ԲԴԽ նախագահ է ընտրվել Արթուր Աթաբեկյանը։ [Դատական իշխանություն]

Դեկտեմբեր ամսվա ընթացքում օդի ամսական միջին ջերմաստիճանը հանրապետության ողջ տարածքում կանխատեսվում է նորմայից բարձր 1-2 աստիճանով, տեղումների քանակը՝ նորմայից պակաս։ Եղանակային պայմանները ամսվա ընթացքում հիմնականում կլինեն սակավատեղում և նորմայից տաք։

Հեռախոսազրույց են ունեցել Ռուսաստանի նախագահ Վլադիմիր Պուտինը և Իրանի նախագահ Մասուդ Փեզեշքիանը։ Կրեմլի մամուլի ծառայությունից հայտնում են, որ «կողմերը անվերապահ աջակցություն են հայտնել Սիրիայի օրինական իշխանությունների գործողություններին՝ վերականգնելու երկրի սահմանադրական կարգը և տարածքային ամբողջականությունը»։ Նշվում է, որ նախագահները ընդգծել են Թուրքիայի մասնակցությամբ Աստանայի ձևաչափի շրջանակներում ջանքերի համակարգման կարևորությունը։ |hetq.am|

Ուկրաինայի նախագահ Վլադիմիր Զելենսկին հայտարարել է, որ Ուկրաինայի զինված ուժերը չունեն բավարար ռեսուրսներ օկուպացված տարածքները, այդ թվում Ղրիմը վերադարձնելու համար։ Նա Kyodo News-ին տված հարցազրույցում նշել է, որ իր երկիրը ձգտում է շուտափույթ դադարեցնել Ռուսաստանի հետ պատերազմը և դիվանագիտական ​​ճանապարհով վերադարձնել իր տարածքի մի մասը այն ժամանակ, երբ Կիևի անդամակցությունը ՆԱՏՕ-ին որոշակի կդառնա։ Նրա խոսքով՝ Կիևը նմանատիպ քայլեր կդիտարկի «միայն այն դեպքում, երբ իմանա, որ բավականաչափ ուժեղ է», և որ Ռուսաստանը չի կարող նոր ագրեսիա սկսել Ուկրաինայի դեմ։

«Արաբկիր» բժշկական կենտրոնում արձանագրվել է 4-ամյա աղջկա մահվան դեպք։ «Արմենպրես»-ի հետ զրույցում տեղեկությունը հաստատել է ՀՀ ՆԳՆ մամուլի խոսնակ Նարեկ Սարգսյանը։ «Այո, ահազանգ ստացել ենք բժշկական կենտրոնից։ Նախնական տեղեկություններով բռնության հետքեր չկան։ Փաստաթղթերը փոխանցվել են նախաքննական մարմին»,- ասել է Սարգսյանը։

Օտարված «Երասխ-1» զորամասը կվերադարձվի պետությանը. դատարանը բավարարել է Գլխավոր դատախազության հայցը: Անվավեր է ճանաչվել շուրջ 60 միլիոն արժողությամբ «Երասխ-1» զորամասն օտարելու մասին Պաշտպանության նախարարության և Է.Ա.-ի միջև 2009թ. հունվարի 13-ին կնքված առուվաճառքի պայմանագիրը:

Գերմանիայի կանցլեր Օլաֆ Շոլցը չհայտարարված այցով ժամանել է Կիև. պատերազմի ընթացքում կանցլերի առաջին այցը եղել է 2022-ին: «Ես ցանկանում եմ այստեղ հստակեցնել, որ Գերմանիան կմնա Ուկրաինայի ամենաուժեղ աջակիցը Եվրոպայում»,- ժամանելուն պես ասել է Շոլցը՝ խոստանալով դեկտեմբերին 650 միլիոն եվրոյի լրացուցիչ զենքի մատակարարումներ:

Ընդդիմադիր պատգամավորները դատական հայց են ներկայացրել ընդդեմ ՀՀ կառավարության և ԱԳՆ-ի: «Աննա Գրիգորյանի, Գեղամ Մանուկյանի և Արթուր Խաչատրյանի հետ համատեղ դատական հայց ենք ներկայացրել ընդդեմ կառավարության և ԱԳՆ-ի՝ պահանջելով ոչ իրավաչափ համարել ՀՀ արտգործնախարարի 2024 թ. մարտի 14-ի գրությունը, որով մեզ արգելվել էր ծանոթանալ Ադրբեջանի հետ քննարկվող պայմանագրի փոխանակվող նախագծերին։ Դատարանը՝ դատավոր Ռոբերտ Մաքեյանի նախագահությամբ, հայցադիմումը վարույթ ընդունելու որոշում է կայացրել»,- գրել է պատգամավոր Քրիստինե Վարդանյանը:

ԱՄՆ պետքարտուղար Էնթոնի Բլինքենը և Թուրքիայի ԱԳ նախարար Հաքան Ֆիդանը հեռախոսազրույցում քննարկել են Սիրիայում արագ զարգացող իրավիճակը: «Բլինքենը և Ֆիդանը քննարկել են դեէսկալացիայի անհրաժեշտությունը և Հալեպում ու այլ վայրերում քաղաքացիական բնակչության և ենթակառուցվածքների պաշտպանությունը»,- հայտնել են ԱՄՆ պետքարտուղարությունից:

Բոլոր ավտոբուսներում և միկրոավտոբուսներով այսօրվանից հնարավոր է վճարում իրականացնել ՀՀ բանկերի թողարկած ֆիզիկական բանկային քարտերով: Մետրոյում այդ հնարավորությունը կլինի մի փոքր ուշ։ Դեռևս չի գործում հեռախոսային NFC տարբերակով վճարելու համակարգը: