Երևանում ամանորյա տոնական ձևավորման աշխատանքներով պայմանավորված՝ այսօր՝ նոյեմբերի 28-ին, ժամը 22:00-ից մինչև նոյեմբերի 29-ի ժամը 07։00-ն, ժամանակավորապես կդադարեցվի Աբովյան փողոցի՝ Պուշկին-Բուզանդ հատվածի երթևեկությունը: [Երևանի քաղաքապետարան]

Երևանի կայազորային հոսպիտալի շուրջ 7,000 դոլար կաշառք ստանալու մեջ մեղադրվող պետի ու ևս 13 անձի վերաբերյալ նախաքննությունն ավարտվել է։ Ե. Հ.-ն, զբաղեցնելով «Երևանի կայազորային հոսպիտալ» պետական հիմնարկի պետի պաշտոնը, հոսպիտալի այլ աշխատակիցների հետ խմբի կազմում, իր ծառայողական լիազորություններն օգտագործելով ժամկետային զինծառայողների օգտին ապօրինի գործողություններ կատարելու համար, վերջիններիս ազգականներից և մտերիմներից պարբերաբար ստացել է տարբեր չափերի կաշառք: Զինծառայողներին տրամադրվել է իրականությանը չհամապատասխանող ախտորոշումներ, որի հիման վրա զինվորները հոսպիտալացվել են կամ ծառայության համար ճանաչվել ոչ պիտանի և վաղաժամկետ զորացրվել:[Հակակոռուպցիոն կոմիտե]

ՀՀ ՊՆ «Եռաբլուր» զինվորական պանթեոն հուշահամալիրի տարածքից 2023 թ. նոյեմբերին 15-ին ժամը 09:30-ի սահմաններում կատարվել է գողություն. պանթեոնից գողացել են 14 հատ 100 մմ տրամաչափ 4 մետր երկարությամբ խողովակներ: Պարզվել է, որ Երևան քաղաքի բնակիչը նախապես խոստացել է իրացնել գողացված խողովակները, ինչից հետո 51-ամյա տղամարդը և Արարատի բնակիչը «Եռաբլուր» զինվորական պանթեոնի տարածքից գողացել են խողովակները, որից հետո 40.000 ՀՀ դրամով վաճառել են Երևան քաղաքի մեկ այլ բնակչի:  Երեք անձի մեղադրանք է ներկայացվել։ [ՔԿ]

Ոստիկանությունը բերման է ենթարկել ԱԺ «Քաղաքացիական պայմանագիր» խմբակցության պատգամավոր Սերգեյ Բագրատյանի կնոջ անունով գրանցված՝ հանքարդյունահանմամբ զբաղված ընկերության տնօրենին ու աշխատակիցներին։ «Հետքը» տեղեկացել է, որ նոյեմբերի 27-ին իրավապահները նրանց ապօրինի գործող հանքի տարածքից տեղափոխվել են քննչական մարմին։ Ավազի հանքի աշխատանքը դադարեցվել է։ Արդյունահանման հետևանքով պետությանը խոշոր վնաս է պատճառվել։ Այս մասին հայտնել են Գլխավոր դատախազությունից։ Ապօրինի ձեռնարկատիրության, հողը փչացնելու, ընդերքի պահպանման և օգտագործման կանոնները խախտելու հատկանիշներով (երեք դրվագ) քրեական վարույթ է նախաձեռնվել։|hetq.am|

Ալեն Սիմոնյանը, անդրադառնալով Լարսում տիրող իրավիճակին, նշեց՝ իր տեղեկություններով սահմանակետում ծառայություն իրականացնող մարմինների հերթափոխ է տեղի ունեցել, և նման իրավիճակ ստեղծվել է նաև Ադրբեջան-Ռուսաստան կամ Ադրբեջան-Վրաստան սահմանի հատվածում։ Սիմոնյանը նշեց՝ ինքը չի բացառում, որ կարող է քաղաքական պատճառ ունենալ իրավիճակը, սակայն խնդրեց չշտապել և նման հետևություններ չանել։

Փաշինյանի հեռախոսազրույց է ունեցել Կորեայի Հանրապետության նախագահ Յուն Սոկ Յոլի հետ: Զրուցակիցները գոհունակությամբ են ընդգծել երկկողմ հարաբերություններում վերջին շրջանում նկատվող ակտիվությունը, ինչի արդյունքում փոխադարձության հիմունքներով երկու մայրաքաղաքներում դեսպանատներ բացելու պայմանավորվածություն է ձեռքբերվել: Երկու ղեկավարները երկկողմ հարաբերությունների հետագա զարգացմանը նպաստելու պատրաստակամություն են հայտնել: [ՀՀ կառավարություն]

Արցախի պետական ինստիտուտները Հայաստանում գործում են՝ ի՞նչ անեն, ի՞նչ ֆունկցիա պետք է իրականացնեն։ Այս մասին Factor.am-ի լրագրողի հարցին ի պատասխան՝ ասել է ՀՀ նախագահ Վահագն Խաչատուրյանը: Նա նշել է, որ Հայաստանի Հանրապետություն կա, որի պետական ինստիտուտները գործում են, արցախահայության իրավունքները Հայաստանի Հանրապետությունը պաշտպանում է։

ԱՄՆ-ն Ադրբեջանի և Հայաստանի համար խաղաղություն հաստատելու իրական հնարավորություն է տեսնում։ Այս մասին հայտարարել է ԱՄՆ պետքարտուղարի օգնական Ջեյմս Օ՛Բրայենը։ «Մեզ ոգեշնչում է, որ կողմերը խոսում են միմյանց հետ անմիջականորեն և միջնորդների միջոցով։ Այստեղ մենք տեսնում ենք ողջ տարածաշրջանի համար օգուտ քաղելու իրական հնարավորություն։ Օրինակ, եթե առևտուրը Կենտրոնական Ասիայից կարողանա Ադրբեջանով և Հայաստանով հասնել Թուրքիա, ապա դա էական խթան կլինի այդ առևտրային ճանապարհի վրա գտնվող բոլոր երկրների համար։ Եվ մենք ողջունում ենք դրա մի մասը լինելու հնարավորությունը։ Եթե որոշվի դա անել ոչ խաղաղ ճանապարհով, ապա Վաշինգտոնը կօգտագործի հնարավոր բոլոր գործիքները՝ կանխելու նման առևտրային ճանապարհի ստեղծումը»,- ասել է պաշտոնյան։ |azatutyun.am|

Մարդու իրավունքների պաշտպանի հանձնարարությամբ արագ արձագանքման խումբ է մեկնել Ոստիկանության Երևան քաղաքի վարչության Կենտրոնի բաժին մայրաքաղաքի Արամի փողոցում ակցիա իրականացնող մի քանի անձանց բերման ենթարկելու դեպքի առնչությամբ: Տեղի կունենան առանձնազրույցներ բերման ենթարկված քաղաքացիների հետ, կուսումնասիրվեն նրանց բերման ենթարկելու հիմքերն ու իրավունքների ապահովման վիճակը, ինչպես նաև այդ առնչությամբ կազմված փաստաթղթերը։[ՄԻՊ գրասենյակ]

Իսրայելն ու պաղեստինյան արմատական ՀԱՄԱՍ շարժումը համաձայնության են եկել Գազայի հատվածում մարդասիրական հրադադարը ևս երկու օրով երկարաձգելու շուրջ։ Այս մասին, ինչպես գրում է ՏԱՍՍ գործակալությունը, հայտնել է Կատարի ԱԳՆ պաշտոնական ներկայացուցիչ Մաջիդ բեն Մուհամմեդ ալ Անսարին։ |tert.am|