Կարեն Անդրեասյան

ՀՀ արդարադատության նախարարն է․ այս պաշտոնին նշանակվել է 2021թ․ օգոստոսի 3-ին։

Կարեն Անդրեասյանը ծնվել է 1977 թվականին։ 1994-2002 թթ. սովորել և մասնագիտացել է մի շարք հաստատություններում, այդ թվում՝ Երևանի պետական համալսարանի իրավաբանական ‎ֆակուլտետում և նույն ֆակուլտետի ասպիրանտուրայում, ԱՄՆ Քալիֆորնիայի նահանգի Բերկլիի համալսարանում, Մեծ Բրիտանիայի Օքսֆորդի համալսարանում, Մարդու իրավունքների կանադական կենտրոնում, Նիդերլանդների եվրոպական լրագրության կենտրոնում։

1997-2000 թթ. աշխատել է ՀՀ պետական մի շարք մարմիններում՝ Երևանի քաղաքապետարանում, ՀՀ պաշտպանության նախարարությունում, առաջին ատյանի դատարանում, ինչպես նաև դասավանդել է մարդու իրավունքներ և վարչական իրավունք թիվ 120 միջնակարգ դպրոցում և ՀՀ Ոստիկանության ակադեմիայում։

2001-2007 թթ. դասավանդել է Երևանի պետական համալսարանի իրավաբանական ֆակուլտետում։

2001-2003 թթ. համատեղությամբ աշխատել է մի շարք հասարակական կազմակերպություններում, այդ թվում՝ ՀՀ իրավաբանների միության անվճար իրավական օգնության կենտրոնում /որպես տնօրեն/, «Քաղաքացիական կրթության ծրագիր» միջազգային կազմակերպությունում /որպես ծրագրի համակարգող/, «Ինտերնյուս» հասարակական կազմակերպությունում /որպես իրավաբան/։ Նշված ժամանակաշրջանում նաև դասավանդել է մարդու իրավունքներ Աբխազիայում, Հարավային Օսիայում և Ղարաբաղում անցկացված լրագրողների համար նախատեսված սեմինարներին։

2003 թվականին աշխատել է Մեծ Բրիտանիայի Օքսֆորդի համալսարանի Սոցիոլոգիական և իրավական հետազոտությունների կենտրոնում՝ որպես ավագ գիտաշխատող։

2003-2004 թթ. որպես միջազգային փորձագետ և խորհրդատու՝ աշխատել է Մեծ Բրիտանիայում գտնվող «Հոդված 19» միջազգային կազմակերպությունում, Հունգարիայում տեղակայված «Բաց Հասարակության իրավական նախաձեռնություն» միջազգային կազմակերպությունում, Բուլղարիայի «Տեղեկատվության մատչելիություն» կազմակերպությունում։

2005-2008 թթ. աշխատել է Ամերիկյան իրավաբանների ընկերակցությունում՝ որպես իրավաբան, հետո գլխավոր իրավաբան, այնուհետև փոխտնօրեն։

2006-2007 թթ. համատեղությամբ աշխատել է որպես ՀՀ Սահմանադրական դատարանի նախագահի խորհրդական։

2008 -2011 թվականներին «ԴԻՖԵՆՍ» իրավաբանական ընկերության տնօրենն էր։

2007-2010 թթ. իրականացրել է մի շարք հեռուստատեսային և հասարակական նախագծեր, այդ թվում՝ Եվրոպական լրագրության կենտրոնի հետ համատեղ կազմակերպել է տեղեկատվական իրավունքի և հետաքննական լրագրության բուհական մրցույթ լրագրող և իրավաբան ուսանողների համար, վարել է «Երկրի թեմա» հաղորդաշարը «Երկիր Մեդիա» հեռուստաընկերությունում, «Իրականում» հաղորդաշարը՝ «Արմենիա» հեռուստաընկերությունում։

2011 թ. մարտի 2-ին ՀՀ Ազգային ժողովի որոշմամբ ընտրվել է ՀՀ Մարդու իրավունքների պաշտպան[1]։

2016 թ. հունվարի 12-ին Կարեն Անդրեասյանը ներկայացրել է հրաժարականի դիմում։ 2016 թ. հունվարի 18-ին կրկնել է հրաժարականի դիմումը, և այն համարվել է ընդունված։

ԲԴԽ նախագահը և ՌԴ դեսպանը քննարկել են Հայաստանում գործարարությամբ զբաղվող ՌԴ քաղաքացիների հիմնախնդիրները

ԲԴԽ նախագահը և ՌԴ դեսպանը քննարկել են Հայաստանում գործարարությամբ զբաղվող ՌԴ քաղաքացիների հիմնախնդիրները

Բարձրագույն դատական խորհրդի նախագահ Կարեն Անդրեասյանն ընդունել է Հայաստանում Ռուսաստանի դաշնության արտակարգ և լիազոր դեսպան Սերգեյ Կոպիրկինին: ԲԴԽ նախագահ Անդրեասյանը ներկայացրել է դատական համակարգի ներկայիս իրավիճակը և սպասվող բարեփոխումները։ ՌԴ դեսպանն իր հերթին կարևորել է Հայաստանում դատական համակարգի բարեփոխումների գործընթացը՝ հատկապես համակարգի թվայնացումը, որի մեկնարկն արդեն տրված է։  Դեսպան Կոպիրկինը բարձր է գնահատել համագործակցությունը Կարեն Անդրեասյանի հետ՝ որպես արդարադատության նախարարի, և համոզմունք հատնել, որ նոր կարգավիճակում էլ ավելի արդյունավետ կլինի համագործակցությունը վերջինիս և ռուս գործընկերների միջև։ Քննարկման առարկա են դարձել հատկապես վերջին շրջանում Հայաստանում գործարարությամբ զբաղվող՝ Ռուսաստանի Դաշնության մեծ թվով քաղաքացիների հիմնախնդիրները, որոնք հաճախ գործ են ունենում դատական համակարգի տարբեր ատյանների հետ։ Հանդիպման ընթացքում քննարկվել և երկուստեք առանձնակիորեն կարևորվել են մարդու իրավունքների պաշտպանության ոլորտում իրականացվող աշխատանքները, դրանց արդյունքները, ինչպես նաև հետագա քայլերը: Ձեռք է բերվել պայմանավորվածություն հետագա համագործակցության ամրապնդման և փորձի փոխանակման վերաբերյալ։
13:33 - 18 հոկտեմբերի, 2022
Վահագն Խաչատուրյանը և Կարեն Անդրեասյանը քննարկել են դատաիրավական համակարգի գործունեությանն առնչվող հարցեր

