«Քաղաքացիական պայմանագիր» կուսակցություն - ՔՊ

2021 թվականի հունիսին տեղի ունեցած խորհրդարանական արտահերթ ընտրությունների արդյունքում ՀՀ-ում կառավարություն ձեւավորած եւ խորհրդարանական մեծամասնություն դարձած քաղաքական կուսակցություն է։ 8-րդ գումարման խորհրդարանում՝ «Քաղաքացիական պայմանագիր» խմբակցություն։

Որպես միավոր՝ ձեւավորվել է 2013 թվականին։ Կուսակցությունը պաշտոնապես ստեղծվել է 2015 թվականին։

Կուսակցությունը «Իմ քայլը» դաշինքի կազմով բացարձակ մեծամասնություն է եղել նաեւ ՀՀ 7-րդ գումարման Ազգային ժողովում։

Իսկ 2017 թվականի խորհրդարանական ընտրություններին կուսակցությունը դաշինքով էր հանդես եկել «Հանրապետություն» եւ «Լուսավոր Հայաստան» կուսակցութունների հետ, ԱԺ-ում «Ելք» խմբակցություն ձեւավորել՝ 9 պատգամավորով։ Նույն դաշինքով կուսակցությունը մասնակցել էր նաեւ 2017թ․ Երեւանի քաղաքապետի եւ ավագանու ընտրություններին՝ ունենալով 14 հոգանոց խմբակցություն։

2018 թվականին Երեւանի քաղաքապետի ու ավագանու արտահերթ ընտրությունների ժամանակ կուսակցությունը մասնակցել էր «Առաքելություն» կուսակցության հետ՝ «Իմ քայլը» դաշինքով․ դաշինքի ցուցակը գլխավորող Հայկ Մարությանը դարձավ Երեւանի քաղաքապետ` ստանալով 80%-ից ավել քվե։

ԱԺ-ն առաջին ընթերցմամբ ընդունել է պարտադիր զինծառայությունից խուսափած և 27 տարին լրացած անձանց վերաբերող նախագծերի փաթեթը

