Դմիտրի Պեսկով

Դմիտրի Սերգեւիչ Պեսկով, 2012 թվականից ՌԴ նախագահ Վլադիմիր Պուտինի մամուլի քարտուղար:

Ծնվել է 1967 թվականի հոկտեմբերի 17-ին Մոսկվայում, ուսանող, հետագայում ռուս դիվանագետ Սերգեյ Պեսկովի (1948-2014) ընտանիքում:

1989 թվականին Պեսկովն ավարտել է Լոմոնոսովի անվան Մոսկվայի պետական համալսարանի Ասիայի եւ Աֆրիկայի երկրների ինստիտուտը՝ «արեւելագետ-պատմաբան» եւ «թարգմանիչ» մասնագիտություններով:

1989 թվականին աշխատել է ԽՍՀՄ Արտաքին գործերի նախարարությունում:

1990-ից 1994 թվականներին եղել է հերթապահ ռեֆերենտ, կցորդ, ԽՍՀՄ-ի երրորդ, ապա Թուրքիայում ՌԴ-ի դեսպանատան քարտուղար: 1994-ից 1996 թվականներին աշխատել է Ռուսաստանի Արտաքին գործերի նախարարության կենտրոնական ապարատում: 1996-ից 2000 թվականներին Թուրքիայում ռուսական դեսպանության երկրորդ, ապա առաջին քարտուղար:

2003 թվականին ղեկավարել է Սանկտ Պետերբուրգի 300 ամյակին նվիրված տոնակատարությունը:

2004 թվականի ապրիլի 9-ին նշանակվել է Ալեքսեյ Գրոմովի առաջին քարտուղար (որն այդ ժամանակ ՌԴ աշխատակազմի մամլո խոսնակն էր):

2008 թվականի փետրվարին նշանակվել է «Միր (հեռուստառադիոընկերության)» տնօրեն:

Մենք ապրում ենք աշխարհի ամենամեծ երկրում, բայց մենք քիչ ենք. ներգաղթյալները ՌԴ-ի համար անհրաժեշտություն են. Պեսկով |tert.am|

tert.am: Ռուսաստանին անհրաժեշտ են աշխատանքային ներգաղթյալներ այլ երկրներից՝ ժողովրդագրական լարված իրավիճակի ֆոնին երկրի դինամիկ զարգացումն ապահովելու համար. այս մասին ՌԻԱ «Նովոստի»-ին տված հարցազրույցում ասել է ՌԴ նախագահի մամուլի քարտուղար Դմիտրի Պեսկովը։ «Ներգաղթյալներն անհրաժեշտ են: Փաստն այն է, որ մենք ժողովրդագրական շատ լարված իրավիճակ ունենք։ Մենք ապրում ենք աշխարհի ամենամեծ երկրում, բայց մենք քիչ ենք: Երկրի դինամիկ զարգացման համար Ռուսաստանին անհրաժեշտ են աշխատանքային միգրանտներ այլ երկրներից: Որպեսզի մենք դինամիկ զարգանանք և իրականացնենք զարգացման բոլոր ծրագրերը, իհարկե, մեզ պետք են աշխատողներ։ Մենք միայն ողջունում ենք նրանց գալը», - ասել է Կրեմլի ներկայացուցիչը: Ավելի վաղ ՌԴ նախագահ Վլադիմիր Պուտինը հայտարարել էր, որ երբ խոսքը վերաբերում է ներգաղթյալների ներգրավման մասին, իշխանություններն առաջին հերթին պետք է մտածեն երկրի քաղաքացիների շահերի մասին։ Երկրի ղեկավարն ընդգծել է, որ ներգաղթյալները ռուսաստանցիների շրջանում «չընդունվելու իրավիճակ չեն ստեղծի», եթե տիրապետեն օրենքներին և պատրաստ լինեն դրանք կատարել, ինչպես նաև լավ տիրապետեն ռուսաց լեզվին։ Բացի այդ, Պուտինը հավելել է, որ Ռուսաստան ժամանած ներգաղթյալները պետք է ապրեն «մարդկային պայմաններում» և օգտվեն բոլոր առավելություններից։

