#armVote

2021 թվականի հունիսի 20-ին Հայաստանում կանխատեսվում են խորհրդարանական արտահերթ ընտրություններ: 

2021 թվականի մարտի 18-ին ՀՀ վարչապետ Նիկոլ Փաշինյանը հայտարարեց, որ այս որոշումը կայացվել է ՀՀ նախագահի, «Իմ քայլը» խմբակցության, «Լուսավոր Հայաստան» խմբակցության ղեկավար Էդմոն Մարուքյանի ու «Բարգավաճ Հայաստան» խմբակցության ղեկավար Գագիկ Ծառուկյանի հետ քննարկումներից հետո։

ՀՀ Սահմանադրությունը սահմանում է, որ խորհրդարանական արտահերթ ընտրություններ անցկացնելու համար Ազգային ժողովը պետք է արձակվի, դրա համար վարչապետը պետք է հրաժարական ներկայացնի, որից հետո 2 շաբաթում 2 անգամ անընդմեջ չընտրվի նոր վարչապետ, այնուհետեւ ոչ շուտ, քան 30 եւ ոչ ուշ, քան 45 օր հետո նշանակվեն նոր ընտրություններ։

Այս գործընթացի համար վարչապետը հրաժարական է ներկայացրել 2021 թվականի ապրիլի 25-ին, եւ արդեն մեկ անգամ չի ընտրվել։ Վարչապետի ընտրության հարցով հաջորդ նիստը կգումարվի մայիսի 10-ին։

Քաղաքական մի շարք ուժեր կարեւորում են նախքան ընտրությունները Ընտրական օրենսգրքի փոփոխությունների ընդունումը։ Խորհրդարանական մեծամասնությունը հայտարարել էր, որ Օրենսգրքում փոփոխություններ անելու որոշում ունեն, դրանցից որոշներն արդեն ընդունվել են, մասնավորապես, ռեյտինգային ընտրակարգը վերացվել է։ ԸՕ փոփոխությունների մեծ փաթեթը դեռեւս ընդունված չէ։

Կարող եք կատարել նվիրատվություն հետևյալ հղումով՝

Նվիրաբերել
Վարդենիս-Մարտունի ավտոճանապարհի փակման բողոքի ակցիան ավարտվեց, ճանապարհը բացվեց |armenpress.am|

Վարդենիս-Մարտունի ավտոճանապարհի փակման բողոքի ակցիան ավարտվեց, ճանապարհը բացվեց |armenpress.am|

armenpress.am: Այսօր իրականացված բողոքի ակցիայի արդյունքում մի քանի ժամ փակ էր մնացել Վարդենիս-Մարտունի միջպետական նշանակության ճանապարհը։ Բողոքի ակցիան իրականացրել էին Վարդենիսի ավագանու ձայների մեծամասնության քվեարկության արդյունքում 2021 թվականի դեկտեմբերի 30-ի ավագանու նիստում Վարդենիս խոշորացված համայնքի ղեկավար ընտրված Ահարոն Խաչատրյանի կողմնակիցները։ Բողոքի ակցիա իրականացնող քաղաքացիները պնդում էին, որ Վարդենիս խոշորացված համայնքի նորընտիր ղեկավարը չի կարողանում իրականացնել իրականացնել իր լիազորությունները, քանի որ նրա աշխատանքի համար ստեղծվում են տարբեր խոչընդոտներ, մասնավորապես, համայնքապետին նախկին իշխանությունները չեն հանձնում համայնքապետի աշխատասենյակի կնիքը եւ բանալիները։ Բողոքի ակցիային նախորդել էր Վարդենիս համայնքի ավագանու նիստը։ Բողոքի ակցիա իրականացնողների հետ ճանապարհը բացելու բանակցություններ էր վարում ՀՀ Ոստիկանության Գեղարքունիքի մարզային վարչության պետ Արթուր Մկրտչյանը։ Բողոքի ակցիան ավարտվեց ժամը 16-ի սահմաններում, երբ ճանապարհը փակած մարդկանց խմբի հետ հանդիպելու եկավ Վարդենիս խոշորացված համայնքի ղեկավար ընտրված Ահարոն Խաչատրյանը։ Նա հայտնեց, որ կայացել է զրույց  իր եւ Գեղարքունիքի մարզպետի միջեւ, եւ հույսեր կան, որ առաջիկա 10 օրերի ընթացքում իրավիճակը լիովին կկարգավորվի, աշխատանքները կմտնեն բնականոն հունի մեջ։ «Կոչ եմ անում ավարտել քաղաքական ակցիան, բացել ճանապարհը եւ անցնել ձեր առօրյա հոգսերին։ Հուսով եմ, որ առաջիկա օրերին խնդիրը կկարգավորվի»,-ներկաներին դիմեց Ահարոն խաչատրյանը։ Այդ կոչից հետո բողոքի ակցիայի նախաձեռնողները բացեցին ճանապարհը։
17:03 - 08 փետրվարի, 2022
«Ուզում ենք համայնքապետ լինի Ահարոն Խաչատրյանը». քաղաքացիները փակել են Մարտունի–Վարդենիս ճանապարհը |news.am|

«Ուզում ենք համայնքապետ լինի Ահարոն Խաչատրյանը». քաղաքացիները փակել են Մարտունի–Վարդենիս ճանապարհը |news.am|

