ԱՄՆ նախագահ Ջո Բայդենը Եմենի հութիներին «ահաբեկչական» խմբավորում է անվանել` այդ տարածքում ամերիկյան և բրիտանական ռազմական հարվածների ֆոնին: «Կարծում եմ՝ այո», - ասել է Բայդենը՝ պատասխանելով լրագրողի հարցին, թե արդյոք պատրաստ է հութիներին անվանել ահաբեկչական խմբավորում: Բայդենը նշել է, որ Վաշինգտոնը կպատասխանի հութիներին, եթե նրանք շարունակեն նույն վրդովեցուցիչ վարքագիծը դրսևորել:

Ադրբեջանը բարձրացնում է 4 գյուղերի հարցը, Հայաստանը՝ 32 գյուղերի, որոնց կենսական նշանակության տարածքները օկուպացված են, այդ թվում՝ Գեղարքունիքի մարզում։ Այս մասին ասել է ՀՀ վարչապետ Նիկոլ Փաշինյանը՝ ՔՊ-ի նախաձեռնող խմբի նիստին։ «Մենք, քանի որ հավատարիմ ենք Ալմաթիի հռչակագրի հիման վրա տարածքային ամբողջականությունն ընդունելուն, ասում ենք՝ օկուպացված տարածքներ պետք է չլինեն։ Հետևաբար, որտեղ պարզվի՝ ՀՀ-ն է ինչ-որ տարածքներ հսկողության տակ պահում, որոնց Ադրբեջանին են պատկանում, ՀՀ-ն դուրս կգա, որտեղ պարզվի՝ Ադրբեջանը, իրենք պետք է դուրս գան։ Սա գործնականում հնարավոր չէ իրագործել առանց համաձայնեցված քարտեզի․ ինչպե՞ս որոշենք՝ սա ՀՀ տարածքն է, թե՞ Ադրբեջանի․ պետք է սեղանին դնել Ալմաթիի հռչակագրի դրույթները դե յուրե արտահայտող քարտեզներ և իրողությունները համապատասխանեցնել քարտեզներին»։

Հունվարի 13-ին եղանակային խիստ անբարենպաստ պայմաններում մարտական դիրքից մշտական տեղակայման վայր տեղափոխվելու ճանապարհին կորել է կապը ՀՀ ՊՆ N զորամասի զինծառայող Բ. Մ.-ի հետ: Չնայած սաստիկ բքին և մառախուղին՝ մեկնարկած որոնողափրկարարական աշխատանքները շարունակվում են: Ձեռնարկվում են անհրաժեշտ բոլոր միջոցառումները՝ զինծառայողին հայտնաբերելու ուղղությամբ: [ՀՀ ՊՆ]

Մենք առաջարկում ենք զորքերը հայելային հետ քաշել, որ բախումների վտանգը չեզոքացնենք, Ադրբեջանը սա մերժում է, ասում ենք՝ եկեք սահմանային շրջանները ապառազմականացնենք, Ադրբեջանը մերժում է։ Ես կարող եմ ուրիշ առաջարկ անել․ եկեք սպառազինությունների վերահսկման վերաբերյալ պայմանագիր կնքենք, որ Հայաստանն ու Ադրբեջանը սպառազինությունների հետ կապված կոնկրետ պայմանավորվածություն ձեռք բերեն և դրանց կատարման՝ մեկը մյուսին վերահսկելու հնարավորություն ունենան։ Սա իհարկե նոր բան է, բայց կարծում եմ՝ եթե մենք անկեղծ ուզում ենք գնալ խաղաղության, բոլոր հարցերը կարելի է հասցեագրել։ [ՀՀ վարչապետ Նիկոլ Փաշինյանը՝ ՔՊ-ի նախաձեռնող խմբի նիստին]

