Կ. Չ.-ն, զբաղեցնելով Տավուշի մարզի համայնքներից մեկի վարչական ղեկավարի պաշտոնը և, հանդիսանալով պաշտոնատար անձ, կատարել է պաշտոնեական կեղծիք: ՀՀ հակակոռուպցիոն կոմիտեից, նախաքննությամբ պարզվել է, որ Կ. Չ.-ն 2024 թվականի փետրվարին համայնքապետարան է  ներկայացրել իր ստորագրությամբ վավերացված՝ Տավուշի մարզի բնակավայրերից մեկի 20-ից 51 տարեկան բնակիչներ հանդիսացող ՀՀ զինապարտ քաղաքացիների անվանացուցակ, որի մեջ եղել են նաև իր որդու տվյալները: Կ. Չ.-ն, սակայն, մտադրված լինելով ազատել որդուն ՀՀ պաշտպանության նախարարության կողմից կազմակերպվող 25-օրյա վարժական հավաքներից, կեղծ նշում է կատարել վերջինիս՝ ՌԴ-ում գտնվելու մասին այն դեպքում, երբ որդին այդ պահին գտնվել է Հայաստանի Հանրապետությունում: Այնուհետև ակնհայտ կեղծ տեղեկատվություն պարունակող փաստաթուղթը Կ. Չ.-ն ուղարկել է  համայնքապետարան, որից հետո այն դրվել է պաշտոնական շրջանառության մեջ:  Քրեական վարույթով նախաքննությունն ավարտվել է, և վարույթի նյութերը մեղադրական եզրակացությամբ ուղարկվել են դատարան՝ ըստ էության քննելու համար: [ՀՀ հակակոռուպցիոն կոմիտե]

4 տարի առաջ այս օրը Ադրբեջանը լայնածավալ հարձակում սկսեց Լեռնային Ղարաբաղի հետ շփման գծի ողջ երկայնքով՝ գործի դնելով իր սպառազինության մեջ առկա գրեթե բոլոր զինատեսակները՝ հրաձգային զենքերից մինչեւ ավիացիա։  2020թ․ պատերազմն անսպասելի չէր, հատկապես, երբ դիտարկում ենք 4 տարվա հեռավորությունից՝ ուսումնասիրելով այն խոսույթը, որն օգտագործում էր ադրբեջանական կողմը եւ այն մտահոգությունները, որոնք պարբերաբար բարձրաձայնվում էին ոչ միայն հայ, այլեւ օտարերկրյա պաշտոնյաների կողմից։ Ադրբեջանը հարձակման համար հող էր նախապատրաստում տեւական ժամանակ՝ ամենօրյա ռեժիմով լրատվադաշտ նետելով հրադադարի ռեժիմի խախտման մասին հաղորդագրություններ՝ Հայաստանին մեղադրելով սադրանքի նախապատրաստվելու մեջ։ Այս հրապարակմամբ «Ինֆոքոմն» ամփոփ ներկայացնում է պատերազմի ընթացքը։

Դաղստանում (Մախաչկալա) բենզալցակայանի պայթյունի հետևանքով զոհվել է 5 մարդ, կա 8-ը վիրավոր։ Այս մասին հայտնում է «Ռիա Նովոստին»։

Սեպտեմբերի 28-ից մինչև սեպտեմբերի 30-ը՝ ժամը 01:00-ից մինչև 06:00-ն փակ է լինելու Մյասնիկյան պողոտա-Սարալանջի փողոց տրանսպորտային հանգույցի Արմենակյան փողոցի՝ Սարալանջի փողոցի խաչմերուկից «Հաղթանակ» զբոսայգի տանող ճանապարհի առաջին երթևեկելի գոտին, որտեղ վերականգնվում է կամրջի դեֆորմացիոն կարը: [Երևանի քաղաքապետարան]

Ծանրամարտի երիտասարդների աշխարհի առաջնության մրցումային վերջին օրը Աշոտ Մովսիսյանը, երկամարտում գրանցելով 366 կգ արդյունք, նվաճեց բրոնզե մեդալ:Հրում վարժությունում 208 կգ ծանրաձողը գլխավերևում պահելով` Մովսիսյանը դարձավ նաև փոքր բրոնզե մեդալակիր:

Հայ ժողովուրդը պետք է պահանջի Սահմանադրության փոփոխության հանրաքվե։ Այս մասին ասել է Ադրբեջանի նախագահ Իլհամ Ալիևի օգնական ՀիքմեթՀաջիևը։ «Մենք ցանկանում ենք խաղաղության հասնել ոչ միայն Հայաստանի կառավարության, այլև ժողովրդի հետ, որը պետք է պահանջի Սահմանադրության փոփոխության հանրաքվե՝ հրաժարվելով ադրբեջանական տարածքների նկատմամբ հավակնություններից: Հանրաքվեի ժամանակ հայերը պետք է ցույց կտան, որ չեն պաշտպանում Ղարաբաղի նկատմամբ հավակնությունները»,- ասել է Ալիևի օգնականը։ |tert.am|

Փոխգնդապետ Հովիկ Գաբրիելյանի գործով երեկ դատարանում հարցաքննվեց 44-օրյա պատերազմի ժամանակ ՀՀ ՊՆ 1-ին բանակային կորպուսի N զորամասի հրամանատար Համլետ Լեւոնյանը։ Հենց նրա ղեկավարած ստորաբաժանումն է, ըստ մեղադրանքի, Գաբրիելյանի չթույլատրված նահանջի հետեւանքով ընկել շրջափակման մեջ՝ կրելով մարդկային եւ նյութական կորուստներ։ Վկայի պնդմամբ՝ բոլոր հրամանատարները վերադասության հետ կապի մեջ էին նույն ռադիոցանցով, բոլորը բոլորին լսում էին, հետեւաբար եթե նահանջից առաջ Գաբրիելյանը զեկուցած լիներ այդ մասին կամ օգնություն խնդրած լիներ, ինքը կիմանար։ Մեղադրող դատախազի հարցին՝ Հադրութը իրենց կորպուսի պաշտպանության տա՞կ է եղել, վկան բացասական պատասխան տվեց։ Այդ դեպքում ինչո՞ւ է Գաբրիելյանը նահանջել դեպի Հադրութ․ «Գաբրիելյանի հետ առերեսման ժամանակ ենք այդ հարցը պարզել, հարցրել եմ՝ ինչի՞ ես 40 կմ գնացել Հադրութ, եթե կարող էիր մի քանի կմ գալ դեպի մեզ, ասել է, որ ինֆորմացիա ուներ, որ ճեղքել են էդտեղ, հետո էլ, թե՝ անձնակազմիս տարել եմ էնտեղ, որ լողանային, չորանային, պատսպարվեին»,– ասաց վկան՝ նշելով, որ իր համար այդ պատրվակը ծիծաղելի էր։

ԼՂ-ից բռնի տեղահանված շուրջ 3226 անձ ստացել է ՀՀ քաղաքացիություն: Քաղաքացիություն ստանալու համար դիմել է Լեռնային Ղարաբաղից բռնի տեղահանված 4918 անձ: |armenpress.am|

Արարատ Միրզոյանը հանդիպում է ունեցել Իրանի ԱԳ նախարար Սեյեդ Աբբաս Արաղչիի հետ: Նախարարներն անդրադարձ են կատարել տարածաշրջանային տնտեսական ու տրանսպորտային կապուղիների ապաշրջափակման հարցերին, ինչի համատեքստում Արարատ Միրզոյանը շեշտել է կառավարության կողմից ներկայացված «Խաղաղության խաչմերուկ» հայեցակարգի հիմքում դրված սկզբունքներին համապատասխան հաղորդակցությունների բացման հարցում ՀՀ հաստատակամ մոտեցումը։

Արդարադատության նախարար Գրիգոր Մինասյանի պաշտոնանկության հարցով ստորագրությունները փոխանցվել են ՔՊ ղեկավարությանը․ հայտնել է Անդրանիկ Քոչարյանը։ Մինասյանի պաշտոնանկության հարցը քննարկման առարկա դարձնելու ստորագրահավաքի մասին «Ազատության»-ը հայտնել էր ՔՊ պատգամավոր Հովիկ Աղազարյանը՝ առանց պատճառները հստակեցնելու։ ՔՊ պատգամավոր Անդրանիկ Քոչարյանն անդրադարձել է նաև Գրիգոր Մինասյանի երեկվա գրառմանը՝ նշելով․ «Պարոն Մինասյանը երեկ շատ անթույլատրելի և վտանգավոր հայտարարություն է արել: Արդարադատության նախարարը ԱԺ պատգամավորներին մեղադրում է խարդավանքների մեջ։ Եթե պարոն Մինասյանը մնալու է նախարար, պետք է դրա հետ կապված գա այստեղ բացատրություն տա՝ ով է խարդավանքով զբաղվող պատգամավորը»։