ՌԴ ԱԳ փոխնախարար Միխայիլ Գալուզինը և Հայաստանի հետ հարաբերությունների կարգավորման հարցերով Թուրքիայի հատուկ ներկայացուցիչ Սերդար Քըլըչը քննարկել են Հարավային Կովկասում խաղաղության հասնելու ուղիները։ ՌԴ ԱԳՆ–ն հայտնում է, որ երկուստեք հետաքրքրություն են հայտնել նաև «3+3» տարածաշրջանային ձևաչափի շրջանակում համագործակցության վերաբերյալ։ |arm.sputniknews.ru|

Սեպտեմբերի 12-ից նախատեսվում է Իսակովի պողոտա – Աթենքի փողոց – Հաղթանակի կամուրջ խաչմերուկում երթևեկության կազմակերպման փոփոխություն: Հաղթանակի կամրջի 2 երթևեկելի գոտիներից կթույլատրվի կատարել աջ շրջադարձ, մյուս 2 երթևեկելի գոտիներից կթույլատրվի կատարել ձախ շրջադարձ: Աթենքի փողոցում՝ դեպի Ծիծեռնակաբերդի խճուղի ուղղությամբ կազմակերպված հետիոտնային անցումը կտեղափոխվի Իսակովի պողոտայի սկզբնամաս: [Երևանի քաղաքապետարան]

Քանի դեռ իրավիճակը տարածաշրջանում ամբողջությամբ չի կարգավորվել, ռուս սահմանապահների դուրսբերումն Իրանի և Թուրքիայի հետ սահմաններից անտեղի է Հայաստանի անվտանգության տեսանկյունից։ ՌԴ ԱԳՆ պաշտոնական ներկայացուցիչ Մարիա Զախարովան՝ մեկնաբանելով ՀՀ ԱԺ նախագահ Ալեն Սիմոնյանի հայտարարությունը, որ Հայաստանի իշխանությունները պետք է մտածեն Իրանի և Թուրքիայի հետ սահմաններին ռուս սահմանապահների ներկայության նպատակահարմարության շուրջ: «Այնպիսի տպավորություն է, որ Ալեն Ռոբերտովիչն այքնան էլ ուշադիր չի հետևել Նիկոլ Փաշինյանի մամուլի ասուլիսին։ 1992 թվականին Հայաստանում ռուս սահմանապահների ներկայությունը կարգավորող հիմնական փաստաթուղթը հանրապետությունում ռուսական սահմանապահ զորքերի կարգավիճակի մասին անժամկետ պայմանագիրն է։ Ռուս սահմանապահները բազմիցս ապացուցել են իրենց ներկայության կարևորությունը», - ճեպազրույցի ժամանակ ասել է Զախարովան: |azatutyun.am| |azatutyun.am|

Պետք է հաշվի առնել, որ Սահմանադրությանը հակասող միջազգային պայմանագրերը չեն կարող վավերացվել։ Ենթադրենք՝ մենք ստորագրում ենք խաղաղության պայմանագիր, որտեղ նշված է, որ Հայաստանն Ադրբեջանից տարածքային պահանջներ չունի։ Այդ հարցը ներկայացվում է Սահմանադրական դատարան։ Եթե ՍԴ-ն որոշում է, որ այս դրույթը մեր Սահմանադրությանը չի համապատասխանում, ապա արձանագրվում է, որ մենք ունենք տարածքային պահանջներ Ադրբեջանից, և մենք պետք է դիրքորոշվենք այս իրավիճակի նկատմամբ։ Հակառակ դեպքում, եթե ՍԴ-ն հաստատում է, որ խաղաղության պայմանագիրը համապատասխանում է Սահմանադրությանը, ապա այն փաստը, որ Հայաստանը չունի տարածքային պահանջ Ադրբեջանից, ստանում է իրավական ուժ։ Խաղաղության պայմանագրի ստորագրումից ու վավերացումից հետո Ադրբեջանի մտահոգություններն ամբողջությամբ վերանում են, միաժամանակ լուծվում են Հայաստանի մտահոգությունները։ [ՀՀ վարչապետ Նիկոլ Փաշինյան] |civilnet.am|

Երևանում փոշու ամպ բարձրացրած բարձրահարկի քանդումը պիտի հարկ առ հարկ՝ տեխնիկայի գործադրմամբ ապամոնտաժելով իրականացվեր, ոչ թե ճոպանի միջոցով։ Այս մասին ասել է Երևանի քաղաքապետարանի մամուլի խոսնակ Հայկ Կոստանյանը՝ նշելով, որ քանդման այդ տարբերակը թույլ կտար խուսափել և փոշու ամպից, և նաև քաղաքացիների անվտանգության հետ կապված խնդիրներ չէին առաջանա։ Երևանի քաղաքապետարանի մամուլի քարտուղարի խոսքով՝ մոնտաժումն իրականացրած ընկերությունը կտուգանվի․ «Տուգանքի չափը 750 հազարից մեկուկես միլիոն դրամ է»։ Հայկ Կոստանյանը նշել է, որ ինքը որպես Երևանի քաղաքապետարանի մամուլի քարտուղար, նախապես տեղյակ չի եղել, որ բազմահարկ շենքի սեփականատերն այսօր է քանդելու շենքը։ Տեղի ունեցածի մասին տեղեկացել է համացանցից։ |azatutyun.am|