Վահագն Խաչատուրյանը և Կարեն Անդրեասյանը քննարկել են դատաիրավական համակարգի գործունեությանն առնչվող հարցեր

Հանրապետության նախագահ Վահագն Խաչատուրյանն այսօր հանդիպում է ունեցել Բարձրագույն դատական խորհրդի նախագահ Կարեն Անդրեասյանի հետ:Նախագահ Խաչատուրյանը շնորհավորել է ԲԴԽ նախագահին պատասխանատու պաշտոնը ստանձնելու կապակցությամբ և հույս հայտնել, որ Հայաստանում դատաիրավական համակարգի բարեփոխումները կշարունակվեն սկզբունքային ուղեգծով:Կարեն Անդրեասյանը շնորհակալություն է հայտնել ընդունելության համար և առանձնահատուկ ընդգծել, որ Հանրապետության նախագահի կողմից հետևողական ուշադրությունը դատական համակարգում կատարվող բարեփոխումներին շատ պարտավորեցնող է:Հանդիպման ընթացքում անդրադարձ է կատարվել դատաիրավական համակարգի գործունեությանը և իրականացվող բարեփոխումների ներկայիս փուլին:
16:51 - 14 հոկտեմբերի, 2022
Կարեն Անդրեասյանն ընտրվել է ԲԴԽ նախագահ

Կարեն Անդրեասյանն ընտրվել է ԲԴԽ նախագահ

ՀՀ «Դատական օրենսգիրք» սահմանադրական օրենքի 84-րդ հոդվածի համաձայն՝ այսօր՝ հոկտեմբերի 7-ին, ՀՀ Բարձրագույն դատական խորհրդում տեղի է ունեցել գաղտնի քվեարկություն, որի արդյունքներով ԲԴԽ նախագահ է ընտրվել Խորհրդի նորընտիր գիտնական անդամ Կարեն Անդրեասյանը: Այս մասին տեղեկացնում է ԲԴԽ մամուլի խոսնակ Լիլիթ Շաբոյանը: Հիշեցնենք՝ Կարեն Անդրեասյանն ու Երանուհի Թումանյանցը երեկ ընտրվել են ԲԴԽ անդամներ: Այդ պաշտոնում նրանց առաջադրել էր «Քաղաքացիական պայմանագիր» խմբակցությունը։  Կարեն Անդրեասյանը զբաղեցնում էր Արդարադատության նախարարի, Երանուհի Թումանյանցը՝ Արդարադատության փոխնախարարի պաշտոնը։ Հիշեցնենք, որ ԲԴԽ նախագահի պաշտոնակատար Գագիկ Ջհանգիրյանը 2022թ. հուլիսի 1-ին հրաժարականի դիմում էր ներկայացնել, ինչը պայմանավորել էր «առողջական խնդիրներով»: Սակայն, հանրությանը հայտնի է, որ նրա հրաժարականն իրականում պայմանավորված էր ԲԴԽ նախկին նախագահ Ռուբեն Վարդազարյանի հրապարակած ձայնագրությամբ:  Այս տարվա փետրվարի 20-ին Ջհանգիրյանի մասնակցությամբ զրույց էր տեղի ունեցել: Ջհանգիրյանը հորդորել էր Վարդազարյանին ինքնակամ հեռանալ խորհրդի նախագահի պաշտոնից` երաշխավորելով, որ նրա դեմ քրեական գործեր չեն հարուցվի։ Հենց այդ զրույցի ձայնագրությունն էլ հունիսի 20-ին հրապարակել էր Վարդազարյանը: Դրանից հետո իրավապապաշտպանները պահանջեցին, որպեսզի Գագիկ Ջհանգիրյանը հրաժարականի դիմում ներկայացնի:
15:53 - 07 հոկտեմբերի, 2022
Ես լոյալ չեմ որևէ թիմի հանդեպ, կարողանում եմ տարբերել կուսակցական լինելը չլինելուց. Կարեն Անդրեասյան |1lurer.am|

Ես լոյալ չեմ որևէ թիմի հանդեպ, կարողանում եմ տարբերել կուսակցական լինելը չլինելուց. Կարեն Անդրեասյան |1lurer.am|

1lurer.am: Ես լոյալ չեմ որևէ թիմի հանդեպ, ես կարողանում եմ տարբերել կուսակցական լինելը չլինելուց, և կապ չունի, որ մի քանի օր առաջ եմ դադարել լինել ՔՊ կուսակցության անդամ, ես ինձ այլևս կուսակցական չեմ զգում և որևէ պարտավորություն չունեմ նույնիսկ այն կուսակցության հանդեպ, որի անդամ եղել եմ: Դա ոչ թե սկզբունքների և արժեքների փոփոխություն է, այլ մոտեցումների, էթիկայի, պահվածքի, բարեվարքության դրսևորում: Խորհրդարանում՝ լրագրողների հետ զրույցում, պատասխանելով հարցին, թե Հրայր Թովմասյանին ՍԴ գործուղելու որոշումից ինչով է տարբերվում իր՝ ԲԴԽ անդամի թափուր տեղի համար առաջադրվելու որոշումը, ասաց արդարադատության նախկին նախարար, ԲԴԽ անդամի թեկնածու Կարեն Անդրեասյանը: Հիշեցնենք, որ Ազգային ժողովի «Քաղաքացիական պայմանագիր» խմբակցությունը Բարձրագույն դատական խորհրդի անդամի պաշտոնում առաջացած երկու թափուր տեղերի համար թեկնածուներ է առաջադրել Կարեն Անդրեասյանին և Երանուհի Թումանյանցին:
15:10 - 06 հոկտեմբերի, 2022
Կարեն Անդրեասյանը պատասխանեց իշխանական պատգամավորների հարցերին |hetq.am|

