2020 թվականի բյուջեի նախագծով պլանավորված ծախսերը 2018 թվականի համեմատ 27.4 տոկոսով ավելին են |armenpress.am|

armenpress.am։ 2020 թվականի բյուջեի նախագծով պլանավորված է 1 տրիլիոն 602 մլրդ եկամուտ: Այս ցուցանիշը 2018 թվականի բյուջետային եկամուտների համեմատ 27.4 տոկոսով ավելին է: Այս մասին ՀՀ Ազգային ժողովում 2020 թվականի բյուջեի նախագծի քննարկման ժամանակ ասած ՀՀ վարչապետ Նիկոլ Փաշինյանը:

«Ծախսերի առումով տվյալները համընկնում են այն թվերին, ինչի մասին ես խոսել եմ հեղափոխությունից առաջ և հետո: Ծախսերի աճը կազմում է 29.9 տոկոս: Շատ կարևոր է արձանագրել, թե 2018 թվականի համեմատ մարդկային կապիտալում ներդրումների ինչպիսի աճ ունենք: Առողջապահության ոլորտում 2018 թվականի համեմատ ունենք բյուջետային հատկացումների 33 տոկոս աճ, կրթության, գիտության, մշակույթի, սպորտի բնագավառում՝ 41 տոկոս աճ, աշխատանքի և սոցիալական հարցերի բնագավառում՝ 21 տոկոսի աճ »,-ասաց Նիկոլ Փաշինյանը:

ՀՀ վարչապետն անդրադարձավ պաշտպանական ծախսերի հետ կապված վերջին քննարկումներին: Նրա խոսքով, 2018 թվականի համեմատ, 2020 թվականի նախագծով պլանավորել են 25.3 տոկոսով բյուջետային հատկացումների ավելացում:

«Ռազմական ծախսերի հետ կապված ուզում եմ արձանագրել, որ մենք ունենք օրենսդրական որոշակի կարգավորում, և ռազմական ծախսերը չպետք է գերազանցեն ՀՆԱ-ի 4 տոկոսը: Մենք պետք է մնանք այս շրջանակներում: Շատ կարևոր է նաև արձանագրել, որ մենք ռազմական ծախսերի ոլորտում 2020 թվականին ունենք ծախսեր, որոնք մի փոքր այլ տրամաբանությամբ են արվելու, նախկինում այդ թեմայի վերաբերյալ հայտարարություններ արել եմ: Հույս ունեմ, որ վերջին շրջանի փոփոխությունների արդյունքում կոռուպցիայի դեմ պայքարի ծավալները և շոշափելի արդյունքները կմեծացվեն և դրանք կուղղվեն նաև պաշտպանության մակարդակի բարձրացմանը» ,-ասաց Նիկոլ Փաշինյանը:

x