Նիկոլ Փաշինյանի և Իլհամ Ալիևի հնարավոր հանդիպման հարցը ՌԴ-ում ԲՐԻԿՍ-ի կամ ԱՊՀ միջոցառումների շրջանակներում կախված է բացառապես նրանցից։ Այս մասին հայտարարել է ՌԴ ԱԳ նախարար Սերգեյ Լավրովը ՄԱԿ-ի Գլխավոր վեհաժողովի 79-րդ նստաշրջանի բարձր մակարդակի շաբաթվա աշխատանքներին հաջորդած մամուլի ասուլիսում։ «Ամերիկացիները շատ են ցանկանում, որ նրանք այստեղ գերիշխող լինեն, ինչպես որ Մերձավոր Արևելքում։ Նրանց համար կարևոր է ցույց տալ, որ իրենք են տերը։ Եթե դա ձեռք է տալիս մեր ադրբեջանցի և հայ ընկերներին, ապա սա համապատասխան ղեկավարների ընտրությունն է։ Մենք միշտ պատրաստ ենք իրականացնել այն, ինչ պայմանավորվել ենք մեր մասնակցությամբ՝ սկսած 2020 թվականի նոյեմբերից»,- ասել է ՌԴ ԱԳ նախարարը: |tert.am|

Իսրայելի պաշտպանության բանակը հայտարարել է «Հըզբոլլահ» շարժման կանխարգելիչ անվտանգության ստորաբաժանման հրամանատար Նաբիլ Կաուկի ոչնչացման մասին: Կաուկը համարվել է շարժման բարձրագույն ղեկավարությանը մոտ կանգնած անձանցից մեկը: |1lurer.am|

Պատմական անբեկանելի ճշմարտություն է՝ մարտնչել Սուրբ Էջմիածնի դեմ, նշանակում է մարտնչել հայոց ինքնության և գոյության դեմ, հարվածել հայոց պետականությանը, և հայ կյանքը պարպել ազգային ու հոգևոր բովանդակությունից. այս մասին Մայր Տաճարի վերաօծման արարողությանն ասել է Ամենայն Հայոց Կաթողիկոս Գարեգին Երկրորդը: «Սուրբ Էջմիածնի առաքելությունն արժեզրկելու որևէ քայլ նշանակում է փորձել ստրկացնել մեր ազգին, խարխլել հիմներն անկախ ու ինքնիշխան կյանքի, որի ջատագովն ու պաշտպանն է հայոց եկեղեցին»,- ընդգծել է Վեհափառը: |tert.am| |tert.am|

Ադրբեջանի ՊՆ հաղորդագրությունը, թե իբր սեպտեմբերի 28-ին՝ ժամը 23։20-ի սահմաններում, ՀՀ ԶՈՒ ստորաբաժանումները կրակ են բացել սահմանագոտու հարավարևմտյան հատվածում տեղակայված ադրբեջանական դիրքերի ուղղությամբ, չի համապատասխանում իրականությանը։ [ՀՀ ՊՆ]

Բաքուն կոշտ քննադատություն է հնչեցնում պաշտոնական Բրյուսելի հասցեին, Հայաստանում ԵՄ առաքելության մանդատի և Հայաստանի կողմից զենք գնելու փորձերի մասին ԵՄ պաշտոնյայի հայտարարությունները որակում «կողմնակալ», «անհիմն», «անընդունելի»։ «Պնդումները, թե Ադրբեջանի համաձայնությամբ ստեղծված և առանց որևէ հիմնավորման ընդլայնված առաքելությունը, իբր, դեր է խաղում տարածաշրջանում խաղաղությանն աջակցելու և Ադրբեջանի ու Հայաստանի միջև հարաբերությունների կարգավորման գործընթացում, ցույց են տալիս, թե ինչպես են չարաշահում այդ առաքելությունը», - նշել է Հաջիզադեն։ Ադրբեջանի ԱԳՆ-ի ներկայացուցիչը կրկին պնդել է՝ Հայաստանում տեղակայված ԵՄ-ի առաքելությունն «օգտագործվում է որպես հակաադրբեջանական քարոզչության գործիք», «չի կարող որևէ դեր խաղալ Ադրբեջանի և Հայաստանի միջև հարաբերությունների կարգավորման գործընթացում»։ |azatutyun.am|