Կարեն Անդրեասյանը պատասխանեց իշխանական պատգամավորների հարցերին |hetq.am|

hetq.am: Այսօր ԱԺ «Քաղաքացիական պայմանագիր» խմբակցության պատգամավորներն Ազգային ժողովում հարցեր են ուղղում Բարձրագույն դատական խորհրդի անդամի թեկնածու Կարեն Անդրեասյանին: Ընդդիմադիր պատգամավորները չեն մասնակցում արտահերթ նիստին: Հերթագրվել է 9 պատգամավոր: Պատգամավոր Գևորգ Պապոյանը Կարեն Անդրեասյանից «1-2 կոնկրետ անելիքից» հետաքրքրվեց, որ ընտրվելու դեպքում անմիջապես անելու է: Նշենք, որ իր հիմնական ելույթում Կարեն Անդրեասյանը որևէ ծրագրի մասին չխոսեց, այլ սահմանափակվեց իր երազանքների` արդար դատարան ունենալու մասին` առանց որևէ քայլ նշելու, ինչպես նաև արդար գործելուն` դարձյալ չմանրամասնելով: Կարեն Անդրեասյանը, պատասխանելով հարցին, նշեց, որ ԲԴԽ անդամը միայն մեկ անելիք ունի` քվեարկել արդար: Այդ նպատակով պետք է քվեարկել դատավորներին պատասխանատվության ենթարկելու, առաջխաղացման ցուցակներում ընդգրկելու և հարցերում: «Ես չեմ գնում, որ հայեցակարգային կամ քաղաքականություն մշակող կամ որևէ օրենսդրություն մշակող դերակատարում ստանձնեմ: Պարզ է, իմ կարծիքն ազդելու է որոշակի իմաստով այդ գործընթացների վրա, բայց դա էլ է քվեարկության ձևով լինելու»,-նշեց Կ. Անդրեասյանը: Թեկնածուն նշեց, որ ԲԴԽ-ում մի քանի «շատ արդար մարդիկ» սպասում են, որ «արդար ձայների քանակն այնտեղ ավելանա»: «Ես գնում եմ դառնալու այդ մեկ ավել ձայնն այն կշեռքում, որը կշռելու է դեպի արդարություն: Սա է իմ առաքելությունը կամ խոստումը ձեզ»,-ասաց Անդրեասյանը: Գևորգ Պողոսյանը, թեև հայտարարեց, որ ընտրելու է Կարեն Անդրեասյանին, սակայն պահանջեց էլ ավելի բացել թեման: Պատգամավորը նշեց, որ նախարար եղած ժամանակ տարբեր գրություններ է ուղարկել ԲԴԽ-ին, ուստի հետաքրքրվեց, կարող է նշել 1-2 դեպք, որ նոր նախարարն ուղարկեր, իսկ Անդրեասյանն «արդար որոշում կայացներ» կամ արդարությունը վերականգնվեր, երբ «արդար մարդիկ շատ լինեն»:   Կարեն Անդրեասյանը դարձյալ խուսափեց կոնկրետ պատախանելուց: Նշեց, քանի որ ուզում է, որպեսզի լինի նման դեպք, երբ արդարությունը կվերականգնվի, հետևաբար չի նշի դեպքեր` հետագայում չկաշկանդվելու համար:   Թեկնածուն նշեց, որ համակարգի հետ կապված կա հսկայական ասելիք և անելիք` դատարանների գերծանրաբեռնվածությունից մինչ դատավորների որոշակի խմբավորումներ, որոնք փորձում են պահպանել յուրային, ոչ յուրային տրամաբանությունը: «Կան դատավորներ, որոնք հիմա ինձ համարում են դատական համակարգի համար ոչ յուրային, և ես գնալու եմ նաև ապացուցելու, որ չի լինելու, իմ կարծիքով յուրային-ոչ յուրային, և մենք բոլորս լծվելու ենք մի աշխատանքի` մաքրել դատական համակարգն անարդարություններից»,-ասաց Կ. Անդրեասյանը: Պատգամավոր Զարուհի Բաթոյանը, դիմելով թեկնածուին, ասաց, որ կան դատավորներ, ովքեր թյուր պատկերացում ունեն խտրական վերաբերմունքից պաշտպանված լինելու, ընտանեկան բռնության զոհերի պաշտպանության իրավունքի, հաշմանդամություն ունեցող անձանց իրավունքների վերաբերյալ և այլն: Պատգամավորը հետաքրքրվեց, թե այդ խնդիրների լուծման համար ինչ քայլեր պետք է ձեռնարկվի: Կարեն Անդրեասյանը նշեց, որ պետք է թեթևացնել դատավորների ծանրաբեռնվածությունն այնքան, որ իրենք ինքնակրթման գոնե մի փոքր ժամանակ ունենան: Բացի այդ, կառավարության ծրագրում հստակ դրված է մասնագիտացված դատարանների ստեղծման հարցը: «Կա երրորդ ասպեկտը: Շատ հաճախ հարցը կրթվածությունը չէ, տեղեկացվածությունը չէ: Շատ հաճախ դատավորի բարեվարքությունն ու ներքին մոտեցումն է խնդիրներին: Այս դեպքերում մենք պետք է ուենանք կարգապահական պատասխանատվության հստակ միջոցներ»,-պատասխանեց Կ. Անդրեասյանը: Պատգամավոր Հայկ Սարգսյանն էլ հետաքրքրվեց ուշացած վճիռների կայացման դեպքերով: Ըստ նրա, երբեմն վճիռները հնարավոր է կայացնել շատ արագ, մինչդեռ տարիներով ձգվում է: ԲԴԽ անդամի թեկնածուն դատական համակարգի «ամենամեծ խոցը» որակումը տվեց բարձրացված հարցի բովանդակությունը: Ըստ Անդրեասյանի, եթե 2013թ. դատական համակարգի ամենամեծ խոցը համատարած կաշառակերությունն է եղել, այժմ` համատարած ուշացումները, որոնց «զոհն»  են դառնում նաև դատավորները: «Դատավորներն այնպիսի խայտառակ գերծանրաբեռնվածությամբ են աշխատում, որ հաճախ, իսկապես օբյեկտիվ են իրենց ուշացումները», նշեց Անդրեսայանը` կարևորելով տարանջատել, թե որն է ուշացումը, որը` սուբյեկտիվիզմն ու «կոռուպցիոն խաղը»: Շարունակությունը՝ hetq.am
14:55 - 06 հոկտեմբերի, 2022
Ազգային ժողովում արտահերթ կարգով Կարեն Անդրեասյանին և Երանուհի Թումանյանցին ընտրում են ԲԴԽ անդամ |hetq.am|

