Պաղեստին

Դե յուրե ինքնիշխան պետություն Միջին Արեւելքում՝ Հորդանան գետի արեւմտյան ափին (սահմանակցում է Իսրայելին եւ Հորդանանին) եւ Գազայի հատվածին (սահմանակցում է Իսրայելին եւ Եգիպտոսին), որի մայրաքաղաքն է համարվում Արեւելյան Երուսաղեմը՝ չնայած վարչական կենտրոնը Ռամալլահում է: Պաղեստին պետության մեծ հատվածն, ըստ համացանցի աղբյուրների, օկուպացված է Իսրայելի կողմից՝ 1967 թվականի Վեցօրյա պատերազմից հետո:

Երկրորդ համաշխարհային պատերազմից հետո, 1947 թվականին ՄԱԿ-ը հաստատեց Բաժանման նախագիծը Պաղեստինի համար, որը հորդորում էր ստեղծել անկախ արաբական եւ հրեական պետություններ` առանձնացնելով Երուսաղեմը, որը պետք է ղեկավարվեր ՄԱԿ-ի հատուկ միջազգային կառավարման ռեժիմով: Հրեական պետության հիմնադրումից հետո, որը 1948 թվականի մայիսի 14-ին ստացավ Իսրայել անվանում, ներքաշվեց պատերազմների մեջ արաբական բանակների հետ: Ավելի ուշ Արաբական լիգայի կողմից ստեղծվեց Համապաղեստինյան կառավարությունը, որը կառավարեց Եգիպտոսի կողմից վերահսկվող Գազայի հատվածը: Այն շուտով ճանաչվեց Արաբական լիգայի անդամ բոլոր պետությունների կողմից՝ բացառությամբ Հորդանանի: Չնայած Համապաղեստինյան կառավարությունը իրեն հռչակեց ոչ միայն Գազայի հատվածի, այլ ամբողջ նախկին Բրիտանական Պաղեստինի կառավարիչ, այն միայն սահմանափակվում էր Գազայի հատվածով: Իսրայելը ավելի ուշ նվաճեց Գազայի հատվածը եւ Սինայի թերակղզին Եգիպտոսից, Հորդանանի գետի արեւմտյան ափը Հորդանանից եւ Գոլանի բարձունքները՝ Սիրայից՝ Վեցօրյա պատերազմի ընթացքում:

ԵՄ-ն կփորձի իսրայելցիների և պաղեստինցիների միջև կրակի դադարեցման հասնել |tert.am|

tert.am: Եվրոպական միությունը փորձում է կրակի դադարեցման հասնել պաղեստինա-իսրայելական հակամարտության շրջանակում։ Այս մասին քննարկումներ կընթանան միության անդամ 27 պետությունների առցանց հանդիպման ընթացքում, հայտնում է Al Jazeera լրատվականը։«Մենք հանդիպել ենք տեսնելու, թե ինչպես կարող ենք նպաստել բռնության այս շատ վտանգավոր և մտահոգիչ ալիքի կասեցմանը», - ասել է ԵՄ խոսնակ Պիտեր Ստանոն։ԵՄ-ն Իսրայելի ամենամեծ առևտրային գործընկերն ու միևնույն ժամանակ պաղեստինցիներին մեծ քանակությամբ օգնություն տրամադրող կառույց է, սակայն տրամադրված չէ Իսրայելի նկատմամբ հնարավոր տնտեսական պատժամիջոցներ կիրառելուն։Պաղեստինա-իսրայելական հակամարտության լուծմանն ուղղված դիվանագիտական ջանքերը շարունակվում են, մինչդեռ զոհերի և վիրավորների թիվն ամեն պահ աճում է։Գազայում Al Jazeera-ի թղթակից Յումնա ալ Սայյեդն ասել է, որ տեղի Ալ Շիֆա հիվանդանոցում իրավիճակը վատթարանում է։«Առողջապահության նախարարությունը հայտնել է, որ Գազան պայքարում է բժշկական պարագաների և դեղերի խիստ պակասի դեմ և կամավորներին կոչ է անում արյուն հանձնել», - ասել է թղթակիցը՝ հավելելով, որ հիվանդանոցը նաև հոսանքի և ջրի պակաս ունի։