ԱԺ հասարակայնության հետ կապերի և հաղորդակցության վարչությունը տեղեկացնում է, որ պատգամավոր Հայկ Սարգսյանի հեղինակած ««Զինվորական ծառայության եւ զինծառայողի կարգավիճակի մասին» օրենքում լրացումներ եւ փոփոխություն կատարելու մասին» եւ «ՀՀ քրեական օրենսգրքում լրացում կատարելու մասին» օրենքների նախագծերի փաթեթն առաջին ընթերցմամբ քննարկվել է դեկտեմբերի 12-ի ԱԺ արտահերթ նիստում: Առաջարկվող օրենսդրական փաթեթով նախատեսվում է 27 տարին լրացած եւ պարտադիր զինվորական ծառայություն չանցած քաղաքացիներին հնարավորություն տալ անցնելու զինվորական ծառայություն՝ միաժամանակ ՀՀ պետական բյուջե վճարելով համապատասխան գումարներ, կամ առանց զինվորական ծառայություն անցնելու, պետական բյուջե վճարելով համապատասխան գումար՝ նշված բոլոր դեպքերում ազատվելով քրեական պատասխանատվությունից: «Գործող կարգավորումներով 27 տարին լրացած եւ պարտադիր զինվորական ծառայությունից խուսափած քաղաքացիները ենթակա են դատապարտման: Նրանք որեւէ տարբերակով չեն կարող ազատվել քրեական հետապնդումից, մեծ ցանկության դեպքում անգամ չեն կարող ծառայել, քանի որ համարվում են զինվորական ծառայության սահմանային տարիքն անցած»,- ասել է Հայկ Սարգսյանը՝ մանրամասն ներկայացնելով օրենքների նախագծերի փաթեթը: Մասնավորապես, 27-37 տարեկան քաղաքացուն հնարավորություն է տրվում զինվորական ծառայություն անցնել 24 ամիս ժամկետով կամ 12 ամիս ժամկետով՝ ՀՀ պետական բյուջե վճարելով 2.500.000 ՀՀ դրամ: Նախագծով առաջարկվող երրորդ տարբերակը 6 ամիս ժամկետով ծառայությունն է, որի պարագայում ՀՀ պետական բյուջե պետք է վճարել 5.000.000 ՀՀ դրամ: Մեկ ամիս ժամկետով զինվորական ծառայության ընտրության դեպքում ՀՀ պետական բյուջե պետք է վճարել 10.000.000 ՀՀ դրամ: Իսկ զինվորական ծառայության փոխարեն, ըստ առաջարկվող նախագծի, քաղաքացին կարող է ՀՀ պետական բյուջե վճարել 15.000.000 ՀՀ դրամ: Ներկայացնելով նախկին օրենսդրական կարգավորումները՝ Հայկ Սարգսյանը նշել է, որ այսօր բանակում չծառայելու համար հետախուզման մեջ է գտնվում ավելի քան 10 հազար քաղաքացի, որոնցից շուրջ հինգ հազարի 27 տարին լրացել է: Օրենսդրական նախաձեռնության նպատակն է ընձեռել այս անձանց հնարավորություն օգտակար լինել իրենց պետությանը ծառայությամբ եւ (կամ) գումար վճարելով՝ դատապարտվելու եւ պետության համար բեռ դառնալու փոխարեն: Նախագծով առաջարկվող կարգավորումների կիրառմամբ, ըստ հիմնական զեկուցողի, բազմաթիվ քաղաքացիներ կվերադառնան հայրենիք, Հայաստանի զինված ուժերը կհամալրվեն հայրենադարձ քաղաքացիներով, եւ լրացուցիչ ֆինանսական միջոցներ կմուտքագրվեն պետական բյուջե: Հայկ Սարգսյանի կարծիքով բազմաթիվ երիտասարդներ՝ շատերն ընտանիքներով, կվերադառնան հայրենիք մշտական բնակության՝ իրենց հետ բերելով օտարերկրյա պետություններում կուտակած ֆինանսական միջոցները, որոնց հաշվին կկատարվեն ներդրումներ, կներգրավվեն աշխատանքում, ինչպես նաեւ կստեղծվեն նոր աշխատատեղեր: «Առաջարկվող հաջորդ կարգավորմամբ հնարավորություն կտրվի շտկել մի կողմից` ՀՀ-ում ծնված կամ մինչեւ 27 տարին լրանալը ՀՀ քաղաքացիություն ստացող անձանց եւ մյուս կողմից՝ 27 տարեկանից հետո ՀՀ քաղաքացիություն