Ալեն Սիմոնյան

8-րդ գումարման Ազգային ժողովի նախագահն է, «Քաղաքացիական պայմանագիր» կուսակցության վարչության անդամ։

Ծնվել է 1980թ․ հունվարի 5-ին։ 2000-2002թթ. ծառայել է ՀՀ զինված ուժերում:

2000թ. ավարտել է Երեւանի պետական համալսարանի իրավագիտության ֆակուլտետը: Իրավաբան: 2015թ.՝ ՀՀ ԳԱԱ գիտակրթական միջազգային կենտրոնի քաղաքագիտության ֆակուլտետի մագիստրատուրան: Քաղաքագետ է:

2002-2003թթ. աշխատել է Աջափնյակ-Դավթաշեն համայնքների առաջին ատյանի դատարանի նախագահի օգնական, գրասենյակի քարտուղար: 2003-2004թթ.՝ «Կոնվերս» բանկի մարդկային ռեսուրսների կառավարիչ:

2004-2010թթ. զբաղվել է ձեռնարկատիրական գործունեությամբ:

2006-2007թթ. աշխատել է «Սիթի FM» ռադիոկայանում: 2008թ. մասնակցել է «European Education & Research Center»-ի կազմակերպած «PR and Political Technologies» դասընթացներին: 2007-2012թթ., որպես պրոդյուսեր, տնօրեն, համագործակցել է «TV5», «Երկիր մեդիա», «Արմենիա» հեռուստաընկերությունների հետ: Եղել է մի շարք երաժշտական, քաղաքական, նախընտրական տեսահոլովակների պրոդյուսեր, ներկայացման տնօրեն: 2012-2018թթ.՝ «Արարատ» ամսագրի գլխավոր խմբագիր: 2013-2018թթ.՝ իր հիմնադրած «Ararat Media Group» ՍՊԸ («araratnews.am» կայք եւ «Արարատ» ամսագիր) գլխավոր խմբագիր:

2011 թվականին «Բարեւ Երեւան» դաշինքի ցուցակով մասնակցել է Երեւանի ավագանու ընտրություններին: 2013թ. տրանսպորտի թանկացման դեմ ուղղված «Car free» քաղաքացիական ակցիայի կազմակերպիչներից է:

2013-2015թթ. եղել է «Քաղաքացիական պայմանագիր» հանրային-քաղաքական միավորման կառավարման խորհրդի հիմնադիր անդամ: 2015թ. ընտրվել է «Քաղաքացիական պայմանագիր» կուսակցության վարչության հիմնադիր անդամ, 2016թ.՝ վերընտրվել: 2015-2016թթ.՝ «Քաղաքացիական պայմանագիր» կուսակցության խոսնակ:

2017-2018թթ.՝ Երեւանի ավագանու անդամ («Ելք» դաշինք):

2018-2019թթ.՝ ԱԺ պատգամավոր (թիվ 4 ընտրատարածք, «Ելք» կուսակցությունների դաշինք): ԱԺ եվրոպական ինտեգրման հարցերի մշտական հանձնաժողովի անդամ, «Ելք» խմբակցության անդամ:

2019-2021թթ.՝ ԱԺ պատգամավոր («Իմ քայլը» կուսակցությունների դաշինք, թիվ 4 ընտրատարածքի տարածքային ընտրական ցուցակ): ՀՀ Ազգային ժողովի նախագահի տեղակալ: ԱԺ արտաքին հարաբերությունների մշտական հանձնաժողովի անդամ: «Իմ քայլը» խմբակցության անդամ:

2021թ. հունիսի 20-ին ԱԺ պատգամավոր է ընտրվել «Քաղաքացիական պայմանագիր» կուսակցության համապետական ընտրական ցուցակով:

2021թ. օգոստոսի 2-ին ընտրվել է Հայաստանի Հանրապետության Ազգային ժողովի նախագահ:

ՀՀ ԱԺ նախագահն ու Գերմանիայի նորանշանակ դեսպանը քննարկել են տարածաշրջանային զարգացումներին վերաբերող հարցեր