15:16 - 18 մայիսի, 2021

Պաղեստինը հույս ունի առաջիկա 2-3 օրվա ընթացքում Իսրայելի հետ պայմանավորվել կրակի դադարեցման շուրջ |tert.am|

tert.am: Մոսկվայում Պաղեստինի դեսպան Աբդուլ Հաֆեզ Նոֆալը lenta.ru լրավականի հետ զրույցում ասել է, որ Պաղեստինը հույս ունի առաջիկա 2-3 օրվա ընթացքում Իսրայելի հետ պայմանավորվել կրակի դադարեցման շուրջ։Նոֆալն ասել է, որ Պաղեստինի և Իսրայելի միջև բանակցություններում Եգիպտոսը գործում է որպես հիմնական միջնորդ, սակայն մինչ այժմ Իսրայելը մերժել է զինադադարի մասին Կահիրեի առաջարկները։ Ըստ դեսպանի՝ հակամարտությունը սկսվել է Երուսաղեմում իսրայելցիների կողմից Շեյխ Ժարրա թաղամասից պաղեստինցի ընտանիքներին վտարելուց հետո, հետևաբար հենց Իսրայելն էլ կրում է զինադադարի հասնելու պատասխանատվությունը։«Եթե միջազգային հանրությանը, ի դեմս Եգիպտոսի, հաջողվի կասեցնել Իսրայելի հարձակումները Գազայի հատվածի ուղղությամբ, ապա պաղեստինյան խմբավորումներն անմիջապես կդադարեցնեն իրենց պատասխան գործողությունները», - նշել է Նոֆալը և հավելել, որ, նույիսկ վաղը զինադադարի հասնելու պարագայում, անկլավին միջազգային օգնություն անհրաժեշտ կլինի վնասները վերականգնելու համար։

14:48 - 18 մայիսի, 2021

Անհրաժեշտ է 2 կողմից էլ դադարեցնել բռնության գործողությունները. Պուտինը դիմել է Իսրայելին և Պաղեստինին |tert.am|

tert.am: ՌԴ նախագահ Վլադիմիր Պուտինն Իսրայելին և Պաղեստինին կոչ է արել դադարեցնել զինված հակամարտությունը: Ինչպես նշում է gazeta.ru-ն, Պուտինն այս մասին ասել է օտարերկրյա դեսպանների հավատարմագրերի հանձնման արարողության ժամանակ:ՌԴ ղեկավարն ընդգծել է, որ հակամարտության նոր սրումը մեծ թվով զոհերի է հանգեցրել խաղաղ բնակչության, այդ թվում` երեխաների շրջանում:«Մենք անհրաժեշտ ենք համարում դադարեցնել երկու կողմերի բռնության գործողությունները և ակտիվորեն լուծում փնտրել` հիմնված ՄԱԿ-ի Անվտանգության խորհրդի համապատասխան բանաձևի և միջազգային իրավունքի համընդհանուր ճանաչված սկզբունքների վրա»,-ասել է Պուտինը:Աղբյուրը հիշեցնում է, որ մայիսի 17-ին, ՌԴ արտգործնախարար Սերգեյ Լավրովն ու ՌԴ մամուլի քարտուղար Դմիտրի Պեսկովը դատապարտել են իսրայելցիների և պաղեստինցիների հարվածները քաղաքացիական օբյեկտներին:

13:33 - 18 մայիսի, 2021

Իսրայելը հրադադարի ռեժիմ չի հաստատի մինչև հինգշաբթի |armtimes.com|

armtimes.com: Իսրայելի արտաքին գործերի նախարար Գաբի Աշկենազին ԱՄՆ պետքարտուղար Էնթոնի Բլինքենի հետ հեռախոսազրույցում շնորհակալություն է հայտնել տարածաշրջանում իրավիճակի սրման հետ կապված Վաշինգտոնի աջակցության համար, հաղորդում է The times of Israel-ը: ԱՄՆ-ն արգելափակել է պաղեստինա-իսրայելական հակամարտության վերաբերյալ ՄԱԿ-ի Անվտանգության խորհրդի բանաձևի նախագիծը, ինչի համար Իսրայելն ԱՄՆ-ին անվանել է «լավ ընկեր»: Աշկենազին կարևորել է միջազգային հանրության կողմից Համասի դատապարտումը, «որը քաղաքացիական անձանց օգտագործում է որպես մարդկային վահան»: Արտգործնախարարը նաև հայտարարել է, որ Համաս շարժման դեմ պայքարը շարունակվելու է մինչև Իսրայելի հարավային և նրա կենտրոնական շրջաններում իրավիճակի կայունացումը: Ըստ պարբերականի, Իսրայելը մտադիր չէ Համասի հետ հրադադարի ռեժիմի հաստատման հնարավորությունը դիտարկել մինչ հինգշաբթի: Իսրայելի պաշտպանության նախարարը զինվորականներին կոչ է արել զգոն լինեն, քանի որ Գազայի հատվածի վրա հարձակումը շարունակվելու է: Նախարար Գանցի հայտարարությունն արվել է Միջին Արևելքում հակամարտող կողմերին ուղղված միջազգային հանրության կոչերի ֆոնին՝ վերջ տալ Գազայի հատվածի շուրջ իրավիճակի սրմանը և խաղաղ ճանապարհով լուծել տարաձայնությունները:

13:31 - 18 մայիսի, 2021

Իսրայելը շարունակում է ավիահարվածները Գազայի ուղղությամբ, պատասխան հրթիռներ են արձակվում իսրայելական քաղաքների ուղղությամբ |tert.am|

tert.am: Իսրայելական կողմը շարունակում է ավիահարվածները Գազայի ուղղությամբ, զուգահեռաբար պաղեստինցիները շարունակում են հրթիռներ արձակել իսրայելական քաղաքների ուղղությամբ, հայտնում է Al Jazeera լրատվականը և հավելում, որ այդ ընթացքում ակտիվանում են հրադադարին ուղղված դիվանագիտական ջանքերը։Իսրայելցի զինվորականները պատասխան կրակ են բացել նաև Լիբանանի ուղղությամբ, քանի որ Լիբանանի տարածքից 6 հրթիռ էր արձակվել Իսրայելի ուղղությամբ։Լիբանանում ՄԱԿ-ի ժամանակավոր ուժերը (UNIFIL) հայտնել են, որ լիբանանյան բանակի հետ ուժեղացրել են վերահսկողությունը երկրի հարավային շրջաններում։Հայտնի է, որ Միացյալ Նահանգների նախագահ Ջո Բայդենը երրորդ հեռախոսազրույցն է ունեցել Իսրայելի վարչապետի պաշտոնակատար Բենյամին Նեթանյահուի հետ և աջակցություն հայտնել հրադադարի հաստատմանը։

10:29 - 18 մայիսի, 2021

Մերկելը Նեթանյահուին հավաստիացրել է Գերմանիայի կառավարության՝ Իսրայելին համերաշխություն հայտնելու մասին |tert.am|

tert.am: Գերմանիայի կանցլեր Անգելա Մերկելը հեռախոսազրույց է ունեցել Իսրայելի վարչապետ Բենյամին Նեթանյահուի հետ, որի ընթացքում աջակցություն է հայտնել Իսրայելի իշխանություններին: Այս մասին հայտարարել է Գերմանիայի նախարարների կաբինետի պաշտոնական ներկայացուցիչ Շտեֆեն Զայբերտը, գրում է ՏԱՍՍ-ը: «Կանցլերը կրկին խստորեն դատապարտել է Գազայի հատվածից Իսրայելի վրա շարունակվող հրթիռային հարձակումները և վարչապետին հավաստիացրել է ԳԴՀ կառավարության համերաշխության մասին: Նա ընդգծել է Իսրայելի՝ հարձակումներից պաշտպանվելու իրավունքը»,- մանրամասնել է Զայբերտը:

09:18 - 18 մայիսի, 2021

Գազայի հատվածում իսրայելական հարվածներից վնասվել է բնակելի ֆոնդի 10 հազար շենք |armenpress.am|

armenpress.am: Ավելի քան 800 բնակելի շինություն ամբողջովին ավերվել է, ևս 10 հազարը տուժել է Գազայի հատվածում Իսրայելի կողմից հրթիռային և հրետանային հարվածների հետևանքով: Ինչպես հաղորդում է «ՏԱՍՍ»-ը, այս մասին երկուշաբթի հայտնել է ափամերձ անկլավի Հասարակական աշխատանքների և բնակարանաշինության նախարարությունը: Հայտարարության մեջ նաև ընդգծվում է, որ նախարարությանը կից ներկայումս ստեղծվել է շուրջ 80 բրիգադ, որոնք մասնակցում են փլատակների տակից զոհվածների և վիրավորների դուրսբերման աշխատանքներով: Մայիսի 15-ին իսրայելական ավիացիան հարվածներ է հասցրել Ալ Ջալյա 11-հարկանի շենքին, որտեղ տեղակայվել են Կատարի Al Jazeera հեռուստակայանի, ինչպես նաեւ Associated Press գործակալության և այլ լրատվամիջոցների ներկայացուցչությունները:

20:25 - 17 մայիսի, 2021

Մոսկվան դատապարտել է Պաղեստինում և Իսրայելում քաղաքացիական օբյեկտներին հարվածներ հասցնելը |tert.am|

tert.am: Պաշտոնական Մոսկվան դատապարտում է Պաղեստինում և Իսրայելում քաղաքացիական օբյեկտներին հարվածներ հասցնելը, հայտնում է «ՌԻԱ Նովոստի» լրատվական գործակալությունը՝ վկայակոչելով ՌԴ արտաքին գործերի նախարար Սերգեյ Լավրովին։«Մենք դատապարտում ենք Գազայի հատվածից Իսրայելի բնակելի շրջանների ուղղությամբ արձակվող հարվածները և անընդունելի ենք համարում Պաղեստինի տարածքում գտնվող քաղաքացիական ենթակառուցվածքներին Իսրայելի կողմից հասցված հարվածները։ Կարծում եմ՝ այս իրավիճակի անհապաղ դադարեցմանն ուղղված բավական կոչեր են հնչել արդեն», - ասել է Լավրովը՝ ճեպազրույցի ընթացքում։Պաղեստինցիների և իսրայելցիների միջև անցյալ շաբաթ սկսված բախումների հետանքով պաղեստինյան կողմում զոհերի թիվը հասել է 220-ի, այդ թվում՝ 58 երեխա և 34 կին, իսկ իսրայելական կողմում զոհերի թիվը 10-ն է, այդ թվում՝ 2 երեխա։

17:29 - 17 մայիսի, 2021

«Լրագրողներ առանց սահմանների» և Amnesty International կազմակերպությունները Միջազգային քրեական դատարանին խնդրել են հետաքննել Իսրայելի «ռազմական հանցագործությունը» |tert.am|