ստացող անձանց միջեւ առկա անհավասարությունը՝ կապված այն հանգամանքի հետ, որ գործող իրավակարգավորումների համաձայն՝ ՀՀ-ում ծնված կամ մինչեւ 27 տարին լրանալը ՀՀ քաղաքացիություն ստացող անձինք պարտավոր են անցնելու 2 տարի ժամկետով պարտադիր զինվորական ծառայություն, իսկ 27 տարին լրանալուց հետո ՀՀ քաղաքացիություն ստացող անձինք այդպիսի պարտավորություն չունեն»,- մանրամասնել է նախագծի հեղինակը: Նախագծի ընդունման դեպքում պարտադիր զինվորական ծառայության զորակոչի ենթակա կլինեն նաեւ 27 տարին լրանալուց հետո օրենքով սահմանված կարգով Հայաստանի Հանրապետության քաղաքացիություն ստացած արական սեռի քաղաքացիները: Ընդ որում, նրանք կարող են 12 ամիս ժամկետով պարտադիր զինվորական ծառայություն անցնել ՀՀ զինված ուժերում կամ ՀՀ պետական բյուջե վճարել 2.500.000 ՀՀ դրամ եւ ազատվել զինվորական ծառայությունից: Հայկ Սարգսյանը պատասխանել է պատգամավորների հարցերին՝ ներկայացնելով պարզաբանումներ առաջարկվող փոփոխությունների վերաբերյալ: Նա ընդգծել է, որ օրենքը տարածվում է այն անձանց նկատմամբ, ում 25 տարին լրացած կլինի օրենքի ընդունման պահին: «Այսինքն՝ այն մտավախությունը, որ այսօր 18 տարեկան անձինք կլքեն երկիրը, որ 27 տարեկանում օգտվեն օրենքի ընձեռած հնարավորությունից, չի համապատասխանում իրականությանը»,- նշել է օրենսդրական նախաձեռնության հեղինակը: Հարակից զեկուցող, Պաշտպանության եւ անվտանգության հարցերի մշտական հանձնաժողովի անդամ Վահագն Ալեքսանյանը նշել է, որ հանձնաժողովում նախագծի վերաբերյալ ծավալուն քննարկումներ են տեղի ունեցել: Անդրադառնալով հնչող մտահոգություններին՝ պատգամավորը նշել է, որ տարբեր ժամանակներում արական սեռի ՀՀ քաղաքացիները լքել են Հայաստանը եւ սպասել այնքան, մինչեւ 27 տարին լրանա, որից հետո նրանք այլեւս չեն կարող ծառայել Զինված ուժերում: Նրա խոսքով օրինագծով որոշակիորեն ինստիտուցիոնալ լուծում կտրվի մի շարք հարցերի: Հարակից զեկուցողի գնահատմամբ օբյեկտիվորեն նախագծով շատ ավելի լավ լուծումներ են առաջարկվում, քան եղել է մինչեւ այս: ՀՀ պաշտպանության նախարարի տեղակալ Արման Սարգսյանը նշել է, որ Կառավարությունը որոշակի առաջարկություններ է ներկայացրել նախագիծը լրամշակելու նպատակով: Մասնավորապես, առաջարկվել է ձեռնպահ մնալ 27 տարին լրանալուց հետո քաղաքացիություն ձեռք բերած քաղաքացիների մասով 12 ամիս ժամկետով պարտադիր զինծառայություն անցնելու պարտականություն սահմանելուց՝ հաշվի առնելով քաղաքացիություն ստանալու գործընթացին հնարավոր խոչընդոտելու հանգամանքը: 18-27 տարեկան զինծառայությունից խուսափած քաղաքացիների համար առաջարկվում է ավելացնել 27 տարեկանից հետո ծառայության ժամկետները. 24 ամիսը փոխարինելով 30 ամսով, 12 ամիսը՝ 15-ով, 6 ամիսը՝ 7 ամիս 15 օրով: Առաջարկվել է նաեւ հստակեցնել 27 տարին լրանալուց հետո զինվորական հաշվառման վերցնելու դեպքերը: Ներկայացվել են նաեւ մի շարք տեխնիկական բնույթի փոփոխություններ: Եզրափակիչ ելույթում Հայկ Սարգսյանը պատասխանել է բոլոր հարցադրումներին՝ նշելով, որ օրենքի հավանական շահառու քաղաքացիներին ծառայելու հնարավորություն պետք է տրվի: Օրենքների նախագծերի փաթեթն ընդունվել է առաջին ընթերցմամբ:

