Եվրամիությունը մտահոգված է Հայաստանի տարածքի մասին Ադրբեջանի նախագահ Իլհամ Ալիևի պնդումներով, Հայաստանի ինքնիշխանության ցանկացած խախտում Բաքվի համար լուրջ հետևանքներ կունենա։ «Ալիևի տարածքային պնդումները լուրջ մտահոգություն են առաջացնում։ Հայաստանի տարածքի և ինքնիշխանության ցանկացած խախտում լուրջ հետևանքներ կունենա Ադրբեջանի հետ մեր հարաբերությունների վրա»։ [Եվրամիության արտաքին գործերի և անվտանգության քաղաքականության գերագույն ներկայացուցիչ Ժոզեպ Բորել] |news.am|

2020 թ․ հոկտեմբերի 21-ին պայմանագրային զինծառայող Ռուդիկ Ալեքսանյանը վերջին անգամ է կապ հաստատել ընտանիքի հետ․ «Մա՛մ, լավ մնացեք, գերի եմ ընկել, պախկված եմ, տարբերակ չունեմ հետ գալու․ կա՛մ կմնամ սենց, կա՛մ կխփեն»,– գրել է նա։ Ռուդիկի հայրը՝ Հրաչյա Ալեքսանյանը, այսօր ներկայացել էր դատարան՝ պատմելու որդու հետ կատարվածի իրեն հայտնի մանրամասները։ Հոր խոսքով՝ թե՛ զորամասի հրամանատար Արսեն Աբգարյանը, թե՛ ԶՈՒ ԳՇ պետի նախկին տեղակալ Անդրանիկ Մակարյանը իրեն սին հույսեր են տվել, խոստացել, որ այսօր–վաղը մի քայլ կձեռնարկեն, սակայն ստել եւ ոչինչ այդպես էլ չեն արել։ Վկայի խոսքով՝ Անդրանիկ Մակարյանի մոտ ինքը նաեւ ՀՀ վարչապետ Նիկոլ Փաշինյանի կնոջը՝ Աննա Հակոբյանին է հանդիպել․ «Ես հա դիմում էի Մակարյանին, որ ինձ ընդունի, նույնիսկ թվում էր՝ չի ընդունի, հետո Աննա Հակոբյանն եկավ, խնդրեցի իրեն, ասեցի՝ էս ձեւ վիճակ է եղել իմ էրեխու հետ կապված, ինքը կանչեց Մակարյանին, Մակարյանը դիմավորեց, հանեց վերեւ, մի 20 րոպե հետո ինձ էլ կանչեց»,– ասաց նա։

«Ինֆոքոմ»-ի լրագրողներն առանձնացրել են 2023-ի երրորդ եւ չորրորդ եռամսյակում պետական գերատեսչությունների կողմից «Տեղեկատվության ազատության մասին» օրենքի խախտման այն դեպքերը, որոնց առնչվել ենք մեր աշխատանքի ընթացքում։ Այս օրենքը խախտել են Քաղաքացիական պայմանագիր կուսակցությունը, Էկոնոմիկայի ու Պաշտպանության նախարարությունները, Ոստիկանությունն ու Դատախազությունը։

Երևանում ամանորյա ձևավորման ապամոնտաժման աշխատանքներով պայմանավորված հունվարի 22-ի ժամը 23:00-ից մինչև հունվարի 23-ի ժամը 06:00-ն կդադարեցվի Կիևյան կամրջի և Աբովյան-Բուզանդ փողոցների միջանկյալ հատվածի երթևեկությունը: [Երևանի քաղաքապետարան]

ՀՀ քաղաքացի Աննա Նիկողոսյանն այսօր առավոտյան անհատական բողոքի ակցիա է իրականացրել ՀՀ կառավարության շենքի մոտ՝ ընդդեմ Ամուլսարի հանքի շահագործման։ Աննան կոչ է անում դուրս գալ միանձնյա և կոլեկտիվ պայքարի՝ համախմբվելով Ամուլսարի՝ տարիներ շարունակվող դիմադրության շուրջ։ «Հետպատերազմյան տարիներին շատ ենք լսում «Հայաստանում ակտիվիզմ այլևս չկա», «Փողոցային պայքարը իմաստազրկվել է» արտահայտությունները։ Իրականում, համակարգի դեմ դիմադրությունը միշտ էլ եղել է և կլինի, նույնիսկ այն ժամանակ, երբ պայքարներն անցնում են վերափոխման ու վերաիմաստավորման համեմատաբար լուռ փուլերի միջով»,- ասում է Աննան՝ նշելով, որ ինքն այսօր դուրս միայնակ է փողոց դուրս գալիս ոչ թե այն պատճառով, թե պայքարակիցներ չկան, այլ որովհետև մարել է երկրում որևէ բան փոխելու կոլեկտիվ հույսը։

ԿԳՄՍ նախարարությունն առաջարկում է «Հայոց պատմություն» առարկայի անվանումը փոխել «Հայաստանի պատմություն» անվամբ։ Նախագիծը հանրային քննարկման փուլում է։ Ըստ հիմնավորման՝ փոփոխման «արդյունքում ավելի հստակ է դառնում առարկայի անվանումը, որի շրջանակներում ուսումնասիրվելու են հայկական պետականության և հայ ժողովրդի պատմության տարբեր ժամանակաշրջաններում տեղի ունեցած իրադարձությունները»:

Սպառազինության ոլորտում ռուսաստանյան ընկերությունների հետ ունեցած խնդրահարույց հարցերը մեծամասամբ կարգավորվել են, սակայն մի շարք խնդիրներ շարունակում են մնալ չլուծված: «Ազատության» գրավոր հարցին ի պատասխան հայնտնել են Պաշտպանության նախարարությունից՝ չհստակեցնելով՝ արդյոք խոսքը 400 միլիոն դոլարի շրջանակում իրականացված մատակարարումների մասին է: |azatutyun.am|

Ֆրանսիայի նորանշանակ ԱԳ նախարար Ստեֆան Սեժուրնեն հանդես է եկել դիվանագիտական կորպուսին ուղղված ուղերձով, որում խոսել է Ֆրանսիայի՝ Հայաստանին շարունակական աջակցության մասին, արդար և տևական խաղաղության ձգտման մասին՝ հարգելով օրենքն ու տարածքային ամբողջականությունը, բնակչության արժանապատիվ ապրելու իրավունքի՝ հարգելով նրա հիշողությունը, պատմությունը և մշակույթը: [Հայաստանում Ֆրանսիայի դեսպան Օլիվիե Դըկոտինյի]

Ադրբեջանի ԱԳՆ-ն հայտարարում է՝ «բոլորը պետք է ճնշում գործադրեն Հայաստանի վրա՝ ստանալու համար ականապատման՝ ճշգրիտ տեղեկություն պարունակող քարտեզներ»։ Նշենք, որ Ադրբեջանում այսօր մեկ քաղաքացիական անձ ականի պայթյունից մահացել է։ Գերատեսչության պնդմամբ՝ 2020 թվականից ի վեր զոհերի թիվը հասել է 342-ի։ Հիշեցնենք, որ 2021 թվականին գերիների վերադարձի դիմաց Հայաստանը Ադրբեջանին էր փոխանցել ականապատման քարտեզներ։ Ադրբեջանական կողմը Հայաստանին մեղադրում է այդ քարտեզների ցածր ճշգրտության համար։

Ֆրանսիայի նախագահ Էմանյուել Մակրոնը երեկ զինված ուժերին հղած ամենամյա ուղերձում անդրադարձել է նաև Հայաստանին. «Բալկանները, Հայաստանը [...] գրավել են մեր ուշադրությունը և հանգեցրել մեր դիրքորոշման ամրապնդմանն ու պատմական ընտրություններ կատարելուն՝ հատկապես ինչ վերաբերում է Հայաստանին», - ասել է Մակրոնը՝ առանց մանրամասնելու։ |azatutyun.am|