Հայաստանը պատրաստ է երրորդ երկրների քաղաքացիների և դիվանագիտական անձնագիր կրողների համար սահմանները բացելու մասին պայմանավորվածությունների իրականացմանը, սակայն սպասում է թուրքական կողմի քայլեր ձեռնարկելուն, որոնք թեև առայժմ չկան, բայց ՀՀ-ն հուսով է՝ կլինեն։ Այս մասին CNN Türk-ին տված հարցազրույցում հայտարարել է Ռուբեն Ռուբինյանը։ Հարցին, թե մինչ այժմ չլուծված ի՞նչ խոչընդոտներ կան, Ռուբինյանը նշել է, որ հայկական կողմի համար խոչընդոտ չկա․ «Մեր կարծիքով՝ որևէ խոչընդոտ չկա, Հայայստանը Թուրքիայի հետ հարաբերությունների լիարժեք կարգավորմանը պատրաստ է, դիվանագիտական հարաբերությունների հաստատմանը, սահմանի բացմանը այսօրվա դրությամբ պատրաստ է», - ասել է Հայաստանի և Թուրքիայի միջև հարաբերությունների կարգավորման գործընթացի հատուկ ներկայացուցիչ Ռուբեն Ռուբինյանը:

ՌԴ ԱԳ նախարարը «անշնորհակալ վերաբերմունք» է անվանել հայ պաշտոնյաների հայտարարություններն այն մասին, որ հենց Ռուսաստանն է դրդել Ադրբեջանին 2020 թ․ սեպտեմբերին սկսել պատերազմը ԼՂ-ում. «Ռուսաստանն էր, որ դադարեցրեց պատերազմը ԼՂ-ում, և պատերազմը կարող էր դադարել ավելի վաղ, երբ ադրբեջանցիները դեռ չէին գրավել Շուշին, բայց այն ժամանակ Նիկոլ Փաշինյանը, ի պատասխան Վլադիմիր Պուտինի կոչերի, ասաց՝ ոչ, մենք պայքարելու ենք մինչև վերջ։ Դե, խնդրում եմ: Թեև հնարավոր էր շատ ավելի վաղ կանգ առնել, և կային տարբերակներ, որոնք հնարավորություն կտային ադրբեջանցի փախստականներին վերադառնալ Շուշի՝ Շուշին պահելով Ղարաբաղի կազմում»,- ասել է Լավրովը։ |armeniasputnik.am|

Անթալիայի դիվանագիտական ֆորումի շրջանակներում ՀՀ ԱԳ նախարար Արարատ Միրզոյանը մասնակցում է «Միջազգային առևտուր, կապեր և փոխկապվածություն» թեմայով պանելային քննարկմանը: [ՀՀ ԱԳՆ]

2020 թվականին ՀՀ ռազմատեխնիկական ողջ համագործակցության 96%-ը եղել է Ռուսաստանի հետ։ 2021 թ․ հունվարի մինչ օրս մի քանի միլիարդ դոլարի պայմանագրեր ենք կնքել տարբեր երկրների հետ, բայց դրանց թվում ՌԴ-ի ծավալը 10%-ից քիչ է։ Այս մասին Հանրային հեռուստաընկերությանը տված հարցազրույցում ասել է ԱԽ քարտուղար Արմեն Գրիգորյանը՝ նշելով, որ սա հենց Ռուսաստանի ընտրությունն է եղել՝ մեզ դրել են փաստի առաջ, և մենք ստիպված ենք եղել դիվերսիֆիկացնել մեր գործընկերներին և նորերին փնտրել։ Հարցին՝ ինչ պարզաբանում են տվել ՌԴ-ից, երբ չի մատակարարվել գնված սպառազինությունը, Գրիգորյանն արձագանքել է․ «Ռուսաստանից միտք է հնչել, որ եթե զենք մատակարարեն, ապա Հայաստանի դիրքորոշումները կկոշտանան, այդ պատճառով էլ չեն մատակարարում։ Ցանկացած երկիր, որն ունի այլընտրանքներ, կարող է դիմադրություն ցույց տալ իր շահերին հակասող քայլերի դեմ»։ |news.am|

Մարտի 1-ին, Ազգային ժողովում, Վարչապետ Նիկոլ Փաշինյանը հանդիպել է ԱԺ «Քաղաքացիական պայմանագիր» խմբակցության հետ։ Հանդիպմանը ներկա են եղել նաև կառավարության անդամներ: Քննարկվել են արտաքին քաղաքական զարգացումներին վերաբերող հարցեր: [ «Քաղաքացիական պայմանագիր» խմբակցության ղեկավար Հայկ Կոնջորյան]

Մարտի 1-ին Անթալիայի դիվանագիտական ֆորումի շրջանակներում ՀՀ արտաքին գործերի նախարար Արարատ Միրզոյանը հանդիպում է ունեցել Միացյալ Թագավորության Եվրոպայի հարցերով նախարար Լեո Դոքերթիի հետ: Քննարկվել են տարածաշրջանային հարցեր, մասնավորապես վերջին զարգացումները Հարավային Կովկասում: Նախարար Միրզոյանն ընդգծել է Հայաստանի դիրքորոշումը խաղաղության գործընթացում առկա հարցերի վերաբերյալ՝ նշելով, որ առաջընթաց հնարավոր է գրանցել հանրահայտ համաձայնեցված սկզբունքներին հստակ հանձնառության պարագայում: [ՀՀ ԱԳՆ]

Հունաստանի Պաշտպանության նախարարը հաջորդ շաբաթ կայցելի Հայաստան։ Մարտի 1-ին Հունաստանում Հայաստանի Հանրապետության արտակարգ և լիազոր դեսպան Տիգրան Մկրտչյանը հանդիպեց Հունաստանի ազգային պաշտպանության նախարար Նիկոս Դենդիասին։ Հանդիպման ընթացքում դեսպան Տիգրան Մկրտչյանն ընդգծեց, որ գալիք շաբաթ Հունաստանի պաշտպանության նախարարի պաշտոնական այցը Հայաստան նոր կհաղորդի ռազմական ոլորտում երկու երկրների ընդլայնվող համագործակցությանը։

Անթալիայի դիվանագիտական ֆորումի շրջանակներում Հայաստանի Հանրապետության արտաքին գործերի նախարար Արարատ Միրզոյանը հանդիպում է ունեցել Թուրքիայի Հանրապետության արտաքին գործերի նախարար Հաքան Ֆիդանի հետ: Հանդիպման ընթացքում քննարկվել է Հայաստանի և Թուրքիայի միջև հարաբերությունների կարգավորման գործընթացը և վերահաստատվել է հարաբերությունների ամբողջական կարգավորմանը հասնելու պատրաստակամությունը: Մտքեր են փոխանակվել այդ ուղղությամբ հնարավոր կոնկրետ քայլերի շուրջ: [ՀՀ ԱԳՆ]

ՀՀ ԱԳ նախարար Արարատ Միրզոյանը մասնակցել է Անթալիայի դիվանագիտական ֆորումի բացման արարողությանը։ Այս մասին տեղեկացնում են ՀՀ ԱԳՆ-ից:

Վլադիմիր Զելենսկու աշխատակազմից ոչ հաստատում, ոչ հերքում են տեղեկությունը, թե նախատեսվում է Ուկրաինայի նախագահի այցը Հայաստան: «Ուկրաինայի նախագահի և Ուկրաինայի նախագահի գրասենյակի գործունեության մասին տեղեկատվությունը համակարգված և օպերատիվ կերպով տեղադրվում է Ուկրաինայի նախագահի պաշտոնական կայքում», - «Արմենպրես»-ի հարցմանը ի պատասխան նշել են նախագահի աշխատակազմից։