Հայաստանի Հանրապետության Ազգային ժողովի նախագահ Ալեն Սիմոնյանը նոյեմբերի 27-ին ընդունել է Հայաստանում Գերմանիայի Դաշնային Հանրապետության արտակարգ եւ լիազոր դեսպան Կլաուդիա Բուշին: ՀՀ ԱԺ-ից տարածած հաղորդագրության մեջ նշվում է, որ շնորհավորելով Հայաստանում դիվանագիտական ծառայության անցնելու կապակցությամբ՝ Ալեն Սիմոնյանը դեսպանին հաջողություններ է մաղթել այդ կարեւոր առաքելությունում՝ նշելով, որ որպես ԱԺ նախագահ` պատրաստ է ցուցաբերել անհրաժեշտ օգնություն հայ-գերմանական հարաբերությունները զարգացնելուն միտված նախաձեռնություններում: Գերմանիայի դեսպանն էլ իր հերթին շնորհակալություն է հայտնել Ալեն Սիմոնյանին ընդունելության համար ու վստահեցրել, որ անելու է հնարավորը` երկկողմ հարաբերություններին նոր տեմպ հաղորդելու համար: Երկու երկրների հարաբերություններին վերաբերող հարցերից բացի ՀՀ ԱԺ նախագահի եւ Հայաստանում Գերմանիայի դեսպանի քննարկումների առանցքում են եղել նաեւ Հայաստան-ԵՄ համագործակցությանը եւ տարածաշրջանային զարգացումներին վերաբերող հարցերը:

15:28 - 27 նոյեմբերի, 2024

Վստահեցնում եմ, որ հայ-լեհական համագործակցությունը գնալով սերտանալու է՝ Հայաստանն էլ ավելի մոտեցնելով ԵՄ-ին. Անջեյ Դուդա

Հայաստանի Հանրապետության Ազգային ժողովի նախագահ Ալեն Սիմոնյանը նոյեմբերի 26-ին ընդունել է պաշտոնական այցով Հայաստանում գտնվող Լեհաստանի նախագահ Անջեյ Դուդային: ՀՀ ԱԺ-ից հայտնում են, որ ընդլայնված կազմով տեղի ունեցած հանդիպմանն անդրադարձ է կատարվել հայ-լեհական օրակարգին վերաբերող հարցերի լայն շրջանակի: Ալեն Սիմոնյանը շնորհակալություն է հայտնել Լեհաստանի նախագահին Հայաստան կատարած այցի համար ու նշել, որ ուրախ է հյուրընկալել վերջինիս ՀՀ Ազգային ժողովում: Լեհաստանի նախագահն իր հերթին շնորհակալություն է հայտնել Ալեն Սիմոնյանին ջերմ ընդունելության համար ու ընդգծել, որ տպավորված է Հայաստան կատարած այցից ու ձեռքբերված պայմանավորվածություններից: «Վստահեցնում եմ, որ հայ-լեհական համագործակցությունը գնալով սերտանալու է՝ Հայաստանն էլ ավելի մոտեցնելով ԵՄ-ին»,- ասել է Լեհաստանի նախագահը: Զրուցակիցներն անդրադարձել են նաեւ միջխորհրդարանական համագործակցությանը վերաբերող հարցերին, երկկողմ հետաքրքրության տնտեսական թեմաներին, տարածաշրջանային զարգացումներին, Ադրբեջանում պահվող հայ գերիների խնդրին ու Հայաստան-ԵՄ հարաբերություններին:

18:28 - 26 նոյեմբերի, 2024

Ալեն Սիմոնյանը հրաժեշտի հանդիպում է ունեցել Հայաստանում Իտալիայի դեսպան Ալֆոնսո Դի Ռիզոյի հետ

