Ի պատասխան լրատվամիջոցի հարցման՝ ԱՊՀ արտաքին գործերի նախարարների խորհրդի այսօրվա նիստի շրջանակներում Հայաստանը չի միացել «Եվրասիայում անվտանգության ապահովման սկզբունքների» և «միջազգային հարաբերություններում միակողմանի միջոցների անթույլատրելիության» վերաբերյալ հայտարարություններին: [ԱԳՆ մամուլի խոսնակ Անի Բադալյան] |1lurer.am|

Զինծառայող Վահե Հարությունյանի մահվան դեպքով քրեական վարույթ է նախաձեռնվել անզգուշությամբ ինքնասպանության հասցնելու հոդվածով: Զինծառայողի մահվան գործով հարցաքննվել են ինչպես դեպքի օրը, այնպես էլ դրանից առաջ կրակային դիրքում ծառայություն իրականացրած զինծառայողները։ [Քննչական կոմիտե]

Մոսկվայում ՀՀ արտաքին գործերի նախարար Արարատ Միրզոյանը մասնակցել է ԱՊՀ մասնակից պետությունների ԱԳ նախարարների խորհրդի նիստին: Հանդիպմանն անդրադարձ է կատարվել տարածաշրջանային կայունությանն ու անվտանգությանն առնչվող հարցերի: Արարատ Միրզոյանն անդրադարձել է Հայաստանի և Ադրբեջանի միջև հարաբերությունների կարգավորման, մասնավորապես, խաղաղության պայմանագրի կնքման ուղղությամբ վերջին շրջանի հիմնական զարգացումներին: [ՀՀ ԱԳՆ]

Հեռախոսազրույց են ունեցել Ռուսաստանի և Թուրքիայի նախագահները։ Վլադիմիր Պուտինը և Ռեջեփ Թայիփ Էրդողանը քննարկել են միջազգային թեմաներ, այդ թվում՝ «Մերձավոր Արևելքի իրադրության վտանգավոր զարգացումը»։ «Առաջնորդները գոհունակություն են հայտնել ռուս-թուրքական հարաբերությունների կառուցողական բնույթի կապակցությամբ և իրենց պատրաստակամությունը հայտնել հետագա սերտ փոխգործակցության վերաբերյալ», - հաղորդում է Կրեմլի մամլո ծառայությունը։ |azatutyun.am|

Դոմուս» հիպերմարկետում բռնկված հրդեհը մեկուսացվել է․ հայտնել է ՆԳՆ փրկարար ծառայության տնօրեն Կամո Ցուցուլյանը։ Նրա խոսքով՝ հրդեհի ժամանակ պայթյուն տեղի չի ունեցել․ «Ըստ աշխատակիցների, նախնական տեղեկությամբ, հրդեհը բռնկվել է էլեկտրական հոսանքից․ հոսանքն անջատվել, միացել է, ապա հրդեհ է առաջացել։ Աշխատակիցները փորձել են իրենց միջոցներով հրդեհաշիջում իրականացնել, հետո զանգահարել են փրկարար ծառայություն»։ Կամո Ցուցուլյանի խոսքով՝ հրդեհաշիջման աշխատանքները շարունակվում են։

Վարչապետ Նիկոլ Փաշինյանը մեկնել է Ռուսաստանի Դաշնություն․ նա Մոսկվայում կմասնակցի ԱՊՀ պետությունների ղեկավարների խորհրդի հերթական նիստին: [ՀՀ կառավարություն]

Փաշինյանը շնորհավորական ուղերձ է հղել Վլադիմիր Պուտինին ծննդյան օրվա առիթով: «Կարծում ենք, որ այս փուլում առանձնահատուկ շեշտվում է ՀՀ և ՌԴ միջև փոխշահավետ համագործակցության ամրապնդմանն ուղղված հետևողական գործունեության անհրաժեշտությունը՝ փոխադարձ հետաքրքրություն ներկայացնող բոլոր ոլորտներում։ Ակնկալում եմ Երևանի և Մոսկվայի միջև փոխշահավետ փոխգործակցության համատեղ ակտիվացում, ինչպես նաև փոխըմբռնման, վստահության և մեր պետությունների շահերը հաշվի առնելու վրա հիմնված բազմաշերտ երկխոսության զարգացում։ Մաղթում եմ Ձեզ, հարգելի Վլադիմիր Վլադիմիրի, առողջություն, հաջողություններ և ամենայն բարիք», - նշված է ուղերձում։