Ազգային ժողովում արտահերթ կարգով Կարեն Անդրեասյանին և Երանուհի Թումանյանցին ընտրում են ԲԴԽ անդամ |hetq.am|

hetq.am: Ազգային ժողովում պատգամավորների նախաձեռնությամբ արտահերթ նիստ է հրավիրվել` Բարձրագույն դատական խորհրդի (ԲԴԽ) երկու անդամ ընտրելու նպատակով: Ազգային ժողովի «Քաղաքացիական պայմանագիր» խմբակցությունը ԲԴԽ անդամի պաշտոնում առաջացած երկու թափուր տեղերի համար թեկնածուներ է առաջադրել արդարադատության նախարար Կարեն Անդրեասյանին (երեկ աշխատանքից ազատվելու դիմում է ներկայացրել) և արդարադատության նախարարի տեղակալ Երանուհի Թումանյանցին (Թումանյանցը երեկ ազատվել է արդարադատության նախարարի տեղակալի պաշտոնից)։  Գրանցվել է 58 պատգամավոր: Ընդդիմադիր պատգամավորները չեն մասնակցում նիստին: Թեկնածուներին ԱԺ ամբիոնից ներկայացնում է ՔՊ խմբակցության պատգամավոր, պետական-իրավական հարցերի մշտական հանձնաժողովի նախագահ Վլադիմիր Վարդանյանը: Հիշեցնենք, որ ԲԴԽ նախագահի պաշտոնակատար Գագիկ Ջհանգիրյանը 2022թ. հուլիսի 1-ին հրաժարականի դիմում էր ներկայացնել, ինչը պայմանավորել էր «առողջական խնդիրներով»: Սակայն, հանրությանը հայտնի է, որ նրա հրաժարականն իրականում պայմանավորված էր ԲԴԽ նախկին նախագահ Ռուբեն Վարդազարյանի հրապարակած ձայնագրությամբ:  Այս տարվա փետրվարի 20-ին Ջհանգիրյանի մասնակցությամբ զրույց էր տեղի ունեցել: Ջհանգիրյանը հորդորել էր Վարդազարյանին ինքնակամ հեռանալ խորհրդի նախագահի պաշտոնից` երաշխավորելով, որ նրա դեմ քրեական գործեր չեն հարուցվի։ Հենց այդ զրույցի ձայնագրությունն էլ հունիսի 20-ին հրապարակել էր Վարդազարյանը: Դրանից հետո իրավապապաշտպանները պահանջեցին, որպեսզի Գագիկ Ջհանգիրյանը հրաժարականի դիմում ներկայացնի: ԲԴԽ-ում հաջորդ թափուր տեղն առաջացել է Լիպարիտ Մելիքջանյանի` Վճռաբեկ դատարանի  հակակոռուպցիոն պալատի հակակոռուպցիոն քաղաքացիական գործերով քննության դատական կազմի դատավոր նշանակվելու հանգամանքով:  Վերջինս այդ պաշտոնում նշանակվել է հուլիսի 4-ին:
12:59 - 06 հոկտեմբերի, 2022
Արդար դատարանը միշտ եղել է իմ երազանքը. Կարեն Անդրեասյանը՝ ԲԴԽ անդամի թեկնածու |1lurer.am|

Արդար դատարանը միշտ եղել է իմ երազանքը. Կարեն Անդրեասյանը՝ ԲԴԽ անդամի թեկնածու |1lurer.am|

1lurer.am: Ազգային ժողովը քննարկում է ԲԴԽ անդամների ընտրության հարցը: ԱԺ պետաիրավական հարցերի հանձնաժողովի նախագահ Վլադիմիր Վարդանյանը ներկայացրեց Կարեն Անդրեասյանի կենսագրությունը: 2011 թվականին նա ընտրվել է ՀՀ ՄԻՊ, պաշտոնավարել մինչև 2016 թվականը: 2016-21 թթ. կատարել է փորձագիտական և խորհրդատվական աշխատանքներ, զբաղվել նաև ձեռնարկատիրական գործունեությամբ: 2021 թվականի օգոստոսի 3-ին նշանակվել է ՀՀ արդարադատության նախարար: Պաշտոնավարումը դադարեցրել է վերջերս: Անդրեասյանը շուրջ 20 հրապարակված գիտական հոդվածների, ուսումնական ձեռնարկների ու այլ աշխատությունների հեղինակ է: Իր խոսքում Անդրեասյանը նշեց, որ եթե լինի վստահության քվե, ինքը կլինի ԲԴԽ այն անդամներից մեկը, որը կգործի արդար: «Դա արդեն բավական է ավելի շատ բան անելու դատական համակարգի համար, քան այն բոլոր պաշտոններում, որ ինձ շանս է տրվել ունենալ: Արդար դատարանը միշտ եղել է իմ երազանքը, և սա հնարավորություն է ի վերջո իմ երազանքին մոտենալու»,- ասաց նա:
12:55 - 06 հոկտեմբերի, 2022
Այսօր ավարտվեց իմ պաշտոնավարումը․ Կարեն Անդրեասյան