11:24 - 22 նոյեմբերի, 2024

Սանդուն Մոլդովայի նախագահը չէ. բնակչության մեծ մասը չի քվեարկել նրա օգտին. Կրեմլ |tert.am|

tert.am: Մոլդովայում կայացած նախագահական ընտրությունները եղել են ոչ ժողովրդավարական և անարդար, քանի որ հանրապետության հարյուր հազարավոր քաղաքացիներ, որոնք ապրում են Ռուսաստանում, նույնիսկ չեն կարողացել քվեարկել։ Այս մասին նոյեմբերի 5-ին հայտարարել է Կրեմլի պաշտոնական ներկայացուցիչ Դմիտրի Պեսկովը, գրում է iz.ru-ն։«Մենք կարող ենք օբյեկտիվորեն դատել այս ընտրությունների մասին՝ խոսելով Մոլդովայի այն հարյուր հազարավոր քաղաքացիների մասին, որոնք ապրում են Ռուսաստանի Դաշնությունում։ Այս քաղաքացիներին հնարավորություն չի տրվել օգտագործելու իրենց ձայնը։ Սա, իհարկե, չէր կարող չանդրադառնալ ընտրությունների արդյունքների վրա, որոնք, բնականաբար, արդար համարել չենք կարող։ Այս ընտրությունները ո՛չ ժողովրդավարական էին, ո՛չ արդար»,- ասել է ՌԴ նախագահի մամուլի քարտուղարը։Նա պնդել է, որ ընտրություններում հաղթող հռչակված Մայա Սանդուն Մոլդովայի նախագահը չէ, քանի որ երկրի բնակչության մեծ մասը չի քվեարկել Սանդուի օգտին։«Սանդուն, որքան մենք հասկանում ենք, իր երկրի նախագահը չէ, քանի որ բուն երկրում նույնպես բնակչության մեծամասնությունը չի քվեարկել նրա օգտին: Մենք խոսում ենք շատ, շատ պառակտված հասարակության մասին», - ասել է Պեսկովը:

14:05 - 05 նոյեմբերի, 2024

Բաքվում COP29-ին Պուտինի մասնակցության մասին դեռ որոշում չկա․ Պեսկով |azatutyun.am|

azatutyun.am: Բաքվում կայանալիք COP29-ին Ռուսաստանի նախագահ Վլադիմիր Պուտինի մասնակցության մասին դեռ որոշում չկա,«ՌԻԱ Նովոստի»-ին ասել է Ռուսաստանի նախագահի մամուլի քարտուղար Դմիտրի Պեսկովը՝ միևնույն ժամանակ շեշտելով՝ Ռուսաստանն անպայման ներկայացված կլինի համաժողովին։ «Դեռ որոշում չի կայացվել։ Ռուսաստանը, իհարկե, ներկայացված կլինի», - ասել է Պեսկովը։ Հուլիսին Աստանայում Շանհայի համագործակցության կազմակերպության գագաթնաժողովի ժամանակ Ադրբեջանի նախագահ Իլհամ Ալիևը կազմակերպության բոլոր ղեկավարներին հրավիրել է ՄԱԿ-ի կլիմայական COP29 համաժողովին։ Միջոցառումը կմեկնարկի նոյեմբերի 11-ին։ ՄԱԿ-ի միջոցառումը Բաքվում անցկացնելու որոշումը կայացվեց անցած դեկտեմբերին՝ Լեռնային Ղարաբաղի վրա ադրբեջանական լայնածավալ հարձակումից և Արցախի հայաթափումից ընդամենը երեք ամիս անց։ Որոշումն ընդունվեց այդ թվում պաշտոնական Երևանի աջակցության շնորհիվ, ինչի դիմաց Բաքուն համաձայնեց ազատ արձակել 32 հայ ռազմագերիների։ Ադրբեջանը նաև Հայաստանին է հրավիրել՝ մասնակցելու այդ համաժողովին, Երևանը դեռ որոշում չունի։

