ԶՈՒ ԳՇ պետ Էդվարդ Ասրյանը ԱՄՆ-ում հանդիպումներ է ունեցել Պաշտպանական անվտանգության հարցերով համագործակցության գործակալության տնօրեն Մայք Միլլերի, ԱՄՆ բանակի անվտանգության աջակցման հրամանատարության հրամանատար, բրիգադի գեներալ Ալեն Փեփերի և ԱՄՆ պաշտպանության քարտուղարի միջազգային անվտանգության հարցերով տեղակալ, պաշտպանական քաղաքականության գրասենյակի տնօրեն Թրեսա Գուենովի հետ։ Քննարկվել են ՀՀ-ԱՄՆ պաշտպանական գործընկերության ներկայիս ընթացքին, առաջիկա ծրագրերին և տարածաշրջանային անվտանգությանն առնչվող մի շարք հարցեր։ [ՀՀ ՊՆ]

ԱՄՆ պետքարտուղարության խոսնակ Մեթյու Միլլերը հայտնել է, որ Հայաստանի ու Ադրբեջանի միջև խաղաղության պայմանագրի կնքումը կախված է կողմերից, ոչ թե ԱՄՆ-ից: Նա նաև նշել է, որ Վաշինգտոնը խաղաղության համաձայնագիրը երբեք չի կապել Բաքվում կայանալիք COP29-ի հետ: |azatutyun.am|

Խաղաղության պայմանագրի նախագծի վերաբերյալ օգոստոսի վերջին ՀՀ կողմից փոխանցված առաջարկին (պայմանագրի նախագծի 10-րդ խմբագրություն) Ադրբեջանի կողմից պատասխան առաջարկ դեռևս չի ստացվել: [ՀՀ ԱԳՆ մամուլի խոսնակ Անի Բադալյան] |arm.sputniknews.ru|

Հոկտեմբերի 16-ից երթևեկության կազմակերպման փոփոխություն կկատարվի Շարիմանյան փողոցում: Մասնավորապես, Հերացի փողոցից դեպի Աբովյան պուրակ, երթևեկելի մասի աջ կողմում կարգելվի մեքենաների կանգառը: [Երևանի քաղաքապետարան]

Փաշինյանը Ադրբեջանի նախագահ Իլհամ Ալիեւին առաջարկել է, որ արտաքին գործերի նախարարները երկօրյա հանդիպում ունենան, համաձայնեցնեն Խաղաղության պայմանագրի չհամաձայնեցված մեկ-երկու հոդվածները, ապա երկրների առաջնորդները, նախքան Բաքվում COP-29-ի կայացումը, ստորագրեն պայմանագիրը: [ԱԺ Արտաքին հարաբերությունների մշտական հանձնաժողովի նախագահ Սարգիս Խանդանյան]|armenpress.am|

ՀՀ ԱԳ նախարար Արարատ Միրզոյանը կմասնակցի «3+3» տարածաշրջանային խորհրդատվական հարթակի երրորդ հանդիպմանը: Հայտնել է ՀՀ ԱԳՆ մամուլի խոսնակ Անի Բադալյանը։ Ռուսական կողմը ևս հաստատել է արտգործնախարար Սերգեյ Լավրովի մասնակցությունը «3+3» ձևաչափով հանդիպմանը։ Ավելի վաղ իրանական կողմն էլ հաղորդել էր Իրանի արտգործնախարար Աբբաս Արաղչին մասնակցության մասին։|factor.am|

Հոկտեմբերի 18-ին Ստամբուլում կկայանա «3+3» տարածաշրջանային հարթակի նիստը։ Այս մասին հայտարարել է Թուրքիայի ԱԳ նախարար Հաքան Ֆիդանը։ «Հանդիպմանը ներկա կլինեն նաև Ադրբեջանի, Հայաստանի, Իրանի և Ռուսաստանի արտաքին գործերի նախարարները», - ասել է Ֆիդանը: |tert.am|

ՀՀ ԱԽ քարտուղարը հայտարարել է, որ ՀՀ-ԵՄ հարաբերությունները երբեք այսքան ամուր չեն եղել։ Նա նշել է, որ հաշվի առնելով երկկողմ ցանկությունը՝ այսօր հարաբերությունները կայուն զարգացման միտում ունեն: Նրա խոսքով՝ հարաբերությունները այսօր արդեն ընդլայնվել և ներառում են նաև անվտանգության ոլորտը։ Գրիգորյանը կարևորել է ԵՄ քաղաքացիական առաքելության գործունեությունը և Խաղաղության եվրոպական գործիքակազմի շրջանակում տարվող աշխատանքը: [ՀՀ ԱԽ]

Թեհրանում քննարկվել են Իրանի տարածքով Ադրբեջանի հիմնական մասը Նախիջևանին կապող տրանսպորտային երթուղին կառուցելու, ինչպես նաև Հյուսիս-Հարավ միջազգային տրանսպորտային միջանցքով բեռնափոխադրումների ծավալներն ավելացնելու հարցերը։ Այս մասին հայտնել է «Ադրբեջանական երկաթուղիներ» ընկերության նախագահ Ռովշան Ռուստամովը, որը Թեհրանում բանակցել է Իրանի երկաթուղային ադմինիստրացիայի ղեկավար Ջաբար Ալի Սարդրուդի հետ։ |azatutyun.am|

Բրիտանական կողմը որոշել է կասեցնել Վրաստանի հետ երկխոսությունը նախարարների մակարդակով, չեղարկվել են բարձր մակարդակի բանակցությունները պաշտպանության նախարարությունների շտաբների միջև, և կասեցվել է կիբերանվտանգության նոր ծրագիրը: Այս մասին «Интерпрессньюс»-ին հայտնել է Վրաստանում Մեծ Բրիտանիայի դեսպան Գարեթ Ուորդը։ Նրա խոսքով Մեծ Բրիտանիայի և Վրաստանի, ինչպես նաև արևմտյան այլ գործընկերների հետ հարաբերությունները «խաթարվել են վրացական կառավարության այս տարվա գործողությունների պատճառով»: |azatutyun.am|