Ադրբեջանի ՊՆ հաղորդագրությունը, թե իբր սեպտեմբերի 4-ին՝ ժամը 19։35-ի սահմաններում, ՀՀ ԶՈՒ ստորաբաժանումները կրակ են բացել սահմանագոտու հարավարևմտյան հատվածում տեղակայված ադրբեջանական դիրքերի ուղղությամբ, չի համապատասխանում իրականությանը։ [ՀՀ ՊՆ]

Ֆրանսիայի քաղաքացիներին, այդ թվում՝ երկքաղաքացիություն ունեցողներին, խորհուրդ է տրվում առանց ծանրակշիռ պատճառի, առանց խիստ անհրաժեշտության չմեկնել Ադրբեջան։ Այդ մասին ասված է Ֆրանսիայի ԱԳՆ-ի հաղորդագրության մեջ։ «Ֆրանսիայի քաղաքացիները, այդ թվում՝ երկքաղաքացիություն ունեցողները, որոնք ապրում կամ տարանցիկ ճանապարհորդում են, Ադրբեջանում հայտնվում են ձերբակալության, կամայական կալանքի և անարդար դատավարությունների վտանգի առջև: Ձերբակալության կամ կալանավորման դեպքում հիմնարար իրավունքների հանդեպ հարգանքը երաշխավորված չէ»: Ադրբեջանի ԱԳՆ մամուլի ծառայության ղեկավար Այխան Հաջիզադեն քննադատել է Ֆրանսիայի ԱԳՆ-ի՝ Ադրբեջան մեկնելուց զերծ մնալու կոչը, այն համարելով «անհիմն»։ |1lurer.am|

Այսօր «Հետք»-ում հրապարակված տեղեկատվությունը, թե «Արմավիրի մարզում Արևմտյան Նեղոսի տենդից 3 մարդ է մահացել», հաստատված չէ, քանի որ դեռևս արձանագրված չէ մահվան դեպքերի պատճառաբանական կապը հիվանդության հետ։ [ՀՀ առողջապահության նախարարություն]

Դավիթ Հարությունյանի միջնորդությամբ ներկայացված հարցը նիստում քննարկելու անհրաժեշտության բացակայությամբ պայմանավորված՝ Խորհուրդը որոշել է այն քննության առնել գրավոր ընթացակարգով՝ 2024 թվականի սեպտեմբերի 17-ին, ժամը՝ 16:30-ին: ԲԴԽ նախագահ Կարեն Անդրեասյանն ինքնաբացարկ է հայտնել, քանի որ դատավորի լիազորությունները դադարեցնելուց հետո նա այս գործի մասին որպես Խորհրդի նախագահ ներկայացրել էր մեկնաբանություններ և պարզաբանումներ։ [ԲԴԽ]

Հայաստանը կմասնակցի ԲՐԻԿՍ-ի գագաթաժողովին: Այս մասին հայտնել է ՀՀ ԱԳ նախարարի տեղակալ Մնացական Սաֆարյանը։ Նշենք, որ ԲՐԻԿՍ-ը 5 երկրների խումբ է, որի անդամ են Բրազիլիան, Ռուսաստանը, Հնդկաստանը, Չինաստանը և ՀԱՀ-ը։ Այս տարի գագթնաժողովն անկացվելու է Կազանում։ Այս տարի BRICS-ի նախագահության ժամանակ ՌԴ-ն հայտարարել է, որ կենտրոնանալու է «ասոցիացիայի շրջանակներում գործընկերության և համագործակցության ողջ շրջանակի խթանման վրա երեք հիմնական ուղղությամբ՝ քաղաքականություն և անվտանգություն, տնտեսություն և ֆինանսներ, մշակութային և հումանիտար կապեր»: |tert.am|

Զինծառայող Է․ Ալեքսանյանին ինքնասպանության հասցնելու մեղադրանքով կալանավորվել է վերջինիս ծառայակիցը։ «Փաստական տվյալներ են ստացվել որ ՀՀ ՊՆ N զորամասի պարտադիր ժամկետային զինծառայող Հ․ Ե․-ն, տվյալ մարտական դիրքում որպես դիտորդ ընդգրկված լինելով մարտական հերթապահության, 2024թ․ օգոստոսի 27-ից մինչև սեպտեմբերի 2-ն ընկած ժամանակահատվածում, տարբեր օրերի անձնակազմի ներկայությամբ պարբերաբար նվաստացրել է Է․ Ալեքսանյանի անձնական պատիվն ու արժանապատվությունը, հնչեցրել հայհոյանքներ, հարվածել։ Ալեքսանյանը, հայտնվելով անելանելի վիճակում նույն մարտական դիրքում դիտորդի պարտականությունները կատարելու ընթացքում «ԱԿՄ» տեսակի ինքնաձիգով մեկ կրակոց է արձակել կզակի շրջանում և ինքնասպան եղել»,- հայտնում են ՔԿ-ից։

Քիմիկների զորամասի գործով առանցքային վկա Արման Նուրիջանյանը, ում վստահված էր զորքի ուղեկցումը՝ մարտական օպերացիայի, դատարանում պնդում է՝ իրեն չի ասվել, թե մինչեւ ուր պիտի ուղեկցի, ասվել է՝ նրանք գիտեն տեղակայման վայրը, պետք է միայն ճանապարհը ցույց տալ։ Զորամասի՝ այդ ժամանակվա հրամանատար, այժմ մեղադրյալ Արսեն Աբգարյանի պաշտպան Դավիթ Դավիդյանի հարցին՝ եթե տեղակայման վայրը գիտեին, ապա որպես ուղեկցող՝ իրեն նշանակելու իմաստն ու տրամաբանությունը որն էր, վկան դժվարացավ հստակ պատասխանել, ասաց՝ ճանապարհը ցույց տալը, որ չշեղվեին։ Պաշտպանը խնդրեց պարզաբանել՝ այդ պարագայում ինչպե՞ս է, որ դատարանում հարցաքննված երկու այլ վկաներ ասում են, որ Նուրիջանյանին մի քանի անգամ հստակ նշել են, որ պետք է ուղեկցել մինչեւ Կիրի հանք, այլ ոչ թե Կովսական․ «Ստում են»,– ի պատասխան ասաց Նուրիջանյանը։ Նրա խոսքով՝ դեպքից ժամեր անց Քաջարանի ջոկատը մեկնել է՝ շրջափակման մեջ մնացածներին օգնության, սակայն տեղ չհասնելով՝ հետ է դարձել․  «Էլի նույն ձեւ գնաց, ընկավ զասադի մեջ, զոհեր,մահեր․․․»

Մոնղոլիան Միջազգային քրեական դատարանի օրդերի հիման վրա չի ձերբակալելու Ռուսաստանի նախագահ Վլադիմիր Պուտինին, քանի որ գտնվում է էներգետիկ կախվածության մեջ և չեզոքության քաղաքականություն է վարում: Այդ մասին Politico-ին հայտնել է այդ երկրի կառավարության ներկայացուցիչը։ «Այդ մատակարարումները վճռորոշ նշանակություն ունեն մեր և մեր ժողովրդի գոյությունն ապահովելու համար։ < ... > Մոնղոլիան իր դիվանագիտական բոլոր հարաբերություններում միշտ պահպանել է չեզոքության քաղաքականություն»,- հավելել է նա։ |hetq.am| |hetq.am|

Ըմբիշ Աշոտ Խաչատրյանը 4:1 հաշվով հաղթել է ադրբեջանցի Ռուսլան Նուրուլաևին և դուրս եկել աշխարհի Մ20 առաջնության եզրափակիչ:

Առուշ Առուշանյանը հայտարարել է, որ հրաժարական չի տալու․ «Ինձ ժողովուրդն է ընտրել։ Ես եղել եմ կալանքում եւ ժողովուրդը մոտ 70 տոկոս վստահության քվե է տվել»: Այս մասին այսօր դատարանի բակում ասել է Գորիսի համայնքապետը՝ անդրադառնալով արդարադատության նախարար Գրիգոր Մինասյանի հայտարարությանը, թե Առուշանյանը կա՛մ հրաժարական պետք է տա, կա՛մ ավագանին լիազորություն ունի այդ հիմքով անվստահություն հայտնելու նրան: Առուշանյանի խոսքով՝ իր նկատմամբ քաղաքական հետապնդում չկա. «Մի քանի հարյուր հազար մարդիկ ընդդիմադիր հայացքներ ունեն, հիմա՝ ի՞նչ, բոլորին պետք է դատեն։ Ես կաշկանդվածություն չունեմ իմ գաղափարների մեջ արտահայտվելու»։