Այսօր ավարտվեց իմ պաշտոնավարումը․ Կարեն Անդրեասյան

Այսօր ավարտվեց իմ պաշտոնավարումը` որպես Հայաստանի Արդարադատության նախարար. ֆեյսբուքի իր էջում գրել է ՀՀ արդարադատության նախարար Կարեն Անդրեասյանը։ «Մեկ տարուց ավելի իմ աշխատանքի ընթացքում ձեռք են բերվել հետևյալ արդյունքները. 1. Ձևավորվեցին Հակակոռուպցիոն դատարաններ երեք ատյաններում (առաջին ատյան, վերաքննիչ և վճռաբեկ): Նոր դատարանների համար ստեղծվեցին նոր ենթակառուցվածքներ: 2. Պարեկային ոստիկանությունն ընդլայնվեց դեպի 6 նոր մարզեր: Գործող պարեկների կարողություններն ավելացան: Ներքին գործերի նախարարության ձևավորման հայեցակարգային աշխատանքները և իրավական փաթեթի մշակման աշխատանքները վերջնականացվեցին: 3. Ստեղծվեց և հաջողությամբ սկսեց գործել Հակակոռուպցիոն կոմիտեն՝ անձնակազմի համալրման և ընդհանուր կառավարման նոր չափանիշներով: 4. Մշակվեց Հայաստանի նոր Արբիտրաժային կենտրոնի կառուցվածքն ու մոդելը և ձևավորվեց արբիտրաժի ոլորտի հայտնի մասնագետների մեծ ցանց։ Մշակվեց Արբիտրաժային նոր կենտրոնի կանոնադրության նախագիծը և «Արբիտրաժի մասին» օրենքում փոփոխության նախագիծը։ 5. Լրամշակվեց և ընդունվեց Հանրային կառավարման բարեփոխումների ռազմավարությունը: Ձևավորվեց այն իրագործող ղեկավար թիմը: 6. Հանրային ծառայությունների միասնական գրասենյակներ բացվեցին Գյումրի և Վանաձոր քաղաքներում: Նախապատրաստվեց հաջորդ գրասենյակի նոր հայեցակարգը Աբովյան քաղաքում, որը կմատուցի 450 հանրային ծառայություններ՝ այսօրվա 110-ի փոխարեն։ 7. Նախարարության Փորձագիտական կենտրոնը համալրվեց փորձաքննության համար անհրաժեշտ ամենաժամանակակից սարքավորումներով և տեխնիկական հագեցվածությամբ: Փորձագետների աշխատավարձերը բարձրացվեցին 80 տոկոսով։ Մաքրվեց տարիներով ձգձգված փորձագիտական եզրակացությունների կուտակումը: 8. Վճռաբեկ և սահմանադրական դատարանների դատավորների աշխատավարձերը բարձրացվեցին 50 տոկոսով։ Տարբեր դատարաններում և դատական ատյաններում դատավորների թիվն ընդհանուր առմամբ ավելացավ 50-ով։ 9. Մեկնարկեց քաղաքացիական դատավարության թվային մոդուլի մշակումը։ 10. Ավարտական փուլում է քրեական գործերով մինչդատական ​​վարույթի էլեկտրոնային կառավարման համակարգի ձևավորումը։ 11. Մեկնարկեցին էլեկտրոնային արդարադատության միասնական հարթակի (e-justice.am) մշակման, ինչպես նաև վարչական, քրեական, սնանկության և հակակոռուպցիոն դատական գործընթացների թվայնացման աշխատանքները: 12. Գրեթե ավարտին հասցվեցին Պրոբացիայի էլեկտրոնային համակարգը (e-probation) և բժշկական էլեկտրոնային համակարգը (e-health), որոնք կգործեն մինչև տարեվերջ։ 13. Մեկնարկեցին Հարկադիր կատարումն ապահովող ծառայության էլեկտրոնային կառավարման նոր համակարգի (e-cesa), ինչպես նաև նոտարական էլեկտրոնային կառավարման համակարգի (e-notary) մշակման աշխատանքները։ 14. Հարկադիր կատարումն ապահովող ծառայության էլեկտրոնային կառավարման նոր համակարգի ծրագրի գործարկումն ապահովելու նպատակով ձեռք բերվեց սերվերային նոր և բավականաչափ տարողունակ հանգույց։ 15. Ավարտական փուլ հասցվեց Սնանկության էլեկտրոնային հարթակի (e-bankruptcy) մշակումը: 16. Ընդունվեց դատաիրավական բարեփոխումների լիովին նոր որակի ռազմավարությունը, որն անդառնալի և խիստ իրատեսական է դարձնում այս ոլորտի տասնյակ բարեփոխումները մինչև 2026 թվականը։ 17. Ընդունվեցին քրեական և քրեական դատավարության նոր օրենսգրքերը գործարկող և բարելավող շուրջ 100-ից ավելի օրենսդրական ակտեր: 18. Մշակվեց Ընտրական օրենսգրքի բացերի վերաբերյալ ծավալուն զեկույց, որի հիման վրա էլ ավելի կբարելավի գործող ընտրական օրենսգիրքը: 19. Ընդունվեց և ուժի մեջ մտավ Քրեակատարողական նոր օրենսգիրքը, որը փոխարինեց շուրջ քսան տարի առաջ ընդունված և խորհրդային տրամաբանությամբ գրված հին օրենսգրքին: 20. Մշակվեց և ընդունվեց «Հաշտարարության մասին» օրենքում փոփոխությունների համապարփակ նախագիծ (պարտադիր հաշտարարություն, առցանց հաշտարարություն, հաշտարարների որակավորման նոր համակարգ և այլն): 21. Մշակվեց և շրջանառության մեջ դրվեց «Պրոբացիոն ծառայության մասին» օրենքի նոր նախագիծ։ 22. Փաստաբանական համայնքի հետսերտ համագործակցությամբ և բացառիկ փոխհամաձայնությամբ մշակվեց ու ընդունվեց «Փաստաբանության մասին» օրենքում փոփոխությունների փաթեթը: 23. Ձեռք բերվեց էլեկտրոնային մոնիթորինգի համակարգը՝ կալանքին այլընտրանք հանդիսացող տնային կալանք և վարչական հսկողություն խափանման միջոցները կիրառելու նպատակով։ Ընդհանուր համակարգը պատրաստ կլինի շահագործման մինչև տարեվերջ։ 24. Մշակվեց Էրեբունի վարչական շրջանի տարածքում նոր քրեակատարողական հիմնարկի կառուցման հայեցակարգը: Նոր հիմնարկը կփոխարինի Երևանում գործող 4 հիմնարկներին: Կատարվեց եռաչափ մոդելավորում և մշակվեց ճարտարապետական ​​նախագծման տեխնիկական առաջադրանքը: 25. «Արմավիր» քրեակատարողական հիմնարկում գրեթե ավարտին է հասցվել օդափոխության նոր համակարգի ներդրման աշխատանքները, որը կտրուկ կբարելավի բանտարկյալների կենցաղային պայմանները, ինչպես նաև ներդրվեց տեսահսկման ժամանակակից համակարգ, որը կանխում է բազմաթիվ նոր հանցանքներ։ 26. 19 տարեկանից բարձր տարիքի դատապարտյալները պետական ​​աջակցությամբ սկսեցին միջնակարգ կրթություն ստանալ։ 27. Մեկնարկեց քրեակատարողական հիմնարկներում տեսազանգերի միջոցով փաստաբան-վստահորդ հաղորդակցումը կազմակերպելու ծրագիրը։ Այն պատրաստ կլինի օգտագործման մինչև տարեվերջ։ 28. Քրեակատարողական հիմնարկներում մահերը կանխելու նպատակով մշակվել և պիլոտավորման հենքով արդեն իսկ կիրառվում են ինքնավնասման և ինքնասպանության ռիսկի, ինչպես նաև հոգեկան առողջության սկրինինգի և ռիսկերի գնահատման գործիքները: 29. Ներդրվեցին քրեակատարողական հիմնարկներում խոշտանգումների կամ դաժան վերաբերմունքի այլ ձևերի արձանագրումների հետ կապված բժշկական զննումների պատշաճ գրանցման գործիքներ։ Ազատազրկված անձանց պատշաճ բժշկական օգնությունն ու սպասարկումն ապահովելու նպատակով ձեռք բերվեցին ժամանակակից բժշկական սարքավորումներ։ 30. Պրոբացիայի ծառայության մի շարք գրասենյակներ հիմնանորոգվեցին, շահառուների հետ անհատական հոգեբանական աշխատանքի համար ստեղծվեցին առանձին սենյակներ, ապահովվեց ծառայության տեխնիկական հագեցվածությունը։ Այս ցանկը, բնականաբար, սպառիչ չէ: Կատարվել են բազմաթիվ այլ աշխատանքներ, որոնք նախապատրաստել են մի շարք նոր նախագծեր ու միջոցառումներ, որոնք շուտով իրապես բարելավելու են արդարացիորեն այդքան քննադատված արդարադատության ոլորտը: Ի վերջո, ամենօրյա ռեժիմով, գրեթե անխափան գործել են նախարարության ենթակա մի քանի տասնյակ կառույցներ ու ստորաբաժանումներ: Այս ամենն իհարկե կատարվել է Արդարադատության նախարարության թիմի հազարավոր նվիրյալների և նրանց մի քանի տասնյակ փայլուն ղեկավարների ջանքերով: Ես պարզապես աշխատել եմ չխանգարել նրանց եռանդուն աշխատանքին: Բոլոր թվարկված արդյունքները չեն սկսվել ինձ հետ, և սպասվող նոր բարեփոխումները բնականաբար չեն ավարտվի իմ հեռանալուց հետո: Այս ամենն սկսվել է 2018 թվականի հեղափոխությամբ և Վարչապետ Նիկոլ Փաշինյանի թիմի ջանքերով: Առանձնահատուկ շնորհակալ եմ պարոն Փաշինյանին այս մեծ պատասխանատվությունն ինձ վստահելու և մեր բոլոր դրական նախաձեռնություններին իր ամենօրյա մեծ աջակցության համար: Շնորհակալ եմ Կառավարության բոլոր անդամներին, Ազգային ժողովում ակտիվ աշխատող բոլոր պատգամավորներին, բոլոր պետական կառույցների գործընկերներին, Վարչապետի գերպրոֆեսիոնալ աշխատակազմին: Առանձնահատուկ շնորհակալ եմ բոլոր հասարակական կազմակերպություններին և լրատվամիջոցներին. հատկապես իրենց օբյեկտիվ քննադատությունը մեզ շատ է օգնել: Շնորհակալ եմ բոլոր դեսպաններին և միջազգային կառույցներին՝ արդարադատության ոլորտում իրենց սրտացավ աջակցության համար: Ցանկացած կարգավիճակով կշարունակեմ իմ աշխատանքը, որպեսզի Հայաստանում ի վերջո լինի արդարություն բոլորի համար, իսկ դրան հասնելու միակ ճանապարհը արդար և արդյունավետ դատարանն է»:Ավելի վաղ հայտնել էինք՝ ԱԺ «Քաղաքացիական պայմանագիր» խմբակցությունը ԲԴԽ անդամի պաշտոնում առաջացած թափուր տեղերի համար թեկնածուներ է առաջադրել Կարեն Անդրեասյանին և Երանուհի Թումանյանցին:
18:22 - 05 հոկտեմբերի, 2022
Կարեն Անդրեասյանն ԱՄՆ դեսպանի հետ քննարկել է համատեղ իրականացվող բարեփոխումների ընթացքը

