Արմավիրի մարզի Նալբանդյան համայնքում ոստիկանության մեկ ծառայող զոհվել է, մյուս ծառայողը տեղափոխվել է բժշկական կենտրոն։ Այս մասին հայտնում է ՆԳՆ խոսնակ Նարեկ Սարգսյանը։ «Ոստիկանության Արմավիրի բաժնում տեղեկություններ են ստացվել, որ Արմավիրի մարզի Նալբանդյան համայնքի բնակիչներից մեկը զինված է։ Ըստ նախնական տվյալների՝ շուրջ մեկ ժամ առաջ, նշված անձին վնասազերծելու ընթացքում նա կրակոցներ է արձակել ոստիկանության ծառայողների ուղղությամբ։ Ոստիկանության մեկ ծառայող զոհվել է, մյուս ծառայողը տեղափոխվել է բժշկական կենտրոն։ Կտրվի լրացուցիչ տեղեկատվություն», - հայտնել է խոսնակը։

Երևանի ավագանու «Քաղաքացիական պայմանագիր» խմբակցությունն ուզում է վաղաժամկետ դադարեցնել «Ազգային առաջընթաց» խմբակցության ղեկավար Գրիգոր Երիցյանի և «Հանրային ձայն» խմբակցության անդամներ Անուշ Խուդավերդյանի ու Անույշ Գինոսյանի լիազորությունները: Նախագծերն ընդգրկված են ավագանու՝ սեպտեմբերի 10-ի հերթական նիստի օրակարգում: Հիմնավորման մեջ նշվում է, որ Գրիգոր Երիցյանը, որն Իրավական հարցերի մշտական հանձնաժողովի անդամ է, հանձնաժողովի 7 նիստերից միայն մեկին է ներկա եղել, իսկ ավագանու 5-րդ գումարման երկրորդ նստաշրջանի ընթացքում 5 նիստերից դարձյալ միայն մեկին է մասնակցել: Իսկ Անույշ Խուդավերդյանի և Անուշ Գինոսյանի դեպքում նշվում է, որ նրանք բացակայել են ավագանու նիստերի քվեարկություններից կեսից ավելիից: «Սա Ավինյանի՝ ընդդիմախոսներից ազատվելու և քաղաքական հաշվեհարդարի հերթական փորձն է, որը վտանգավոր նախադեպ է ստեղծում, քանի որ Հայաստանի նորանկախ պատմության մեջ որևէ իշխանություն մանդատից չի զրկել որևէ ընդդիմադիր խմբակցության ղեկավարի։ Թե՛ իշխանությանը, թե՛ ընդդիմությանն ընտրում է ժողովուրդը, և միայն ժողովուրդն է ընտրությունների միջոցով որոշում, թե ում լիազորությունները պետք է դադարեցվեն»,- ասել է ավագանու ընդդիմադիր անդամը։|factor.am|

Եվրահանձնաժողովի փոխնախագահը կայցելի Հայաստան՝ մասնակցելու վիզաների ազատականացման երկխոսության մեկնարկին: Մարգարիտիս Սխինասը հանդիպումներ կունենա ՀՀ նախագահի, վարչապետի, փոխվարչապետ Մհեր Գրիգորյանի, ԱԳ նախարարի հետ, ելույթ կունենա ԵՊՀ-ում։ Այս մասին հայտնում են Եվրահանձնաժողովից։

«Մենք դեմ ենք, որ այլ երկրներից գան այստեղ և փորձեն ինչ-որ անվտանգություն կամ վերահսկողություն սահմանեն», - այսօր հայտարարել է ՀՀ-ում Իրանի դեսպան Մեհդի Սոբհանին՝ արձագանքելով հարցին, թե ինչպե՞ս է գնահատում Ադրբեջանը Նախիջևանին կապող ճանապարհի անվտանգության ապահովումը մասնավոր պահնորդական ընկերությանը արտապատվիրակվելու հնարավորությունը։ «Կողմ ենք, որ ցանկացած վերահսկողություն պետք է լինի Հայաստանի կողմից։ Եվ այն, ինչ փոխանցվել է ՀՀ իշխանությունների կողմից, այն է, որ սահմանային անցակետերի վերահսկողությունը լինելու է Հայաստանի պատկան մարմինների կողմից և Հայաստանի ինքնիշխանության ներքո։ Ինչքանով, որ ինձ է փոխանցվել, դա չի խոսում այն մասին, որ անվտանգությունը պետք է հանձնվի ինչ-որ միջազգային կազմակերպության։ Այլ խոսքն այն մասին է, որ տվյալ առևտրային ընկերությանը ներկայացուցիչն իր բեռը փոխադրելիս կարող է ներկա գտնվել այդ ճանապարհի ընթացքում։ Ինձ փոխանցվել է, որ անվտանգությունը և վերահսկողությունը լինելու է ՀՀ կառավարության կողմից և հայաստանյան մարմինների կողմից», - նշել է ՀՀ-ում Իրանի դեսպանը։|azatutyun.am|

Հայաստանը մասնակցելու է BRICS-ի գագաթնաժողովին վարչապետ Նիկոլ Փաշինյանի մակարդակով։ Հայաստանը միջազգային տարբեր ֆորմատներին մասնակցություն է ունենում։ Մենք BRICS-ի անդամ չենք պատրաստվում դառնալ՝ անդամակցել, և նաև՝ Հայաստանը BRICS-ի անդամ մի շարք երկրների հետ ունի շատ բազմաբնույթ հարաբերություններ։ Ես չգիտեմ՝ ՀՀ-ն BRICS-ի կանոնադրության համաձայն մասնակցում է դիտորդի՞, թե՞ հրավիրյալի կարգավիճակով։ Այստեղ որևէ ինտրիգ չէի փորձի գտնել: [ՀՀ ԱԺ ՔՊ խմբակցության պատգամավոր, Արտաքին հարաբերությունների հանձնաժողովի անդամ Սարգիս Խանդանյանը՝ Factor TV-ի հետ հարցազրույցում] |factor.am|

Խաղաղության պայմանագրի տեքստի շուրջ 80 տոկոսն արդեն համաձայնեցված է. հայտարարել է Իլհամ Ալիևը։ «Մենք կարող ենք խաղաղության հասնել Հարավային Կովկասում։ Մենք տեսնում ենք, որ դա հնարավոր է Ադրբեջանի և Հայաստանի միջև խաղաղ բանակցությունների միջոցով»,- Իտալիայում միջազգային համաժողովի ժամանակ ասել է Ալիևը: Ադրբեջանի ղեկավարը նաև խոսել է սահմանազատման գործընթացի մասին՝ նշելով, որ դա «ճիշտ ուղղությամբ արված քայլ է»: |civilnet.am|

Տելեգրամի համահիմնադիր Պավել Դուրովը առաջին հրապարակային հայտարարությունն է արել իր կալանավորումից հետո՝ ասելով, որ Ֆրանսիայի իշխանությունները պետք է բողոքներ ներկայացնեին իր ընկերության դեմ, ոչ թե կալանավորեին իրեն։ Նա չի ընդունել, թե հավելվածում «անարխիա» է, ավելին՝ իր դեմ ներկայացված պնդումներն անվանել է «անակնկալ», իսկ իրավիճակը՝ «զարմանալի», քանի որ, ըստ նրա, Ֆրանսիայի իշխանությունները մուտք են ունեցել թեժ գիծ, որը ինքն օգնել է ստեղծել, և նրանք ցանկացած պահի կարող էին կապ հաստատել Տելեգրամի ԵՄ ներկայացուցչի հետ: |azatutyun.am|