news.am: Քաղաքացիները փակել են Մարտունի-Վարդենիս ճանապարհը եւ պահանջում են Վարդենիս խոշորացված համայնքի ղեկավար ընտրված Ահարոն Խաչատրյանին տալ համայնքապետի աշխատասենյակի բանալին եւ կնիքը: Նրանք հայտարարեցին, որ ճանապարհը բաց է միայն շտապօգնության եւ ռազմական մեքենաների համար, մյուսների համար ոչ մի դեպքում ճանապարհը չի բացվելու:  «Ինձ համար աշխատող ուժը Ահարոն Խաչատրյանն է: Ինքը կարա մեր շրջանի համար սրտացավ մի բան անի»,-ասաց Ծովակ գյուղի բնակիչներից մեկը: Դեկտեմբերի 5-ին կայացած ՏԻՄ ընտրություններում այս համայնքում «Քաղաքացիական պայմանագիր» կուսակցությունը ստացել էր 13 մանդատ, «Ահարոն Խաչատրյան» դաշինքը՝ 10, «Միասնական Վարդենիս»-ը՝ 4 մանդատ: Ընդդիմադիր ուժերն ընտրություններից հետո կոալիցիա կազմելու հուշագիր էին ստորագրել և համայնքապետ ընտրել Ահարոն Խաչատրյանին: ՔՊ-ն, սակայն, հայտարարել էր, որ քաղաքապետի ընտրությունն անօրինական է, չէին ընդունել ընտրությունների արդյունքները և դիմել էին վարչական դատարան: Ահարոն Խաչատրյանի երդման արարողությունը տեղի է ունեցել համայնքապետարանի շենքի բակում, քանի որ երդման արարողության օրը ոստիկանության մեծաթիվ աշխատակիցներ թույլ չէին տվել ավագանու անդամներին ներս մտնել:
15:08 - 08 փետրվարի, 2022
Բողոքի ցույց՝ Բերդաշենում․ ՔՊ-ականները հրաժարվում են  համայնքապետարանի փաստաթղթերը հանձնել Ամասիայի նորընտիր համայնքապետին |factor.am|

Բողոքի ցույց՝ Բերդաշենում․ ՔՊ-ականները հրաժարվում են համայնքապետարանի փաստաթղթերը հանձնել Ամասիայի նորընտիր համայնքապետին |factor.am|

factor.am: Շիրակի մարզի Արփի համայնքի նախկին վարչական կենտրոնում՝ Բերդաշենում, այս պահին բողոքի ցույց է տեղի ունենում։ ՔՊ-ականներն ու նրանց համակիրները պահանջում են նոր ընտրություններ։ Նրանք դիմել են  նաև դատարան և հրաժարվում են համայնքապետարանի փաստաթղթերը հանձնել Ամասիայի նորընտիր համայնքապետ Ջեմմա Հարությունյանի ներկայացուցիչներին։ «Մենք չենք թողնի փաստաթղթերը հանձնեն, Արփիում ՔՊ-ն 90 տոկոսով ձայն տարավ, ինչի՞ պիտի փաստաթղթղերը հանձնենք։ Մենք ո՛չ մարզպետ ունենք, ո՛չ էլ դեպուտատ, էն ժամանակ, երբ որ ձայն էր պետք, նույն մարզպետը, նույն դեպուտատը կաղաչեին մեզ։ Էսօր մենք են մեր տերը։ Ջեմմա Հարությունյանը չի մոտենալու շենքին ու վերջ»,- ասսում էին բողոքավորները։ ՔՊ-ի ցուցակը գլխավորող Մերգել Ղարիբյանը, որը Արփիի նախկին համայնքապետն էր, մեզ հետ զրույցում ասաց, որ ինքը չի հանձնել փաստաթղթերը, քանի որ Արփի համայնքի բնակչությունը թույլ չի տալիս։ Նա նաև նշեց, որ ընդունող-հանձնող հանձաժողովի ներկայացուցիչները եկել են Արփի՝ առանց Ջեմմա Հարությունյանի։ «Նրանք ներս են մտել, մենք ասինք՝ ժողովրդի պահանջն է, չենք հանձնում թղթերը,  90 տոկոսը մեր օգտին է քվեարկել։ Թողեցին, հեռացան»,-ասաց Մերգել Ղարիբյանը։
15:43 - 03 փետրվարի, 2022
Ընտրական հանձնաժողովի անդամի կեղծ վկայականներ՝ Լոռիում. մարզի դատախազը ԿԸՀ-ին միջնորդագիր է հասցեագրել

Ընտրական հանձնաժողովի անդամի կեղծ վկայականներ՝ Լոռիում. մարզի դատախազը ԿԸՀ-ին միջնորդագիր է հասցեագրել

2021թ. մայիսի 31-ին ՀՀ ոստիկանության Տարոնի բաժնում ՀՀ քրեական օրենսգրքի 325-րդ հոդվածի 1-ին մասով հարուցված քրեական գործով ՀՀ ՔԿ Լոռու մարզային վարչությունում կատարված նախաքննությամբ հիմնավորվել է, որ համապատասխան պայմանագրի հիման վրա ՀՀ կենտրոնական ընտրական հանձնաժողովի կողմից գործուղղված դասընթացավարը ընտրությունների մասնագիտական դասընթաց և որակավորման ստուգարքներ անցկացնելու շրջանակներում կազմել է պաշտոնական փաստաթուղթ, որում բովանդակությամբ կեղծ տեղեկություններ է ներառել 4 անձի կողմից իր վարած դասընթացին մասնակցելու, հարցաթերթիկ լրացնելու և դրական գնահատական ստանալու մասին: Դրանց հիման վրա վերջիններս իրավունք են ստացել հանդիսանալ տեղամասային ընտրական հանձնաժողովի անդամ: Մինչդեռ, նախաքննությամբ հաստատվել է, որ հիշյալ 4 անձինք դասընթացին և որակավորման ստուգարքին չեն մասնակցել, քանի որ տվյալ ժամանակահատվածում գտնվել են Երևան քաղաքում:  ՀՀ կենտրոնական ընտրական հանձնաժողովից ստացված գրության համաձայն՝ թեև նշված անձինք ստացել են տեղամասային ընտ­րական հանձնաժողովում ընդգրկվելու որակավորման վկայական, սակայն դրա հիման վրա որևէ անգամ չեն ընդգրկվել հանձնաժողովի կազ­մում: Վարույթն իրականացնող մարմինը գտել է, որ թեև դասընթացավարի գործողությունները ձևականորեն պարունակել են փաստաթղթերի կեղծման հանցագործության հատկանիշներ, սակայն այդ արարքը լուրջ հանրային վտանգավորություն չի ներկայացրել, քանի որ՝ որպես հետևանք՝ հասարակությանը կամ պետությանը էական վնաս չի պատճառվել, հիշյալ անձինք որևէ անգամ չեն ընդգրկվել տեղամասային ընտրական հանձնաժողովի կազմում: Բացի այդ, քննությամբ տվյալներ չեն ստացվել նաև այդ 4 անձանց կողմից ընտ­րական հանձնաժողովում ընդգրկվելու որակավորման վկայականն այլ նպատակներով օգտագործելու, ինչպես նաև պաշտոնական փաստաթուղթ կեղծելու կապակցությամբ դասընթացավարին օժանդակելու վերաբերյալ: Ելնելով դրանից՝ կայացվել է վարույթը կարճելու և քրեական հետապնդում չիրականացնելու որոշում: Այդուհանդերձ քրեական գործի նախաքննությամբ հաստատվել է, որ վերը նշված դասընթացի կազմակերպման և անցկացման գործընթացում տեղ են գտել ակնհայտ թերություններ և բացթողումներ: Մասնավորապես՝ չի պահպանվել որակաորման վկայական ստանալու համար կազմակերպված դասընթաց անցկացնելու և ստուգարք ընդունելու կարգը, առերևույթ կատարվել է փաստաթղթին կեղծիք: Ելնելով դրանից՝ ՀՀ Լոռու մարզի դատախազը միջնորդագիր է հղել ՀՀ կենտրոնական ընտրական հանձնաժողովի նախագահին: Հաշվի առնելով ընտրական գործընթացների օրինականության ապահովման՝ պետության և հասարակության համար բացառիկ կարևորությունը՝ մարզի դատախազն առաջարկել է անհրաժեշտ միջոցառումներ ձեռնարկել ընտրությունների անցկացման մասնագիտական դասընթացների և որակավորման ստուգարքներ ընդունելու գործընթացը սահմանված կարգին համապատասխան և վերահսկողության պայմաններում իրականացնելու, դրանց չմասնակցելու պայմաններում անձանց կողմից որակավորման վկայական ստանալու հնարավորությունը բացառելուն ուղղված մեխանիզմներ կիրառելու ուղղությամբ:
16:15 - 27 հունվարի, 2022
Փարաքարի բնակիչները բողոքի ակցիա են անում Կառավարության բակում, համայնքի բանկիչների 60 տոկոսը միացել է արտահերթ ընտրություններ իրականցնելու ստորագրահավաքին |tert.am|