Իսրայելի և Ադրբեջանի համագործակցությունը շարունակում է զարգանալ, այդ թվում՝ պաշտպանական արդյունաբերության ոլորտում։ Հայտարարել է Ադրբեջանում Իսրայելի դեսպան Ջորջ Դիկը։«AS Holdings-ը և նրա դուստր ձեռնարկությունը՝ Ari Arms միջազգային ընկերությունը, որը մասնագիտացած է ՆԱՏՕ-ի չափանիշներին համապատասխան թեթև սպառազինության արտադրության և մշակման մեջ, այսօր ստորագրել են փոխըմբռնման ռազմավարական հուշագիր Ադրբեջանի պաշտպանական արդյունաբերության նախարարությանը կից պետական սեփականություն հանդիսացող Azersilah ընկերության հետ», - նշված է հայտարարությունում։ Փաստաթուղթը ստորագրվել է Բաքվում ընթացող միջազգային պաշտպանական ADEX ցուցահանդեսի շրջանակներում։|tert.am|

2020 թվականից «Խաղողագործության և գինեգործության» հիմնադրամը սկսել է «Խաղողի տնկարկների ռեեստրի» ստեղծման աշխատանքները։ Հիմնադրամից նախորդ տարի հայտնել էին, որ Ռեեստրի պիլոտային տարբերակը կգործարկվի 2024-ին։ Մոտ մեկ տարի անց՝ «Ինֆոքոմը» հետաքրքրվել է, թե ինչ փուլում են գտնվում ռեեստրի գործարկման աշխատանքները։ Հիմնադրամից պատասխանել են, որ ռեեստրը չի գործարկվել, քանի որ ծրագիրը դեռ պատրաստ չէ և որ ռեեստրի գործարկման համար հստակ ժամկետ սահմանված չի եղել։

Մայր Աթոռում կայացել է Սրբալույս Մյուռոնի օրհնության արարողությունը` ձեռամբ Ն.Ս.Օ.Տ.Տ. Գարեգին Երկրորդ Ծայրագույն Պատրիարք և Ամենայն Հայոց Կաթողիկոսի։ Արարողությանը մասնակցել են քաղաքական-հասարակական և մշակույթի գործիչներ, գործարարներ: Հնչել է Ավետարանից մի հատված, ինչից հետո Ամենայն հայոց կաթողիկոս Գարեգին Երկրորդն ընթերցել է խնկարկության աղոթքը։ «Դիմում ենք միջազգային հանրությանը, մեր քույր եկեղեցիներին, եկեղեցական և դիվանագիտական ներկայացուցիչներին, որպեսզի ազդու միջոցներ ձեռնարկեն՝ զսպելու Ադրբեջանի ծավալապաշտական նկրտումներն ու ուժի դիրքերից ներկայացվող նորանոր պահանջները», - հայտարարել է Գարեգին Բ Ամենայն Հայոց Կաթողիկոսը: |tert.am|

«Հըզբոլլահը» հաստատել է իր առաջնորդ Հասան Նասրալլայի մահը: Այս մասին հայտնում է CNN-ը, հղում անելով «Հըզբոլլահին»։ «Հըզբոլլահ»-ը նշել է, որ Իսրայելի դեմ պայքարը կշարունակվի:

Իրանի գերագույն առաջնորդ Ալի Խամենեին տեղափոխվել է մի վայր, որտեղ անվտանգության ուժեղացված միջոցառումներն են՝ լիբանանյան «Հըզբոլլահ» շարժման առաջնորդ Հասան Նասրալլայի մահվան մասին լուրերից հետո․ հայտնում է Reuters-ը՝ հղում անելով աղբյուրներին։ Գործակալության զրուցակիցները նշել են, որ Իրանը մշտական ​​կապի մեջ է Հըզբոլլահի և տարածաշրջանային այլ շարժումների հետ՝ հետագա գործողությունները որոշելու համար այն բանից հետո, երբ Իսրայելի պաշտպանության բանակը հայտարարեց Նասրալլահի մահվան մասին: |factor.am|