Տիեզերական երկարատև առաքելություններին նախապատրաստվելիս կարևոր է հաշվի առնել, թե առողջական ինչ ռիսկեր կան տիեզերագնացների համար։ Այդպիսի ռիսկերից են գալակտիկական տիեզերական ճառագայթները, որոնք պոտենցիալ վնաս են ներկայացնում կենդանի օրգանիզմների համար: Մոլեկուլային կենսաբանության ինստիտուտի գիտնականների և նրանց արտասահմանցի գործընկերների նոր հետազոտությունը ցույց է տալիս, որ գալակտիկական տիեզերական խառը տեսակի ճառագայթները կարող են օրգանիզմի վրա երկարատև ազդեցություն ունենալ՝ պոտենցիալ վնաս հասցնելով սրտանոթային համակարգի աշխատանքին, ինչպես նաև ունեն սեռային յուրատիպություն։

Այսօրվա դրությամբ Սիրիա ծովափնյա քաղաքներում բախումները շարունակվում են: Այս մասին հայտնել է Հալեպի «Գանձասար» թերթի գլխավոր խմբագիր Զարմիկ Պողիկյանը՝ հավելելով, որ  բուն Լաթաքիա քաղաքում իրավիճակը համեմատաբար մեղմ է: «Անվտանգության ուժեր են տարածված քաղաքում և խուզարկություններ,  գործողություններ են իրականացնում վտանգավոր երևույթները կանխելու համար: Ընդհանրապես՝ քաղաքում մարդիկ զգուշություն են ցուցաբերում, տներից դուրս չեն գալիս: Նույնն է վիճակը Տարտուսում և Բանիասում, որտեղ հայեր քիչ կան, նրանցից ոմանք տեղափոխվել են Հալեպ՝ անվտանգության նկատառումներով»,- ասաց նա: Նրա խոսքով՝  ներկայում որոշակի մտահոգություններ կան՝ կապված սննդի, դեղորայքի հետ, քանի որ տեղաշարժը քաղաքում գրեթե կանգ է առել: Ժամանակ առ ժամանակ ընդհատվում է ջրամատակարարումը, բացակայում է էլեկտրամատակարարումը: «Փակ են եկեղեցին, դպրոցները: Կրթության նախարարությունն այս երկու օրերին քաղաքում  ընդհանրապես փակ է հայտարարել դպրոցներն ու համալսարանները, մինչև իրավիճակը կմեղմանա»,- հավելել է Պողիկյանը: |armenpress.am|

Լոնդոնում Պաղեստինի դրոշով ակտիվիստը բարձրացել է Վեսթմինսթերյան պալատի ժամացույցի աշտարակի՝ Բիգ Բենի վրա, նրան այնտեղից հեռացրել են միայն 16 ժամ անց: Փրկարարները երեք անգամ բանակցել են հրշեջ վերելակից և խնդրել ակտիվիստին իջնել, սակայն նա հրաժարվել է՝ ասելով, որ դա կանի միայն իր պայմաններով: Ակտիվիստը եթեր է վարել Instagram-ում, որտեղ ասել է, որ բողոքում է «ոստիկանական բռնաճնշումների և պետական բռնության դեմ»։ Ակտիվիստը Բիգ Բեն է բարձրացել մարտի 8-ին՝ առավոտյան ժամը 7-ի սահմաններում, նրան այնտեղից իջեցրել են կեսգիշերին, իսկ հետո ձերբակալել։ |azatutyun.am|

«Ապրելու երկիր» կուսակցության համահիմնադիր Մանե Թանդիլյանը հիվանդանոցից վերադարձել է Ազատության հրապարակ` շարունակելու հացադուլը։ Այս մասին NEWS.am-ին ասել է «Ապրելու երկիր» կուսակցության համահիմնադիր Մերոպ Առաքելյանը։ «Առողջական վիճակը լավ չէ, թույլ է զգում իրեն, բայց բժիշկների հորդորները չլսեց ու կրկին վերադարձավ հրապարակ՝ շարունակելու հացադուլը»,–ասել է նա։ |news.am|

Եվրամիությունը դատապարտել է Սիրիայի անցումային կառավարության անվտանգության ուժերի վրա հարձակումները՝ դրանք վերագրելով Սիրիայի նախկին նախագահ Բաշար Ասադի կողմնակիցներին, ինչպես նաև կոչ է արել պաշտպանել Սիրայի քաղաքացիական բնակչությանը, ասվում է եվրոպական արտաքին քաղաքական ծառայության հաղորդագրության մեջ: «Քաղաքացիական անձինք պետք է պաշտպանված լինեն ցանկացած հանգամանքում՝ համաձայն միջազգային հումանիտար իրավունքի»,- ասված է հաղորդագրության մեջ: ԵՄ-ն նաև կոչ է արել արտաքին ուժերին պահպանել Սիրիայի ինքնիշխանությունն ու տարածքային ամբողջականությունը: |1lurer.am|

«Ապրելու երկիր» կուսակցության համահիմնադիր Մանե Թանդիլյանին երեկ գիշեր շտապօգնության մեքենայով կրկին տեղափոխել են հիվանդանոց: Այս մասին Factor.am-ին հայտնել է «Ապրելու երկիր» կուսակցության համահիմնադիր Մերոոպ Առաքելյանը նշելով, որ Թանդիլյանը բժիշկների հսկողության տակ է: Մանե Թանդլիյանը մարտի 1-ից հացադուլ է հայտարարել Ազատության հրապարակում` հաջակցություն Բաքվի բանտում ապօրինաբար պահվող Ռուբեն Վարդանյանի: Նա հույս ունի, որ իր այս ծայրահեղ քայլով կստիպի Վարդանյանին դադարեցնել հացադուլը: |factor.am|

