Ջրականի 5-րդ ուսումնական գումարտակի հրամանատար Իշխան Վահանյանի վերաբերյալ քրեական գործով գրեթե 2 տարվա ընթացքում հարցաքննվեց 40 վկա, 14 տուժող եւ տուժողի 15 իրավահաջորդ։ Դատարանը, դատավոր Ջոն Հայրապետյանի նախագահությամբ, այսօր ավարտեց դատակոչի ցուցակում ներառված անձանց հարցաքննության փուլը։ Նրանցից մի քանիսը, սակայն, հարցաքննությունների ողջ ընթացքում դատարան այդպես էլ չներկայացան։ Պատճառները տարբեր են։ Ոմանք մահացել են, ոմանք վատառողջ են, ոմանք գտնվում են Հայաստանից դուրս, ոմանք էլ 2023 թ․ սեպտեմբերին Արցախից Հայաստան բռնի տեղահանումից հետո գտնել չի հաջողվել․ նրանք այլեւս չեն բնակվում այն հասցեներում, որ Միգրացիայի եւ քաղաքացիության ծառայությունն է դատարանին տրամադրել, դատարանի կողմից ոստիկանություն ուղարկված գրությունների հիման վրա եւս նրանց հնարավոր չի եղել հայտնաբերել։ Դատարանը որոշեց հրապարակել եւ հիմք ընդունել նրանց նախաքննական ցուցմունքները։

ՆԱՏՕ-ի գլխավոր քարտուղար Ենս Ստոլտենբերգը կժամանի Հայաստան։ Տեղեկությունը «Լուրերին» հաստատել է ՀՀ ԱԳՆ մամուլի քարտուղար Անի Բադալյանը:Այցը տեղի կունենա մարտի 19-ին: |1lurer.am|

Ադրբեջանի և Իրանի նախագահները մտադիր են հանդիպել Խուդաֆերինի կամրջի տարածքում, Baku.tv-ին տված հարցազրույցում ասել է Ադրբեջանում Իրանի դեսպան Սեյիդ Աբբաս Մուսավին։ Իրանցի դիվանագետի խոսքով՝ Իլհամ Ալիևի և Էբրահիմ Ռայիսիի մասնակցությամբ տեղի կունենա Խուդաֆերին և Գիզ Գալասի հիդրոէլեկտրակայանների բացման հանդիսավոր արարողությունը։ |azatutyun.am|

ԵՄ խորհրդի նախագահ Շառլ Միշելը շնորհավորել է Վլադիմիր Պուտինին այսօր մեկնարկած ընտրություններում «ջախջախիչ հաղթանակի» կապակցությամբ։ «Չկա ընդդիմություն, չկա ազատություն, չկա ընտրություն»,- հավելել է Միշելը X-ի իր միկրոբլոգում։

Շիրակի մարզպետարանի երկու պաշտոնյա է այսօր ձերբակալվել․ նրանց կաշառք ստանալու մեղադրանք է առաջադրվել։ «Ազատության»-ը հայտնել են Հակակոռուպցիոն կոմիտեից։ Ձերբակալվածներից մեկը Շիրակի մարզպետարանի քաղաքաշինության վարչության պետ Խաչատուր Խնձրցյանն է, մյուսը՝ նույն վարչության աշխատակից։

ԵՄ վիզաների ազատականացման ուղղությամբ կա հետընթաց․ հայտարարել է ԱԳ փոխնախարարը։ «Երևանն աշխատում է երկու ուղղությամբ՝ ինչպես ազատականացման, այնպես էլ դյուրացված գործող ռեժիմի վերականգնման ուղղությամբ, քանի որ կորոնավիրուսի համավարակից հետո այդպես էլ լիարժեք չվերականգնվեց»,- ասել է Պարույր Հովհաննիսյանը։

«Ինֆոքոմի» լրագրող Լյուսի Մանվելյանը Երևանի քաղաքապետ Տիգրան Ավինյանի հետ զրուցել է հանրային տրանսպորտի նոր ուղեվարձի, Երևանյան լճի հարակից տարածքի բարեկարգման խնդիրների, ՔՊ ավագանու թեկնածուի ընկերության՝ պետական գնումներում հաղթելու, Երևանի ավագանու ընտրություններին ընդառաջ ՔՊ կուսակցության կասկածելի նվիրատվությունների մասին։

Հայաստանի բոլոր իշխանությունները միշտ բանակցել են որոշակի տարածքներ զիջելու վերաբերյալ։ Դա եղել է տարածքներ զիջելու բանակցություններ։ Չգիտեմ՝ ով, ինչ, որ փուլում, որ պատմական պահին ինչ շահ է ունեցել այլ բան ասելու ՀՀ հանրությանը, կարծում եմ՝ բոլորը արդեն կարող են ակնհայտորեն հասկանալ, որ այդ բանակցություններն առաջին օրվանից եղել են տարածքներ զիջելու բանակցություններ։ [Արարատ Միրզոյանը՝ ի պատասխան Ալիևի հայտարարության]

Ադրբեջանի պատվերը Դուք եք կատարում անձամբ և Ադրբեջանին հովանավորող ուրիշ երկրի պատվեր [եք կատարում]․ Արարատ Միրզոյանը՝ ի պատասխան ընդդիմադիր պատգամավոր Աննա Գրիգորյանի հայտարարության, որ իշխանությունը «կատարում է Ադրբեջանի պատվերը» Սահմանադրական փոփոխությունների գործընթաց նախաձեռնելով։ Միրզոյանը ներկայացրեց այն բանակցային գործընթացները, որ տեղի են ունեցել ՀՀ տարածքի վրա հարձակումից հետո (ՀԱՊԿ արձագանքը, ապա Ֆրանսիայի ու ԵՄ խորհրդի նախագահների միջնորդությամբ հայտարարությունները)՝ նշելով․ «Եթե կապը տեսնում եք, լավ, եթե չեք տեսնում, ապա պետք է կրկնեմ այն, ինչ ասել եմ սկզբում՝ Դուք կատարում եք պատվեր»։

Արարատ Միրզոյանը մեղադրեց ընդդիմությանը, որ բանակցային փաստաթղթերին՝ մասնավորապես Խաղաղության պայմանագրի տեսքստին ծանոթանալուց հետո ոչ ճիշտ տեղեկություն են հանրայնացնում։ «Կարելի է անհամաձայնություն հայտնել այն հարցերին, որոնք փաստաթղթում կան գրված։ Հողմաղացների դեմ պայքարել պետք չէ, առավել ևս մեր հանրությանը համոզել, որ էդ թղթում ինչ-որ ապոկալիպտիկ բաներ են գրված, ընդհանրապես պետք չէ», - ասաց նա։