Կարեն Անդրեասյանն ԱՄՆ դեսպանի հետ քննարկել է համատեղ իրականացվող բարեփոխումների ընթացքը

Արդարադատության նախարար Կարեն Անդրեասյանն ընդունել է Հայաստանում ԱՄՆ դեսպան Լին Թրեյսիին, ԱՄՆ ՄԶԳ հայաստանյան գրասենյակի ղեկավար Ջոն Ալլելոյին, Հայաստանում ԱՄՆ դեսպանության թմրամիջոցների դեմ պայքարի և իրավապահ համագործակցության ծրագրի տնօրեն Ալեքսիս Հաֆտվանիին: ԱՆ-ից   հայտնում են, որ նախարար Անդրեասյանը ներկայացրել է ներկայումս ոստիկանության ոլորտում իրականացվող բարեփոխումները և դրանց արդյունքները, մասնավորապես խոսել է Հայաստանում Ներքին գործերի նախարարության ձևավորմանն ուղղված աշխատանքների ընթացքից, բարեփոխումների իրականացման ընթացքում առաջ եկած հնարավոր խնդիրների շրջանակից, ինչպես նաև առաջարկել է դրանց լուծմանն ուղղված քայլեր: Կարեն Անդրեասյանն անդրադարձ է կատարել նաև Հանրային կառավարման բարեփոխումների ռազմավարության իրականացմանն ուղղված գործողություններին և ներկա ընթացքին, մանրամասնել Ռազմավարությամբ սահմանված կարևոր դրույթներ, ինչպես նաև հայտնել, որ շուտով տեղի է ունենալու Հանրային կառավարման բարեփոխումների ռազմավարության իրականացմանը նվիրված դոնորների համակարգող հանդիպում: Հանդիպման ընթացքում քննարկվել և երկուստեք առանձնակիորեն կարևորվել են մարդու իրավունքների պաշտպանության ոլորտում իրականացվող աշխատանքները, դրանց արդյունքները, ինչպես նաև հետագա քայլերը. վերահաստատվել է համագործակցության շարունակականության հրամայականը:  
18:50 - 20 սեպտեմբերի, 2022
Հայաստանում քաղբանտարկյալներ չկան․ Արդարադատության նախարար
 |hetq.am|