11:18 - 15 հոկտեմբերի, 2024

ՌԴ-ն չի միջամտում Հայաստանի և Ադրբեջանի երկկողմ հարաբերություններին․ Դմիտրի Պեսկով |armenpress.am|

armenpress.am: Ռուսաստանը չի միջամտում Հայաստանի և Ադրբեջանի երկկողմ հարաբերություններին։ «Արմենպրես»-ի հաղորդմամբ՝ այս մասին «Իզվեստիա»-ին ասել է ՌԴ նախագահի մամուլի քարտուղար Դմիտրի Պեսկովը: «Նրանք շարունակում են իրենց երկխոսությունն այսպես թե այնպես ԱՊՀ շրջանակներում։ Բայց մնացածը ՝ երկկողմ հարաբերություններն արդեն մերը չեն, դա նրանց ինքնիշխան իրավասությունն է»,-նշել է Պեսկովը։ Ռուսաստանի նախագահի մամուլի քարտուղարը նշել է, որ Մոսկվան շարունակում է երկխոսություն վարել ինչպես Երևանի, այնպես էլ Բաքվի հետ:

20:28 - 08 հոկտեմբերի, 2024

«Զանգեզուրի միջանցքի» թեման, հավանաբար, շոշափվել է Պուտինի՝ Փաշինյանի և Ալիևի հետ ունեցած առանձին հանդիպումներում․ Պեսկով

«Զանգեզուրի միջանցքի» թեման, հավանաբար, շոշափվել է Պուտինի՝ Փաշինյանի և Ալիևի հետ ունեցած առանձին հանդիպումներում։ Այս մասին հայտարարել է ՌԴ նախագահի մամուլի քարտուղար Դմիտրի Պեսկովը։ «Պուտինն առանձին-առանձին խոսեց նրանցից յուրաքանչյուրի հետ, երևի թե կես ժամ, ուստի, հավանաբար, կարծիքների փոխանակում եղել է, շոշափվել է նաև Զանգեզուրի միջանցքի թեման»,- ասել է Պեսկովը՝ պատասխանելով լրագրողների հարցին։ Հիշեցնենք, որ Հայաստանի վարչապետն ու Ադրբեջանի նախագահը Մոսկվայում էին՝ մասնկացելու ԱՊՀ պետությունների ղեկավարների խորհրդի նիստին։ Նիկոլ Փաշինյանի և Իլհամ Ալիևի հետ առանձին հանդիպումներ է ունեցել ՌԴ նախագահ Վլադիմիր Պուտինը։

16:42 - 08 հոկտեմբերի, 2024

Կրեմլը բացարձակապես համաձայն չէ Նիկոլ Փաշինյանի հետ ՀԱՊԿ-ի վերաբերյալ նրա գնահատականի հարցում․ Կրեմլ

Կրեմլը բացարձակապես համաձայն չէ Հայաստանի վարչապետ Նիկոլ Փաշինյանի հետ ՀԱՊԿ-ի վերաբերյալ նրա գնահատականի հարցում։ Կազմակերպությունը որևէ վտանգ չի ներկայացնում Հայաստանի ինքնիշխանության համար։ Այս մասին ասել է ՌԴ նախագահի մամուլի քարտուղար Դմիտրի Պեսկովը։ «Պետք է կտրականապես չհամաձայնենք Փաշինյանի հետ։ Հայաստանի ինքնիշխանությանը ՀԱՊԿ-ից որևէ վտանգ չի սպառնում և չի կարող սպառնալ։ Ընդհակառակը, այս կազմակերպությունը պաշտպանում է անդամ պետությունների ինքնիշխանությունը։ Բայց մենք համբերատարորեն կշարունակենք Հայաստանի ղեկավարությանը տեղեկացնել այս դիրքորոշման մասին»,- լրագրողներին ասաց նա։ Հիշեցնենք, որ այսօր ՀՀ վարչապետ Նիկոլ Փաշինյանը հայտարարել էր, որ ՀՀ-ն ՀԱՊԿ-ում իր անդամակցությունը սառեցրել է ոչ միայն այն պատճառով, որ ՀԱՊԿ-ը չի ապահովում Հայաստանի նկատմամբ իր ունեցած անվտանգային պարտավորությունները, այլև այն պատճառով, որ ՀԱՊԿ-ը ստեղծում է սպառնալիքներ ՀՀ անվտանգության համար, Հայաստանի հետագա գոյության, ինքնիշխանության և պետականության համար։

