Քիչ առաջ Ձերբակալված անձանց պահման վայրից ազատ են արձակվել հայկական ֆուտբոլի երկրպագու և FAF շարժման 9 անդամներ, ովքեր բերման էին ենթարկվել նախօրեին տեղի ունեցած բողոքի ակցիայի համար։

ՄԱԿ-ի Մարդու իրավունքների գերագույն հանձնակատարը պահանջել է անհապաղ ազատ արձակել Ադրբեջանում ապօրինաբար պահվող հա գերիներին։ Այս մասին հաղորդում է Շվեյցարիայում Հայաստանի դեսպանատունը:  Գերագույն հանձնակատարը նաև ընդգծել է, որ ուշադիր հետևում է Հայաստանի և Ադրբեջանի միջև խաղաղության բանակցություններին: Ֆոլկեր Տյուրկը հույս է հայտնել, որ դրանք կհանգեցնեն ճշմարտության հաստատման և հաշտեցման գործընթացի, որին հանձնակատարը պատրաստ է իր աջակցությունը ցուցաբերել:

Հակակոռուպցիոն դատարանն այսօր շարունակեց քննարկել 44-օրյա պատերազմի ժամանակ Ջրականի 5-րդ ուսումնական գումարտակի 13-րդ վաշտի հրամանատար, մայոր Հայկազ Գրիգորյանի պաշտպան Նորայր Նորիկյանի միջնորդությունն այն մասին, որ գործին առնչվող մի շարք հանգամանքներ պարզելու համար հարկավոր է նշանակել ռազմագիտական փորձաքննություն։ Դեռ նախորդ նիստին էր պաշտպանը հանդես եկել նման միջնորդությամբ, սակայն դատարանը հայտարարել էր, որ այն չի համապատասխանում Քրեական դատավարության օրենսգրքի պահանջներին եւ առաջարկել էր լրացնել միջնորդությունն ու նորից ներկայացնել։ Մասնավորապես, դատարանը նշել էր, որ փորձաքննության նշանակում միջնորդող կողմը պարտավոր է դատարանին գրավոր ներկայացնել փորձագետին առաջադրվելիք հարցերը, փորձագիտական կազմակերպության կամ որպես փորձագետ ներգրավման ենթակա անձի տվյալները, ինչպես նաև փորձագիտական հետազոտության համար անհրաժեշտ առարկաները կամ փաստաթղթերը:

Համացանցում տեսանյութ է տարածվել, թե ինչպես է մի մեքենա երթևեկում ճանապարհին՝ բեռնախցիկին Ադրբեջանի դրոշ. հայտնում են ՀՀ ՆԳՆ-ից։ «Տրանսպորտային միջոցը վարող անձի գործողություններում իրավախախտման հանգամանքները պարզելու և ըստ այդմ համապատասխան վարույթ նախաձեռնելու հարցը քննարկելու նպատակով՝ վարորդը տրանսպորտային միջոցով ներկայացվել է Համայնքային ոստիկանության Վաղարշապատի բաժին», - հայտնել է ՆԳՆ խոսնակը՝ նշելով, որ կտրվի լրացուցիչ տեղեկատվություն։

Կարմիր Խաչի երևանյան գրասենյակի մոտ hաջակցություն Բաքվում պահվող Ռուբեն Վարդանյանի ու մյուս հայ գերիների բողոքի ակցիա իրականացվեց։ Արցախի նախկին ՄԻՊ Արտակ Բեգլարյանը նշեց, որ ՀՀ իշխանություններից գործողություններ են պահանջում․ «Այսօր Կարմիր խաչի առջև ենք, որպեսզի մեր ձայնը բարձրացնենք և մեր ակնկալիքները ներկայացնենք նրանց, որ իրենք իրենց աշխատանքը կատարեն։ Այս մասով էլ իրենք պետք է ճնշում զգան»։ Ակցիայի մասնակիցները նամակ փոխանցեցին՝ ուղղված ԿԽՄԿ տնօրենին: Կազմակերպության հայաստանյան գրասենյակի ներկայացուցիչ Զառա Ամատունին նշեց, որ Ռուբեն Վարդանյանին այցելել են, երբ նա արդեն հացադուլի մեջ էր, բայց իրենց մանդատը թույլ չի տալիս հրապարակայնացնել՝ թե՛ այցի մանրամասները, թե՛ առհասարակ միջազգային կազմակերպության արձանագրած դիտարկումները: Ամատունին ընդգծեց, որ Կարմիր խաչը հետևողական է, պարբերաբար այցելում է բոլոր ռազմագերիներին և մանդատի շրջանակում տեղեկություններ փոխանցում այդ երկրի իշխանություններին: |azatutyun.am|

