Երևանում կայացավ թվային ֆինանսների և նորարարական տեխնոլոգիաների առանցքային միջոցառումը՝ Doing Digital Forum 2025-ը, որն  անցկացվեց երրորդ տարին անընդմեջ։ Միջոցառման կազմակերպիչը SPRING PR ընկերությունն է: Ֆորումը, որը կրում էր «Ապագայի փողը․ տնտեսական ազդեցությունը» խորագիրը, համախմբել էր պետական կառույցների, գործարար համայնքի ներկայացուցիչներին, ոլորտի միջազգային ու տեղական առաջատար փորձն ու գիտելիքը կրող փորձագետներին ու կազմակերպություններին։ 

Ֆրանսիայի և Թուրքիայի ԱԳ նախարարներ Մ․ Ժան-Նոել Բարոն և Հաքան Ֆիդանը քննարկել են Հարավային Կովկասը՝ նշելով Հայաստան-Ադրբեջան հարաբերությունների կարգավորումը, երկու պետությունների տարածքային ամբողջականության և ինքնիշխանության նկատմամբ հարգանքի հիման վրա, Հարավային Կովկասը պետք է դարձնի խաղաղության, ինտեգրման և համագործակցության գոտի։ Այս մասին հայտնում է Ֆրանսիայի ԱԳՆ-ն: Ըստ հաղորդագրության՝ նախարարները քննարկել են նաև ուկրաինական կարգավորումը, իրավիճակը Սիրիայում և Գազայում։ |civilnet.am|

Ինչ է տեղի ունեցել Նուբարաշեն ՔԿՀ-ում. պարզաբանել է Քրեակատարողական ծառայությունը: Ստացվել էին տեղեկություններ, որ դատապարտյալներից մեկը տևական ժամանակ խաթարում է հիմնարկի բնականոն աշխատանքը: Ծառայությունը որոշել է նրան տեղափոխել այլ ՔԿՀ: Հաջակցություն վերջինիս՝ որոշ կալանավորված անձինք և ցմահ դատապարտյալներ դրսևորել են անհնազանդություն, վնասել են խցերի գույքը, այրել ներքնակները, հարվածել դռներին և այլն Հիմնարկի ծառայողներն օրենքով սահմանված կարգով բազմիցս պահանջել են դադարեցնել անհնազանդությունը, սակայն պահանջները չեն կատարվել։ Հետևաբար ձեռնարկվել են հատուկ միջոցառումներ. ֆիզիկական ուժի գործադրմամբ դատապարտյալները դուրս են բերվել խցերից, իսկ խցերում իրականացվել են խուզարկություններ։Կատարված գործողություններից հետո երկու դատապարտյալ հայտարարել է հնարավոր կոտրվածքների մասին, սակայն ռենտգեն հետազոտության արդյունքում վերջիններիս մոտ կոտրվածքներ չեն հայտնաբերվել:

Միջազգային հարաբերությունների փոփոխվող ճարտարապետության ժամանակակից պայմաններում կարևոր է շարունակել մեր գործընկերային փոխգործակցությունը՝ հիմնվելով մեր պետությունների շահերի վրա և ի բարօրություն մեր երկրների ու ժողովուրդների։  Մենք որպես ուղենիշ ունենք քաղաքական, սոցիալ-տնտեսական, մարդասիրական և այլ ոլորտներում երկարաժամկետ փոխշահավետ համագործակցությունը և նպատակ ունենք շարունակել ու ընդլայնել բովանդակալից, մեր երկրների շահերին ամբողջությամբ համապատասխանող երկխոսությունը։ [ՀՀ ԱԳ նախարար Արարատ Միրզոյանի ուղերձը՝ ՀՀ և ՌԴ ԱԳՆ-ների միջև դիվանագիտական հարաբերությունների հաստատման 33-ամյակի կապակցությամբ]

ՀՀ-ում Չինաստանի դեսպանը հերքել է «Զանգեզուրի միջանցք»-ի մասին Չինաստանի կոմկուսի ներկայացուցչին վերագրվող հայտարարությունը: Դեսպան Չեն Մինը մանրամասնել է, որ չինական պատվիրակությունը վերջերս Բաքվում մասնակցել է կոնֆերանսի, որը նվիրված է եղել «Մեկ գոտի, մեկ ճանապարհ» նախաձեռնությանը։ Չինաստանի պատվիրակությունը քննարկել է այն հարցը, թե ինչպես կարող են նպաստել «Մեկ գոտի, մեկ ճանապարհ» նախաձեռնության տարածմանը Հարավային Կովկասում։  «Բնականաբար, Չինաստանն աջակցում է Հայաստանի ինքնիշխանությանն ու տարածքային ամբողջականությանը։ Հայաստանն ու Ադրբեջանը Չինաստանի համար բարեկամ երկրներ են, և մենք կողմնակից ենք նրան, որպեսզի կողմերը քաղաքական երկխոսության և դիվանագիտական ուղիներով փորձեն կարգավորել տարաձայնությունները։ «Մեկ գոտի, մեկ ճանապարհ նախաձեռնությունը, որը մենք առաջ ենք մղում նաև Հարավային Կովկասում, շատ կարևոր է տարածաշրջանի խաղաղության և զարգացման համար»,- հայտարարել է Չեն Մինը։ Sputnik գործակալության ադրբեջանական ծառայությունն ավելի վաղ տեղեկություններ էր տարածել, թե Չինաստանի Կոմկուսի ներկայացուցիչ Լյու Ցզյանչաոն Բաքվում կայացած խորհրդաժողովում իբր հայտարարել է, թե «Զանգեզուրի միջանցքի» գործարկումը մեծ ռազմավարական նշանակություն ունի և էլ ավելի կամրապնդի կապերը Եվրոպայի և Ասիայի միջև: |armenpress.am|