13:33 - 18 սեպտեմբերի, 2024

Կրեմլին չի անհանգստացնում Պուտինի այցը Մոնղոլիա, որը ստորագրել է Հռոմի ստատուտը |armenpress.am|

armenpress.am: ՌԴ նախագահ Վլադիմիր Պուտինի՝ Մոնղոլիա այցի առումով Կրեմլին չի անհանգստացնում այն, որ Ուլան Բատորը ստորագրել է Հռոմի ստատուտը և Միջազգային քրեական դատարանի անդամ է հանդիսանում։ Այս մասին լրագրողներին հայտնել է ՌԴ նախագահի մամուլի քարտուղար Դմիտրի Պեսկովը։ Լրագրողների այն հարցին, թե արդյոք Կրեմլում մտահոգություններ կան՝ կապված Մոնղոլիայի կողմից ՄՔԴ-ի իրավասության ճանաչման հետ, ՌԴ ղեկավարի մամուլի քարտուղար Դմիտրի Պեսկովը պատասխանել է. «Ոչ, անհանգստություն չկա»։ «Մենք հիանալի երկխոսություն ունենք Մոնղոլիայի մեր բարեկամների հետ», - Պեսկովի խոսքերն է մեջբերում «Ինտերֆաքս»-ը։ Պեսկովին հարցրել են՝ արդյոք Մոնղոլիայի իշխանությունների հետ բանակցություններ տեղի են ունեցել ՄՔԴ-ի կողմից Պուտինի ձերբակալման հրաման տալու շուրջ։ «Անշուշտ, այցի բոլոր ասպեկտները մանրակրկիտ նախապատրաստվել են»,- ասել է Պեսկովը։ Ակնկալվում է, որ Ռուսաստանի ղեկավարը սեպտեմբերի 3-ին պաշտոնական այցով կմեկնի Մոնղոլիա, որտեղ կմասնակցի Խալխին Գոլ գետի մոտ ԽՍՀՄ-ի և Մոնղոլիայի զինված ուժերի կողմից ճապոնական զորքերի նկատմամբ տարած հաղթանակի 85-ամյակին նվիրված հանդիսավոր միջոցառումներին։ Հաագայի Միջազգային քրեական դատարանը Վլադիմիր Պուտինին մեղադրանք է առաջադրել պատերազմական հանցագործության, մասնավորապես՝ ռազմական գործողությունների ժամանակ Ուկրաինայի տարածքից երեխաներին անօրինական կերպով Ռուսաստան տեղափոխելու համար։ Պուտինի հետ ձերբակալության հրաման է տրվել նաև Ռուսաստանի Դաշնության նախագահին առընթեր երեխաների իրավունքների հանձնակատար Մարիա Լվովա-Բելովային։

15:16 - 30 օգոստոսի, 2024

Ռուսաստանը Հայաստանին համարում է եղբայրական երկիր և հույս ունի, որ իրենք չեն ընտրի այն ճանապարհը, որը ժամանակին ընտրել էր Ուկրաինան․ Պեսկով |tert.am|

tert.am: Ռուսաստանը Հայաստանին համարում է եղբայրական երկիր և հույս ունի, որ իրենք չեն ընտրի այն ճանապարհը, որը ժամանակին ընտրել էր Ուկրաինան։ Այս մասին հայտարարել է ՌԴ նախագահի մամուլի քարտուղար Դմիտրի Պեսկովը, փոխանցում է ՏԱՍՍ-ը։ Կրեմլում հարգանքով են վերաբերվում ԵՄ-ի հետ Հայաստանի համագործակցության ընդլայնմանը, բայց հույս ունեն, որ այն չի վնասի Մոսկվայի հետ Երևանի հարաբերությունների զարգացմանը։ Այս մասին այսօր հայտարարել է ՌԴ նախագահի մամուլի քարտուղար Դմիտրի Պեսկովը։«Մեր հույսը Հայաստանի քաղաքական իմաստությունն է։ Մենք հարգանքով ենք վերաբերվում նման փնտրտուքներին և չէինք ցանկանա, որ այդ որոնումները իրականացվեն այն կերպ, ինչպես ժամանակին արել էր Կիևի ռեժիմը, այսինքն՝ «կամ–կամ»,– սկզբունքով։ Քաղաքական տեսլականի այլընտրանքի բացակայությունն այն չէ, ինչ մենք կցանկանայինք տեսնել»,– մեկնաբանել է Պեսկովը` անդրադառնալով Հայաստանին 10 մլն եվրոյի ռազմատեխնիկական օգնություն տրամադրելու ԵՄ որոշումը։ «Հայաստանն ինքնիշխան երկիր է, ինքն է ընտրում փոխգործակցության առաջնահերթ ուղիները։ ՀՀ-ն մեր դաշնակիցն է, եղբայրական երկիր։ Մենք չէինք ցանկանա, որ նրան փնտրտուքները տանեին այն ճանապարհով, որը ժամանակին ընտրել էր Կիևի ռեժիմը»,- ասել ՌԴ նախագահի մամուլի քարտուղարը: «Ռուսաստանը մտադիր է զարգացնել հարաբերությունները ՀՀ-ի հետ»,- հայտարարել է Պեսկովը։