Փարաքարի բնակիչները բողոքի ակցիա են անում Կառավարության բակում, համայնքի բանկիչների 60 տոկոսը միացել է արտահերթ ընտրություններ իրականցնելու ստորագրահավաքին |tert.am|

tert.am: Փարաքար համայնքի բնակիչների 60 տոկոսը միացել է արտահերթ ընտրություններ անցակացնելու պահանջով ստորգրահավաքին։ Այս մասին կառավարության դիմաց բողոքի ակցիաի ժամանակ տեղեկացրին համայնքի բնակիչները։ Նրանք պահանջում են, որ կառավարությունը պատասախանի «Ապրելու երկիր» խմբակցությունը հունվարի 3-ին կառավարությանը ներկայացրած պահանջին՝ արտահերթ ընտրություններ անցկացնելու հետ կապված։ Բողոքի ակցիայի մասանակիցները վկայկոչում էին ՏԻՄ օրենքը, ըստ որի՝ եթե երկշաբաթյա ընթացքում համայնքի ղեկավար չի ընտրվում, ապա Կառավարությունը նշանակում է արտահերթ ընտրություններ և հիշեցնում էին, թե ինչպիսի խախատումներով է համայքի ղեկավար ընտրվել։ Բողոքի ակցիային մասանակցում էր նաև «Ապրելու երկիր» խմբակցության կողմից համայնքի ղեկավարի թեկնածու Վոլոդյա Գրիգորյանը, ով լրագրողների հետ զրույցում պարազաբնեց, թե ինչու էր հայտարարել, որ ավագանու մանդատները վայր են դնում։
12:16 - 20 հունվարի, 2022
Անթույլատրելի է որեւէ կալանավորի թույլ տալ համայնքային որեւէ  ընտրության նպատակով բացակայել ՔԿՀ-ից․ նախարարն անդրադարձավ Վանաձորի ավագանու նիստին Մ․ Ասլանյանի մասնակցության հարցին

Անթույլատրելի է որեւէ կալանավորի թույլ տալ համայնքային որեւէ ընտրության նպատակով բացակայել ՔԿՀ-ից․ նախարարն անդրադարձավ Վանաձորի ավագանու նիստին Մ․ Ասլանյանի մասնակցության հարցին