Ավելի քան 1000 մարդ, այդ թվում՝ 745 քաղաքացիական անձ է սպանվել Սիրիայի նոր կառավարության և Ասադի հավատարիմ գրոհայինների միջև երկու օրվա բախումների հետևանքով։ Այս մասին հայտնում է Մեծ Բրիտանիայում գործող «Սիրիայում մարդու իրավունքների դիտորդական կենտրոն» կառույցը նշելով: Կառույցը նշում է, որ 745 խաղաղ բնակիչներ հիմնականում ենթարկվել են մահապատժի։ Զինված բախումների հետևանքով Սիրիայի անվտանգության ուժերից սպանվել են 125 հոգի, իսկ 148 հոգի սպանվել են Բաշար Ասադին հավատարիմ ալավիների զինյալների խմբից: Երկու օրվա մարտերի զոհերի թիվը կտրուկ տարբերվել է, որոշ գնահատականներով զոհերի վերջնական թիվը նույնիսկ ավելի մեծ է:

2014 թ․ սպանված գյումրեցի Արտյոմ Ադանալյանի վերաբերյալ քրեական գործը կքննվի նորից․ ավելի քան 10 տարի անց 6-րդ անգամ դատարանի փոփոխություն է տեղի ունեցել։ Նոր դատավորը, ի տարբերություն նախորդների, որոշել է գործի քննությունը սկսել ոչ թե ընդհատված տեղից, այլ զրոյից։ Թեեւ դա օրենքի պահանջ է, բայց դատավորները, մատնանշելով արդարադատության շահը, երբեմն գործի քննությունը շարունակում են ընդհատված տեղից․ «9 տարին ջնջում ենք, սկսում զրոյից։ Հասկանում եմ՝ Ձեզ համար բավականին հեշտ որոշում է այդքան վկայի բերել, նորից հարցաքննել, բայց Դուք պատկերացնո՞ւմ ենք՝ մեզ համար, իբրեւ տուժող կողմի, ի՞նչ է սա»,- դիմելով նախագահող դատավորին՝ ասաց որդեկորույս մոր փաստաբան Արմինե Ֆանյանը։ Մեղադրյալ Արթուր Մարտիրոսյանի պաշտպան Արամայիս Հայրապետյանն էլ մեր զրույցում շեշտեց՝ այս գործով ողջամիտ ժամկետում քննության իրավունքը անվերադարձ խախտված է․ «Արդեն 11 տարի մարդուն մեղադրում են առանձնապես ծանր հանցագործության մեջ, եւ տեսանելի չէ, թե ինչ է լինելու։ Դրանից ուժեղ հոգեբանական խոշտանգում կա՞»։  Թե հարցի վերաբերյալ ինչ դիրքորոշում ունի մեղադրող դատախազը, հայտնի չէ․ նիստի ընթացքում նա կարծիք չհայտնեց, նիստից հետո հրաժարվեց մեր հարցին պատասխանել, Դատախազության հանրային կապերի բաժինը հրաժարվեց հարցազրույց կազմակերպել, իսկ մեր գրավոր հարցմանը պատասխանեց օրենքով սահմանված ժամկետի խախտմամբ՝ խուսափողական մեկ նախադասությամբ միայն․«Քրեական գործով դատախազի իրավական դիրքորոշումները ներկայացվում են դատական նիստի ընթացքում»։

Երեկ Սիրիայի Լաթակիա քաղաքում երկու հայ է զոհվել։ Այս մասին հայտնում է «Գանձասար» թերթը։ Զոհվածները՝ հայր և որդի Անթուան ու Ֆատի Պութրոսներն են, որոնք կրակոցների զոհ են դարձել։

Ժամը 12։30-ի դրությամբ Գյումրի և Արթիկ քաղաքներից ստացվել է 2 ահազանգ։ Գյումրիում, ըստ նախնական տվյալների, փլուզվել է վթարային տան երկշերտ պատի արտաքին շերտը՝ մոտ 2ք․մ։ Արթիկում, ըստ նախնական տվյալների, շենքերից մեկի 5-րդ հարկից ընկել է 2 քար։ Փրկարարները հեռացրել են թուլացած ևս 2 քար։ Այս պահի դրությամբ տուժածներ չկան, փլուզումների՝ երկրաշարժի հետ կապված լինելու հանգամանքները ճշտվում են։ Տեղի ունեցած երկրաշարժին հաջորդում են հետցնցումներ, որը բնական է։ Մասնավորապես, այս պահի դրությամբ արձանագրվել է 45 հետցնցում, որոնցից ամենաուժեղը՝ 3.2 մագնիտուդով, գրանցվել է Սպիտակից 9 կմ հյուսիս։ Հետցնցումը զգացվել է Լոռու մարզի Սպիտակ, Ստեփանավան և Վանաձոր քաղաքներում՝ 2-3 բալ ուժգնությամբ։ Հետցնցումային ակտիվությունը որոշ ժամանակ կշարունակվի, որի ընթացքում հնարավոր են տեղի ունենալ թույլ և միջին ուժգնությամբ սեյսմիկ իրադարձություններ, որոնք կարող են զգացվել բնակավայրերում բնակչության կողմից։ [ՆԳՆ մամուլի քարտուղար Նարեկ Սարգսյան]