Երեւանի ընդհանուր իրավասության քրեական դատարանի Շենգավիթի նստավայրում այսօր հարցաքննվեցին 44-օրյա պատերազմի ժամանակ Հադրութի շրջանի Այգեստան գյուղում զոհված 73 զինծառայողների ծնողներից երեքը։ Դատարանում քննության առարկա են Մարտունու N զորամասի 3-րդ հրաձգային գումարտակի 7-րդ վաշտի 73-հոգանոց անձնակազմի զոհվելու հանգամանքները։ Այս գործով երկու մեղադրյալ կա՝ զորամասի նախկին հրամանատար Գոռ Իշխանյանը եւ ՊԲ օպերատիվ բաժնի նախկին պետ Նվեր Մարտիրոսյանը։ Նրանց նկատմամբ խափանման միջոց է ընտրված չբացակայելու արգելքը, իսկ դատական նիստերն ընթանում են առանց նրանց մասնակցության։  Զոհված զինծառայող Պետրոս Ասատրյանի հայր Նվեր Ասատրյանն այսօր դատարանում ասաց, որ որդու հետ վերջին անգամ խոսել է նրանց վաշտի՝ Հադրութի 9կմ կոչվող տեղանք գործողության մեկնելու օրը։ Հանրային մեղադրող Գրիգոր Մղդեսյանի հարցին՝ ինչ է խոսել որդու հետ վերջին անգամ, Ասատրյանը պատասխանեց, որ Պետրոսը սովորականից մի քիչ ավելի պաշտոնական տոն է ունեցել, ասել է՝ «պապ, մեզ տեղափոխում են՝ չգիտեմ ուր, ու հեռախոս չի լինելու»։

Շողակաթ Վարդանյանի «1489» վավերագրական ֆիլմը հաղթող է ճանաչվել Հռոմի վավերական ֆիլմերի միջազգային փառատոնում: Այս մասին ֆեյսբուքյան իր էջում հայտնել է ֆիլմի հեղինակը։ Հիշեցնենք, որ ֆիլմը ներկայացված է նաև «Օսկար»-ի 97-րդ մրցանակաբաշխության հավակնորդ ֆիլմերի ցանկում։

Թուրքիայի և Ադրբեջանի նախագահները հեռախոսազրույց են ունեցել։ Թուրքական կողմի հաղորդագրության համաձայն՝ զրույցի ընթացքում Ռեջեփ Էրդողանը նշել է, որ Անկարան շարունակելու է աջակցել Սիրիայի ժողովրդին այդ երկրում մնայուն կայունության հաստատման համար։ Իլհամ Ալիևը գոհունակություն է հայտնել Սիրիայում ձևավորված նոր իրավիճակի առնչությամբ։ Քննարկվել են նաև տարածաշրջանային և միջազգային հարցեր։ |1lurer.am|

Հայաստան-Թուրքիա սահմանին անցած ամիս տեղի է ունեցել երկու երկրների մի շարք գերատեսչությունների ներկայացուցիչների հանդիպումը․ հայտարարել է Հայաստան-Թուրքիա կարգավորման գործընթացում ՀՀ հատուկ ներկայացուցիչ Ռուբեն Ռուբինյանը։ Հանդիպման վերաբերյալ, սակայն, պաշտոնական տեղեկություն այդ օրերին կողմերը չեն հաղորդել: Ռուբեն Ռուբինյանն այսօր էլ շատ մանրամասներ չի հայտնել՝ միայն փոխանցել է. «Գնահատվել են տեխնիկական կարիքները, որոնք հնարավորություն կընձեռեն գործարկել Ախուրիկ/Աքյաքա երկաթուղու սահմանային անցակետը: Հանդիպումը անցել է դրական և կառուցողական մթնոլորտում»: Նշենք, որՀայաստանի և Թուրքիայի հատուկ բանագնացներ Ռուբեն Ռուբինյանն ու Սերդար Քըլըչն ամռանը տեղի ունեցած իրենց վերջին հանդիպմանը պայմանավորվել էին համատեղ գնահատել Գյումրի-Կարս երկաթուղով սահմանի անցման տեխնիկական պահանջները: |azatutyun.am|

Վարչական դատարանի վճիռը, որով ոչ իրավաչափ էր ճանաչվել E-disability էլեկտրոնային համակարգով անձի ֆունկցիոնալությունը գնահատելիս միջավայրային գործոնները հաշվի չառնելը, բողոքարկվել է Վերաքննիչ դատարան․ բողոք են ներկայացրել թե՛ հայցվոր կողմը՝ «Հաշմանդամություն ունեցող անձանց իրավունքների պաշտպանության օրակարգ» ՀԿ–ն, թե՛ պատասխանող կողմը՝ Աշխատանքի եւ սոցիալական հարցերի նախարարությունը։ Նշենք, որ վճռի հրապարակումից հետո գրավոր հարցում ենք ուղարկել նախարարությանը՝ խնդրելով հայտնել՝ պատրաստվո՞ւմ են բողոքարկել վճիռը, եթե ոչ, ապա ինչպե՞ս են այն ի կատար ածելու։ Հարցմանը պատասխանելու համար նախարարությունը մեկամսյա ժամկետ էր խնդրել, ինչից հետո՝ երեկ՝ ժամկետի վերջին օրը, ուղարկել է պատասխան, ըստ որի՝ բողոք ներկայացնելու հարցը դեռեւս քննարկման փուլում է։ Դատական տեղեկատվական համակարգից, սակայն, պարզ է դառնում՝ Նախարարությունը բողոքը ներկայացրել է դեռեւս դեկտեմբերի 4-ին։