Ինչ պայմանով Իրանը տրամադրում է կապ՝ Ադրբեջանի և Նախիջևանի միջև, նույն պայմաններով մենք էլ ենք պատրաստ տրամադրել՝ և երկաթուղային, և ավտոճանապարհային։ Ադրբեջանից ասում են՝ նոյեմբերի 9-ի հայտարարության մեջ իրենք հասան նրան, որ արձանագրվի «Զանգեզուրի միջանցք» և, որ ՌԴ-ն է ապահովելու այդ ճանապարհների անվտանգությունը: Եռակողմ հայտարարության մեջ այդ երկուսից ոչ մեկը չկա գրված, նման բան ընդհանրապես գոյություն չունի: Ոչ մի տեղ գրված չէ, որ ՌԴ-ն ՀՀ որևէ տարածքում կոմունիկացիայի անվտանգություն պետք է ապահովի, ընդհակառակը գրված է, որ ՀՀ-ն է երաշխավորում անվտանգությունն իր տարածքում: Եվ բանական է, ուրիշ ով պետք է ապահովի: [ՀՀ վարչապետ Նիկոլ Փաշինյանը՝ ՔՊ-ի նախաձեռնող խմբի նիստին]

Արամուս գյուղում գործող հացատանը տեղի ունեցած զենքի գործադրմամբ խուլիգանության եվ մեկ անձի վնասվածք հասցնելու դեպքի նախաքննությամբ ձերբակալվել է հինգ անձ: ՔԿ-ն մանրամասներ է հայտնել Տիրան Խաչատրյանի հետ առնչվող գործի վերաբերյալ։

Շտապօգնության բժշկին մարմնական վնասվածքներ պատճառած եղբայրներին ձերբակալել են։ [ՀՀ ոստիկանություն]

Ծեծի է ենթարկվել Երևանի քաղաքապետարանի «Շտապօգնություն» ՓԲԸ բժիշկը։ Պացիենտը բժշկից պահանջել է ներարկել «Տրամադոլ» դեղամիջոց, բժիշկը հորդորել է ապավինել իր որոշմանը' նշելով, որ այլ դեղամիջոցով նույնպես կարելի է ցավազրկել։ Այնուհետ հիվանդը սկսել է ագրեսիվ պահվածք դրսևորել, հնչեցնել վիրավորական արտահայտություններ՝ նշելով որ կա՛մ պետք է իր ուզած դեղը ներարկեն, կա՛մ հեռանան, որ այլ կանչով իրեն ներարկվի նախընտրած դեղամիջոցը։ Բժշկի հասցեին հնչել են հայհոյանքներ, որից հետո վերջինիս 3 անձինք ծեծի են ենթարկել։ Ավելի ուշ բուժօգնության դիմած բժշկի մոտ ախտորոշվել են ուղեղի ցնցում, քթի սալջարդ, դեմքի շրջանում քերծվածքներ։ [Քաղաքապետարանի մամուլի խոսնակ Հայկ Կոստանյան]

Ստեփանավանի համայնքապետարանը ապատեղեկատվություն է անվանել լուրը, թե քաղաքապետը փորձել է դանակով կտրել անձնական հարցով քաղաքապետին դիմած քաղաքացու կոկորդը: Նշվում է, որ քաղաքացի Գագիկ Կարապետյանը համայնքապետարանի շենքից դուրս է եկել առանց որևէ վնասվածքի, իսկ ներսում դրսևորել է ոչ ադեկվատ պահվածք, հայհոյել է, խոչընդոտել բնականոն աշխատանքը, որի հիմքով համայնքապետարանը դիմել է ոստիկանություն։

«Թուրքիայի նախագահն այժմ պարծենում է նրանով, որ անհիմն պնդումներով թիրախավորում է Իսրայելը՝ իր անցյալում ունենալով Հայոց ցեղասպանությունը։ Մենք հիշում ենք հայերին ու քրդերին։ Ձեր պատմությունը ինքնին խոսում է։ Ձեր բարբարոս դաշնակիցների դեմ Իսրայելը կանգնած է պաշտպանվելու, ոչ թե կործանելու»,- X-ի իր էջում գրել է Իսրայել Կացը։ Նշենք, որ Թուրքիայի նախագահը հայտարարել է՝ Հաագայի դատարան է փոխանցել Իսրայելին ցեղասպանության մեջ մեղադրող նյութեր․ «Մեր ներկայացրած փաստաթղթերը (ցեղասպանության ապացույցները) օգտակար են Հաագայի համար։ Իսրայելի վարչապետ Բենիամին Նեթանյահուն թաքնվելու տեղ չունի, և պաշտպանություն չկա Գազայի հատվածում ՀԱՄԱՍ-ի դեմ սկսված գործողության համար»։