ՀՀԿ փոխնախագահ Արմեն Աշոտյանը ևս երեք ամիս կմնա կալանքի տակ։ Հակակոռուպցիոն դատարանում ընթացող դատական նիստում, որտեղ քննարկվում էր նրա խափանման միջոց կալանքը փոխարինելու հարցը, նման որոշում կայացրեց դատավոր Վահե Դոլմազյանը։ |armeniasputnik.am|

Հունվարի 8-ին ՀՀ արտաքին գործերի նախարար Արարատ Միրզոյանն ընդունել է ԱՄՆ Կովկասյան բանակցությունների հարցերով ավագ խորհրդական, ԵԱՀԿ Մինսկի խմբի համանախագահ Լուիս Բոնոյին: Հանդիպման ընթացքում զրուցակիցները քննարկել են տարածաշրջանային անվտանգությանը վերաբերող հարցեր, այդ թվում՝ անդրադարձ է կատարվել Հայաստանի և Ադրբեջանի միջև հարաբերությունների կարգավորման գործընթացին։ [ՀՀ ԱԳՆ]

Արաբական Միացյալ Էմիրությունների նախագահ շեյխ Մոհամմեդ բին Զայեդ Ալ Նահյանը հունվարի 8-ին պաշտոնական այցով ժամանել է Ադրբեջան:

44-օրյա պատերազմի ժամանակ ՀՀ ՊՆ N զորամասի շտաբի պետ, փոխգնդապետ  Անդրանիկ Վերանյանի վերաբերյալ գործով այսօր պետք է շարունակվեր ապացույցների հետազոտումը, սակայն հերթը դրան չհասավ։ Նրա պաշտպան Նորիկ Նորիկյանը գործի հետագա քննությունը դռնփակ անցկացնելու միջնորդություն ներկայացրեց, որը եւս օրենքի պահանջով քննվեց դռնփակ։ Մեզ հայտնի դարձավ, որ պաշտպանական կողմը դռնփակ քննություն իրականացնելու միջնորդությունը ներկայացրել է՝ դատական նիստի ընթացքում անվտանգության նկատառումներից ելնելով, հաշվի առնելով պաշտպանական եւ տուժող կողմերի միջեւ պարբերաբար սրվող լարվածությունը։ Մեղադրող եւ տուժող կողմերն առարկել են միջնորդության դեմ՝ պնդելով, որ դատարանն ի զորու է ապահովել անվտանգությունը դռնբաց քննության պայմաններում։

Զինվորական կոմիսարիատում զորակոչի ենթակա քաղաքացու մահ  չի արձանագրվել։ Անհիմն պատճառահետևանքային կապերի շեշտադրմամբ մամուլում տեղեկություններ են տարածվում ՀՀ ԶՈՒ չզորակոչված քաղաքացի Է. Հ.-ի մահվան պատճառների վերաբերյալ, ինչի կապակցությամբ պաշտպանության նախարարությունը հայտնում է, որ զինվորական կոմիսարիատում առկա փաստաթղթերի համաձայն՝ զորակոչիկը ինչպես զինվորական հաշվառման, այնպես էլ շարքային կազմի պարտադիր զինծառայության հայտարարված զորակոչի ընթացքում ուղեգրվել է ստացիոնար հետազոտության և իրավասու հանձնաժողովների կողմից գտնվել է բժշկական փորձաքննության փուլում։ Քաղաքացու վերաբերյալ պիտանիության որոշում կայացված չի եղել. նա կենտրոնական բժշկական հանձնաժողովի կողմից ուղեգրվել է լրացուցիչ հետազոտության՝ ախտորոշումը ճշտելու և փորձաքննական ճիշտ եզրակացություն կայացնելու նպատակով։ [ՀՀ ՊՆ]