Հրապարակվեց Հայաստանի ազգային հերոս, արտակարգ իրավիճակների նախկին նախարար Անդրանիկ Փիլոյանի գործով դատավճիռը։ Դատարանը վճռեց Փիլոյանին մեղավոր ճանաչել պաշտոնական լիազորությունների չարաշահման, խոշոր չափերով կաշառք ստանալու, խոշոր չափերով խարդախության համար, որը կատարվել է մի խումբ անձանց կողմից նախնական համաձայնությամբ։ Նրա նկատմամբ վերջնական պատիժ նշանակվեց 4 տարի 5 ամիս 23 օրը՝ 5 տարվա ազատազրկմանը հաշվակցելով կալանքի ժամկետը, 3 տարի ժամկետով զրկել որոշակի հանրային ծառայության պաշտոններ զբաղեցնելու իրավունքից, նշանակել տուգանք՝ 1 միլիոն 300 հազար դրամ, ընտրված բացակայելու արգելք խափանման միջոցը դատավճռի օրինական ուժի մեջ մտնելուց հետո վերացնել։ |iravaban.net|

Իսրայելական զրահատեխնիկան առաջ է շարժվել դեպի Սիրիայի տարածքի խորքը և այժմ Դամասկոսից մոտ 20 կմ հեռու է, հայտնել են տեղի ԶԼՄ-ները: Միևնույն ժամանակ, իսրայելական բանակը Սիրիայում ավիահարվածներ է հասցրել 250 թիրախի, այդ թվում՝ ռազմաբազաների, տասնյակ մարտական ինքնաթիռների, ՀՕՊ համակարգերի, ինչպես նաև զենքի արտադրության և պահպանման օբյեկտների: |1lurer.am|

Հովիկ Աղազարյանի կողմից պետական գաղտնիք պարունակող արտահոսքեր կազմակերպելու վերաբերյալ հրապարակումն ուղարկվել է ՀՀ հակակոռուպցիոն կոմիտե՝ վարույթ նախաձեռնելու հարցը լուծելու համար։ [ՀՀ Գլխավոր դատախազություն] |arm.sputniknews.ru|

Հալեպահայերն անվտանգության երաշխիք են ստացել քաղաքի ռազմական կառավարիչներից։ Բերիո թեմի առաջնորդ Մակար արքեպիսկոպոս Աշգարյանն «Ազատությանը» հայտնել է, որ այսօր Հալեպի մյուս քրիստոնյա համայնքների ներկայացուցիչների հետ հանդիպմանն են այդ մասին իրենց հայտնել։ «Կարող ենք ասել, որ ապահովություն լինելու է, չպետք է վախենանք։ Ընդհակառակը՝ պետք է հուսանք, որ մոտ ապագայում ամեն ինչ պետք է լավ լինի։ Իրենք ասում են, որ լավ կլինի, որ ամեն մարդ սկսի աշխատանքին գնա, թեև որոշ տնտեսական դժվարություններ ունենք։ Բանկերը փակ են, տակավին դպրոցները փակ են։ Բայց մոտ ժամանակներս՝ հավանաբար մեկ շաբաթից համալսարաններն ու դպրոցները կսկսեն իրենց բնականոն ընթացքի մեջ մտնել։ Մաղթենք, որ բանկային դրությունն էլ կկարգավորվի», - ասաց Աշգարյանը։ Ըստ արքեպիսկոպոսի՝ քաղաքում իրավիճակը խաղաղ է։|azatutyun.am|

Այժմ Ադրբեջանի դեմ հայցերը փոխադարձության սկզբունքով հետ կանչելու հարց չի քննարկվում. հայտարարեց Միջազգային իրավական հարցերով ՀՀ ներկայացուցիչ Եղիշե Կիրակոսյանը։ Կիրակոսյանն այսօր լրագրողների հետ զրույցում հրաժարվեց մեկնաբանել վարչապետ Փաշինյանի հայտարարությունը։ Նա վստահեցրեց՝ այժմ նման հարց չի քննարկվում: Նրա խոսքով՝ շարունակվում է գործերի քննությունը, շարունակվում են նաև ընթացակարգային քայլերը, որ անհրաժեշտ են հայցերի քննությունն ապահովելու համար։ Ավելի վաղ մամուլում տեղեկություններ էին շրջանառվում, որ Եղիշե Կիրակոսյանը դեմ է հայցերը հետ կանչելու կառավարության մոտեցմանը, լրատվամիջոցներն անգամ նրա հնարավոր հրաժարականի մասին էին գրում: Արդյոք Կիրակոսյանն այս հարցով վարչապետ Փաշինյանի հետ վեճ ունեցե՞լ է և եթե ի վերջո Հայաստանի բանակցողները նման որոշում կայացնեն՝ հնարավո՞ր է հրաժարականի դիմում ներկայացնի․ «Չեմ մեկնաբանում այդ հարցերը», - պատասխանեց նա: