Օգոստոսի 21-ից մինչև սեպտեմբերի 20-ը՝ ժամը 23:00-ից մինչև 08:00-ն միակողմանի փակ է լինելու Բաբաջանյան փ. - Աճառյան փ. խաչմերուկից մինչև Բաբաջանյան փ. - Խուդյակովի փ. խաչմերուկ ընկած ճանապարհահատվածը, այնուհետև՝ հակառակ ուղղությամբ պայմանավորված ճանապարհաշինարարական աշխատանքներով։ Երթևեկությունը իրականացվելու է հանդիպակաց ուղղության երթևեկելի մեկ գոտու հաշվին: Հորդորում ենք վարորդներին՝ աշխատանքի արդյունավետությունն ապահովելու համար տրանսպորտային միջոցները չկայանել վերոնշյալ ճանապարահատվածի երթևեկելի մասում: [Երևանի քաղաքապետարան]

Գորիս համայնքի ավագանին օգոստոսի 19-ի արտահերթ նիստում մերժել է Պրոբացիայի ծառայության Սյունիքի մարզային մարմնի պետի պահանջը, որը ուղարկվել է օգոստոսի 16-ին համայնքի ղեկավար Առուշ Առուշանյանի վերաբերյալ Սյունիքի մարզի առաջին ատյանի ընդհանուր իրավասության դատարանի 2022թ․ մարտի 28-ին կայացրած դատավճիռը՝ կատարումն ապահովելու նպատակով։ Ավագանին արձանագրել է, որ համամասնական ընտրակարգով ընտրվող ավագանի ունեցող համայնքներում ՏԻՄ պաշտոններ զբաղեցնելու իրավունքից զրկելու ձևով պատժի դատապարտելը ներառված չէ ՏԻՄ օրենքի 75 հոդվածով նախատեսված համայնքի ղեկավարի լիազորությունները վաղաժամեկտ դադարեցնելու հիմքում։ Որպես քրեաիրավական հարաբերություններից բխող հիմք՝ դրանցում ներառված է բացառապես ազատազրկման դատապարտվելը, և այդ պատիժը կրելն այս դեպքում բացակայում է։ «Գրությամբ հայցվող գործողությունը դուրս է ավագանու լիազորությունների շրջանակից, ուստի «որոշակի պաշտոններ զբաղեցնելու իրավունքից զրկելու պատժատեսակը» համայնքի ղեկավարին պաշտոնանկ անելու օրենքով նախատեսված հիմք չէ, ուստի պրոբացիայի ծառայության գրության պահանջներն ավագանու գործառույթներից դուրս են»,- արձանագրել է Գորիս համայնքի ավագանին։ |hetq.am|

Մարիա Զախարովան արձագանքել է ՀՀ ԱԳՆ-ի՝ Բաքվում Սերգեյ Լավորվի հայտարարություններին ի պատասխան տարածած հայտարարությանը։ Զախարովայի պնդմամբ՝ Հարավային Կովկասում տրանսպորտային հաղորդակցությունների ապաշրջափակման ուղղությամբ լայնածավալ աշխատանք է կատարվել, սակայն երկաթուղային հաղորդակցության մեկնարկի շուրջ վերջնական պայմանավորվածություն հնարավոր չի եղել ձեռք բերել հենց սահմանային հսկողության հարցերում հայկական կողմի անզիջողականության պատճառով։ «Հայաստանի ներկայացուցիչները հրաժարվել են պայմանավորվել ՌԴ ԱԴԾ սահմանային ծառայության կողմից տրանսպորտային հաղորդակցությունների վերահսկման շուրջ։ Բացի այդ, Երևանը որևէ պարտավորություն չի ստանձնել Ադրբեջանի և Նախիջևանի միջև ճանապարհային երթուղու գործարկման ժամկետների հետ կապված։ Այնուհետև ՀՀ իշխանությունները հետևեցին իրենց նոր արևմտյան ընկերների խորհրդին և, փաստացի, սառեցրեցին համատեղ աշխատանքը եռակողմ աշխատանքային խմբում»,- հայտարարել է Զախարովան՝ նշելով, թե ՌԴ-ն շարունակում է հավատարիմ մնալ 2020-2022 թվականների եռակողմ պայմանավորվածություններին։|factor.am|

Բելառուսում ՀՀ գործերի ժամանակավոր հավատարմատարը հրավիրվել է Բելառուսի ԱԳՆ։ Հաղորդագրության մեջ նշվում է, որ ԱԳՆ-ում հայ դիվանագետին մանրամասն տեղեկացրել են Երևանում Բելառուսի դեսպանատան շենքի նկատմամբ մի խումբ անձանց կողմից կատարված վանդալիզմի, Բելառուսի դիվանագիտական ​​առաքելությանը հասցված վնասի և այն կանխելու համար Հայաստանի իրավապահ մարմինների ակնհայտ անբավարար միջոցների մասին։ Մատնանշվել է ընդունող պետության պարտավորությունը՝ ապահովելու Բելառուսի դիվանագիտական ​​առաքելության և նրա ունեցվածքի, ինչպես նաև դիվանագիտական ​​անձնակազմի անվտանգությունը։ Բելառուսական կողմը ելնում է նրանից, որ վանդալները կբացահայտվեն, կփոխհատուցեն պատճառված վնասը և կպատժվեն Հայաստանի օրենսդրությամբ սահմանված կարգով։

Գորիսի համայնքապետ Առուշ Առուշանյանը 5 տարի ժամկետով կզրկվի պետական պաշտոններ զբաղեցնելու իրավունքից։ ՀՀ արդարադատության նախարարության խոսնակ Նորայր Շողիկյանը հայտնել է, որ Առուշանյանը հրավիրվել է նախարարության Պրոբացիայի ծառայություն, վերցվել հաշվառման, նրան ներկայացրել են դատական ակտ, ըստ որի նա տուգանվել է 700 հազար ՀՀ դրամով, պետք է անցնի 1.5 տարի փորձաշրջան, ինչպես նաև 5 տարի չի կարող զբաղեցնել պետական պաշտոններ։ «Քրեական գործը, որի շրջանակներում մեղավոր է ճանաչվել Առուշանյանը, վերաբերվում է «պաշտոնեական դիրքը չարաշահելուն, ինքնիրավչությանը, ինչպես նաև դիտավորությամբ այլ մարդու առողջությանը վնաս պատճառելուն»։ |news.am|

«Հանուն Հանրապետության» կուսակցության մի խումբ անդամներ ու համակիրներ այսօր բողոքի ակցիա են իրականացրել Հայաստանում Բելառուսի դեսպանատան առջև: Նրանք «Вон из Армении» բացականչություններով ձվեր, կարտոֆիլ ու լոլիկ են նետել դեսպանատան՝ Առինջում գտնվող շենքի պատերին: Ցուցարարներն այսօր պահանջել են Հայաստանի իշխանություններից խզել դիվանագիտական հարաբերությունները Բելառուսի հետ: Նշենք, որ երեկ Բելառուսի նախագահ Ալեքսանդր Լուկաշենկոն «Россия» հեռուսատաալիքին տված հարցազրույցում, հեթական անգամ կոշտ քննադատելով Հայաստանի իշխանություններին, հայտարարել է՝ «ո՞ւմ են պետք հայերը՝ մեզնից բացի»: |azatutyun.am|

Այսօր առավոտյան «Հեզբոլլահը» Լիբանանի տարածքից առնվազն 135 հրթիռ է արձակել Իսրայելի հյուսիսային շրջանների ուղղությամբ։ Իսրայելի պաշտպանության բանակն էլ հայտնել է «Հեզբոլլահի» զենքի պահեստներին ու ռազմական ենթակառուցվածքներին ավիահարվածներ հասցնելու մասին։ |tert.am|

Ճանապարհաշինարարական աշխատանքներով պայմանավորված՝ օգոստոսի 21-ից սեպտեմբերի 5-ը՝ ժամը 23:00-ից 08:00-ն 1-ին փուլով փակ է լինելու Հանրապետության հրապարակը, 2-րդ փուլով՝ Վազգեն Սարգսյան փողոցը: Տրանսպորտային միջոցների վարորդներին առաջարկվում է երթևեկել հետևյալ փողոցներով՝ Ագաթանգեղոսի փող. - Խանջյան փող., Գր. Լուսավորչի փող. - Մաշտոցի պող., Տիգրան Մեծի պող. - Խանջյան փող., Աբովյան փող. - Արամի փող., Նալբանդյան փող. - Արամի փող.: Քաղաքապետարանից հորդորում են վարորդներին աշխատանքի արդյունավետությունն ապահովելու նպատակով փոխադրամիջոցները չկայանել վերոնշյալ ճանապարհահատվածի երթևեկելի մասում:

Ռուսաստանը ողջունում է Ադրբեջանի որոշումը՝ միանալ ԲՐԻԿՍ-ին, Lenta.ru-ի հետ զրույցում հայտարարել է Դաշնային խորհրդի միջազգային հարցերով կոմիտեի նախագահ Գրիգորի Կարասինը։ «Մենք կշարունակենք աջակցել, որպեսզի դա տեղի ունենա, սակայն ԲՐԻԿՍ-ը նոր անդամների ընդունելու հստակ մեխանիզմ դեռ չի մշակվել: Բայց ես կարծում եմ, որ դա կարվի առաջիկա տարիներին»,- ասել է Կարասինը։|tert.am| |tert.am|

Ադրբեջանը ԲՐԻԿՍ-ին անդամակցելու պաշտոնական հայտ է ներկայացրել։ Այդ մասին, APA գործակալության փոխանցմամբ, հայտարարել է Ադրբեջանի արտաքին քաղաքական գերատեսչության պաշտոնական ներկայացուցիչ Այհան Հաջիզադեն։ Արդեն մի քանի ամիս է` Բաքուն տարբեր մակարդակներով հայտարարում էր իր այդ մտադրության մասին։ Վերջերս հայտնի դարձավ, որ ԲՐԻԿՍ-ին անդամակցության մտադրություն ունի նաև Թուրքիան։ |hetq.am|