ԼՂ-ից բռնի տեղահանված յուրաքանչյուր ընտանիքի բնակության ծախսերը հոգալու համար մեկ անձի հաշվով կտրամադրվի ամսական 40 հազար դրամ, գումարած եւս 10 հազար դրամ մեկ անձի հաշվով՝ կոմունալ բոլոր ծախսերի համար: Այս ծրագիրը կմեկնարկի հոկտեմբերի 1-ից եւ կգործի առնվազն 6 ամիս: Ծրագրի շահառու կլինեն բոլոր բռնի տեղահանվածները՝ անկախ տարիքից: Բացառություն կլինեն այն ընտանիքները, որոնք ՀՀ-ում ունեն բնակարան, ինչպես նաեւ խնամքի հատուկ կենտրոններում գտնվող անձինք, որոնք չեն կարող բնակարան վարձել: Նախապես հայտարարված՝ յուրաքանչյուր բռնի տեղահանվածի 100 հազար միանվագ դրամների վճարումը կսկսվի հաջորդ շաբաթ: [ՀՀ վարչապետ Նիկոլ Փաշինյան]

18։00-ի դրությամբ ԼՂ-ից բռնի տեղահանված 100 480 անձ է ժամանել ՀՀ։ Հակարիի կամուրջը հատել է 21 076 տրանսպորտային միջոց։ Դեռ կեսգիշերից մուտքի զգալի նվազում է տեղի ունեցել, և այս պահի դրությամբ կարող ենք ֆիքսել, որ ինտենսիվությունը խիստ նվազել է։14։00-ի դրությամբ թիվը 100 437 էր։ [ՀՀ վարչապետի խոսնակ] |1lurer.am|

Ազգային կոմիտեի այսօրվա հանրահավաքին Վազգեն Մանուկյանը հայտարարեց, որ Փաշինյանին հեռացնելու՝ իրենց նախօրոք հայտնած գործընթացը չստացվեց, քանի որ իրենք սխալվեցին․ «Սխալն այն էր, որ մենք գերագնահատեցինք մեր մարդկային ու կազմակերպական ուժը, բայց մի շատ դրական բան կատարվեց․ շատ ուսանողներ միայն խոսքով, վրդովված այն ամենից, ինչ լինում է, դուրս էին գալիս»։ «Կոմիտեն այսպես միայն 5 հոգով աշխատել չի կարող, մենք ուզում ենք ընդլայնել այն։ Ես անձամբ դիմեցի մի քանի շատ արժեքավոր մարդկանց՝ հրավիրելով դառնալ կոմիտեի անդամ, նրանք դեռ պատասխան չեն տվել», - ասաց Մանուկյանը` դեռևս չնշելով այն մարդկանց անունները, որոնք հրավիրվել են կոմիտե։

Ադրբեջանի ՊՆ հաղորդագրությունն այն մասին, թե սեպտեմբերի 30-ի կեսօրին ՀՀ ԶՈՒ ստորաբաժանումներն իբր կրակ են բացել սահմանագոտու արևելյան հատվածում տեղակայված ադրբեջանական դիրքերի ուղղությամբ, որի հետևանքով Ադրբեջանի ԶՈՒ զինծառայող է զոհվել, չի համապատասխանում իրականությանը: [ՀՀ ՊՆ]

Ադրբեջանը պատասխանատվություն է կրում արցախահայերի իրավունքների և անվտանգության ապահովման համար, ներառյալ վախի և խտրականության իրենց տներում արժանապատիվ ապրելու իրավունքը, ինչպես նաև տեղահանված անձանց վերադարձի իրավունքը։ Կարևոր է, որ ՄԱԿ առաքելությունը կարողանա տարածք մտնելու իրավունք ունենալ առաջիկա օրերի ընթացքում։ Եվրամիությունն ի գիտություն է ընդունել Ադրբեջանի իշխանությունների կողմից հատուկ հարթակի միջոցով հայ բնակիչների գրանցման գործընթացի մեկնարկի մասին հայտարարությունը։ [ԵՄ]

Լեռնային Ղարաբաղի ռուսական համայնքի ղեկավար Ալեքսանդր Բորդովը մուտք է գործել Հայաստան։ Sputnik Արմենիային հայտնեց Հայաստանում «Ռոսսոտրուդնիչեստվոյի» ներկայացուցչության ղեկավար Վադիմ Ֆեֆիլովը։ Ավելի վաղ հաղորդվել էր, որ Բորդովն արդեն երկու օր է՝ կապի դուրս չի գալիս, իսկ ականատեսներն ասել էին, որ նրան ձերբակալել են Հակարիի կամրջի վրա: Հիմա կապը վերականգնվել է, և Բորդովը հայտնել է, որ ադրբեջանցի սահմանապահներն իրեն իսկապես տարել են զրուցելու։ Զրույցից հետո նրան վերադարձրել են անձնագիրը, և նա շարունակել է ճանապարհը։ |armeniasputnik.am|

Թուրքիայի ԱԳՆ-ն արձագանքել է Կալիֆորնիայի համալսարանում տեղի ունեցած միջադեպին․ «Մտահոգիչ է, որ մեր երկիրը և Ադրբեջանը, իսկ վերջերս Հայաստանի Կառավարությանը և տարածաշրջանում խաղաղության գործընթացը թիրախավորած սփյուռքի ծայրահեղական խմբերի ատելության խոսքը բռնության է վերածվում։ Մեր պատվիրակության վրա ֆիզիկական հարձակում կատարողների դեմ կնախաձեռնենք անհրաժեշտ իրավական գործընթաց»։

Ժամը 14։00-ի դրությամբ ԼՂ-ից բռնի տեղահանված 100 437 անձ է ժամանել Հայաստանի Հանրապետություն, հաշվառված է 82 827-ը։ Հակարիի կամուրջը այս պահի դրությամբ հատել է 21 062 տրանսպորտային միջոց։ [ՀՀ վարչապետի խոսնակ]

Ըստ Ադրբեջանի գլխավոր Դատախազության՝ Դավիթ Բաբայանը բերման է ենթարկվել սեպտեմբերի 29-ին, նրան մեղադրանք է առաջադրվել «ագրեսիվ պատերազմ ծրագրելու, պատրաստելու, սկսելու ու տանելու, վարձկաններ հավաքագրելու, նրանց ուսուցանելու ու պատերազմում ներգրավելու, զինված հակամարտության ընթացքում միջազգային մարդասիրական իրավունքի նորմերը խախտելու, հանցավոր հրամաններ տալու, ահաբեկչություն կազմակերպելու, ազգային թշնակմություն սերմանելու» կետերով։ Լևոն Մնացականյանը մեղադրվում է խոշտանգման մեջ, «իբր նա մի խումբ անձանց հետ 2002թ․ Ֆիզուլիում գերեվարել է ադրբեջանցիների ու խոշտանգել նրանց»։ Նա բերման է ենթարկվել սեպտեմբերի 29-ին Լաչինի ապօրինի անցակետում։ Բաբայանն ու Մնացականյանը դեռևս մեկուսարանում են։ Նրանց խափանման միջոցը դեռ որոշված չէ։

Արցախը գրեթե դատարկ է․ միայն մի քանի 100 մարդ է մնացել, որոնք ևս հեռանում են։ Արդյո՞ք միջազգային դիտորդները գնում են ստուգելու, թե Ալիևի ցեղասպան ռեժիմը ինչպես է պաշտպանում կենդանիների իրավունքներն ու անվտանգությունը։ Միջազգային ամուր երաշխիքների առկայության դեպքում մարդիկ կվերադառնան իրենց տներ։ [Արտակ Բեգլարյան]