ԱԽ քարտուղար Արմեն Գրիգորյանը և ԵԱՀԿ Մինսկի խմբի ամերիկացի համանախագահ Լուի Բոնոն քննարկել են հայ-ադրբեջանական հարաբերությունների կարգավորման գործընթացը և անդրադարձել վերջին շրջանում տեղի ունեցած բանակցություններին ու դրանց շրջանակներում ձեռք բերված պայմանավորվածությունների կատարման ընթացքին: Գրիգորյանը մեկ անգամ ևս վերահաստատել է հայկական կողմի հանձնառությունը տարածաշրջանում հաստատելու երկարատև և համապարփակ խաղաղություն: [ՀՀ ԱԽ գրասենյակ]

«Մոնթե Մելքոնյանի անվան ռազմամարզական վարժարան»-ի տնօրենի պաշտոնակատար է նշանակվել Սուրեն Պապիկյանի համակուրսեցի Ալեքսանդր Մանուչարյանը։ Factor.am-ին հայտնի դարձած այս տեղեկությունը հաստատել է Մանուչարյանը։ Պատասխանելով հարցին, թե համակուրսեցի լինելու հանգամանքը որքանո՞վ է եղել որոշիչ պաշտոնի նշանակվելու հարցում, Մանուչարյանն ասել է․ «Կարծում եմ՝ դա ընդհանրապես կապ չուներ, խոսքը կոմպետենտության մասին է»: Նա մինչ այս աշխատել է Չարենցավանի Մ. Մաշտոցի անվան ավագ դպրոցում որպես պատմության ուսուցիչ։ |factor.am|

Հռոմի ստատուտի վավերացումը և դրանից հետո նոր օրենսդրության մշակումը ՀՀ քննչական մարմիններին հնարավորություն կտա Ադրբեջանի ռազմական հանցագործությունների առնչությամբ հետաքննություններին ներգրավել միջազգային դատախազների և իրավապահների։ Այս մասին ամփոփիչ ասուլիսի ժամանակ հայտնել է արդարադատության նախարար Գրիգորի Մինասյանը։ Նրա խոսքով նախարարությունն ուսումնասիրել է տարբեր երկրների, այդ թվում՝ Վրաստանի փորձը, սկսել է օրենսդրական փոփոխությունների փաթեթի մշակումը, որը պետք է ընդունվի Հռոմի ստատուտի վավերացումից հետո․ «Առաջին քայլը նոր օրենսդրության մշակումն է՝ միջազգային փորձագետների հետ աշխատելով։ Այս գործընթացի մեկնարկը տրվել է։ Այսինքն, վավերացումից հետո իրավական նորմատիվ ակտեր կան, որոնք մենք պետք է ընդունենք կամ փոփոխենք եղած օրենքները»։ |civilnet.am|

Գլխավոր դատախազությունը բողոք է ներկայացրել Վճռաբեկ դատարան՝ պահանջելով կալանավորել գեներալ-մայոր Գրիգորի Խաչատուրովին։ Այս մասին tert.am-ին հայտնել են Դատախազությունից։

Կենտրոնի թաղապետարանի պաշտոնյաները շուրջ 1 միլիոն 750 հազար դրամ կաշառք են ստացել՝ հրատապ գնման ընթացակարգերի մասին ընկերության տնօրենին տեղեկացնելու և անհրաժեշտ խորհրդատվությամբ այդ ընթացակարգերին տվյալ տնտեսվարողի պարտադիր մասնակցությունն ապահովելու համար, Երևանում գործող սրճարանների դիմաց անցուղիների տեղադրման և նախատեսված կանաչապատ ծածկի հաշվին մայթի լայնացման աշխատանքներն անտեսելու ու չարձանագրելու համար։ Երկու պաշտոնյաների նկատմամբ որպես խափանման միջոց է կիրառվել կալանքը: Նախաքննությունն ավարտվել է: Դատախազի կողմից հաստատվել է մեղադրական եզրակացությունը, և վարույթի նյութերն ուղարկվել են դատարան՝ ըստ էության քննելու համար: [Հակակոռուպցիոն կոմիտե]