tert.am: «Լրագրողներ առանց սահմանների» կազմակերպությունը և Amnesty International միջազգային իրավապաշտպան կազմակերպությունը Միջազգային քրեական դատարանին խնդրել են որպես ռազմական հանցագործություն հետաքննել Իսրայելի կողմից «Ալ Ջալաա» շենքի պայթյունը, որտեղ տեղակայված են Al Jazeera և Associated Press լրատվականների գրասենյակները, հայտնում է Al Jazeera լրատվականը։«Լրատվամիջոցների դիտավորյալ թիրախավորումը ռազմական հանցագործություն է: Իսրայելի պաշտպանության ուժերը դիտավորյալ հարվածով ոչ միայն անընդունելի նյութական վնաս են հասցրել լրատվականներին, այլ նաև խոչընդոտել են լրատվամիջոցների կողմից հակամարտության լուսաբանմանն ու ուղղակիորեն ազդել խաղաղ բնակչության վրա»,- հայտնել է «Լրագրողներ առանց սահմանների» կազմակերպության գլխավոր քարտուղար Քրիստոֆ Դելոիրը։ Հիշեցնենք, որ Իսրայելական բանակը հաստատել էր, որ հարված է հասցրել Գազայում գտնվող բազմահարկ շենքին՝ հայտարարելով, որ «Համասը» շենքն օգտագործել է ռազմական նպատակներով։ Առավել մանրամասն՝ tert.am-ում։

15:10 - 17 մայիսի, 2021

Պաղեստինի վարչապետը կոչ է արել պատժամիջոցներ կիրառել Իսրայելի նկատմամբ |tert.am|

tert.am: Պաղեստինի վարչապետ Մոհամադ Շթայեն երկրների ղեկավարներին կոչ է արել հայտարարություններից անցում կատարել գործողությունների, հայտնում է Al Jazeera լրատվականը։«Անկեղծ ասած՝ հայտարարություններ անելը բավարար չէ։ Պաղեստինի ժողովրդի նկատմամբ այս բոլոր գործողությունները ՄԱԿ-ը պետք է անօրինական ճանաչի»,- ասել է Պաղեստինի վարչապետը և կոչ արել պատժամիջոցների կիրառել Իսրայելի նկատմամբ։Նա նաև դաշնակից պետություններին կոչ է արել հետ կանչել Իսրայելի դեսպաններին, այդ երկրի հետ դադարեցնել առևտրային կապերը, իսկ ԱՄՆ-ին և ԵՄ-ն կոչ է արել դադարեցնել Իսրայելին տրամադրվող օգնությունն այնքան ժամանակ, մինչև «Իսրայելը կսկսի հարգել մարդու իրավունքները»։«Այն երեխաները, որ արյան մեջ են, կամ կորցրել են իրենց կյանքը․․․․սրանք հանցագործություններ են, որոնք միջազգային իրավունքին համաձայն պետք է պատժի արժանանան։ Իսրայելի՝ սպանություններ իրականացնելու իրավունքը վերահաստատվել է, և դա պետք է անհապաղ դադարեցվի»,- եզրափակել է Պաղեստինի վարչապետը։

13:40 - 17 մայիսի, 2021

Գազայում բախումների հետևանքով պաղեստինյան կողմի զոհերի թիվը հասել է 192-ի, այդ թվում՝ 54 երեխա․ իսրայելական կողմն ունի 10 զոհ |tert.am|

