Համապատասխան կառույցները ստուգում են ռուս հաքերների կողմից ՀՀ վարչապետի աշխատակազմի տվյալների բազայի վրա հարձակման մասին տեղեկության իսկությունը: Այս պահին դրա հաստատումը չունենք։ [ՀՀ վարչապետի աշխատակազմի Տեղեկատվության և հասարակայնության հետ կապերի վարչության պետ Արմեն Խաչատրյան] |armenpress.am|

Այսօր Անաստաս Միկոյան 64 հասցեում կառուցվող բազմաբնակարան կոմպլեքսի բնակիչները բողոքի ակցիա էին իրականացնում Կառավարության շենքի մոտ։ Այդ հասցեում կառուցվող «Դավթաշեն սիթի» բնակելի համալիրը հունիսի 5-ին շինարարության ավարտական ակտ է ստացել, սակայն բնակիչները պնդում են, որ համալիրում բազմաթիվ անավարտ աշխատանքներ կան։  «Շինարարական աշխատանքների ավարտական ակտ է տրամադրվել կառուցապատողին այն պարագայում, երբ շինարական աշխատանքները ավարտված չեն։ Խնդրելու ենք, որ վարչապետի աշխատակազմը պարզաբանի, թե ինչ իրավական հիմքերով են կատարվել շինարարության թույլտվությունների երկարացումները, ի՞նչ իրավական հիմքերով են տեղի ունեցել նախագծի փոփոխությունները»,- նշեց շենքի բնակիչներից Հայկ Սմբատյանը։  Շենքում այժմ մոտ 300 ընտանիք է ապրում, նրանցից 160-ը մասնակցել են ստորագրահավաքին, դիմում ներկայացրել Կառավարություն և Դատախազություն։  Կառավարությունից պատասխանել են, որ դիմումը կուսումնասիրեն և պատասխան կներկայացնեն օրենքով սահմանված ժամկետներում։ 

Կրեմլը բացարձակապես համաձայն չէ Նիկոլ Փաշինյանի հետ ՀԱՊԿ-ի վերաբերյալ նրա գնահատականի հարցում, հայտարարել են Կրեմլից։ «Հայաստանի ինքնիշխանությանը ՀԱՊԿ-ից որևէ վտանգ չի սպառնում և չի կարող սպառնալ։ Ընդհակառակը, այս կազմակերպությունը պաշտպանում է անդամ պետությունների ինքնիշխանությունը։ Բայց մենք համբերատարորեն կշարունակենք Հայաստանի ղեկավարությանը տեղեկացնել այս դիրքորոշման մասին»,- ասել է ՌԴ նախագահի խոսնակ Դմիտրի Պեսկովը։ |ria.ru|

ՀԱՊԿ-ում մեր անդամակցությունը սառեցրել ենք ոչ միայն այն պատճառով, որ ՀԱՊԿ-ը չի ապահովում Հայաստանի նկատմամբ իր ունեցած անվտանգային պարտավորությունները, այլև այն պատճառով, որ, մեր կարծիքով Հավաքական անվտանգության պայմանագիրը ստեղծում է սպառնալիքներ ՀՀ անվտանգության համար, Հայաստանի հետագա գոյության, ինքնիշխանության և պետականության համար։ Մենք լիարժեք կվերականգնենք ՀԱՊԿ-ում մեր գործունեությունը միայն այն պարագայում, երբ մեր բարձրացրած հարցերին հնչեն կոնկրետ պատասխաններ։ Մեր այս շեշտադրումից անցել է երկու տարի, պատասխանները ոչ միայն չեն հնչել, այլև արդեն ակնհայտ է, որ չեն հնչելու: Ինչքան այդ պատասխանները չեն հնչում, ՀՀ-ն ավելի է հեռանում ՀԱՊԿ-ից: Մեծ է հավանականությունը, որ այս իրավիճակի շարունակվելու դեպքում կանցնենք անդառնալիության կետը»։ [Նիկոլ Փաշինյան]

Բացահայտվել է իշխանությունը յուրացնելու նախապատրաստության դեպք․ 7 անձի նկատմամբ քրեական հետապնդում է հարուցվել, 3-ը կալանավորվել են։ ՀՀ մի շարք քաղաքացիներ, ինչպես նաև ԼՂ նախկին 2 բնակիչ, ինքնությունները դեռևս չպարզաբանված այլ անձանց հետ ամսական շուրջ 220.000 ՌԴ ռուբլի վճարի դիմաց 2024թ․ ընթացքում հավաքագրել են ՀՀ մի շարք քաղաքացիների և ԼՂ մի շարք նախկին բնակիչների: Վերջիններս տարբեր խմբերով մեկնել են ՌԴ-ում, որտեղ անցել են նախնական ստուգումներ: Ապա այդ անձանց տեղակայել են «Արբատ» անվանումով ռազմաբազայում, որից հետո անցկացրել են փակ տարածքում մարտ վարելու պարապմունքներ։ Հավաքագրված անձանց անձանց մի մասը հրաժարվել է մասնակցել վարժանքներին ու վերադարձել է ՀՀ, իսկ Ս. Գ.-ն ու հանցավոր խմբի մյուս անդամները հանցագործությունն ավարտին չեն հասցրել ՀՀ իրավապահ մարմինների կողմից այն բացահայտվելու արդյունքում։

Մոսկվան աջակցում է Ադրբեջանի հետ միջանցքների և հաղորդակցության ուղիների հարցում Իրանի քաղաքականությանը։ Այս մասին ասել է ՌԴ ԱԽ քարտուղար Սարգեյ Շոյգուն Իրանի ազգային անվտանգության բարձրագույն խորհրդի քարտուղար Ալի-Աքբար Ահմադիանի հետ Թեհրանում կայացած հանդիպմանը։ Իրանի նախագահի հետ հանդիպմանը Շոյգուն փոխանցել է Պուտինի ուղերձը՝ շեշտելով, որ ՌԴ դիրքորոշումը տարածաշրջանային հարցերում Իրանի հետ համագործակցելու հարցում չի փոխվել։ |azatutyun.am|

Լիբանանում փեյջերների պայթյունների հետևանքով զոհվել է 8 մարդ, մեծ մասը՝ երեխաներ։ Վիրավորների թիվը շուրջ 2,800 է։ Այս մասին հայտնում են Լիբանանի առողջապահության նախարարությունից։ |tert.am|

ՌԴ անվտանգության խորհրդի քարտուղարը Սերգեյ Շոյգուն չհայտարարված այցով ժամանել է Իրան ։ Շոյգուն հանդիպել է Իրանի Ազգային անվտանգության բարձրագույն խորհրդի նախագահ Ալի Աքբար Ահմադիանի հետ։ |arm.sputniknews.ru|

Գլխավոր դատախազությունը բողոքարկել է երրորդ նախագահ Սերժ Սարգսյանի արդարացման որոշումը հակակոռուպցիոն վերաքննիչ ատյան։ Այս մասին «Ազատությանը» հայտնել են դատախազությունից։ Հիշեցնենք, որ ըստ մեղադրանքի, Սերժ Սարգսյանի կազմակերպմամբ և «Ֆլեշ» ՍՊ ընկերության սեփականատեր Բարսեղ Բեգլարյանի դրդմամբ, ՀՀ նախկին գյուղատնտեսության նախարարի տեղակալ Սամվել Գալստյանի ու նույն նախարարության բուսաբուծության վարչության պետ Գևորգ Հարությունյանի օժանդակությամբ, ՀՀ նախկին գյուղատնտեսության նախարար Սերգո Կարապետյանի կողմից 2013 թվականի հունվարի 25-ից փետրվարի 7-ն ընկած ժամանակահատվածում ՀՀ կառավարության պահուստային ֆոնդից վատնվել է պետական աջակցության ծրագրերի իրականացման ընթացքում իրացված 15.391.765 լիտր դիզելային վառելիքի համար հատկացված սուբսիդիայի առանձնապես խոշոր չափերով գումարը՝ 489.160.310 ՀՀ դրամը։

Վրաստանի խորհրդարանը երրորդ և վերջին ընթերցմամբ ընդունել է «ԼԳԲՏ քարոզչությունը, միասեռ ամուսնությունները և սեռը փոխելու նպատակով բժշկական միջամտությունները» արգելող օրենքի նախագիծը: Նախագիծը խորհրդարան էր բերել իշխող «Վրացական երազանք» կուսակցությունը։ Նախագծի քննարկման ժամանակ Խորհրդարանի շենքի մոտ ակցիա է իրականացվել օրենքի նախագծի ընդունման դեմ։ |oc-media.org|