21:14 - 24 հուլիսի, 2024

Պեսկով․ «Թրամփի օրոք Մոսկվայի և Վաշինգտոնի միջև գոնե երկխոսություն կար» |azatutyun.am|

azatutyun.am: «Թրամփի նախագահության տարիներին Ռուսաստանի համար որևէ լավ բան չէր կատարվում, բայց գոնե երկխոսություն կար Մոսկվայի և Վաշինգտոնի միջև», - այսօր հայտարարել է Կրեմլի պաշտոնական ներկայացուցիչ Դմիտրի Պեսկովը։ «Թրամփի օրոք Ռուսաստանի դեմ նորանոր սահմանափակումներ էին մտցվում։ Երկխոսությանը առկայությունը, սակայն, կարելի է դասել դրական երևույթների թվին», - նշել է Պեսկովը՝ մեկնաբանելով ԱՄՆ 45-րդ նախագահի հայտարարությունը, թե իր պաշտոնավարման ընթացքում ինքը՝ «լավ հարաբերություններ է ունեցել Պուտինի հետ»։

16:18 - 17 հուլիսի, 2024

Ռուսաստանը երբեք չի միջամտել ԱՄՆ-ի ներքին գործերին․ Պեսկով |1lurer.am|

1lurer.am: Ռուսաստանը երբեք չի միջամտել ԱՄՆ-ի ներքաղաքական գործընթացներին և մտադիր է հետագայում ևս հավատարիմ մնալ այդ դիրքորոշմանը՝ հայտարարել է ՌԴ նախագահի մամուլի քարտուղար Դմիտրի Պեսկովը: Նրա խոսքով՝ Մոսկվան, այնուամենայնիվ, ուշադրությամբ հետևում է ԱՄՆ-ում տեղի ունեցող իրադարձություններին, այդ թվում՝ ԱՄՆ-ի ռազմական ծախսերին, քանի որ «Պենտագոնի վրա ավելի շատ գումար է ծախսվում, քան մյուս երկրների պաշտպանության նախարարությունների վրա՝ միասին վերցրած»: Կրեմլի խոսնակը հիշեցրել է, որ ԱՄՆ-ն ունի աշխարհի խոշորագույն տնտեսությունը և ռազմական առումով ամենահզոր երկիրն է, որը հսկայական գումարներ է հատկացնում Պենտագոնի կարիքներին: Նրա խոսքով՝ նման երկրում նախագահական ընտրապայքարի ժամանակ բռնության գործողություններըմտահոգություն են առաջացնում ամբողջ աշխարհում:

14:00 - 16 հուլիսի, 2024

Պուտինը Օրբանի միջոցով Թրամփին ոչ մի ուղերձ չի փոխանցել. Պեսկով |azatutyun.am|

azatutyun.am: Ռուսաստանի նախագահ Վլադիմիր Պուտինը Հունգարիայի վարչապետ Վիկտոր Օրբանի միջոցով ԱՄՆ նախկին նախագահ Դոնալդ Թրամփին ոչ մի ուղերձ չի փոխանցել։ Այդ մասին լրագրողներին հայտնել է Կրեմլի խոսնակ Դմիտրի Պեսկովը։ «Ոչ, պարոն Օրբանը Պուտինին չի տեղեկացրել Թրամփի հետ հանդիպելու մտադրության մասին և ոչ մի նամակ կամ հաղորդագրություն՝ ո՛չ գրավոր, ո՛չ բանավոր, չի փոխանցվել», - ասել է խոսնակը: Հուլիսի 5-ին Օրբանն այցելել է Մոսկվա, որտեղ Պուտինի հետ քննարկել է Ուկրաինայի հակամարտության կարգավորման հարցը, մինչ այդ՝ հուլիսի 2-ին, Օրբանն այցելել է Կիև, որտեղ հանդիպել է Ուկրաինայի նախագահ Վլադիմիր Զելենսկու հետ։ Հուլիսի 8-ին Օրբանը հանդիպել է Չինաստանի նախագահ Սի Ծինփինի հետ և նրա հետ էլ է մտքեր փոխանակել այդ ճգնաժամի կարգավորման հեռանկարների շուրջ։ Հունգարիայի վարչապետն այնուհետեւ մեկնել է ԱՄՆ, որտեղ մասնակցել է ՆԱՏՕ-ի գագաթնաժողովին, ինչպես նաև հանդիպել է Թրամփին։ Ամփոփելով այդ զրույցի արդյունքները՝ Հունգարիայի վարչապետն ասել է, որ ԱՄՆ նախկին նախագահը, եթե հաղթի նոյեմբերի ընտրություններում և վերադառնա Սպիտակ տուն, մտադիր է հասնել Ուկրաինայի հակամարտության կարգավորմանը։ Օրբանը Թրամփի հետ հանդիպումն անվանել է «խաղաղապահ առաքելություն 5.0»՝ նկատի ունենալով Կիև, Մոսկվա և Պեկին կատարած վերջին այցերը, ինչպես նաև Վաշինգտոնում ՆԱՏՕ-ի գագաթնաժողովի շրջանակում Թուրքիայի նախագահ Թայիփ Էրդողանի հետ հանդիպումը, որի ընթացքում նույնպես անդրադարձ է եղել ուկրաինական հակամարտությունը:

15:06 - 12 հուլիսի, 2024

ՌԴ-ն կշարունակի աշխատել Հայաստանի հետ՝ հստակեցնելու Երևանի դիրքորոշումը ՀԱՊԿ-ի վերաբերյալ․ Պեսկով

Ռուսաստանի Դաշնությունը կշարունակի աշխատել Հայաստանի հետ՝ հստակեցնելու Երևանի դիրքորոշումը ՀԱՊԿ-ի վերաբերյալ։ Այս մասին հայտարարել է ՌԴ նախագահի խոսնակ Դմիտրի Պեսկովը։ «Իհարկե, հուսով ենք, որ ամեն դեպքում հավատարիմ կմնանք գործընկերային և դաշնակցային հարաբերություններին։ Հավանաբար Հայաստանը նույնպես հետաքրքրված է դրանով», - ասել է Պեսկովը՝ մեկնաբանելով Փաշինյանի հայտարարությունները։ Հիշեցնենք, որ երեկ և այսօր ՀՀ վարչապետ Նիկոլ Փաշինյանը ելույթ ունենալով ԱԺ-ում չի բացառել, որ Հայաստանը կարող է ՀԱՊԿ-ից դուրս գալ․ «Է դուրս կգանք, դրանով էլ վախեցնո՞ւմ եք, լավ ենք անում, մենք կորոշենք՝ երբ դուրս գանք։ Բա ձեր կարծիքով հաջորդ քայլը որն ա, կարո՞ղ ա հետ գնանք, ուրիշ ճանապարհ չկա։ Գնում ենք դեպի իրական Հայաստան, ինքնիշխան, անվտանգ, սահմանազատված սահմաններով պետություն․․․ ուղղակի չենք ասում շուտ, որ ձեր տրամադրությունը հանկարծ չընկնի»,- հայտարարել էր Փաշինյանը։

14:27 - 13 հունիսի, 2024

Պեսկովը մեկնաբանել է Financial Times-ի տեղեկությունները Ռուսաստանում հնարավոր մոբիլիզացիայի մասին |1lurer.am|