WCIT 2024-ի շրջանակներում տեղի ունեցած հրավառությունը թույլատրելի կլիներ, եթե լիներ դիմում։ Այս մասին հայտարարել է Տիգրան Ավինյանը։ «Օրենսդրությամբ Երևան քաղաքում հրավառություններն առհասարակ արգելված են, բացառությամբ այն դեպքերի, երբ կա քաղաքապետի թույլտվություն», - ասաց քաղաքապետը: Ավինյանը նշեց՝ քանի որ թույլտվություն չի եղել, արձանագրություն կկազմվի։ Նշենք, որ հրավառությունը տեղի էր ունեցել Հանրապետության հրապարակում հոկտեմբերի 4-ի՝ WCIT 2024-ի բացման համերգի վերջում։

ԱԳՆ խոսնակը հակադարձում է Բաքվից հնչող մեղադրանքներին՝ նշելով. «Սահմանադրական դատարանի որոշումը շատ հստակ և ուղիղ ասում է, որ 1990թ. Հայաստանի Անկախության հռչակագրի միայն այն դրույթներն ունեն սահմանադրական ուժ, որոնք բառացի արտահայտված են ՀՀ Սահմանադրության հոդվածների մեջ: Եվ հետևաբար, այն ինչ գրված չէ ՀՀ Սահմանադրության՝ նախաբանին հաջորդող տեքստի, այսինքն՝ Սահմանադրության հոդվածների մեջ, Սահմանադրությանը վերագրել հնարավոր չէ, և որևէ այլ մեկնաբանության տեղ պարզապես չկա, մանավանդ որ Բարձր դատարանն արձանագրել է, որ նախկինում իր կայացրած որոշումներում երբևէ այլ դիրքորոշում չի ամրագրվել: Այսպիսով, ՀՀ Սահմանադրության նախաբանում հիշատակված հայոց պետականության հիմնարար սկզբունքները և համազգային նպատակները նրանք են, որոնք արտահայտված են ՀՀ Սահմանադրության հետագա տեքստի մեջ, իսկ այնտեղ որևէ բան չկա, որ հնարավոր լինի մեկնաբանել որպես որևէ երկրի դեմ ուղղված տարածքային պահանջ»։ Նշենք, որ Ադրբեջանի ԱԳՆ խոսնակն ասել էր, թե սահմանազատման հանձնաժողովների կանոնակարգի վերաբերյալ ՀՀ ՍԴ որոշման ուսումնասիրությունից իրենք եզրակացրել են, թե դրանով ավելի են ընդգծվում Ադրբեջանին ուղղված տարածքային պահանջները ՀՀ Սահմանադրության մեջ։ |armenpress.am|

Համազգային գիտության շաբաթվա ու Գիտության փառատոնի վերջին օրն է, և փառատոնի ամփոփիչ թեման գիտական ֆանտաստիկան է։ Այսօր միայն Գիտության փառատոնի այցելուները չէ, որ դպրոցականներ են․ տաղավարներում տարբեր կրթահամալիրների սաներ ներկայացնում են իրենց աշխատանքները։ Ամենագիտաֆանտաստիկ տաղավարում փառատոնի կազմակերպիչները խորհուրդ են տալիս, թե գիտաֆանտաստիկ ժանրի ինչ գրքել կարդալ ու ինչ ֆիլմեր դիտել։ Մեծ տաղավարում էլ սպասում են աստղադիտակները՝ ցերեկը՝ Արևին, երեկոյան՝ աստղերին ու մոլորակներին նայելու համար։