ԱՄՆ փոխնախագահ ՋեյԴի Վենսը կարճ հարցազրույց է տվել NBC News-ին՝ ընդգծելով, որ Միացյալ Նահանգները չի պատերազմում Իրանի հետ։ «Մենք պատերազմում ենք նրա միջուկային ձգտումների դեմ», - նշել է Վենսը՝ հավելելով, որ ԱՄՆ-ն վստահ է, թե «կործանել է Իրանի միջուկային ծրագիրը»։ Փոխնախագահը նաև արձագանքել է Դոնալդ Թրամփի հասցեին հնչած քննադատությանը՝ նշելով, որ «ճշմարտությանը չի համապատասխանում» այն պնդումը, թե ռազմական գործողություն սկսելը ԱՄՆ նախագահի լիազորությունների սահմաններում չէ։ Այդ հարցը ավելի վաղ բարձրացրել էր Ներկայացուցիչների պալատի դեմոկրատ առաջնորդ Հաքիմ Ջեֆրիսը։

Իրանի իշխանությունները կրկին սպառնացել են փակել Հորմուզի նեղուցը, որի միջոցով իրականացվում է նավթի համաշխարհային առևտրի հինգերորդ մասը։ Իրանական Press TV հեռուստաալիքը մեջբերել է պատգամավոր և գեներալ Իսմայիլ Քոսարիի խոսքերը, որը նշել է, որ Իրանի խորհրդարանը որոշում է ընդունել փակել նեղուցը։ Վերջնական որոշումը, նրա խոսքով, պետք է կայացնի Ազգային անվտանգության բարձրագույն խորհուրդը։ |factor.am|

Չինաստանը խստորեն դատապարտում է Իրանի վրա ԱՄՆ-ի հարձակումները և Ատոմային Էներգիայի միջազգային գործակալության երաշխիքների ներքո գտնվող միջուկային օբյեկտների ռմբակոծությունները: «Չինաստանը կոչ է անում հակամարտության կողմերին, մասնավորապես, Իսրայելին, որքան հնարավոր է շուտ հասնել հրադադարի, ապահովել քաղաքացիական բնակչության անվտանգությունը և երկխոսություն ու բանակցություններ սկսել»,- հայտարարել են Չինաստանի ԱԳՆ-ից։ |armenpress.am| |armenpress.am|

Իրանի արտգործնախարարը հայտարարել է, թե պատրաստվում է մեկնել Մոսկվա, որտեղ վաղը կհանդիպի ՌԴ նախագահ Պուտինի հետ։ «Ռուսաստանը Իրանի բարեկամն է, մենք ռազմավարական գործընկերություն ունենք, միշտ խորհրդակցում ենք միմյանց հետ և համակարգում մեր դիրքորոշումները», - հասել է նա Թուրքիայում այսօր տեղի ունեցած ասուլիսի ժամանակ։ Արաղչին երեկ մեկնել էր Ստամբուլ՝ Իսլամական կազմակերպության երկրների հավաքին մասնակցելու։ |azatutyun.am|

ՌԴ ԱԳ նախարարությունը խստորեն դատապարտել է ԱՄՆ-ի կողմից Իրանի մի շարք միջուկային օբյեկտների դեմ իրականացված հարվածները։ «Անկախ որևէ հիմնավորումից՝ սուվերեն պետության տարածքի վրա հրթիռային և ռմբակոծիչ հարվածների իրականացումը հանդիսանում է միջազգային իրավունքի, ՄԱԿ-ի կանոնադրության և ՄԱԿ-ի Անվտանգության խորհրդի՝ նման գործողությունները անթույլատրելի ճանաչած բանաձևերի կոպիտ խախտում։ Հատկապես մտահոգիչ է, որ այդ հարվածները իրականացրել է մի երկիր, որն ունի ՄԱԿ-ի ԱԽ մշտական անդամի կարգավիճակ», - նշված է հայտարարության մեջ։ Ռուսաստանը նաև ընդգծել է, որ պարտադիր է ՄԱԿ-ի Անվտանգության խորհրդի արձագանքը՝ նշելով. «Անհրաժեշտ է հավաքական ուժերով մերժել ԱՄՆ-ի և Իսրայելի այս հակամարտային գործողությունները»։