«ՓՄՁ Համագործակցության Ասոցիացիա»-ի կառավարման խորհուրդը բաց նամակով դիմել է Նիկոլ Փաշինյանին՝ վերջինիս ուշադրությունը հրավիրելով էկոնոմիկայի նախարար Գևորգ Պապոյանի բառապաշարին. «Որպես փոքր և միջին ձեռնարկատերերի շահերը ներկայացնող, ՓՄՁ անդամության վրա հիմնված և Հայաստանում գործող հասարակական կազմակերպություն՝ մեզ համար լուրջ մտահոգության տեղիք է տվել վերջին շրջանում մեր երկրում տնտեսության զարգացման պատասխանատու գերատեսչության ղեկավարի հանրային հայտարարությունների բովանդակությունները։ Ելնելով «Հանրային ծառայության մասին» ՀՀ օրենքի դրույթներից, դրանից բխող և սահմանված վարքագծի կանոնագրքից, որպես ՀՀ կառավարության ղեկավարի խնդրում ենք Ձեզ քայլեր ձեռնարկել, որ մեր երկրում հանրային պաշտոն զբաղեցնող, այդ թվում պետական քաղաքական պաշտոն զբաղեցնող անձն առաջին հերթին հենց օրինակով պահպանի իր պաշտոնին ներկայացվող նվազագույն պահանջները»:

Եվրոպացի առաջնորդների հանդիպումից հետո կայացած մամուլի ասուլիսի ժամանակ Միացյալ Թագավորության վարչապետ Քիր Սթարմերը ներկայացրել է չորս կետից բաղկացած ծրագիրը՝ շարունակել ռազմական օգնության հոսքը դեպի Ուկրաինա և շարունակել մեծացնել տնտեսական ճնշումը Ռուսաստանի վրա, ցանկացած երկարատև խաղաղություն պետք է ապահովի Ուկրաինայի ինքնիշխանությունն ու անվտանգությունը, և Ուկրաինան պետք է ներկա լինի խաղաղության բանակցություններին, խաղաղության պայմանագրի կնքման դեպքում ամրապնդել Ուկրաինայի պաշտպանական կարողությունները՝ ապագա ներխուժումը կանխելու համար, զարգացնել «կամեցողների կոալիցիա»՝ Ուկրաինայում պայմանավորվածությունը պաշտպանելու և հետագայում խաղաղությունը երաշխավորելու համար։ |civilnet.am|

Կարեն Կարագուլյանի և Վաչե Թովմասյանի մասնակցությամբ «Անորա» ֆիլմը «Օսկար» մրցանակի է արժանացել 5 անվանակարգում (նոմինացված էր 6-ում)՝ «Լավագույն ֆիլմ», «Լավագույն օրիգինալ սցենար», «Լավագույն ռեժիսոր» - Շոն Բեյքեր, «Lավագույն դերասանուհի» - Մայքի Մեդիսոն, «Լավագույն մոնտաժ»:

Լոնդոնում մեկնարկել է Ուկրաինայի հարցով գագաթնաժողովը, մասնակցում են եվրոպական մի շարք երկրների առաջնորդները։ Եվրոպացի պաշտոնյաները քննարկելու են Ուկրաինայի խաղաղության ծրագիրը, իսկ հինգշաբթի օրը նրանք կմասնակցեն Եվրամիության գագաթնաժողովին: |azatutyun.am|

ՀՖՖ Գործադիր կոմիտեի անդամ Կարեն Շաբոյանը հրաժարվում է անդամությունից։ «Հանդիսանալով ՖԱՖ-ի հիմնադիր անդամ՝ 18 տարվա ընթացքում ես երբեք չեմ հանդիպել նման վերաբերմունքի, երբ 9 երկրպագու ձերբակալվում է, 72 ժամով կալանավորվում, և նրանց դեմ հարուցվում է քրեական գործ։ Առաջարկել եմ ՀՖՖ ղեկավարությանը հանդիպել երկրպագուների հետ, անկեղծորեն քննարկել ստեղծված խնդիրները և ֆիքսել հստակ ժամանակացույց՝ ընթացիկ ծրագրերը ավարտին հասցնելու և անցնցում հեռանալու համար։ Ցավոք, այս առաջարկը չի ընդունվել», - այս մասին գրել է Շաբոյանը իր ֆեյսբուքյան էջում։