Անցյալ դեկտեմբերին Վանաձորի ՏԻՄ ընտրություններում Վանաձորի նախկին ղեկավար Մամիկոն Ասլանյանի անունով ստեղծված դաշինքը հաղթահարել էր անցողիկ շեմը՝ ստանալով ձայների 38,70 տոկոսը, «Քաղաքացիական պայմանագիրը» ստացել էր 25.06 տոկոս, «Հայաստանի աշխատավորական սոցիալիստական» կուսակցությունը՝ 14,53 տոկոս, «Հայրենիք» կուսակցությունը՝ 4,48 տոկոս, և «Ապրելու երկիրը»՝ 4,29 տոկոս։ ԱԺ-ում կառավարության հետ հարց ու պատասխանի ժամանակ ԱԺ «Հայաստան» խմբակցության պատգամավոր Արմինե Կյուրեղյանը նշեց, որ Մամիկոն Ասլանյան դաշինքին 15 մանդատ է վստահվել արդյունքում, նրա խոսքով՝ քաղաքացիների ակնկալիքը եղել է այն, որ հենց Ասլանյանն էլ կլինի քաղաքապետ․ «Անմիջապես հետո Ալսանյանին կալանավորելու գործընթաց է հետեւել։ Հաշվարկում կար այն, որ 15 մանդատը կդառնար 14, եթե նույնիսկ 2 մանդատ միանա, 16-16-ով քաղաքապետ չեն ընտրի, որովհետեւ նա ձեր ուզած քաղաքապետը չէ։ Մինչեւ հիմա այդ մարդուն քրեակատարողական հիմնարկում եք պահում, չնայած այս դեպքում կալանավորումը կարելի էր որպես խափանման միջոց չօգտագործել»,- ասաց Կյուրեղյանը, եւ, դիմելով Արդարադատության նախարարին՝ մեջբերեց ՀՀ Սահմանադրության 48-րդ հոդվածը, որի 4-րդ կետի համաձայն՝ ՏԻՄ մարմիններ ընտրվելու եւ ընտրելու իրավունք չունեն դատարանի օրինական վճռով դատապարտվածները․ այդ ցանկի մեջ, Կյուրեղյանի խոսքով, Մամիկոն Ասլանյանը չի մտնում, ուստի նա պետք է մասնակցի ավագանու առաջին նիստին՝ որպես ընտրող եւ ընտրվող։ Նա  հարց հնչեցրեց՝ մասնակցելո՞ւ է արդյոք Ասլանյանն այդ նիստին, ո՞վ է ապահովելու նրա մասնակցությունը, ի՞նչ մեխանիզմներով։ Արդարադատության նախարար Կարեն Անդրեասյանը, անդրադառնալով հարցի քաղաքական մասին, նշեց, որ բազմաթիվ տեղերում ընտրվել են իշխանական ուժը չներկայացնող համայնքապետեր, եղել են համայնքներ, որտեղ «Քաղաքացիական պայմանագրի» թեկնածում ունեցել է 40-ից ավելի տոկոս, բայց ընտրվել է մեկ այլ թեկնածու․ «Ինչ վերաբերում է հարցի իրավական կողմին՝ այստեղ նույնիսկ կար հարցում ՄԻՊ-ին, թե ինչպես կարող է ՔԿՀ-ն ապահովել մարդու ընտրվելու իրավունքը։ Մենք սա գրել ենք ՄԻՊ-ին, փաստաբանին, որ օրենսդրությունը որեւէ կերպ չի նախատեսում սահմանադրական այդ իրավունքի իրացումն այն դեպքերում, երբ անձը կալանքի տակ է։ Կան թույլտվության մեխանիզմներ, թե մարդը, որը կալանավորված է, երբ կարող է լքել ՔԿՀ-ն։ Մենք ՄԻՊ-ին ներկայացրել ենք, որ, ցավոք, ՔԿՀ ղեկավարը, կամ Արդարադատության նախարարն իրավասու չեն մեկնաբանել կամ կոնկրետ քայլ անել, որը դուրս է իրենց լիազորություններից։ Նախարարության իմաստով ուղղակի անթույլատրելի է որեւէ կալանավորի թույլ տալ որեւէ համայնքային ընտրութան նպատակով բացակայել ՔԿՀ-ից»,- ասաց Կարեն Անդրեասյանը։
17:27 - 19 հունվարի, 2022
«Ապրելու երկիր» կուսակցությունը Փարաքարում արտահերթ ընտրություններ անցկացնելու պահանջով դիմել է կառավարությանը

«Ապրելու երկիր» կուսակցությունը Փարաքարում արտահերթ ընտրություններ անցկացնելու պահանջով դիմել է կառավարությանը

«Ապրելու երկիր» կուսակցությունը Փարաքար համայնքում արտահերթ ընտրություններ անցկացնելու պահանջով դիմել է կառավարությանը․ ««Ապրելու երկիր» խմբակցությունը, 03․01․2022թ․ դիմել է ՀՀ կառավարությանը Փարաքար համայնքի ավագանու լիազորությունները վաղաժամկետ դադարեցնելու և նոր ընտրություններ նշանակելու խնդրանքով՝ հիմք ընդունելով «Տեղական ինքնակառավարման մասին» օրենքի 69-րդ հոդվածի 2-րդ մասը։ Օրենքով սահմանված երկշաբաթյա ժամկետը լրացել է 2022թ հունվարի 3-ին։ Նույնանման հանգամանքներով մեկ այլ՝ Վեդի համայնքի դեպքում ՀՀ կառավարության 2022թ հունվարի 4-ի որոշմամբ վաղաժամկետ դադարեցվել են Արարատի մարզի Վեդի համայնքի ավագանու լիազորությունները և նշանակվել են ավագանու արտահերթ ընտրություններ։ Ընդ որում, հունվարի 4-ին ՀՀ կառավարությունը այդ որոշումը կայացրել է հեռակա քվեարկությամբ՝ չսպասելով հունվարի 5-ի հերթական նիստին՝ նպատակ ունենալով պահպանել օրենքով սահմանված ժամկետները։ 2021թ․ դեկտեմբերի 20-ին տեղի է ունեցել ՀՀ Արմավիրի մարզի Փարաքար համայնքի ավագանու առաջին նիստը, և համայնքի ղեկավար է «ընտրվել» հունվարի 9-ի նիստին՝ 21-րդ օրը՝ օրենքի կոպիտ խախտումներով։ Այս փաստը հիմք է ՀՀ կառավարության կողմից օրենքի ուժով ՀՀ Արմավիրի մարզի Փարաքար միավորված համայնքի ավագանու լիազորությունները վաղաժամկետ դադարեցնելու և ավագանու արտահերթ ընտրություններ նշանակելու համար։ Սակայն, ՀՀ կառավարությունը նման որոշում չի կայացրել ոչ միայն սեփական նախաձեռնությամբ, այլև «Ապրելու երկիր» խմբակցության կողմից 2022թ հունվարի 3-ի և հունվարի 5-ի ներկայացված դիմումների հիման վրա։ Ավելին, կառավարությունը մինչև այժմ չի պատասխանել խմբակցության նամակին՝ սպասելով քաղաքական որոշման։ Այս կապակցությամբ, «Ապրելու երկիր» խմբակցությունը դիմելու է դատարան՝ կառավարության անգործության հիմքով և կառավարության կողմից իր պարտականությունների կատարման պահանջով։ «Ապրելու երկիր» կուսակցությունը Փարաքար համայնքում հավաքել է ձայների 49%-ը, «Քաղաքացիական պայմանագիր» կուսակցությունը՝ 27%: Համայնքի ութ բնակավայրերից երեքում «Ապրելու երկիր» կուսակցությունը հավաքել է 77-85% ձայներ»։
13:56 - 13 հունվարի, 2022
Խառնաշփոթ իրավիճակ է, որը պետք է իր վերջնական հանգուցալուծումը գտնի․ Դավիթ Շահնազարյանը՝ Վարդենիսի ՏԻՄ ընտրություններից հետո ստեղծված իրավիճակի մասին

