Երևանի պսևդո քաղաքապետի որոշմամբ փետրվարի 5-ին ավագանու արտահերթ նիստ է գումարվելու, որի օրակարգային հարցն է Հայկ Մարությանի և ևս 4 ընդդիմադիր ավագանու անդամների լիազորությունների վաղաժամկետ դադարեցումը։Միակ հարցը, որ մենք պատրաստ ենք արտահերթ քննարկել այս իշխանությունների հետ դա րոպե առաջ Տիգրան Ավինյանի հրաժարականն է։ Հերի՛ք է փորձեք ընդդիմադիրներին լռեցնել, չի՛ ստացվելու։ [«Ազգային առաջընթաց» կուսակցություն]

Երևանի ավագանու «Մայր Հայաստան» խմբակցության դեմ նիկոլական իշխանությունը տոտալ հարձակման է անցել: Դիմում են քստմնելի քայլերի՝ կիրառելով տարատեսակ մեթոդներ: Մի կողմից ահակեբումներ և հետապնդումներ առանձին անդամների նկատմամբ, մյուս կողմից՝ խմբակցության 4 անդամի ավագանու մանդատից զրկելու նախաձեռնություն: Մենք արձանագրում ենք, որ «Մայր Հայաստանի» քաղաքական գործունեությունը և՛ ավագանիում, և՛ քաղաքական դաշտում հունից հանում է օրվա իշխանությանը, որն առաջնորդվում է Ալիևի թելադրած օրակարգով: Սա ևս մեկ անգամ ցույց է տալիս, որ ամբողջական իշխանափոխության օրակարգն այլընտրանք չունի։ [«Մայր Հայաստան» խմբակցության հայտարարությունը]

Մեր Հռչակագրի դրույթները որոնք են, մենք հռչակել ենք, թե ինչի համար ենք պետություն ստեղծում, եւ երեք ուղենիշ ենք նշում՝ մեկը պատմական արդարությունը, մյուսը՝ հայ ժողովրդի իղձերը, մյուսը՝ ԼՂ ԳԽ եւ Հայաստանի ԳԽ՝ վերամիավորման որոշումը։ Մեր քաղաքականությունը, պետական քաղաքականությունը արդյո՞ք պիտի հղվի դրա վրա, եւ արդյոք մեր պետական քաղաքականությունները պետք է էդ ուղերձով առաջանորդվեն եւ պետք է ելնեն ԼՂ ԳԽ եւ Հայաստանի ԳԽ՝ Ղարաբաղի եւ Հայաստանի վերամիավորման որոշման վրա․ սա քաղաքական ընտրության հարց ա․ եթե այո, սա նշանակում ա, որ մենք խաղաղություն երբեք չենք ունենա, երբեք չենք ունենա, ավելին, սա նշանակում ա, որ մենք հիմա կունենանք պատերազմ։ [Նիկոլ Փաշինյան]

Երկրի անվտանգության ապահովման առաջին պայմանը բանակի բարեփոխումն է։ Անվտանգության ապահովման երկրորդ գործիքը արտաքին հարաբերություններն են։ Այս երկու արձանագրման մեջ մեծ նորություն չկա։ Նախկինում սա միշտ ասվել է, եւ այս թեման՝ բանակ եւ դիվանագիտություն, նորություն չէ։ Կարեւոր եմ համարում, որ այս զույգին ավելանա լեգիտիմության հարցը․ եւ արտաքին հարաբերություններում, եւ բանակի կառուցման կոնտեքստում շատ կարեւոր է ունենալ լեգիտիմ նպատակներ։ Որտեղ եմ տեսնում ես էդ լեգիտիմության սահմանը․ քննարկվող հարցի համատեքստում լեգիտիմությունը տեսնում եմ Հայաստանի՝ միջազգայնորեն ճանաչված սահմանի մեջ։ [Նիկոլ Փաշինյանը՝ Հանրային ռադիոյի տաղավարում ]

Ալեն Սիմոնյանի եղբոր կնոջը՝ Անի Գևորգյանին, 2 ամսով կալանավորելու որոշում է կայացվել։ Նրա փաստաբանի խոսքով՝ իրենք բողոքարկելու են որոշումը, քանի որ իրավաչափ չեն համարում։ Պաշտպանի խոսքով նա մեղադրվում է պաշտոնական դիրքը չարաշահելուն օժանդակելու համար․ «Երեխաներ ունի` 2 և 4 տարեկան, այդ բոլոր մեղմացուցիչ հանգամանքներն անտեսվել են»։

Դա Հայաստանի ինքնիշխան իրավունքն է, ընդհանուր առմամբ, այստեղ մեկնաբանելու ոչինչ չկա։ Բայց մյուս կողմից, մեզ համար կարևոր է, որ նման որոշումները բացասաբար չանդրադառնան ինչպես դե յուրե, այնպես էլ դե ֆակտո մեր հարաբերություններին, որոնք մենք գնահատում ենք և ձգտում ենք զարգացնել։ [Պեսկովը՝ մեկնաբանելով Հայաստանի անդամակցությունը Միջազգային քրեական դատարանին]