Հայաստանում քաղբանտարկյալներ չկան․ Արդարադատության նախարար |hetq.am|

hetq.am: Ինչպես գործադիր իշխանությունը որևէ կապ չուներ ընդդիմադիրների կալանավորման հետ, այնպես էլ կապ չունի կալանքից նրանց ազատման հետ։ Կառավարության նիստից հետո լրագրողների հետ զրույցում նշեց Արդարադատության նախարար Կարեն Անդրեասյանը: Պատասխանելով լրագրողի հարցին՝ ինչո՞վ է պայմանավորված, որ ըննդիմադիրներն ազատ են արձակվում, կալանքի որոշումները փոփոխվում են, Անդրեասյանն ասաց, որ այդ բոլոր հարցերը պետք է ուղղել դատական իշխանությանը, փաստաբաններին, դատավորներին, դատախազներին: «Մենք կարող ենք միայն ուրախությամբ արձանագրել, որ կալանքը որպես խափանման միջոց գրավով կամ այլ ձևով փոխարինելը, ամեն դեպքում, ողջունելի է, որպես քրակատարողական հիմնարկի պատասխանատու ուրախ ենք, լրացուցիչ բեռնաթափվում են ՔԿՀ-ները»,- ասաց նա։ Հարցին՝ Հայաստանում քաղբանտարկյալներ կա՞ն, Արդարադատության նախարարը պատասխանեց․ «Ո՛չ, չկան»։
13:58 - 28 հուլիսի, 2022
Արմեն Գրիգորյանի առողջական վիճակի հետ կապված լուրջ խնդիրներ ու բողոքներ չեն եղել, որ խափանման միջոցը վերանայվեր. Արդարադատության նախարար

 |armenpress.am|

Արմեն Գրիգորյանի առողջական վիճակի հետ կապված լուրջ խնդիրներ ու բողոքներ չեն եղել, որ խափանման միջոցը վերանայվեր. Արդարադատության նախարար |armenpress.am|

armenpress.am: ՀՀ արդարադատության նախարար Կարեն Անդրեասյանը պրոդյուսեր Արմեն Գրիգորյանի՝ դատարանի դահլիճում ինքնազգացողությունը վատանալուց հետո մահանալը համարում է ողբերգություն, որը պետք է ազդակ լինի այդ թվում նաև դատարաններին՝ էլ ավելի ուշադիր լինելու ազատազրկված անձանցից եկող բողոքներին, սակայն միևնույն ժամանակ վստահեցնում է, որ տվյալ դեպքում քրեակատարողական հիմնարկում չի եղել նրա հետ կապված բժշկական թեկուզ մեկ խնդիր, որը տեղում չի լուծվել: Նախարարն այս մասին ասաց Կառավարության նիստից հետո լրագրողների հետ ճեպազրույցում: «Իմ խորը ցավն եմ արտահայտում: Ցանկացած մարդու մահ ողբերգություն է: Տվյալ դեպքում՝ քրեակատարողական հիմնարկում չի եղել իր հետ կապված բժշկական թեկուզ մեկ խնդիր, որը տեղում չի լուծվել: Այսինքն, չեն եղել լուրջ խնդիրներ, բողոքներ, որ վերանայվեր նաև խափանման միջոցը»,-ասաց Անդրեասյանը: Ըստ նախարարի՝ կան հիմա կալանավորված հայտնի անձինք, որոնք տեղափոխվում են քաղաքացիական հիվանդանոց, կալանավայրի բժիշկներն են պարբերաբար ստուգում: Նա վստահեցնում է՝ կալանավայրում ունեցած առողջապահական ռեսուրսով ամեն ինչ անում են, որ ոչ մի ազատազրկված անձ չունենա առողջության հետ կապված խնդիր: «Եվ մենք իրենց մասին իսկապես հոգ ենք տանում: Այլ խնդիր է, որ ցանկացած ողբերգություն պետք է նաև ազդակ լինի բոլոր մարմիններին, այդ թվում՝ նաև դատարաններին՝ էլ ավելի ուշադիր լինելու ազատազրկված անձանցից եկող բողոքներին: Միևնույն ժամանակ ես հույս ունեմ, որ առանձին մարդիկ էլ չեն շահարկի կամ չարաշահի որևէ դեպք, որևէ ողբերգություն, որպեսզի կեղծ առողջական խնդիրների անվան տակ փորձեն խուսափել արդարադատությունից: Սա բալանսավորելու խնդիր է, մենք աշխատում ենք»,-ասաց Անդրեասյանը: Արմեն Գրիգորյանի ինքնազգացողությունը կտրուկ վատացել էր դատական նիստի ընթացքում, նա կորցրել էր գիտակցությունը: Դատարան ժամանած Շտապօգնության բրիգադին չէր հաջողվել փրկել պրոդյուսերի կյանքը:
13:12 - 28 հուլիսի, 2022
Կարեն Անդրեասյանը ներկայացրեց, թե ինչ փուլում են սահմանադրական բարեփոխումների համար մեկնարկած աշխատանքները

 |armenpress.am|

Կարեն Անդրեասյանը ներկայացրեց, թե ինչ փուլում են սահմանադրական բարեփոխումների համար մեկնարկած աշխատանքները |armenpress.am|