ՀՀ ԱԺ նախագահ Ալեն Սիմոնյանը նոյեմբերի 26-ին ընդունել է ՀՀ-ում Իտալիայի դեսպան Ալֆոնսո Դի Ռիզոյին, ով ավարտում է դիվանագիտական առաքելությունը մեր երկրում: Այդ մասին հայտնում են ՀՀ ԱԺ-ից: ՀՀ ԱԺ նախագահը բարձր է գնահատել դեսպան Դի Ռիզոյի աշխատանքը Հայաստանում և շնորհակալություն հայտնել հայ-իտալական հարաբերությունների զարգացման ու խորացման գործում նրա անձնական ներդրման ու ջանքերի համար: Հանդիպման ընթացքում զրուցակիցներն անդրադարձել են նաև երկկողմ օրակարգին վերաբերող տարբեր հարցերի:

16:27 - 26 նոյեմբերի, 2024

«Ավելի լավ էր՝ սպառնար, քան էն, որ ինքը իմ հետ խոսեց». Աղազարյանը՝ Ալեն Սիմոնյանի հետ հանդիպման մասին

ԱԺ «Քաղաքացիական պայմանագիր խմբակցության» պատգամավոր Հովիկ Աղազարյանը պատգամավորական մանդատը դեռևս վայր չի դնում, քանի որ ընկերն է խնդրել. «Երեկ Մոսկվայից հեռախոսազանգ եմ ստացել իմ մանկական, դպրոցական ու ուսանողական ընկերոջից, ասել է՝ շատ կնեղանա ինձանից, եթե արձագանքեմ վարչապետի խնդրանքին առանց իրեն տեսնելու, հիմա սպասում եմ իր գալուն: Պատգամավորը պատասխանեց նաև այն հարցին, թե թիմից ճնշումներ կա՞ն իր վրա. «Իմ ընկներները ճնշում են, մեկն ասում է՝ դիր, մյուսն ասում է՝ մի դիր»: Նա նաև հաստատեց, որ երեկ հանդիպել է ԱԺ նախագահ Ալեն Սիմոնյանին, բայց հանդիպումից մանրամասներ չհայտնեց։ Անդրադառնալով դիտարկմանը, որ մամուլը գրել է՝ Սիմոնյանը սպառնալիքներ է հնչեցրել՝ ուղղված Աղազարյանին, վերջինս ասաց. «Ես կուզեի՝ Ալեն Սիմոնյանը ինձ սպառնար, քան էն որ ինքը արեց իմ գլխին: Ավելի լավ էր՝ սպառնար, քան էն, որ ինքը իմ հետ խոսեց: Վատ բան չի ասել, ուղղակի ճնշել ա ինձ ուրիշ իմաստով»: Հարցին՝ ինչ-որ կոմպրոմատնե՞ր ունեն իր դեմ, որով ճնշում են, Աղազարյանը պատասխանեց. «Հեռախոսս առգրավված ա: Ինչքան կոմպրոմատ ասես էնտեղ կա»: Ապա նա բացատրեց, որ հեռախոսը ոչ թե առգրավել են, այլ ինքն է տվել քննիչին: Աղազարյանը կարծիք հայտնեց, որ այն, ինչ կատարվում է իր հետ, տեղավորվում է ժողովրդավարական արժեքների մեջ, նա բացատրեց, որ լրագրողները վարչապետի ինստիտուտը խառնում են կուսակցության ղեկավարի ինստիտուտի հետ՝ նշելով, որ Նիկոլ Փաշինյանը՝ որպես կուսակցության ղեկավար, իրավունք ունի իրեն մանդատը վայր դնելու խնդրանքով դիմել: Հիշեցնենք, որ Հանրային հեռուստաընկերությանը տված հարցազրույցում Նիկոլ Փաշինյանը հայտնել էր, որ մանդատը վայր դնելու խնդրանքով դիմել է Նարեկ Զեյնալյանին եւ Հովիկ Աղազարյանին։ Հովիկ Աղազարյանը արձագանքել էր, որ մանդատը վայր դնել-չդնելու հետ կապված արդեն որոշում է կայացրել՝ ասելով, որ որոշումը կհայտնի նոյեմբերի 25-ին։ Ավելի ուշ Աղազարյանը հայտարարեց, որ որոշման հրապարակումը մեկ-երկու օր հետաձգում է։