1lurer.am: ՌԴ նախագահ Վլադիմիր Պուտինը բազմիցս ասել է, որ երկրում մոբիլիզացիայի կարիք չկա՝ ՌԻԱ Նովոստիին ասել է պետության ղեկավարի մամուլի քարտուղար Դմիտրի Պեսկովը։ Այսպես է նա մեկնաբանել Financial Times-ի հոդվածը, որում պարբերականի՝ ՌԴ ՊՆ-ին մոտ կանգնած աղբյուրը հայտնել է, որ մարտական գոտում հաջողությունները պահպանելու համար (օրինակ՝ Խարկովի մարզում և Դոնբասում առաջխաղացումները) Մոսկվային անհրաժեշտ կլինի մոբիլիզացիայի նոր ալիք: Նրա խոսքով՝ «մինչև այս տարվա վերջ կամ հաջորդ տարվա սկիզբ մասնակի մոբիլիզացիայի նոր ալիքն անխուսափելի կլինի»։ «Մեզ մոտ շատ ակտիվ է ընթանում պայմանագրային կամավորների հավաքագրումը, և դա արվում է ամեն օր։ Նախագահը բազմիցս ասել է, որ զինվորականների կարծիքով՝ մոբիլիզացիայի անհրաժեշտություն չկա»,- ասել Է Պեսկովը։ 2023 թվականի դեկտեմբերի 14-ին Պուտինը հայտարարել է կամավորներին բանակ ներգրավելու լայն արշավի մասին, ինչպես նաև բացառել երկրորդ մոբիլիզացիայի անհրաժեշտությունը: Նրա խոսքով՝ ամբողջ երկրում օրական 1500 հազար մարդ պայմանագիր է կնքում։

18:31 - 25 մայիսի, 2024

Ռուս սահմանապահները հայկական կողմի խնդրանքով չէ, որ մնում են սահմանի որոշ հատվածներում․ Գրիգորյանը հերքել է Պեսկովի հայտարարությունը

ՀՀ անվտանգության խորհրդի քարտուղար Արմեն Գրիգորյանը Հանրային ՀԸ-ին տված հարցազրույցում մեկնաբանել է Կրեմլի խոսնակ Դմիտրի Պեսկովի հայտարարությունները։ Վերջինս ասել էր, որ Վլադիմիր Պուտինն ու Նիկոլ Փաշինյանը հանդիպմանը համաձայնեցրել են Հայաստանի մի շարք մարզերից ՌԴ զինվորականների և սահմանապահների դուրսբերումը, սակայն հայկական կողմի խնդրանքով ռուս սահմանապահները կմնան հայ-թուրքական և հայ-իրանական սահմանին: Գրիգորյանը պարզաբանել է, որ սկզբում հայկական կողմը ՌԴ-ին առաջարկել է, որ Զվարթնոց օդանավակայանում միայն հայ սահմանապահները ծառայությունն իրականացնեն, ինչպես նաև քննարկումներ են սկսվել, որ հանվեն Սիսիանում և Գորիսում գոյություն ունեցող բազաները, որոնք ԼՂ-ում ռուս խաղաղապահներին էին աջակցում, ինչպես նաև ռուսական ներկայությունը դուրս գա Ներքին Հանդից։ ԱԽ քարտուղարի խոսքով ռուսական կողմը ընդունել է այդ առաջարկները։ «Եվ նրանք (ռուսական կողմը՝ խմբ․) հարցրել են՝ արդյոք Հայաստան-Թուրքիա և Հայաստան-Իրան սահմաններից էլ եք ասում, որ դուրս գանք։ Մենք ասել ենք, որ այս երեք ուղղություններով («Զվարթնոց», Ներքին Հանդի 17 կետ, Սիսիան-Գորիս հատված՝ խմբ․) բանավոր պայմանավորվածություն են։ Ինչ վերաբերում է Հայաստան-Թուրքիա և Հայաստան-Իրան սահմաններին, դրանք պայմանագրային են, մենք դա էս պահին ձեզ հետ (ռուսական կողմի՝ խմբ․) չենք քննարկում»,- ասաց Գրիգորյանը։ Լրագրողի դիտարկմանը, որ սա չի համընկնում Պեսկովի հայտարարությանը, քանի որ վերջինիս խոսքով հայկական կողմի խնդրանքով է մնում ռուսական ներկայությունը, Գրիգորյանն արձագանքել է․ «Մենք որևէ նման խնդրանք չենք ունեցել բնականաբար։ Ես պատմեցի այն, ինչ տեղի է ունեցել՝ թողնելով հանրության դատին եզրակացությունը»։ Հիշեցնենք, որ մայիսի 8-ին Նիկոլ Փաշինյանի և Վլադիմիր Պուտինի միջև համաձայնություն է ձեռք բերվել՝ 44-օրյա պատերազմի ընթացքում և դրանից հետո Տավուշի, Սյունիքի, Վայոց ձորի, Գեղարքունիքի, Արարատի մարզերում, ինչպես նաև «Զվարթնոց» օդանավակայանում տեղակայված ռուս սահմանապահ դուրս գալու մասին։ ՌԴ նախագահի մամուլի քարտուղար Դմիտրի Պեսկովը հաստատել էր ՌԴ զինվորականների և սահմանապահների դուրսբերումը և հայտարարել, որ հայկական կողմի խնդրանքով ռուս սահմանապահները կմնան հայ-թուրքական և հայ-իրանական սահմանին:

10:10 - 17 մայիսի, 2024

Հայկական կողմի խնդրանքով ռուս սահմանապահները կմնան հայ-թուրքական և հայ-իրանական սահմանին. Պեսկով

ՌԴ նախագահի մամուլի քարտուղար Դմիտրի Պեսկովը հաստատել է՝ Պուտինն ու Փաշինյանը երեկ համաձայնեցրել են Հայաստանի մի շարք մարզերից ՌԴ զինվորականների և սահմանապահների դուրսբերումը, սակայն հայկական կողմի խնդրանքով ռուս սահմանապահները կմնան հայ-թուրքական և հայ-իրանական սահմանին: «2020 թվականի աշնանը հայկական կողմի խնդրանքով մեր զինվորականները և սահմանապահները տեղակայվեցին մի շարք հայաստանյան մարզերում: Փաշինյանն ասել է, որ այսօր՝ պայմանների փոփոխությամբ պայմանավորված, այլևս նման անհրաժեշտություն չկա, ուստի նախագահ Պուտինը համաձայնել է, և համաձայնեցվել է մեր զինվորականների և սահմանապահների դուրսբերումը։ Կրկին հայկական կողմի խնդրանքով մեր սահմանապահները կմնան հայ-թուրքական և հայ-իրանական սահմանին և կշարունակեն կատարել իրենց գործառույթները»,- ասել է ՌԴ նախագահի խոսնակը Դմիտրի Պեսկովը «Ինտերֆաքս»-ին: Հիշեցնենք, որ Հայկ Կոնջորյանը հայտնել էր, որ ռուս սահմանապահները դուրս կգան Տավուշի, Սյունիքի, Վայոց ձորի, Գեղարքունիքի, Արարատի մարզերում տեղակայված կետերից, ինչպես նաեւ «Զվարթնոց» օդանավակայանից։

14:52 - 09 մայիսի, 2024

Մոսկվան և Կիևը 2022 թ. Ստամբուլի բանակցությունների ավարտին համաձայնագիր չեն ստորագրել Լոնդոնի ճնշման պատճառով. Պեսկով |1lurer.am|

1lurer.am: Ռուսաստանի նախագահի մամուլի քարտուղար Դմիտրի Պեսկովը հայտարարել է, որ Մոսկվան և Կիևը 2022 թվականին Ստամբուլում կայացած բանակցությունների ավարտին համաձայնագիր չեն ստորագրել Լոնդոնի ուղղակի ճնշման պատճառով: «Բոլորին քաջ հայտնի է, որ փաստաթուղթը փաստացի նախաստորագրվել էր, և բոլորին քաջ հայտնի է նաև ուկրաինական կողմի այդ բանակցությունների մասնակցի խոսքերից, թե ինչն է դարձել ուկրաինացիների՝ հետագայում դրանք շարունակելու և փաստաթղթի վրա աշխատանքն ավարտին հասցնելը մերժելու պատճառը»,- լրագրողների հետ զրույցում ասել է Կրեմլի ներկայացուցիչը: Նրա խոսքով՝ Ուկրաինայի Գերագույն ռադայում իշխող «Ժողովրդի ծառա» կուսակցության խմբակցության ղեկավար Դավիթ Արախամիան ինքն է հայտնել, որ դրա պատճառը Լոնդոնի կողմից ուղղակի ճնշումն էր:

17:43 - 27 ապրիլի, 2024