Էկոնոմիկայի նախարարությանն առնչվող առերևույթ կոռուպցիոն չարաշահումների գործով այսօր 2 ամսով կալանավորվել է «Սիներջի» ընկերության տնօրեն Աշոտ Հովհաննիսյանը։ Այս մասին հայտնել է Բարձրագույն դատական խորհրդի խոսնակ Լիլիթ Շաբոյանը: Հիշեցնենք, երեկ Քննչական կոմիտեն հայտնել էր, որ փաստական տվյալներ են ստացվել, որ էկոնոմիկայի նախարարության պաշտոնատար անձինք, նախնական համաձայնությամբ, մի խումբ անձանց դրդմամբ և օժանդակությամբ, չարաշահել են ծառայողական լիազորությունները և «Հանրային ներդրումային ծրագրերի բանկի ստեղծման» մրցույթի ընթացքում ընկերություններից մեկի հաղթանակն ապահովելու համար, մյուսին համարել են պայմաններին չհամապատասխանող ու հեռացրել: Ըստ քննչական կոմիտեի՝ հաղթող է ճանաչվել մրցակցից շուրջ երեք անգամ ավելի՝ 392 մլն դրամ գնային առաջարկ ներկայացրած ընկերությունը:

Ալիևն այսօր հայտարարել է՝ Հայաստանի Անկախության Հռչակագիրը պարունակում է «Ադրբեջանի Ղարաբաղի շրջանը» Հայաստանին միավորելու ու «Ադրբեջանի տարածքային ամբողջականության խախտման ուղղակի կոչեր», և այդ փաստաթղթին հղումներն արտացոլված են նաև Հայաստանի Սահմանադրության մեջ։ Ադրբեջանի նախագահը նշել է, որ խաղաղության կարելի է հասնել, եթե վերջ դրվի այդ պնդումներին, փոփոխություններ կատարվեն Հայաստանի Սահմանադրության մեջ և այլ նորմատիվ իրավական փաստաթղթերում։ Ալիևը կարևորել է, որ այս քայլերը հնարավորինս շուտ իրականացվեն Հայաստանում, և ընդգծել, թե Հայաստանում այս թեմայով ներքին քննարկումների նախաձեռնումը համարում է դրական քայլ, և դա կարող է լավ հնարավորություն ստեղծվել, որ խաղաղության գործընթացը շուտով ավարտվի։

ՌԴ դրոշի ատրիբուտները պղծած Սամվել Շիրինյանին մեղադրանք է առաջադրվել։ Այս մասին Aysor.am-ին հայտնել է ՔԿ մամուլի խոսնակ Գոռ Աբրահամյանը։ Մեղադրանքը ներկայացվել է ՀՀ քրեական օրենսգրքի 329-րդ հոդվածի 2-րդ մասի 3-րդ կետով (Ատելություն, խտրականություն, անհանդուրժողականություն կամ թշնամանք հրահրելուն կամ քարոզելուն ուղղված հրապարակային խոսքը, ինչպես նաև այդ նպատակով նյութեր կամ առարկաներ տարածելը՝ հրապարակայնորեն ցուցադրվող ստեղծագործությունների, զանգվածային լրատվության միջոցների կամ տեղեկատվական կամ հաղորդակցական տեխնոլոգիաների օգտագործմամբ)։

Aravot.am-ը երեկ կեսգիշերին գրել է, որ ձերբակալվել է ԱԺ նախագահ Ալեն Սիմոնյանի եղբոր՝ Կառլեն Սիմոնյանի կինը՝ Անի Գևորգյանը: Նրա պաշտպան Մուշեղ Ալեքսանյանը հաստատել է, որ ինքն է ներկայացնում Սիմոնյանի կնոջ շահերը: Հարցին՝ դա ասֆալտի տենդերի հե՞տ է կապված՝ Ալեքսանյանը պատասխանել է. «Չէ, ընդհանրապես ըտենց բանի հետ կապված չի: Կապված է իր նախկին աշխատավայրի հետ, որը ծրագրավորման ընկերություն է, ընդհանրապես շինարարության հետ կապ չունի»: ՔԿ խոսնակ Գոռ Աբրահամյանը, թեմայի վերաբերյալ Panorama.am-ի հարցերին ի պատասխան, ասել է․ «Նախաքննության շահերից ելնելով՝ այս պահին տեղեկատվություն չի տրամադրվում»։ Նշենք, որ Անի Գևորգյանը «Սիներջի» ընկերությունում բիզնեսի զարգացման տնօրեն է եղել: Մոտ մեկուկես տարի առաջ «Սիներջին» մասնակցել է Էկոնոմիկայի նախարարության հայտարարած տենդերներից մեկին։