13:57 - 26 նոյեմբերի, 2024

Ալեն Սիմոնյանը վիետնամցի իր գործընկերոջը փոխադարձ պաշտոնական այցով հրավիրել Հայաստան

Պաշտոնական այցով Վիետնամի Սոցիալիստական Հանրապետությունում գտնվող ՀՀ ԱԺ նախագահ Ալեն Սիմոնյանի գլխավորած պատվիրակությունը նոյեմբերի 19-ին այցելել է Վիետնամի Ազգային ժողով և հանդիպել Վիետնամի ԱԺ նախագահ Չան Թան Մանի հետ: Զրուցակիցները բազմակողմանի անդրադարձ են կատարել հայ-վիետնամական միջխորհրդարանական հարաբերություններին և դրանց նոր տեմպ հաղորդելու գործնական քայլեր քննարկել: Բացի միջխորհրդարանական հարաբերություններին վերաբերող հարցերից` քննարկումների առանցքում են եղել միջազգային կազմակերպություններում երկու երկրների համագործակցությանը, ինչպես նաև տնտեսական, կրթական ու մշակութային փոխգործակցությանը վերաբերող հարցերը: ՀՀ ԱԺ նախագահը վիետնամցի իր գործընկերոջը շնորհակալություն է հայտնել ջերմ ընդունելության համար ու փոխադարձ պաշտոնական այցով հրավիրել Հայաստան: Ալեն Սիմոնյանը շրջել է նաև Վիետնամի Ազգային ժողովի տարածքում և գրառում կատարել Պատվավոր հյուրերի գրանցամատյանում:

18:23 - 19 նոյեմբերի, 2024

Ալեն Սիմոնյանն ու Հունգարիայի նախագահն անդրադարձել են Հայաստանի ու Ադրբեջանի միջև խաղաղության պայմանագրի ստորագրմանը

Պաշտոնական այցով Հունգարիայում գտնվող ՀՀ ԱԺ նախագահ Ալեն Սիմոնյանը հանդիպում է ունեցել Հունգարիայի նախագահ Տամաշ Շուլյոկի հետ էր: Հանդիպման ընթացքում զրուցակիցներն անդրադարձ են կատարել Հայաստան-Հունգարիա հարաբերությունների ներկայիս ընթացքին ու դրանք բարելավելու անհրաժեշտ քայլերին: Բացի երկկողմ հարաբերություններին վերաբերող քննարկումներից` ՀՀ ԱԺ նախագահն ու Հունգարիայի նախագահն անդրադարձել են նաև Հայաստանի ու Ադրբեջանի միջեւ խաղաղության պայմանագրի ստորագրման, ինչպես նաև տարածաշրջանային հետաքրքրություն ներկայացնող այլ հարցերի: Ալեն Սիմոնյանը Հունգարիայի նախագահին է ներկայացրել նաեւ ՀՀ կառավարության կողմից նախաձեռնած «Խաղաղության խաչմերուկ» նախագիծը:

17:11 - 15 նոյեմբերի, 2024

Ալեն Սիմոնյանը հանդիպել է Հունգարիայի ԱԺ նախագահի հետ

Պաշտոնական այցով Հունգարիայում գտնվող ՀՀ ԱԺ նախագահ Ալեն Սիմոնյանի գլխավորած պատվիրակությունը նոյեմբերի 14-ին եղել է Հունգարիայի խորհրդարանում ու հանդիպել Հունգարիայի Ազգային ժողովի պատվիրակությանը` երկրի ԱԺ նախագահ Լասլո Կյովերի գլխավորությամբ: Լասլո Կյովերը շնորհակալություն է հայտնել Ալեն Սիմոնյանին կատարած պաշտոնական այցի համար ու նշել, որ նման հանդիպումները մեծ խթան են հանդիսանում երկու երկրների հարաբերությունների զարգացման հարցում: ՀՀ ԱԺ նախագահն էլ շնորհակալություն է հայտնել իր հունգարացի գործընկերոջը ջերմ ընդունելության համար ու վերջինիս պաշտոնական այցով հրավիրել Հայաստան: Զրուցակիցները քննարկել են միջխորհրդարանական համագործակցության, երկկողմ հարաբերությունների եւ տարածաշրջանային հետաքրքրության հարցերի լայն շրջանակ: Անդրադարձ է կատարվել նաեւ Հայաստանի ու Ադրբեջանի միջեւ խաղաղության պայմանագրի թեմային եւ Ադրբեջանում պահվող հայ գերիների խնդրին: Ալեն Սիմոնյանը շրջել է նաեւ Հունգարիայի ԱԺ շենքում եւ գրառում կատարել Հունգարիայի խորհրդարանի պատվավոր հյուրերի գրանցամատյանում:

20:14 - 14 նոյեմբերի, 2024

ԱԺ նախագահն ակնկալում է առաջիկայում հանդիպել իր ադրբեջանցի գործընկերոջը |azatutyun.am|

azatutyun.am: Ազգային ժողովի նախագահն ակնկալում է առաջիկայում հանդիպել Ադրբեջանի Միլլի մեջլիսի նախագահ Սահիբա Գաֆարովային: Ալեն Սիմոնյանի փոխանցմամբ՝ իրենց նախորդ հանդիպումը հյուրընկալած կողմն այժմ դրանով է զբաղված: «Ես անձամբ ակնկալում եմ իմ և իմ ադրբեջանցի գործընկերոջ հանդիպման վերաբերյալ լուրին, որպեսզի շարունակենք մեր խոսակցությունը»,- «Ազատության» հետ զրույցում նշեց խորհրդարանի խոսնակը՝ միաժամանակ շեշտելով, որ հնարավոր հանդիպման վերաբերյալ այս պահին հստակություն չկա։ Հայաստանի ու Ադրբեջանի խորհրդարանի խոսնակները վերջին անգամ հանդիպել են մայիսին Ժնևում՝ Միջխորհրդարանական միության հավաքի շրջանակներում։ Եվս մեկ հանդիպում պետք է տեղի ունենար հոկտեմբերին՝ կրկին Ժնևում, բայց, ըստ հայկական կողմի, վերջին պահին Գաֆարովան հրաժարվել էր։ Միլլի մեջլիսի նախագահն այսօր հայտարարել է, թե Երևանի հետ խաղաղության գործընթացը Բաքվի ջանքերով քայլ առ քայլ առաջ է գնում: Արդյոք սա նշանակո՞ւմ է , որ չհամաձայնեցված կետերի շուրջ առաջընթաց կա, Ալեն Սիմոնյանն արձագանքեց. - «Ես ոչ մի խնդիր չեմ տեսնում այդ հայտարարության մեջ, թեև ամբողջ աշխարհին ակնհայտ է, թե Հայաստանն ինչպիսի ջանքեր է գործադրում, անգամ ներսում քննադատվում դրա համար, բայց ես նորմալ եմ վերաբերվում այդ հայտարարությանը, թե դա Բաքվի ջանքերի արդյունքում է առաջ գնում, կարևորը խաղաղության հաստատումն է: Ինչ վերաբերում է համաձայնության հասնել-չհասնելուն, այս պահին նոր բան չկա, կա այն, ինչ բոլորիս է հայտնի»:

17:25 - 07 նոյեմբերի, 2024

Գերիներին չվերադարձնելու դեպքում Ալեն Սիմոնյանը COP29-ին մասնակցությունը ճիշտ չի համարում |azatutyun.am|