Խառնաշփոթ իրավիճակ է, որը պետք է իր վերջնական հանգուցալուծումը գտնի․ Դավիթ Շահնազարյանը՝ Վարդենիսի ՏԻՄ ընտրություններից հետո ստեղծված իրավիճակի մասին

Անհասկանալի, խառնաշփոթ իրավիճակ է ստեղծվել, որը պետք է իր վերջնական հանգուցալուծումը գտնի։ Վարդենիսի ՏԻՄ ընտրություններից հետով ստեղծված իրավիճակի վերաբերյալ մամուլի ասուլիսի ընթացքում ասաց «Միասնական Վարդենիս» կուսակցությունների դաշինքի ներկայացուցիչ Դավիթ Շահնազարյանը։ Շահնազարյանը հիշեցրեց, որ դեկտեմբերի 5-ին Վարդենիս խոշորացված համայնքի ՏԻՄ ընտրություններում երեք քաղաքական ուժ էր մասնակցում՝ «Ահարոն Խաչատրյան» և «Միասնական Վարդենիս» դաշինքները և «Քաղաքացիական պայմանագիր» կուսակցությունը․ «Ընտրությունների արդյունքում ձևավորվեց մի իրավիճակ, որտեղ 10 մանդատ ստացավ «Ահարոն Խաչատրյան» դաշինքը, նախնական արդյունքներով 5 մանդատ ստացավ «Միասնական Վարդենիս» դաշինքը, և 12 մանդատ՝ «Քաղաքացիական պայմանագիր» կուսակցությունը։ Կասկածելի վերահաշվարկի արդյունքում «Միասնական Վարդենիս» դաշինքի մեկ մանդատը պակասեցվեց և «Միասնական Վարդենիս» դաշինքը ունեցավ 4 մանդատ։ Իհարկե, կասկածելի եմ ասում այն պատճառով, որ այստեղ մեկ մանդատը արժեցավ ընդամենը մեկ քվե, և այս մեկ քվեն որոշիչ եղավ, այդ իսկ պատճառով մեր մանդատների թիվը մեկով պակասեց»։ Նրա խոսքով՝ ընտրական հանձնաժողովներին դիմելուց հետո նաև վարչական դատարան են դիմել․ «Վարչական դատարանը վճիռ կայացրեց և անփոփոխ թողնվեց ընտրական հանձնաժողովի արդյունքները, ինչը, մեր կարծիքով, իրավաչափ  չէր, որովհետև հայերեն «բ» տառը, չգիտես ինչու, նմանեցվեց լատինական V տառին և վավեր համարվեց համապատասխան քվեաթերթիկները, այսինքն՝ ակնհայտ շեղումով քվեաթերթիկները, որոնք անվավեր պետք է ճանաչվեին, վավեր ճանաչվեցին, և որևէ փոփոխություն տեղի չունեցավ։ Մեր դաշինքի առաջատարին՝ Արամ Հարությունյանին, ինչպես հայտնի է, կանչեցին քննչական բաժանմունք, ձերբակալեցին, այնուհետև ենթարկեցին երկամսյա կալանքի, ինչը մեր տեսակետից խիստ քաղաքական որոշում էր, որովհետև եթե այն տեղավորովում է քրեական իրավունքի դաշտում, ապա մարդը քրեական դատավարության տեսակետից տարիներ շարունակ որևէ ուշադրության չարժանացավ, և այդ անհրաժեշտությունը առաջացավ այն դեպքում, երբ նա հրաժարվեց կոալիցիոն հուշագիր ստորագրել «Քաղաքացիական պայմանագիր» կուսակցության հետ, և սրանից հետո անհրաժեշտություն առաջացավ, որպեսզի նրան ձերբակալեն»։ Նրա խոսքով՝ բոլոր որոշումները, որոնք կայացվել են, խիստ քաղաքական որոշումներ են և չեն տեղավորվում իրավական հարթության մեջ․ «Բոլորդ էլ ականատես եղաք Վարդենիս համայնքի ավագանու առաջին նիստին, որտեղ երկու խմբակցությունների ավագանիներին դուրս բերեցին ավագանիների նիստերի դահլիճից, աննախադեպ մի երևույթ, որը երբիցե ՀՀ պատմության մեջ տեղի չէր ունեցել, և այս ամենով հանդերձ դեռ որևէ բան ավարտված չէ, անհասկանալի մի խառնաշփոթ իրավիճակ է ստեղծվել, որը պետք է իր վերջնական հանգուցալուծումը գտնի։ Մենք ակնկալում ենք իրավաչափ և իրավական լուծումներ, և ակնկալում ենք, որ այս հարցը ի վերջո իրավական հարթության մեջ իր ճիշտ և համապատասխան գնահատականը կստանա»։ Դեկտեմբերի 5-ին կայացած ՏԻՄ ընտրություններին Վարդենիս խոշորացված համայնքում երեք քաղաքական ուժ է մասնակցել՝ «Քաղաքացիական պայմանագիր» կուսակցությունը, «Միասնական Վարդենիս» և «Ահարոն  Խաչատրյան» դաշինքները։ Ընտրությունների արդյունքում 2 ընդդիմադիր խմբակցությունները միասին  ունեցել են 15 մանդատ, ՔՊ-ն՝ 12 մանդատ։ Վերահաշվարկի արդյունքում «Միասնական Վարդենիսից» մեկ մանդատ տրվել է  ՔՊ-ին։ Արդյունքում ավագանու կազմում 14 մանդատ ունեցան երկու դաշինքները, 13 մանդատ՝ ՔՊ։ Անցած տարվա դեկտեմբերի 30-ին տեղի էր ունեցել Վարդենիսի ավագանու առաջին նիստը, որտեղ ընդդիմադիր խմբակցությունները համայնքապետ էին ընտրել Ահարոն Խաչատրյանին։ «Քաղաքացիական պայամանագիր» կուսակցության համայնքապետի թեկնածու Արամ Մելքոնյանը, սակայն, հայտարարել էր, որ դիմելու են վարչական դատարան՝ պահանջելով ավագանու այդ նիստը չեղյալ համարել։
17:26 - 11 հունվարի, 2022
Ոստիկանական ուժերի ներքո Փարաքարում փորձում են համայնքի ղեկավար ընտրել |hetq.am|