tert.am: Այսօր վաղ առավոտից իսրայելական կողմը վերսկսել է Գազայի ուղղությամբ ավիահարվածները: Դա տեղի է ունեցել Իսրայելի վարչապետի ժամանակավոր պաշտոնակատար Բենյամին Նեթանյահուի այն հայտարարությունից ժամեր անց, համաձայն որի սկսվելու են պաղեստինյան անկլավի վրա հարձակումներ, հայտնում է Al Jazeera լրատվականը։ Հայտնի է, որ ավիահարվածների հետևանքով վիրավորվել է մեկ պաղեստինցի։ Ավելի վաղ ՀԱՄԱՍ-ը հրթիռներ էր արձակել իսրայելական Աշխելոն և Բեեր Շևա քաղաքների ուղղությամբ։ Պաղեստինցիների և իսրայելցիների միջև անցյալ շաբաթ սկսված բախումների հետևանքով պաղեստինյան կողմում զոհերի թիվը հասել է 192-ի, այդ թվում՝ 58 երեխա և 34 կին, իսկ իսրայելական կողմում զոհերի թիվը 10-ն է, այդ թվում՝ 2 երեխա։ Կիրակի ՄԱԿ-ի Անվտանգության խորհուրդը քննարկել է առկա իրավիճակը, սակայն այս ուղղությամբ համաձայնություն ձեռք չի բերվել։ Չինաստանի պնդմամբ՝ խորհրդի ընդհանուր տեսակետին խանգարում է Միացյալ Նահանգները։ Գազայում էլեկտրաէներգիա բաշխող ընկերությունն ասել է, որ քաղաքի «լայն տարածքներում» հոսանքի անջատումներ են եղել այն բանից հետո, երբ իսրայելական հարվածների հետևանքով վնասվել է քաղաքի հարավային շրջաններին հոսանք մատակարարող միակ գիծը և հավելել, որ փորձում են վերականգնել այն։ Կանադայի վարչապետ Ջասթին Թրյուդոն էլ արձագանքել է Մոնրեալում իսրայեցի և պաղեստինցի ցուցարարների միջև բախմանը՝ նշելով․ «Կանադայում յուրաքանչյուր ոք խաղաղ հավաք անցկացնելու և ազատ արտահայտվելու իրավունք ունի։ Սակայն մենք չենք կարող և չենք հանդուրժելու հակասեմականությունը, իսլամաֆոբիան կամ ցանկացած տեսակի ատելություն»։ ՀԱՄԱՍ-ը, իր հերթին, հայտարարել է, որ Իսրայելը հարվածել է «դատարկ դաշտերին, դատարկ և տարհանված ռազմական բազաներին և ուսումնական ճամբարներին»։

11:18 - 17 մայիսի, 2021

ՀԱՄԱՍ-ը հայտարարել է Իսրայելի ռազմական կառույցին հարվածելու մասին |tert.am|

tert.am: Գազայի հատվածում վերահսկողություն իրականացնող ՀԱՄԱՍ շարժման «Իզեդին ալ Քասամի բրիգադներ» մարտական թևը հայտարարել է Իսրայելի հարավային շրջանում գտնվող ռազմական կառույցին հասցրած հարվածի մասին, ինչի հետևանքով, իրենց տվյալներով, զինվորականների շրջանում կորուստներ են գրանցվել: Այս մասին հայտնում է ՏԱՍՍ գործակալությունը՝ հղում անելով պաղեստինյան ռադիոկայանին: Շարունակությունը՝ tert.am-ում։

20:50 - 16 մայիսի, 2021

Սաուդյան Արաբիան միջազգային հանրությանը կոչ է անում կանգնեցնել Իսրայելին |armtimes.com|

armtimes.com: Սաուդյան Արաբիան կոչ է անում միջազգային հանրությանը անհապաղ միջամտել Արեւելյան Երուսաղեմում ստեղծված իրավիճակին՝ Իսրայելին կանգնեցնելու համար: Այս մասին կիրակի օրը հայտարարել է Թագավորության արտաքին գործերի նախարար Ֆեյսալ բին Ֆարհան Ալ Սաուդը Իսլամական համագործակցության կազմակերպության (ԻՀԿ) արտակարգ նիստում: «Միջազգային հանրությունը պետք է անհապաղ միջամտի Իսրայելի գործողությունները դադարեցնելու համար», - շեշտել է նա: Նախարարի խոսքով, միջազգային հանրությունը «պետք է կատարի իր պարտավորությունները և վերջ տա Արևելյան Երուսաղեմում հակամարտության վտանգավոր սրմանը», ինչպես նաև շտապ ձեռնարկի գործողություններ, որոնք վերջ կդնեն ռազմական գործողություններին և կհանգեցնեն խաղաղության վերսկսմանը բանակցությունների միջոցով:

18:22 - 16 մայիսի, 2021

Իսրայելական ավիահարվածների հետևանքով զոհված պաղեստինցիների թիվը գերազանցել է 200-ը |tert.am|

tert.am: Իսրայելի հետ հակամարտության ընթացիկ սրման հետևանքով ավելի քան 200 պաղեստինցի է զոհվել, մոտ 5600-ը վիրավորում է ստացել: ՏԱՍՍ գործակալության փոխանցմամբ՝ այս տվյալները հաղորդում է պաղեստինյան աղբյուրը՝ վկայակոչելով առողջապահության նախարարությանը:Գերատեսչությունից մասնավորեցնում են, որ զոհերի թվում են ինչպես մայիսի 10-ից մեկնարկած ավիահարվածների հետևանքով մահացածներն, այնպես էլ Հորդանան գետի Արևմտյան ափին տեղի ունեցող բախումների զոհերը: Ընդհանուր առմամբ, բռնության ալիքը 202 պաղեստինցու կյանք է խլել, վիրավորների թիվը հասել է 5588: «Գազայի հատվածում 181 պաղեստինցի է զոհվել, այդ թվում՝ 52 երեխա և 31 կին, տուժել են 1225-ը, Արևմտյան ափին զոհերի թիվը հասել է 21-ի, տուժածներինը՝ 4363-ի»,- նշվում է նախարարության հաղորդագրության մեջ:

17:55 - 16 մայիսի, 2021

Թուրքիան հանդես է եկել Պաղեստինի քաղաքացիների պաշտպանությունն ապահովող միջազգային ուժերի ստեղծման օգտին |armenpress.am|

armenpress.am: Թուրքիան հանդես է գալիս պաղեստինցի խաղաղ քաղաքացիների ֆիզիկական պաշտպանությունն ապահովելու համար միջազգային ուժերի ստեղծման օգտին։ Այս մասին Թուրքիայի արտաքին գործերի նախարար Մեւլութ Չավուշօղլուն մայիսի 16-ին հայտարարել է Իսլամական համագործակցության կազմակերպության (ԻՀԿ) արտաքին գործերի նախարարների արտահերթ նիստում, տեղեկացնում է ՏԱՍՍ-ը: «Միջազգային հանրությունը պատասխանատվություն է կրում պաղեստինցի խաղաղ քաղաքացիների անվտանգության ապահովման համար։ Եվ այդ պատասխանատվության կարևոր մասն ընկած է ԻՀԿ-ի վրա, - ընդգծել է նա իր ելույթի ժամանակ։ - Մենք պետք է աշխատենք Պաղեստինի խաղաղ քաղաքացիներին պաշտպանելու համար միջազգային մեխանիզմ ստեղծելու ուղղությամբ՝ ՄԱԿ-ի Գլխավոր ասամբլեայի 2018 թվականի հունիսին ընդունված բանաձեւին համապատասխան։ Այս նախաձեռնությունը պետք է ներառի նաեւ ֆիզիկական պաշտպանություն միջազգային ուժերի ստեղծման միջոցով, որոնք կունենան ռազմական եւ ֆինանսական աջակցություն շահագրգիռ երկրներից»: Չավուշօղլուի խոսքով՝ «եկել է Պաղեստինի հարցում միասնության եւ վճռականության ժամանակը»: «Իսլամական աշխարհը մեզանից առաջնորդություն է ակնկալում, եւ Թուրքիան պատրաստ է բոլոր անհրաժեշտ քայլերին», - հավելել է նա:

17:35 - 16 մայիսի, 2021

Բորելը ԵՄ արտգործնախարարների հետ կքննարկի Իսրայել-Պաղեստին հակամարտությունը |shantnews.am|

shantnews.am: Մայիսի 18-ին եվրոպական դիվանագիտության ղեկավար Ժոզեպ Բորելը տեսակոնֆերանս կանցկացնի ԵՄ արտգործնախարարների հետ: Նրանք կքննարկեն պաղեստինա-իսրայելական սրացման շուրջ ստեղծված իրավիճակը: Ինչպես Twitter- ում գրել է Բորելը, «քաղաքացիական զոհերի անընդունելի քանակի» պատճառով երեքշաբթի հրավիրվում է արտգործնախարարների արտահերթ տեսակոնֆերանս: Նախարարները կքննարկեն, թե ինչպես կարող են նպաստել բռնության դադարեցմանը:

14:07 - 16 մայիսի, 2021