azatutyun.am: Գերիներին չվերադարձնելու դեպքում Ազգային ժողովի նախագահ Ալեն Սիմոնյանը COP29-ին մասնակցությունը ճիշտ չի համարում։ «Ես չեմ կարծում, որ նման քննարկման պարագայում, երբ կա հնարավորություն գերի վերադարձնելու, մենք պետք է հապաղենք և չգնանք նման քայլի, բայց կապրենք, կտեսնենք», - խորհրդարանում լրագրողներին ասաց նա՝ ի պատասխան հարցին, թե գերիների վերադարձը կնպաստի՞, որ Հայաստանն ընդունի COP29-ի հրավերը։ Իսկ հարցին, թե գերիներին չվերադարձնելու դեպքում մասնակցության անհրաժեշտություն տեսնո՞ւմ է, ԱԺ նախագահը պատասխանեց. - «Չեմ կարծում՝ ճիշտ է»։ COP 29-ի գագաթնաժողովին Երևանի մասնակցությունը հաստատված չէ, խորհրդարանում բյուջեի քննարկման շրջանակում օրերս հայտարարեց Հայաստանի արտգործնախարար Արարատ Միրզոյանը: COP29 գագաթնաժողովը նոյեմբերի 11-22-ը կկայանա Բաքվում, որին Ադրբեջանը հրավիրել է նաև Հայաստանին: Մամուլը գրում է, որ արտգործնախարարը հնարավոր է՝ Բաքու մեկնի պայմանով, որ Ադրբեջանը Հայաստանին գերիներ վերադարձնի: Ըստ պաշտոնական տվյալների՝ Ադրբեջանում հիմա 23 հայ է գերության մեջ, նրանցից 8-ը Արցախի ռազմաքաղաքական նախկին ղեկավարությունն է։ Բաքուն Արցախի նախկին պաշտոնյաներին ծանր մեղադրանքներ է առաջադրել՝ ահաբեկչությունից մինչև ապօրինի զինված խմբավորումների կազմավորում։

15:38 - 04 նոյեմբերի, 2024

Չէր կարելի դատախազին վերևը նստեցնել, տպավորություն էր՝ սովետական դատավարություն է. Ալեն Սիմոնյան |tert.am|

tert.am: Այսօր «Քաղաքացիական պայմանագիր» կուսակցության վարչության արտահերթ նիստ կա: Այս մասին ԱԺ-ում լրագրողների հետ զրույցում ասաց ԱԺ նախագահ Ալեն Սիմոնյանը: Հարցին՝ Անդրանիկ Քոչարյանին հեռացնելու կամ վարքը քննարկելու հարց կա՞ օրակարգում, նա արձագանքեց. «Վարչությունը որևիցե հարց չի քննարկում՝ մեկին հեռացնելու կամ ինչ-որ ձևով պաշտոնանկ անելու, մենք քննարկում ենք այն ինֆորմացիան, որը առկա է, ու այդ ինֆորմացիայի հիման վրա որոշում ենք կայացնում»: Ինչ վերաբերում է բուն օրակարգին, նա ասաց, որ չի հիշում նիստն ինչ օրակարգով է, ներկուսակցական, ինչպես նաև որոշ պաշտոնների հետ կապված քննարկում պետք է լինի, որոնք թափուր են: Ինչ վերաբերում է Անդրանիկ Քոչարյանի ակնարկին, թե Սիմոնյանին անհանգստացնում է իր վարկանիշի աճը, նա ասաց՝ որևէ մեկի վարկանիշի աճն իրեն չի անհանգստացնում: «Բոլորի պահվածքի վերաբերյալ վերապահումներ ունեմ, ես ասել եմ, որ եթե ես ներկա լինեի, այլ կերպ կլիներ, իմ փորձառությունն ավելին է թե՛ կոնֆլիկտներ հրահրելու, թե՛ հարթելու տեսանկյունից»,- ասաց նա: Հարցին՝ Քյարամյանին պետք է լռեցնե՞լ, Սիմոնյանն ասաց. «Չէ՛, պետք չէր բերել-հասցնել այդ իրավիճակին, չէր կարելի դատախազին վերևը նստեցնել: Ինձ մոտ տպավորություն էր, որ ինչ-որ Սովետական Միության դատավարության է տեղի ունենում, և ներքևը ամբաստանյալներն են, վերևը դատավորն ու դատախազությունն է»: Ինչ վերաբերում է նրան, որ Քոչարյանը բացատրել է, որ դատախազը կին է, նա ասաց. «Դե գիտեք ինչ, դա կնամեծարություն չէ, ես չեմ կարծում՝ նրան՝ որպես կին էին այնտեղ նստեցրել, նա ՀՀ դատախազն է, ոչ թե կին»: Սիմոնյանը հերքեց, թե թիմում կան քոչարյանական կամ սիմոնյանական թևեր: «Ո՞նց կարող է նման բան լինել: Կա թիմ՝ նիկոլփաշինյանական թիմ»,- ասաց նա:

14:25 - 04 նոյեմբերի, 2024

Ալեն Սիմոնյանը՝ Սահմանադրության փոփոխության վերաբերյալ Բաքվի պահանջի մասին |1lurer.am|

1lurer.am: Թե՛ Ադրբեջանը, թե՛ Հայաստանը 30-ից ավելի տարվա այս հակամարտության հետևանքով բազմաթիվ չլուծված հարցեր ենք թողել, և քաղաքական կամքի պարագայում բոլոր այդ հարցերը լուծելի են: Կարծում եմ, որ այն քննարկումները, որոնք տեղի են ունենում, դրան են ուղղված: Լրագրողների հետ ճեպազրույցում ասաց ԱԺ նախագահ Ալեն Սիմոնյանը: Սահմանադրության փոփոխության՝ Բաքվի կողմից առաջ քաշվող պահանջի մասին Ալեն Սիմոնյանն ասաց, որ դա մեզ համար լուծված հարց է. «Կարծում եմ՝ ՍԴ-ի որոշումը նաև հստակ ի ցույց դրեց, որ նման խնդիր ՀՀ-ի կողմից գոյություն չունի»: Ինչ վերաբերում է այն հարցին, թե արդյոք հայկական կողմը բանակցում է Բաքվի հետ հարցը խաղաղության պայմանագրի նախապայման չդիտարկելու ուղղությամբ, ԱԺ նախագահն ասաց. «Բանակցում ենք: Իրենց սահմանադրության մեջ էլ խնդիր կա, բայց մենք այդ խնդիրը չենք բարձրացնում»: Հարցին, թե արդյոք փոխվարչապետների մակարդակով ապաշրջափակման վերաբերյալ քննարկումներ կլինեն, նա ասսաց, որ փոքր, շատ փոքր քայլերով երկկողմ շարժվում են դեպի դրական արդյունք, և յուրաքանչյուր բան հնարավոր է: Սահմանազատման հանձնաժողովների կանոնակարգի մասին Ալեն Սիմոնյանն ասաց. «Կարծում եմ, որ այդ թղթի առկայությունը մեծագույն հաղթանակ է և՛ Հայաստանի, և՛ Ադրբեջանի համար: Սա երկկողմ հաղթանակ է: Սա Հայաստանի և Ադրբեջանի միջև միջպետական առաջին փաստաթուղթն է: Դրա իրագործումը թե՛ ՀՀ-ի, թե՛ Ադրբեջանի Հանրապետության անկախության և տարածքային ամբողջականության ամենակարևոր հիմնաքարերից մեկն է, և մենք առաջ ենք շարժվելու, և ես լիահույս եմ դրական ընթացքի հետ կապված»: Ինչ վերաբերում է սահմանազատման գործընթացի շարունակությանը՝ ԱԺ նախագահն ասաց. «Ամեն ինչ հնարավոր է. գոյություն ունեն տարբեր փաստարկներ, հիմքեր, հարցեր, որոնք կարող են դեր խաղալ, թե ինչպես շարունակել՝ դեպի հարավ կամ Սյունիքից սկսել. մենք այդ մասով ունենք քննարկումներ: Երբ որ այդ քննարկումները արդեն պարզ կլինեն, արդեն լավ կլինի, ու 12 կմ, 50 կմ, 100 կմ՝ այդ վերարտադրումը մեր սահմանի, պետք է ասեմ՝ մեր պատմության մեջ կարևորագույն հարց է, որը լուծենք, շատ գոհ պետք է լինենք»:

14:04 - 04 նոյեմբերի, 2024

Նիկոլ Փաշինյանի գլխավորությամբ տեղի է ունեցել Անվտանգության խորհրդի նիստ

Վարչապետ Նիկոլ Փաշինյանի գլխավորությամբ տեղի է ունեցել Անվտանգության խորհրդի հերթական նիստը: Նիստին, բացի ԱԽ անդամներից, մասնակցել է նաև Հայաստանի Հանրապետության Ազգային ժողովի նախագահ Ալեն Սիմոնյանը: Նիստի ընթացքում քննարկվել են արտաքին և ներքին քաղաքականությանն առնչվող հարցեր:

16:32 - 30 հոկտեմբերի, 2024

Վարչապետը հարգանքի տուրք է մատուցել հոկտեմբերի 27-ի ոճրագործության զոհ դարձած գործիչների հիշատակին

Վարչապետ Նիկոլ Փաշինյանը Հանրապետության նախագահ Վահագն Խաչատուրյանի և Ազգային ժողովի նախագահ Ալեն Սիմոնյանի հետ ծաղիկներ է խոնարհել ԱԺ այգում կանգնեցված հուշակոթողի մոտ և հարգանքի տուրք մատուցել 1999 թվականի հոկտեմբերի 27-ի ոճրագործության զոհ դարձած պետական և քաղաքական գործիչների հիշատակին: Այս մասին հայտնում են ՀՀ կառավարությունից։ Վարչապետը ֆեյսբուքյան էջում տեսանյութ է տեղադրել։

14:33 - 27 հոկտեմբերի, 2024

Ալեն Սիմոնյանն ու Վալենտինա Մատվիենկոն հեռախոսազրույց են ունեցել

ՀՀ ԱԺ նախագահ Ալեն Սիմոնյանը հեռախոսազրույց է ունեցել ՌԴ Դաշնային ժողովի Դաշնության խորհրդի նախագահ Վալենտինա Մատվիենկոյի հետ: Զրուցակիցները քննարկել են հայ-ռուսական հարաբերությունների օրակարգին եւ միջխորհրդարանական համագործակցությանը վերաբերող հարցեր:

12:11 - 24 հոկտեմբերի, 2024

Ալեն Սիմոնյանն ու Վալենտինա Մատվիենկոն քննարկել են հայ-ռուսական հարաբերություններին առնչվող հարցեր

ՀՀ ԱԺ նախագահ Ալեն Սիմոնյանը հեռախոսազրույց է ունեցել ՌԴ Դաշնային ժողովի Դաշնության խորհրդի նախագահ Վալենտինա Մատվիենկոյի հետ: Զրուցակիցները քննարկել են հայ-ռուսական հարաբերությունների օրակարգին և միջխորհրդարանական համագործակցությանը վերաբերող հարցեր:

18:09 - 23 հոկտեմբերի, 2024

Հույս ունենք, որ առնվազն մինչեւ խաղաղության պայմանագիր կնքելը ԵՄ դիտորդները այստեղ կլինեն. Ալեն Սիմոնյան |news.am|

news.am: Մենք շնորհակալ ենք ԵՄ դիտորդների քաղաքացիական առաքելությանը, այն երկրներին, որոնք այդ առաքելությունն այստեղ գործուղել են եւ հույս ունենք, որ առնվազն մինչեւ խաղաղության պայմանագիր կնքելը այդ դիտորդները այստեղ կլինեն: Այս մասին, այսօր՝ հոկտեմբերի 23-ին, ԱԺ-ում լրագրողների հետ զրույցում նշեց ԱԺ նախագահ Ալեն Սիմոնյանը: «Հաճախ էր լինում, որ Ադրբեջանը հայտարարում էր, որ հայկական կողմը զորքեր է շարժում կամ պատրաստվում է հարձակումների, այդ եվրոպական դիտորդները գալիս են եւ արձանագրում են, որ այդպես չէ: Հետո կապրենք կտեսնենք, հետո գուցե դրա կարիքը չլինի»,-ասաց նա:

13:43 - 23 հոկտեմբերի, 2024