Ոստիկանական ուժերի ներքո Փարաքարում փորձում են համայնքի ղեկավար ընտրել |hetq.am|

hetq.am: Փարաքար խոշորացված համայնքում իրավիճակը դարձյալ լարված է։ Այսօր ժամը 10-ին հրավիրվել է նորընտիր ավագանու նիստ, որը, սակայն, տեղի չի ունենում լարվածության պատճառով։ «Ապրելու երկիր» կուսակցության ցուցակի առաջին համար, ավագանու անդամ Վոլոդյա Գրիգորյանը «Հետքի» հետ զրույցում ասաց, որ իրենց խմբակցության անդամները ժամը 10-ին եկել են, սակայն դրսում լարվածություն է առաջացել, և իրենց թույլ չեն տվել մտնել դահլիճ։ Երբ որոշ ժամանակ անց ներս են մտել, պարզել են, որ ավագանու նիստը բացել է ավագանու՝ տարիքով ոչ ավագ անդամը՝ «Դավիթ Մինասյան» դաշինքից ընտրված Նեկտար Սարդարյանը։ Նշենք, որ ավագանու տարեց անդամը «Ապրելու երկիր» խմբակցությունից է։ Նեկտար Սարդարյանն ասաց՝ քանի որ ավագանու տարեց անդամը չէր ներկայացել, իրենց խմբակցության տարեց անդամն էլ ինքն է, որոշել են, որ հենց ինքն էլ նիստը կվարի։ Հիշեցնենք, որ երկու կողմերն էլ հայտարարում էին, թե իրենց թեկնածուն է ընտրվել։ Փաստացի ստացվել էր, որ համայնքն ունի երկու համայնքապետ: 2021թ. դեկտեմբերի 30-ին վարչական դատարանն անվավեր է ճանաչել Վոլոդյա Գրիգորյանին համայնքապետ ընտրելու՝ ավագանու որոշումը։ Դրանից հետո ավագանին հունվարի 5-ին դարձյալ նիստ էր հրավիրել, որը չէր կայացել, այսօր նույնպես նիստը կարող է չկայանալ։
12:13 - 07 հունվարի, 2022
Գարիկ Սարգսյանը նշանակվել է Արարատի մարզի Վեդի համայնքի ղեկավարի պաշտոնակատար

Գարիկ Սարգսյանը նշանակվել է Արարատի մարզի Վեդի համայնքի ղեկավարի պաշտոնակատար

Վարչապետ Նիկոլ Փաշինյանի որոշմամբ՝ Գարիկ Սարգսյանն ազատվել է ՀՀ պետական գույքի կառավարման կոմիտեի նախագահի պաշտոնից: «Ղեկավարվելով «Հանրային ծառայության մասին» օրենքի 9-րդ հոդվածի 7-րդ մասով՝ Գարիկ Սարգսյանին ազատել պետական գույքի կառավարման կոմիտեի նախագահի պաշտոնից»,- ասված է որոշման մեջ: Վարչապետի մեկ այլ որոշմամբ՝ Գարիկ Սարգսյանը նշանակվել է Հայաստանի Հանրապետության Արարատի մարզի Վեդի համայնքի ղեկավարի պաշտոնակատար: «Տեղական ինքնակառավարման մասին» օրենքի 27-րդ հոդվածի 2.1-ին մասին համապատասխան՝Գարիկ Սարգսյանին նշանակել Հայաստանի Հանրապետության Արարատի մարզի Վեդի համայնքի ղեկավարի պաշտոնակատար»,- ասված է որոշման մեջ: Հիշեցնենք, որ ավելի վաղ հայտնի էր դարձել, որ Թիվ 13 տարածքային ընտրական հանձնաժողովն ուժը կորցրած է ճանաչել Վեդի համայնքում կայացած ՏԻՄ ընտրությունների արդյունքներով ավագանիում մանդատներ ստացած «Քաղաքացիական պայմանագիր» և «Հանրապետություն» կուսակցությունների ցուցակների բոլոր թեկնածուների գրանցումը:  Իսկ երեկ հայտնի դարձավ, որ Կառավարության որոշմամբ վաղաժամկետ դադարեցվել են Վեդի համայնքի ավագանու լիազորությունները, և համայնքում նշանակվել են ավագանու արտահերթ ընտրություններ։
10:10 - 05 հունվարի, 2022
Դատարանն անվավեր է ճանաչել Փարաքարի ավագանու որոշումը |1lurer.am|

Դատարանն անվավեր է ճանաչել Փարաքարի ավագանու որոշումը |1lurer.am|

1lurer.am:  Վարչական դատարանն անվավեր է ճանաչել Փարաքարի ավագանու որոշումը՝ համայնքի ղեկավարի ընտրության վերաբերյալ: Դատարան դիմել էին «Քաղաքացիական պայմանագիր» կուսակցությունն ու «Դավիթ Մինասյան» դաշինքը: Դեկտեմբերի 5-ի ընտրությունների արդյունքում Փարաքարում «Ապրելու երկիր» կուսակցությունը ստացել էր 10 մանդատ, «Դավիթ Մինասյան» դաշինքը՝ 9, «Քաղաքացիական պայմանագիրը»՝ 2: Համայնքի ղեկավարի պաշտոնում ընտրվելու համար «Ապրելու երկիր» կուսակցության թեկնածուն ստացել էր 10 ձայն, իսկ մյուս երկու ուժերը զրկված էին եղել թեկնածու առաջադրելու և քվեարկելու հնարավորությունից: Դեկտեմբերի 23-ին «Ապրելու երկիր» կուսակցության աջակիցները հավաքվել էին Փարաքարի մշակույթի տան բակում, երդմնակալություն անցկացրել: Ոստիկանները թույլ չէին տվել նրանց մտնել համայնքապետարան, որից հետո ոստիկանների և կուսակցության համակիրների միջև բախում էր եղել: Նույն օրը «Դավիթ Մինասյան» կուսակցությունների դաշինքն ու «Քաղաքացիական պայմանագիրը» դիմել էին դատարան: Ավագանին նիստ կգումարի տոներից հետո, կոնկրետ օրը կորոշի աշխատակազմը: Օրակարգում ներառված կլինի համայնքի ղեկավարի ընտրության հարցը:  
14:18 - 31 դեկտեմբերի, 2021
Վարդենիս խոշորացված համայնքում ավագանու անդամների մանդատներն արդեն բաշխվել են