«Զվարթնոց» տաճարի մոտից մեկնարկել է երթ դեպի Մայր աթոռ` ցույց տալու քաղաքացիների աջակցությունը Հայ առաքելական եկեղեցուն: Էջմիածնի Մայր Տաճարում նախատեսված է ակցիայի մասնակիցների հանդիպումը Ամենայն հայոց կաթողիկոս Գարեգին Բ-ի հետ։ Երթին մասնակցում են մի շարք ընդդիմադիր պատգամավորներ և քաղաքական գործիչներ: Քաղաքացիները բռնել են նաև գործարար Սամվել Կարապետյանի նկարով պլակատներ՝ նրան աջակցություն ցույց տալու համար։

ՄԱԿ-ի միջուկային գործակալության ղեկավար Ռաֆայել Գրոսսին հայտարարել է, որ վաղը կառավարիչների խորհրդի արտահերթ նիստ է հրավիրում՝ «Իրանում ստեղծված արտակարգ իրավիճակի» պատճառով։ «Գործակալությունը լրացուցիչ գնահատականներ կտրամադրի Իրանում տիրող իրավիճակի վերաբերյալ, երբ ավելի շատ տեղեկություններ հասանելի դառնան», - հայտարարել էր ՄԱԿ-ի միջուկային վերահսկող մարմինը ։ |azatutyun.am| |azatutyun.am|

«Այսօր առավոտյան տեղի ունեցած իրադարձությունները խիստ վրդովեցուցիչ են և կունենան երկարատև հետևանքներ», - այս մասին հայտարարել է Իրանի ԱԳ նախարար Աբբաս Արաղչին, նշելով՝ ՄԱԿ-ի յուրաքանչյուր անդամ պետություն պետք է տագնապի մատնվի այս «ծայրահեղ վտանգավոր, ապօրինի և հանցավոր վարքագծի կապակցությամբ»։ «Միացյալ Նահանգները, ՄԱԿ-ի Անվտանգության խորհրդի մշտական անդամ լինելով, լրջորեն խախտել է ՄԱԿ-ի կանոնադրությունը, միջազգային իրավունքը և Միջուկային զենքի չտարածման մասին պայմանագիրը (NPT)՝ հարձակվելով Իրանի խաղաղ նպատակներով օգտագործվող միջուկային օբյեկտների վրա», - գրել է նա X-ի իր էջում, նշելով, որ Իրանը համաձայն ՄԱԿ-ի կանոնադրության և դրույթների՝ պահպանում է բոլոր հնարավորությունները՝ պաշտպանելու իր ինքնիշխանությունը, շահերը և ժողովրդին։

ՄԱԿ-ի գլխավոր քարտուղար Անտոնիու Գուտերեշը խորը մտահոգություն է հայտնել Իրանի դեմ ԱՄՆ կողմից գործադրված ուժի կիրառման կապակցությամբ։ «Աճող ռիսկ կա, որ այս հակամարտությունը կարող է արագորեն դուրս գալ վերահսկողությունից՝ աղետալի հետևանքներով քաղաքացիական բնակչության, տարածաշրջանի և աշխարհի համար», - գրել է Գուտերեշը X սոցիալական ցանցում։ Իրանի մշտական ներկայացուցիչը ՄԱԿ-ում՝ Ամիր Սաիեդ Իրավանին, իր հերթին գրությամբ դիմել է ՄԱԿ-ի Անվտանգության խորհրդին՝ հրատապ նիստ հրավիրելու խնդրանքով։ Նա Միացյալ Նահանգների գործողությունները որակել է որպես «ծայրահեղ սպառնալիք տարածաշրջանային և միջազգային խաղաղությանն ու անվտանգությանը»։ Իրավանին պնդել է, թե հարձակումները տեղի են ունեցել Միջազգային միջուկային էներգիայի գործակալության՝ ՄԱԳԱՏԷ-ի վերահսկողության ներքո՝ չներկայացնելով որևէ ապացույց։

ԱՄՆ-ն հարվածել է Իրանի երեք գլխավոր միջուկային օբյեկտներին՝ փաստացի միանալով Իսրայելի նախաձեռնությանը՝ ոչնչացնելու Իրանի միջուկային ծրագիրը։ «Մենք ավարտել ենք մեր չափազանց հաջող հարձակումը Իրանի երեք միջուկային օբյեկտների վրա, ներառյալ՝ Ֆորդոն, Նաթանզը և Սպահանը։ Բոլոր ինքնաթիռները այժմ գտնվում են Իրանի օդային տարածքից դուրս»,- հայտարարել է ԱՄՆ նախագահ Դոնալդ Թրամփը։