Մենք կարծում ենք, որ Ռուսաստանը չի հարգել իր պարտավորությունները, որը ստանձնել էր 2020 թվականի Նոյեմբերի 9-ի համաձայնության շրջանակներում։ Ռուսաստանը պետք է ապահովեր, որ հնարավոր լինել հարցերը լուծել քաղաքական ճանապարհով և լուծեր երկու երկրների միջև եղած խնդիրները։ Դրանք չեն կատարվել։ [Ֆրանսիայի արտգործնախարար Կատրին Կոլոննա]

Իմ Հայաստան այցը հերթական մի ձև է ցույց տալու, որ Ֆրանսիան շատ զգոն է լինելու մեր բարեկամ երկրի՝ Հայաստանի տարածքային ամբողջականության և ցանկացած սպառնալիքի նկատմամբ։ [Ֆրանսիայի արտգործնախարար Կատրին Կոլոննա]

Ֆրանսիան իր համաձայնությունն է տվել՝ Հայաստանի հետ ապագա պայմանագրի կնքման համար, որը հնարավորություն կտա ռազմատեխնիկա տրամադրել ՀՀ-ին, որպեսզի ՀՀ-ն կարողանա իր պաշտպանությունը ապահովել։ [Ֆրանսիայի արտգործնախարար Կատրին Կոլոննա]

Եվրախորհրդարանում այսօր լսումներ են կայացել Լեռնային Ղարաբաղի թեմայով: Բոլոր բանախոսները քննադատել են Իլհամ Ալիևի ռեժիմի գործողությունները: Միաժամանակ, նրանք դատապարտել են Եվրամիության ղեկավարներին, մասնավորապես՝ Եվրոպական հանձնաժողովի նախագահ Ուրսուլա ֆոն դեր Լայենին, ով «հուսալի գործընկեր» է անվանել Ալիևին, քանի որ Եվրամիությունը գազային գործարք է կնքել Ադրբեջանի հետ: Բանախոսները նշել են, որ բազմիցս են ահազանգել Լեռնային Ղարաբաղին սպառնացող վտանգի մասին: Նրանցից շատերն առաջարկել են պատժամիջոցներ սահմանել Ալիևի նկատմամբ: Շատ բանախոսներ նաև ասել են, որ Հայաստանին անհրաժեշտ է եվրոպական հեռանկար առաջարկել, մասնավորապես՝ վիզաների հարցը լուծել: |azatutyun.am|

ԼՂ-ի հայերը ինքնակամ չեն լքել իրենց տները, սա բռնի տեղահանում էր։ Ես պետք է ևս մեկ անգամ ընդգծեմ, որ տեղի ունեցածը միջազգային իրավունքի կոպտագույն խախտում է։ Ես անհրաժեշտություն եմ զգում ևս մեկ անգամ հայտարարելու այդ մասին, քանի որ մենք լսում ենք հայտարարություններ, որոնցում ասվում է, որ մարդիկ ինքնակամ լքել են իրենց տները։ Դա այդպես չէ։ Մարդասիրական այս սարսափելի աղետի պայմաններում Ֆրանսիան 12,5 մլն եվրոյի օգնություն է հատկացրել Հայաստանին, որն ուղղված է բռնի տեղահանվածների համար արժանապատիվ պայմանների ապահովմանը։ Ես խոստանում եմ, որ այդ օգնությունը կլինի շարունակական և կրկին կտրամադրվի, եթե անհրաժեշտություն առաջանա։ [Ֆրանսիայի արտգործնախարար Կատրին Կոլոննա]

ՀՀ վարչապետ Նիկոլ Փաշինյանն ընդունել է է Ֆրանսիայի Հանրապետության Եվրոպայի և արտաքին գործերի նախարար Կատրին Կոլոննային: «Ըստ էության, մենք գործ ունենք նախապես հայտարարված էթնիկ զտման իրականացման հետ: Այս առումով, իհարկե, հումանիտար այն ճգնաժամը, որ ունեինք Լեռնային Ղարաբաղում, տեղափոխվել է Հայաստանի Հանրապետություն:Մյուս կողմից պետք է ընդգծեմ, որ Ադրբեջանի իշխանություններն ապօրինի ձերբակալություններ են իրականացնում Լեռնային Ղարաբաղում, ինչը նույնպես կարծում եմ, միջազգային ուշադրության կենտրոնում պետք է լինի»,- հանդիպմանն ասել է վարչապետը: [ՀՀ վաչապետի աշխատակազմ]

Վերջին 4 ժամվա ընթացքում ԼՂ-ից Հայաստան տեղափոխվողներ չեն եղել, բռնի տեղահանվածներն այս պահի դրությամբ 100 625-ն են։ 100 625 բռնի տեղահանված քաղաքացիներից Հայաստանում հաշվառվել են 94 724-ը՝ ընդհանուր տեղահնվածների 95 տոկոսը: [Վարչապետի մամուլի քարտուղար Նազելի Բաղդասարյան]

{ՉՀԱՍՏԱՏՎԱԾ} Ադրբեջանական լրատվականները հայտնում են, որ այսօր գերեվարվել է նաև Արցախի նախկին նախագահ Արայիկ Հարությունյանը։

Այսօր Սյունիք է հասել Իրանի կողմից Հայաստան ուղարկված հումանիտար բեռը՝ նախատեսված Լեռնային Ղարաբաղից բռնի տեղահանված անձանց համար։ Մոտ 60 տոննա հումանիտար օգնությամբ բեռնատարներում սնունդ է, հիգիենիկ պարագաներ, տաք ծածկոցներ, ջեռուցիչներ և այլն։[Սյունիքի մարզպետարան]

ԼՂ պետնախարար Արթուր Հարությունյանը, ԼՂ ներքին գործերի նախարար Կարեն Սարգսյանը և ԱԱԾ պետ Արարատ Մելքումյանը մի քանի ժամ է արդեն Հայաստանում են։ [ԼՂ պետնախարար Արթուր Հարությունյան] |armenpress.am|