Չնայած ռուս-հայկական դաշինքը խարխլելու արտաքին փորձերին՝ մեզ հաջողվում է պահպանել քաղաքական երկխոսության և արտաքին քաղաքականության համակարգման բարձր մակարդակ և մեծացնել առևտրատնտեսական համագործակցությունը ինչպես երկկողմ, այնպես էլ միասնական ինտեգրացիոն տարածության ձևաչափով։ Մենք պատրաստ ենք շարունակել համատեղ աշխատանքը՝ ավելի խորացնելու և բարելավելու գործընկերության արդյունավետությունը՝ ի շահ մեր երկրների քաղաքացիների, ի շահ Հարավային Կովկասում խաղաղության և անվտանգության ամրապնդման: [ՌԴ ԱԳ նախարար Սերգեյ Լավրովի ուղերձը՝ ՀՀ և ՌԴ ԱԳՆ-ների միջև դիվանագիտական հարաբերությունների հաստատման 33-ամյակի կապակցությամբ] |news.am|

ՄԻՊ-ը այսօր ահազանգ է ստացել, որ «Նուբարաշեն» ՔԿՀ-ում դիմակներով անձինք ծեծի են ենթարկել ցմահ դատապարտյալներին։ «Սոցիալական ցանցերի և զանգվածային լրատվության միջոցների մշտադիտարկման արդյունքում ստացվել է նաև տեղեկություն, որ դատապարտյալներին որևէ բուժօգնություն չի ցուցաբերվում։ Պաշտպանի հանձնարարությամբ «Նուբարաշեն» ՔԿՀ է մեկնել արագ արձագանքման խումբ՝ տեղում բարձրացված խնդիրների մանրամասներին ծանոթանալու, ցմահ ազատազրկման դատապարտված անձանց հետ առանձնազրույց ունենալու նպատակով: Պաշտպանի աշխատակազմում ուսումնասիրվում են նաև նշված դեպքի վերաբերյալ հրապարակային նյութերը»,- նշված է հաղորդագրությունում:

«Ես 3 անչափահաս երեխա թողել եմ տանը, եկել դատարան։ 2 տարեկան երեխայիս թողել եմ 10 տարեկանի մոտ, պատուհանները փակել, եկել։ Չի կարելի էլի էսպես, չորս տարի է՝ էստեղ նստած եմ, բայց դրա համար մի պատճառ չկա», -Քիմիկների զորամասի գործով ամբաստանյալ Էլլադա Հարությունյանի խոսքերն են։ Հարությունյանը, որ 44-օրյա պատերազմի ժամանակ ծառայել է Քիմիկների զորամասում, մեղադրվում է ՀՀ ԶՈՒ ՌՔԿՊ զորքերի պետ-վարչության պետ Վարդան Նշանյանի որդու ծառայությունից խուսափելու հանգամանքը կոծկելու մեջ։ Դատարանում երեկ հարցաքննվեց նաեւ Քիմիկների գործով վկա Դավիթ Կատանյանը․ նա շրջափակումից փրկվել է, նրա եղբայրը՝ զոհվել․ «Որ տեսա՝ պոստեր կան, որ սապյորը միներ էր շարում, մտածեցի՝ անիմաստ չէր դա, մեջս մի վախ ընկավ․ եթե սապյորը շարում է, մենք էլ խի՞ ենք գնում առաջ։ Էդտեղ սարերի վրա նկատեցի թուրքերին, գոռացի՝ կանգնեք, զասադ է, տղերքին արթնացրի։ Բայց վարորդն ասաց՝ մինչեւ դիմացի ավտոբուսը չկանգնի, չի կարող։ Եթե էդ առաջին խաչմերուկի վրա կանգներ՝մոտ 300 մ հետ, էդպես չէր լինի։ Հեռախոսս հանել եմ, որ զանգեմ ախպորս, զգուշացնեմ՝ առաջ չգան, կապ չի եղել»,- պատմեց նա։

Հակակոռուպցիոն կոմիտեն մանրամասներ է ներկայացրել Գյումրիի ընտրությունների ժամանակ ընտրակաշառքի դեպքերի վերաբերյալ. «Գյումրիի ավագանու արտահերթ ընտրություններին մասնակցող կուսակցությունների դաշինքի թեկնածու 71-ամյա կինը Գյումրիի 75-ամյա բնակչին խոստացել է ընտրակաշառք՝ նշված դաշինքի օգտին քվեարկելու պայմանով ընտրողներ հավաքագրելու համար: [...] Հայտնաբերվել են Գյումրու մի շարք բնակիչների՝ անձնական տվյալներ պարունակող ցուցակներ՝ ձեռագիր նշումներով: Հարցաքննված մի շարք անձինք իրենց ցուցմունքներով հաստատել են ընտրակաշառք տալու և ստանալու վերաբերյալ վարույթն իրականացնող մարմնի տեղեկությունները: Հաշվի առնելով մեղադրյալների տարիքը և սեռը երկու մեղադրյալների նկատմամբ խափանման միջոց է կիրառվել վարչական հսկողությունը»:

Ծառայությունից խուսափելու համար նախատեսված պատիժները խստացվում են: ՀՀ կառավարության որոշմամբ՝ պարտադիր զինվորական կամ այլընտրանքային ծառայության զորակոչից խուսափելու համար նախատեսված ազատազրկման ներկայիս 2-5 տարվա սահմանը կփոխարինվի 3-6 տարվա ազատազրկմամբ։ Վարժական հավաքներից խուսափելու համար նախատեսված պատիժը կդառնա 1-3 տարի ազատազրկում, կխստացվի նաև տուգանքի չափը։ |civilnet.am|