Մեղրիի զորամասի անձնակազմը 2020 թ․ հոկտեմբերի 5-ից մինչ 8-ը մարտական գործողությունների մեջ է եղել եւ հոկտեմբերի 8-ից պետք է հանգստանար։ Զորամասի հրամանատարի տեղակալ Դավիթ Հարությունյանի վկայությամբ, սակայն, իրավիճակը փոխվել է ՄՈԲ–ի փախուստի պատճառով․ «Մենք այդ օրը չպիտի գնայինք։ Եթե իրենք տեղում լինեին, էս էրեխեքն էսօր ողջ կլինեին»,– դատարանում հայտարարեց Հարությունյանը։ Խոսքը ինժեներասակրավորական անձնակազմի մասին է, որի 18 զինծառայողը զոհվել է այն բանից հետո, երբ հրամանատարը ԱԹՍ–ի առկայության պայմաններում հրամայել է նստել մեքենան եւ շարունակել երթը։ Պետք էր կրակե՞լ ԱԹՍ–ի ուղղությամբ թե՞ պատսպարվել․ այս հարցը երկար քննարկվեց նիստում։ Ըստ վկայի՝ պատերազմի ժամանակ ԳՇ պետը նոր ցուցում է տվել՝ չկրակել ԱԹՍ–ի ուղղությամբ եւ երթի ընթացքում մեծացնել արագությունը, քանի որ ԱԹՍ–ն արագ ընթացող մեքենաներին չէր խոցում։ Մեղադրողը խնդրեց բացատրել՝ ինչպե՞ս է, որ մեկ տարի առաջ հարցաքննվելիս ԳՇ պետի այդ կարգադրության մասին ոչինչ չի հայտնել։ Վկան բացատրեց՝ քրեական այլ գործերի շրջանակում որոշ փաստաթղթեր վերանայել է, հավելյալ ուսումնասիրել։

Բաքուն անընդունելի է համարում «մասամբ համաձայնեցված» խաղաղության պայմանագրի ստորագրումը: Այս մասին հայտարարել է Ադրբեջանի ԱԳՆ խոսնակ Այխան Հաջիզադեն՝ արձագանքելով Հայաստանի արտգործնախարար Արարատ Միրզոյանի հայտարարություններին: «Համաձայնագրի նախագիծը ստորագրելու համար, առաջին հերթին, Հայաստանը պետք է համապատասխան փոփոխություններ կատարի իր Սահմանադրության մեջ, որը մեր երկրի նկատմամբ տարածքային պահանջներ ունի։ Չնայած Հայաստանը տեղյակ է իր գրավոր և ստորագրված պարտավորությունների մասին՝ Ադրբեջանի արևմտյան շրջանները Նախիջևանի Ինքնավար Հանրապետության հետ կապող հաղորդակցությունների բացման վերաբերյալ, վերջին չորս տարիներին դրանք չի կատարել: Եթե հայկական կողմն իրականում շահագրգռված է տարածաշրջանում հաղորդակցությունների բացմամբ, ապա պետք է կատարի իր պարտավորությունները», - հայտարարարել է Ադրբեջանի ԱԳՆ ներկայացուցիչը: |azatutyun.am|

Ըստ պաշտոնական վերջին տվյալների՝ Հայաստանում Արևմտյան Նեղոսի տենդի՝ լաբորատոր հաստատված դեպքերի թիվը 108 է: Էմ փոքս (կապիկի ծաղիկ) հիվանդությամբ վարակվածության դեպք Հայաստանում դեռևս չի գրանցվել։ Օգոստոսի 14-ին, սակայն, ԱՀԿ-ն Աֆրիկայում Էմ փոքսի վերջին բռնկումը հայտարարել է հանրային առողջապահության միջազգային նշանակության արտակարգ իրավիճակ։ Ի՞նչ վիրուսներ են սրանք, ինչպե՞ս են փոխանցվում, որո՞նք են թիրախային խմբերը, ի՞նչ կանխարգելիչ միջոցառումներ են իրականացվում Հայաստանում․ այս հարցերի շուրջ «Ինֆոքոմ»-ը զրուցել է վիրուսաբան Հովակիմ Զաքարյանի և ՀՎԿԱԿ ներկայացուցիչ Գայանե Գրիգորյանի հետ։

Որևէ ուժ չի կարող խզել Հայաստանի և Իրանի կապը։ Այս մասին ասել է Արմեն Գրիգորյանը՝ Իրանի դեսպանին։ Հայաստանում Իրանի դեսպանատունից հայտնում են՝ ՀՀ ԱԽ քարտուղարն ընդգծել է, որ Հայաստանը հատուկ կարևորություն է տալիս Իրանի հետ հարաբերություններին»։ Գրիգորյանը շեշտել է, որ ցանկացած ապաշրջափակում կլինի Հայաստանի ներքին ինստիտուտների վերահսկողության և երկրի ազգային և տարածքային սուվերենության ներքո։ Նշենք, որ Թեհրանից այսօր կրկին հայտարարել էին՝ ողջունում են Հարավային Կովկասում տրանսպորտային ուղիների ապաշրջափակումը տարածաշրջանի երկրների ինքնիշխանության շրջանակներում և դեմ են միջազգային սահմանների ցանկացած փոփոխության։

Սուրեն Պապիկյանը Կորեայում մասնակցել է «Պատասխանատու արհեստական բանականություն՝ ռազմական տիրույթում» գագաթնաժողովի բացման արարողությանը: Միջոցառումը կազմակերպել են Կորեայի Հանրապետության, Նիդերլանդների, Միացյալ Թագավորության, Սինգապուրի և Քենիայի պաշտպանության ու արտաքին գործերի նախարարությունները, որոնց նպատակը միջազգային մեխանիզմների նախաձեռնումն է՝ վերահսկելու արհեստական բանականության կիրառումը ռազմական տեխնոլոգիաներում և մարտական գործողությունների վարման ընթացքում:

Վիրավորում  ստացած ոստիկան Ա. Այվազյանը վիրահատվել է և գտնվում է բժիշկների հսկողության տակ։ Այս մասին հայտնեց ՆԳՆ մամուլի խոսնակ Նարեկ Սարգսյանը՝ նշելով, որ ոստիկանի կյանքին վտանգ չի սպառնում:  |news.am|