Փլուզման միջոցով ապամոնտաժվել է Երևանի Պարույր Սևակի 5/1 հասցեում գտնվող բազմահարկ շինությունների մի մասը: Սրան արձագանքել է ՀՀ ՄԻՊ-ը՝ նշելով, որ փլուզումը հանգեցրել է և շարունակում է հանգեցնել մարդկանց, այդ թվում՝ երեխաների մի շարք իրավունքների խախտման: «Իրավասու պետական և տեղական ինքնակառավարման մարմինների գործողությունների (անգործության), ինչպես նաև ներգրավված անձանց և կազմակերպությունների կողմից հնարավոր խախտման հանգամանքները քրեական վարույթի շրջանակում քննարկման առարկա դարձնելու նպատակով համապատասխան գրություն կհասցեագրվի ՀՀ գլխավոր դատախազություն: Հաշվի առնելով, որ ապամոնտաժման աշխատանքներն ավարտին չեն հասցվել, նկատի ունենալով բնակիչների բազմաթիվ դժգոհությունները, ինչպես նաև խիստ մտահոգիչ համարելով առկա իրավիճակը՝ Պաշտպանն արձանագրում է, որ պետք է անհապաղ միջոցներ ձեռնարկվեն մարդու իրավունքների հետագա խախտումները բացառելու ուղղությամբ», - նշված է ՄԻՊ հայտարարության մեջ:

ՀՀ-ն Ադրբեջանին չի առաջարկում 13 հոդվածով խաղաղության պայմանագիր, այլ 16 հոդվածով, հայտարարել է Նիկոլ Փաշինյանը։ «Մենք բոլոր 16 հոդվածների համար ունենք համաձայնեցված բովանդակություն, 3 հոդվածի համար այդ բովանդակությունն ի սկզբանեի հետ համեմատած մասամբ է համաձայնեցված․ կան նախադասություններ, որոնք համաձայնեցված են, կան նախադասություններ՝ ոչ, այսինքն՝ 13 պլյուս 3, այսինքն՝ 16 հոդվածով պայմանագիր», - նշեց Փաշինյանը ԱԺ հարցուպատասխանի ընթացքում: Կառավարության ղեկավարը նաև տեղեկացրեց, որ խաղաղության պայմանագիրն ի սկզբանե ունեցել է 18 հոդված, հիշեցրեց՝ դուրս է եկել ապաշրջափակման հոդվածը, այժմ էլ պայմանագիրն ունի 17 հոդված, որից մեկն էլ, ըստ Փաշինյանի, առհասարակ համաձայնեցված չէ:

Ռուսաստանը հավատարիմ է Զանգեզուրի հետ կապված Թեհրանի հետ նախկին պայմանավորվածություններին, և Մոսկվայի քաղաքականությունն այս հարցում բացարձակապես չի փոխվել, հայտարարել է Սերգեյ Շոյգուն։ Իրանի իր գործընկերոջ՝ Ալի Աքբար Ահմադիանի հետ հանդիպման ժամանակ իր խոսքում ՌԴ անվտանգության բարձրաստիճան պաշտոնյան ասել է, որ Մոսկվան աջակցում է Իրանի ինքնիշխանությանը և տարածքային ամբողջականությանը Պարսից ծոցում գտնվող երկրի եռյակ կղզիների նկատմամբ: |azatutyun.am|

ԵՄ-ին Հայաստանի անդամակցության գործընթաց սկսելու հարցով հանրաքվե կազմակերպելու համար Հայաստանում ստորագրահավաք կանցկացվի Ստորագրությունների հավաքման ժամկետ է սահմանվել 2024 թվականի սեպտեմբերի 16-ից նոյեմբերի 14-ը ներառյալ։ ԵՄ-ին Հայաստանի անդամակցության գործընթաց սկսելու հարցը հանրաքվեի դնելու համար ստորագրահավաքի առաջարկով հանդես են եկել երեք քաղաքական ուժեր՝ Հայաստանի Եվրոպական կուսակցությունը, Հանրապետություն կուսակցությունը, Հանուն Հանրապետության կուսակցությունը։ [ՀՀ ԿԸՀ] |armenpress.am|

Արմեն Աշոտյանը Նուբարաշեն ՔԿՀ-ից ազատ արձակվեց, նրան հանարավորություն չտրվեց լրագրողների նրա հետ խոսելու։ ՔԿՀ աշխատակիցները տեղեկացրել էին, որ Աշոտյանին իրենց մեքենայով կտեղափոխեն տուն։ «Օրենքով չնախատեսված կարգ է, բայց ավանդույթ է դարձել որոշ դեպքերում»,- ասաց փաստաբան Տիգրան Աթանեսյանը։ |aysor.am|