«Մենք 1,5 տարում այս պրոցեսը 19 տարով հետ ենք տարել». Փաշինյանը՝ 1000 դրամների հիմնադրամի գործունեության մասին |news.am|

news.am։ Սա արդեն թվով երրորդ նման որոշումն է, որ գործողության ժամկետի առումով հետ ենք գնում եւ հասել ենք արդեն 1998 թվականին: Այս մասին այսօր՝ հոկտեմբերի 10-ին, կառավարության նիստում հայտարարեց ՀՀ վարչապետ Նիկոլ Փաշինյանը՝ անդրադառնալով նախօրեին Զինծառայողների ապահովագրության հիմնադրամի կայացրած որոշմանը, ըստ որի նախատեսվում է 2020 թվականի հունվարի 1-ից փոխհատուցել նաեւ 1998 թվականից տեղի ունեցած դեպքերի հարազատներին: Խոսքը հազար դրամների հիմնադրամի մասին է:

Իր հերթին պաշտպանության նախարար Դավիթ Տոնոյանն ասաց, որ հունվարի 1-ից այդ ընտանիքները կստանան ամսական 300 հազար դրամ փոխհատուցում, ինչպես մնացած բոլորը, ում վրա տարածվում է այս կարգավորումը:

Նիկոլ Փաշինյանը նկատեց. «Երբ մենք սկսեցինք այս հետ գնալու գործընթացը, ամեն անգամ հասկանալի պատճառներով ինչ-որ կետի վրա կանգնում ենք եւ ցավոք սրտի մեր մի շարք հայրենակիցներ այդ սահմանից դուրս են մնում: Համոզված եմ, որ դա ժամանակավոր է: Իմ կոչն է ըմբռնումով մոտենալ, որ մենք այս 1,5 տարվա ընթացքում այս պրոցեսը 19 տարով հետ ենք տարել: Սա բավականին բարդ աշխատանքային պրոցես է, որ այդ որոշումներն իրականություն դառնալ:

Հաշվարկները շարունակվում են եւ մեր գերնպատակն է այս գործընթացը հետ տանել մինչեւ Հայաստանի անկախության մեկնարկը: Խնդրում եմ մեր հայրենակիցներից համբերություն, որ առավել հանդարտ պայմաններում կարողանանք այս աշխատանքը կատարել»:

x