22:28 - 12 դեկտեմբերի, 2023

Օրենքի նախագիծը տալիս է ոչ թե բանակում չծառայելու, այլ չդատապարտվելու հնարավորություն. Հայկ Սարգսյան |1lurer.am|

1lurer.am: ԱԺ նիստում «Քաղաքացիական պայմանագիր» խմբակցության պատգամավոր Հայկ Սարգսյանը իր առաջարկած՝ պարտադիր զինվորական ծառայությունից խուսափած և 27 տարին լրացած անձանց վերաբերող նախագիծը ներկայացնելիս պատգամավորների հարցերին պատասխանելիս ևս մեկ անգամ պարզաբանեց՝ ովքեր կարող են օգտվել նախագծից: «Օրենքը տարածվելու է այն անձանց նկատմամբ, ում 25 տարին լրացած կլինի օրենքի ընդունման պահին, այսինքն՝ այն մտավախությունը, որ այսօր մարդիկ 18 տարեկանում կլքեն երկիրը, որպեսզի 27 տարեկանում օգտվեն օրենքից, չի համապատասխանում իրականությանը, որովհետև նրանք չեն կարող օգտվել, այսինքն՝ օրենքից կարող են օգտվել միայն նրանք, որոնք օրենքի ընդունման պահին կլինեն 25 տարեկան և ավելի բարձր տարիքի: Ինչո՞ւ 25 տարեկան և ավելի բարձր. որովհետև փորձը ցույց է տալիս, որ մենք արեցինք համաներում, որից կարողացան օգտվել 27 տարին լրացած քաղաքացիները, բայց ունեինք բազմաթիվ 25-26 տարեկաններ, որոնք այս ընթացքում չեն վերադարձել և ծառայել, այսինքն՝ նրանք չօգտվեցին իրենց ծառայելու հնարավորությունից և այսօր գտնվում են քրեական հետապնդման ներքո՝ չունենալով որևէ այլ տարբերակ՝ ազատազրկումից բացի»,- պարզաբանեց պատգամավորը՝ պատասխանելով «Քաղաքացիական պայմանագիր» խմբակցության պատգամավոր Հովիկ Աղազարյանի հարցին: Նրա խոսքով՝ ազատազրկված ամեն մի քաղաքացուն պահելու համար մեր պետությունը ծախսում է տարեկան մոտ 5 միլիոն դրամ: «Այսինքն՝ եթե մենք քաղաքացուն հայտնաբերենք, բերենք-պահենք, 5 տարում մենք քաղաքացու վրա ծախսելու ենք մոտ 25 միլիոն դրամ: Բացի դրանից՝ մենք չենք էլ կարողանում այդ քաղաքացիներին դատապարտել»,- ասաց Սարգսյանը՝ ներկայացնելով թվեր: «2022 թվականին, երբ որևէ կարգավորում չկար քաղաքացիների համար, ովքեր չեն ծառայել՝ ազատվելու պատասխանատվությունից, ունեցել ենք 10 հազարից ավելի քաղաքացիներ, ովքեր հետախուզվել են բանակում չծառայելու համար և այդ 10 հազար քաղաքացուց ընդամենը 420-ն են հայտնաբերվել կամ կամովին ներկայացել: Կարո՞ղ եք ենթադրել՝ այս 420 քաղաքացուց քանիսն են դատապարտվել ազատազրկման: Նրանցից մեկն է դատապարտվել ազատազրկման՝ 1 տարի ժամկետով: Այսինքն՝ նրանք փաստացի չեն էլ ազատազրկվում»,- ասաց պատգամավորը: «Հայաստան» խմբակցության պատգամավոր Արթուր Խաչատրյանը հարց ուղղեց Հայկ Սարգսյանին՝ խնդրելով պատասխանել հարցին՝ որքանո՞վ է ազդելու այս նախագիծը բանակի ինտելեկտուալության վրա: Նրա խոսքով՝ արդյո՞ք նախագծի ընդունման դեպքում չի նվազի ինտելեկտուալ բարձր կադրերի հոսքը բանակ: Սարգսյանի խոսքով՝ օրենքի նախագիծը բանակին տալու է հնարավորություն՝ նոր զորակոչիկներ և ֆինանսական նոր միջոցներ ունենալու, որն այս պահին մենք չունենք, և դա, կարելի է ասել, վատնում ենք՝ այս օրենքը չընդունելով: «Այսինքն՝ մինչ այս պահը օրենքը չենք ընդունել և այն քաղաքացիները, որոնց 27 տարին լրացել է, կամ որևէ ձևով վերադարձել ու խուսափել են պատասխանատվությունից, այսինքն՝ ոչ ծառայել են, ոչ դատապարտվել: Իմ առաջարկած օրենքի ընդունման դեպքում, եթե քաղաքացին վերադառնա և անգամ տեսնենք, որ նա պիտանի չէ պարտադիր զինվորական ծառայության, նա պարտավոր կլինի վճարել 15 միլիոն դրամ, այսինքն՝ մենք միայն կշահենք օրենքի ընդունման դեպքում»,- նշեց Սարգսյանը: Ինչ վերաբերում է ինտելեկտուալ կադրերի արտահոսքին, պատգամավորը պատասխանեց՝ բոլորովին հակառակն է: «Մեր փոփոխություններով՝ այսօր շարքային կազմի պայմանագրային զինծառայողը, եթե ատեստավորումը հանձնի և ստանա «գերազանց», կստանա ավելի քան 500 հազար դրամ աշխատավարձ»,- նշեց Սարգսյանը: «Քաղաքացիական պայմանագիր» խմբակցության պատգամավոր Սերգեյ Բագրատյանը հարց ուղղեց տնտեսագիտական հաշվարկի հիմքի վերաբերյալ. ինչու քաղաքացին պետբյուջե պետք է վճարի 5 կամ 10 միլիոն դրամ, ո՞րն է հիմնավորումը: «Իմ օրենսդրական նախաձեռնության հիմնական շահառուները օգտվելու են 4-րդ կետից, վճարելու են 10 միլիոն դրամ և ծառայելու են 1 ամիս: Ինչո՞ւ 10 միլիոն դրամ, որովհետև դա պայմանագրային զինծառայողի բարձր աշխատավարձով երկու տարվա աշխատավարձին համարժեք գումարն է և մեկ ամսնավ ծառայությունն էլ նրա համար է, որպեսզի նրանք ՀՀ ԶՈՒ համազգեստը կրեն, բանակում ծառայելու հիմնական կանոնները սովորեն և հավանական զորակոչի ժամանակ կարողանան ներկայանալ, իմանալ իրենց հաշվառման զորամասը, տիրապետեն իրենց կցագրված զենքին»,- պարզաբանեց Սարգսյանը: ՀՀ ԱԺ նախագահի տեղակալ Հակոբ Արշակյանը, հաշվի առնելով հարցի լայն հնչեղությունը, հետաքրքրվեց՝ արդյոք տվյալ օրինագիծը կարո՞ղ է նպաստել կամ հնարավորություն ստեղծել սովորական ժամկետային զինծառայողների համար՝ խուսափելու զինծառայությունից տվյալ մեխանիզմով: Սարգսյանը ևս մեկ անգամ պարզաբանեց՝ օրենքը վերաբերում է բոլոր նրանց, որոնց 27 տարին լրացած է, և նրանք այսօրվա գործող կարգավորումներով՝ ենթակա չեն պարտադիր զինվորական ծառայության: «Օրենքի նախագիծը ոչ թե տալիս է հնարավորություն՝ բանակում չծառայելու, այլ տալիս է հնարավորություն՝ չդատապարտվելու: Այսինքն՝ այս խմբի քաղաքացիները այսօր չեն կարող ծառայել, նրանք պետք է միայն դատապարտվեն, ես ասում եմ՝ եկեք նրանց չդատապարտենք, նրանց վրա գումարներ չծախսենք, այլ այդ քաղաքացիներին հնարավորություն տանք գումարներ վճարելու, ծառայելու և պիտանի լինելու իրենց երկրին, որ նրանք բեռ չդառնան պետության վրա՝ կրելով ազատազրկում, այլ պետությանը նպաստ բերեն»,- պարզաբանեց պատգամավորը: Հակոբ Արշակյանի ճշտող հարցին՝ արդյոք Հայաստանի բազմահազար քաղաքացիները, որոնց 27 տարեկանը չի լրացել, կարո՞ղ են ապագայում դիտարկել այս օրինագիծը զինծառայությունից խուսափելու և դրանից օգտվելու ակնկալիքով, Սարգսյանը տվեց բացասական պատասխան: «Այսօրվա դրությամբ և օրենքի ընդունումից հետո այն քաղաքացիները, որոնք ենթակա են պարտադիր զինվորական ծառայության, մինչև 27 տարեկան են, չեն կարող օգտվել օրենքի ընձեռած հնարավորությունից՝ նրանք պետք է ծառայեն: Օրենքը կտարածվի միայն նրանց վրա, ովքեր գործող կարգավորումներով ծառայելու հնարավորություն չունեն»,- ընդգծեց պատգամավորը:

15:09 - 12 դեկտեմբերի, 2023