Վարդենիս խոշորացված համայնքում ավագանու անդամների մանդատներն արդեն բաշխվել են

Գեղարքունիքի մարզի թիվ 21 տարածքային ընտրական հանձնաժողովում արդեն բաշխվել են Վարդենիս խոշորացված համայնքի ավագանու անդամների մանդատները։ Ինչպես տեղեկացրին Գեղարքունիքի մարզի թիվ 21 տարածքային ընտրական հանձնաժողովից, Վարդենիս համայնքի ավագանու 27 մանդատներից 13-ը բաժին է հասել «Քաղաքացիական պայմանագիր» կուսակցությանը, 10 մանդատ՝ «Ահարոն Խաչատրյան» կուսակցությունների դաշինքին, 4 մանդատ՝ «Միասնական Վարդենիս» կուսակցությունների դաշինքին։ «Քաղաքացիական պայմանագիր» կուսակցությունից Վարդենիս խոշորացված համայնքի ավագանու անդամի մանդատներ են շնորհվել Արամ Մելքոնյանին, Արտակ Մանուկյանին, Մելանյա Եփրեմյանին, Մուշեղ Շաբոյանին, Կարեն Սիմոնյանին, Նաիրա Մանուչարյանին, Հայկ Երանոսյանին, Ռաֆայել Խչեյանին, Ռոմելյա Սարգսյանին, Զավեն Շհոյանին, Համլետ Բազոյանին, Արմինե Աղաջանյանին  եւ Սեւակ Սիմոնյանին։ «Ահարոն Խաչատրյան» կուսակցությունների դաշինքից ավագանու անդամի մանդատներ են շնորհվել Ահարոն Խաչատրյանին, Կարեն Մկրտչյանին, Սաթենիկ Մինասյանին, Աշոտ Խաչատրյանին, Արման Մաթեւոսյանին, Նելլի Խաչատրյանին, Աշոտ Գրիգորյանին, Վարուժան Ավետիսյանին, Արուսյակ Ավետիսյանին, Սպարտակ Հովհաննիսյանին։ «Միասնական Վարդենիս» կուսակցությունների դաշինքից ավագանու անդամի մանդատներ են շնորհվել Վարդան Մարգարյանին, Արաքսյա Հայրապետյանին, Դավիթ Շահնազարյանին եւ Ջեմմա Վարդանյանին։ «Միասնական Վարդենիս» կուսակցությունների դաշինքի ցուցակի առաջին համարը զբաղեցնող Արամ Հարությունյանն ինքնաբացարկի դիմում է ներկայացրել Գեղարքունիքի մարզի թիվ 21 ՏԸՀ։   Ըստ գործող կանոնակարգի՝ Վարդենիս խոշորացված համայնքի նորընտիր ավագանու անդրանիկ նիստը կայանալու է մանդատների բաշխմանը հաջորդող շաբաթվա երկուշաբթի օրը՝ դեկտեմբերի 27-ին։
13:28 - 24 դեկտեմբերի, 2021
Ոստիկանները բացեցին Փարաքարի համայնքապետարանի մուտքը, Վոլոդյա Գրիգորյանը մտավ ներս և ողջունեց աշխատակիցներին |tert.am|

Ոստիկանները բացեցին Փարաքարի համայնքապետարանի մուտքը, Վոլոդյա Գրիգորյանը մտավ ներս և ողջունեց աշխատակիցներին |tert.am|

tert.am: Փարաքարում «Ապրելու երկիր» կուսակցության համայնքապետի թեկնածու Վոլոդյա Գրիգորյանը կարողացավ մտնել համայնքապետարանի շենք։ Ոստիկանները, որոնք տևական ժամանակ փակել էին համայնքապետարանի մուտքը, բացեցին այն։ Գրիգորյանը ծանոթացավ աշխատակիցների հետ և հայտարարեց, որ հաջորդ օրվանից սկսելու է բնականոն աշխատանքը։ «Ապրելու երկիր» կուսակցության անդամ Մեսրոպ Առաքելյանը լրագրողների հետ զրույցում ասաց. «Մեզ տեղեկացրին, որ կա դատական վեճ, մինչև այս պահը չենք ծանոթացել դրան։ Ընտրություններից հետո էլ մենք մյուս կողմերին կոչ ենք արել համերաշխությամբ աշխատել, քանի որ անկախ ամեն ինչից բոլոր երեք ուժերը ներկայացված են ավագանիում, և մենք ցանկանում ենք բոլորի հետ համերաշխ աշխատել և համատեղ ջանքերով զարգացնել համայնքը։ Հուսով եմ՝ առաջիկա օրերին լարվածությունը կանցնի, և օր առաջ կանցնենք աշխատանքի»։ Գրիգորյանը, անդրադառնալով ստեղծված իրավիճակին, նշեց՝ ոչ մի խնդիր չկա և չի կարող լինել։ Նա ներողություն խնդրեց ոստիկաններից օրվա ընթացքում հնչած վիրավորանքների համար և նշեց, որ իրենց գործողությունները այդքանով ավարտվում են։ «Մենք իրականացնելու ենք մեր աշխատանքը այստեղ, դատարանն էլ իր գործը կանի, բոլորս գնում ենք տուն»,- ասաց Վոլոդյա Գրիգորյանը։
16:30 - 23 դեկտեմբերի, 2021
Դեկտեմբերի 5-ի ՏԻՄ ընտրությունների վերաբերյալ ստացված հաղորդումների հիման վրա հարուցվել է 8 քրեական գործ