armenpress.am: Սահմանադրական բարեփոխումների մասնագիտական հանձնաժողովն այս փուլում տարբեր հանդիպումների շրջանակներում աշխատանքներ է տանում Երևանում և մարզերում՝ հավաքագրելու խնդիրներն ու նախանշելու լուծումները: Այս մասին Կառավարության հուլիսի 28-ի նիստից հետո լրագրողների հետ ճեպազրույցում ասաց ՀՀ արդարադատության նախարար Կարեն Անդրեասյանը: «Հիմա հանձնաժողովն ակտիվ աշխատում է մարզերում և Երևանում՝ տարբեր հանդիպումների շրջանակներում: Հանձնաժողովի 5 անդամները կհավաքեն ամբողջ խնդիրներն ու լուծումները  և սեպտեմբերից կսկսեն  ուղիղ եթերում ներկայացնել Սահմանադրական բարեփոխումների խորհրդին, բոլորիս»,-ասաց Անդրեասյանը: Նախարարը ժամկետների հետ կապված հստակ ոչինչ չխոստացավ: Ըստ նրա՝ ժամկետները կախված են աշխատանքների դինամիկայից:  
12:45 - 28 հուլիսի, 2022
Կստուգվի բոլոր դատավորների, դատախազների, քննիչների բարեվարքությունը. Կառավարությունը հաստատեց Հայաստանի դատական և իրավական բարեփոխումների 2022-2026 թթ. ռազմավարությունը |1lurer.am|

Կստուգվի բոլոր դատավորների, դատախազների, քննիչների բարեվարքությունը. Կառավարությունը հաստատեց Հայաստանի դատական և իրավական բարեփոխումների 2022-2026 թթ. ռազմավարությունը |1lurer.am|

1lurer.am: Կառավարությունը հաստատեց Հայաստանի Հանրապետության դատական և իրավական բարեփոխումների 2022-2026 թվականների ռազմավարությունը և դրանից բխող գործողությունների ծրագիրը: ՀՀ արդարադատության նախարար Կարեն Անդրեասյանը նշեց, որ ռազմավարությունը նոր չէ, այն շարունակությունն է 2019 թվականին ընդունված ռազմավարության, և շատ աշխատանքներ, որոնք ներկայացված են այս ռազմավարությունում, ժառանգված են նախորդ ռազմավարությունից: Նախարարն անդրադարձավ ռազմավարության մեջ ներկայացված խնդիրներին և նշեց, որ դրանցից առաջինը դատական համակարգի բարեփոխումն է, որտեղ  նախատեսվում է հակակոռուպցիոն դատարանների ամբողջ շղթայի գործարկումը: «Համակարգը գրեթե ամբողջությամբ պատրաստ է թե՛ օրենսդրական, թե՛ կադրային, թե՛ շենքային և աշխատանքային պայմաններով. մենք առաջիկա ամիսներին կունենանք հակակոռուպցիոն դատարաններ երեք ատյանում»,- ասաց նա: Մյուս կարևոր ուղղությունը դատարանների, դատական գործընթացների թվայնացումն է: «Այստեղ մենք ուզում ենք հատուկ շեշտադրել մի կարևոր ուղղություն, որը կոչվում է էլեկտրոնային արդարադատություն, որը չի վերաբերում է միայն դատարաններին, այլ վերաբերում է նաև քրեական արդարադատության ամբողջ համակարգին, նախաքննության մարմինների թվայնացմանը: Այս ուղղությամբ դատախազության հետ աշխատանքներում մոտ ենք որ քննիչների և դատախազների հետ կապված ամբողջ գործընթացները թվայնացվեն, և վարույթները փոխանցվեն թվային եղանակներով»,- նշեց Կարեն Անդրեասյանը: Արդարադատության նախարարը տեղեկացրեց, որ անցկացվել է մրցույթ, կա հաղթող, և չզեկուցվող հարցով շուրջ 348 մլն տրամադրվում է քաղաքացիական դատավարության թվայնացմանը: «Դա նշանակում է, որ փաստաբանները կկարողանան իրենց գրասենյակներից հայցադիմումներ, միջնորդություններ, ապացույցներ ներկայացնել, գործընթացն ամբողջությամբ կթվայնացվի: Օրենսդրական որոշակի լուծումներով կարող են դատական քննություններ անցկացվել օնլայն՝ առանց մարդու կամ փաստաբանների դատարան այցելելու»,- նշեց Անդրեասյանը: Նա հայտնեց, որ ռազմավարությունում կարևոր ուղղություն հանդիսացող թվայնացման գործընթացը լինելու է ոչ միայն քաղաքացիական դատավարության, այլև վարչական դատավարության և քրեական դատավարության գործընթացներում: Նախարարի խոսքով՝ մեկ այլ խնդիր է բարեվարքության ստուգումը: «Ռազմավարությամբ առաջիկա ամիսներին մենք նախաձեռնելու ենք, որ բոլոր գործող դատավորների բարեվարքությունը ստուգվի: Սա կոռուպցիայի դեմ լրջագույն պայքարի միջոց կդառնա: Բարեվարքության ստուգում է նախատեսվում նաև դատախազների, քննիչների, քրեակատարողական համակարգի աշխատակիցների և մի շարք այլ ոլորտների համար»,- ասաց նա: «Կարևոր ռազմավարական քայլ է ԲԴԽ-ում կարգապահական որոշումների բողոքարկման հնարավորության նախատեսումը, որը նույնպես օրենսդրական լուծումներով առաջիկա ամիսներին կներկայացնենք Կառավարությանը և այնուհետև՝ ԱԺ-ին»,- ասաց նախարարը՝ նշելով, որ ռազմավարությունն անդրադառնում է նաև փաստաբանական ոլորտի բարեփոխումներին: «Օրենսդրական նախագիծ է մշակված, և շատ լուրջ առաջընթաց է լինելու ոչ միայն փաստաբանության ներքին կառավարման համակարգում, այլև մեր շատ քաղաքացիներ, ովքեր սոցիալապես անապահով են, կունենան անվճար իրավաբանական օգնության հնարավորություն»,- ընդգծեց նա: Նախարարը նշեց, որ ռազմավարությամբ հատուկ աշխատանքներ են նախատեսվում հարկադիր կատարման համակարգում, սնանկության հետ կապված գործընթացում, վեճերի այլընտրանքային լուծման համակարգի հետ կապված ևս կան հստակ մոտեցումներ, հաշտարարության, նոտարիատի ոլորտներում ևս բարեփոխումներ կլինեն:
11:48 - 21 հուլիսի, 2022