Դեկտեմբերի 5-ի ՏԻՄ ընտրությունների վերաբերյալ ստացված հաղորդումների հիման վրա հարուցվել է 8 քրեական գործ

2021թ. դեկտեմբերի 5-ին հանրապետության 9 մարզերի 38 խոշորացված համայնքներում կայացած ՏԻՄ ընտրությունների ընտրա ողջ գործընթացի, ներառյալ՝ ընտրարշավի, քվեարկության օրվա և քվեների հաշվարկի ժամանակահատվածի վերաբերյալ իրավապահ մարմիններն ստացել են առերևույթ ընտրական կամ ընտրություններին առնչվող այլ բնույթի հանցագործությունների մասին ընդհանուր 87 հաղորդում-ահազանգ՝ ներկայացված ինչպես ԶԼՄ հրապարակումներով և սոցցանցերի օգտատերերի առանձին գրառումներով, այնպես էլ ֆիզիկական անձանց, այդ թվում ընտրության մասնակիցների՝ տեղամասային ընտրական հանձնաժողովիների նախագահների, դիտորդների կողմից տրված հաղորդումներով, ոստիկանության աշխատակիցների զեկուցագրերով:  Ինչպես տեղեկացնում է Գլխավոր դատախազությունը, ամենաշատ հաղորդում-ահազանգերը վերաբերել են ՀՀ Գեղարքունիքի մարզի խոշորացված համայնքներում կայացած (թվով  18), ամենաքիչը՝ ՀՀ Տավուշի և ՀՀ Վայոց Ձորի մարզերի ընտրություններին (4-ական):Նշված 87 հաղորդումների զգալի մասն ուղարկվել է նախաքննության մարմին՝ ՀՀ քրեական դատավարության օրենսգրքի 180-181-րդ հոդվածներով սահմանված կարգով նյութեր նախապատրաստելու նպատակով, իսկ մի մասի կապակցությամբ, հաշվի առնելով դրանց վերացական կամ ընդհանրական բնույթը, ոստիկանության բաժիններում նախաձեռնվել են ստուգողական գործողություններ: Դրանց արդյունքում թվով 79 հաղորդում-ահազանգերից մի մասի դեպքում օպերատիվ-հետախուզական միջոցառումներով ստուգման ենթակա  հանգամանքները չեն հաստատվել և թողնվել են անհետևանք, իսկ մյուս մասի դեպքում նախապատրաստված նյութերով կայացվել են հանցադեպի կամ հանցակազմի բացակայության հիմքերով քրեական գործ հարուցելը մերժելու մասին որոշումներ: Ութ դեպքի առթիվ հարուցվել են քրեական գործեր: Մասնավորապես՝ Երեք քրեական գործ հարուցվել է ՀՀ Գեղարքունիքի մարզի համայնքներում կայացած ընտրությունների ընթացքում արձանագրված դեպքերի կապակցությամբ: Դրանցից երկուսը հարուցվել է ՀՀ քրեական օրենսգրքի 154.2-րդ հոդվածի 2-րդ մասի հատկանիշներով՝ կապված Վարդենիս խոշորացված համայնքում առերևույթ ընտրակաշառք տալու 2 դեպքի հետ, իսկ մեկը՝ ՀՀ քրեական օրենսգրքի 154-րդ հոդվածի 2-րդ մասի հատկանիշներով՝  կապված Վարդենիս համայնքի ընտրատեղամասերից մեկում քվեարկության գաղտնիությունը խախտելու դեպքի հետ: Երկու քրեական գործ վերաբերում է ՀՀ Լոռու մարզի համայնքներում կայացած ընտրություններին: Դրանցից մեկը՝ կապված Վանաձոր համայնքի ընտրատեղամասերից մեկում կրկնակի քվեարկության փորձ կատարելու դեպքի հետ, հարուցվել է ՀՀ քրեական օրենսգրքի 34-153-րդ հոդվածի 1-ին մասի հատկանիշներով: Իսկ մյուսը հարուցվել է Վանաձոր համայնքի ընտրությունների ընթացքում պարտքի դիմաց վերցված անձնագիրը քաղաքացուն չվերադարձնելով վերջինիս ընտրական իրավունքի իրացմանն առերևույթ խոչընդոտելու դեպքի առթիվ՝ ՀՀ քրեական օրենսգրքի 149-րդ հոդվածի 1-ին մասի և 213-րդ հոդվածի 1-ին մասի հատկանիշներով: Երկու քրեական գործ առնչվում է ՀՀ Կոտայքի մարզի համայնքներում կայացած ընտրություններին: Դրանցից մեկը հարուցվել է ՀՀ քրեական օրենսգրքի 137.1-րդ հոդվածի հատկանիշներով՝ Աբովյան խոշորացված համայնքի ընտրատեղամասերից մեկի մոտ անձին ծանր վիրավորանք հասցնելու դեպքի առթիվ, իսկ մյուսը հարուցվել է ՀՀ քրեական օրենսգրքի 154.2-րդ հոդվածի 2-րդ մասի հատկանիշներով՝ կրկին Աբովյան խոշորացված համայնքի ընտրություններում առերևույթ ընտրակաշառք տալու հետ: Մեկ քրեական գործ ՀՀ քրեական օրենսգրքի 154.2-րդ հոդվածի 2-րդ մասին հատկանիշներով հարուցվել է ՀՀ Վայոց Ձորի մարզի Եղեգնաձոր համայնքում կայացած ընտրությունների ընթացքում արձանագրված առերևույթ ընտրակաշառք տալու դեպքի կապակցությամբ: Նշված քրեական գործերով որպես մեղադրյալ ներգրավված անձինք դեռևս չկան: Դատախազության մարմինների կողմից պատշաճ դատավարական ղեկավարման և հսկողության ներքո միջոցներ են ձեռնարկվում բոլոր դեպքերին, դրանց առնչվող անձանց արաքներին վերջնական իրավական գնահատականներ տալու ուղղությամբ:    
15:33 - 21 դեկտեմբերի, 2021