ՄԻՊ-ը հարկ է համարում ընդգծել, որ լրագրողները, իրենց մասնագիտական գործունեությունն իրականացնելիս, պետք է պաշտպանված լինեն ցանկացած տեսակի անհարկի միջամտությունից կամ ճնշումից: Խորհրդարանում լրագրողների գործունեության համար սահմանված կանոնները չպետք է վերածվեն նրանց իրավունքների սահմանափակման կամ մասնագիտական գործունեության անհարկի միջամտության միջոցի: Պաշտպանի հանձնարարությամբ մանրամասն ուսումնասիրվում են միջադեպի վերաբերյալ հրապարակային նյութերը և իր լիազորությունների շրջանակում կձեռնարկվեն անհրաժեշտ քայլեր։ [ՀՀ ՄԻՊ]

ԱԺ-ում Սուրեն Պապիկյանը հայտարարեց՝ «Ես երեկ հետևել եմ լրահոսին, տեղյակ եմ գրառումներից, տեսանյութերը դիտել եմ։ Դրանով պայմանավորված ՊՆ-ն հանդես եկավ հայտարարությամբ, որ սահմանի երկայնքով լինում են դեպքեր, երբ կան կրակոցներ, սակայն դրանք ՀՀ–ի ուղղությամբ չեն։ Դրանք այն դեպքերն են, որոնք վտանգ չեն պարունակում, և մեր կողմից հայտարարության չեն արժանանում։ ՊՆ-ն հետևում է ամենին, և կարծում ենք, որ լուծման ճանապարհը դիվանագիտական է, մենք հարցի կարգավորումը հենց այդ կերպ ենք պատկերացնում և իրականացնում», - ասաց ՀՀ պաշտպանության նախարարը։ |news.am|

Դատախազությունն ուսումնասիրում է Գյումրիի համայնքապետի թեկնածու Վարդան Ղուկասյանի հետ կապվող ձայնագրության վերաբերյալ հրապարակումները: Այս մասին «Ազատությանը» հայտնել են Գլխավոր դատախազությունից։ Նշենք, որ «Անկախ դիտորդը» այսօր հայտնել էր, որ հանցագործության մասին հաղորդում է ներկայացնելու Դատախազություն։ Համացանցում շրջանառվող ձայնագրության համաձայն՝ Ղուկասյանը անհայտ անձի հետ հեռախոսազրույցում ասում է․ «Երկար խանութների, դոմիկների մոտից հատ-հատ պայմանավորվի, որ իրիկվա կողմ գան մոտս»։ Զրուցակիցը պատասխանում է․ «6 անց կես բոլորին հավաքվին, կառնիմ կուգամ»։ Ղուկասյանը պատասխանում է․ «Ասա՝ [հայհոյանք], էդ սաղ ինքն է ձեզի տվել, հիմի, որ ձեր տները կպահենք էդ ինքն է ձեզի տվել, [հայհոյանք]»։ Factor TV-ի հետ զրույցում Գյումրիի համայնքապետի թեկնածուն ասել է. «Հավանական է, որ ես չլինեմ միանշանակ։ Իմ ձայնը եթե գիտեն, իմ ձայնով ինչ ասես կարան սարքեն, արհեստական, ո՞նց է կոչվում դա, բանականություն է, չգիտեմ ինչ է։ Վոբշեմ, դրանք եղած-չեղած իմ համար հաշիվ չի, անցանք գնացինք»։

Վարչապետ Նիկոլ Փաշինյանը այսօր խորհրդարանի ամբիոնից հայտարարեց, թե Ղարաբաղյան շարժումը չպետք է շարունակվի: «Առանց սեթևեթանքի ուզում եմ հստակ և աներկբա ասել, որ ես կարծում եմ՝ մենք Ղարաբաղյան շարժումը չպետք է շարունակենք: Սակայն ուզում ենք համոզված լինել, որ Ադրբեջանում էլ չկա քաղաքական որոշում, որ իրենք սկսում են մի ուրիշ շարժում, օրինակ՝ «Արևմտյան Ադրբեջանի» շարժում, և այս պատմությունը ոչ թե խաղաղություն հաստատելու և այլ կոնֆլիկտային տրամաբանությունը Ադրբեջանի տարածքից Հայաստանի տարածք արտահանելու մասին», - հարցուպատասխանի ժամանակ ասաց Նիկոլ Փաշինյանը: |azatutyun.am|

Տեղի է ունեցել վարչապետ Նիկոլ Փաշինյանի հեռախոսազրույցն ԱՄՆ պետքարտուղար Մարկո Ռուբիոյի հետ։ Զրուցակիցները քննարկել են Հայաստան-ԱՄՆ ռազմավարական գործընկերությանը, ինչպես նաև տարածաշրջանային օրակարգին վերաբերող հարցեր։ [ՀՀ կառավարություն]

ԱԺ աշխատակիցները քաշքշելով հեռացրին ակցիա անող լրագրողներին: Այսօր ԱԺ նիստի ժամանակ լրագրողները փորձում էին պաստառ պահել օթյակից՝ լրագրող Հռիփսիմե Ջեբեջյանի և պատգամավոր Անդրանիկ Քոչարյանի միջև տեղի ունեցած միջադեպի հետ կապված։ ԱԺ անվտանգության աշխատակիցները քաշքշելով խլեցին պաստառը և դուրս հրավիրեցին նրանց: Լրագրող Հռիփսիմե Ջեբեջյանը խորհրդարանում նամակ է փոխանցել վարչապետ Նիկոլ Փաշինյանին: Նա ակնկալում է, որ վարչապետը՝ որպես իշխող ՔՊ կուսակցության ղեկավար, քննարկման առարկա կդարձնի իր և պատգամավոր Անդրանիկ Քոչարյանի միջև տեղի ունեցած միջադեպը: Նամակը ստորագրել է161 լրագրող, որ պահանջում են Նիկոլ Փաշինյանից իր թիմակցի վարքը քննել: Միջադեպը տեղի է ունեցել մարտի 20-ին. լրագրողների հետ ճեպազրույցի ժամանակ Անդրանիկ Քոչարյանը կոշտ տոնով պահանջել էր լրագրողից հեռանալ իր կողքից, հայտարարել, որ նա իրեն խանգարում է, սպառնացել չհեռանալու դեպքում հարցազրույց չտալ նաև այլ լրագրողների, իսկ վերջում մեկնաբանություն արել՝ նշելով․ «Մաքրեք Ձեր շրթունքները»։

Գործից հասկանալի է, որ 2024թ. ամռանից արդեն ձեզ հայտնի էին իրողություններ, որ կոնկրետ անձնավորություն տվել էր ցուցմունք Հովիկ Աղազարյանի կաշառքի գործով և պնդել էր, որ այդպիսի բան եղել է, բայց դուք եկել եք հիմա ԱԺ, երբ արդեն Աղազարյանը ՔՊ խմբակցությունից դուրս է եկել։ Եթե Աղազարյանը մնար ՔՊ-ում, դուք էլի կգայի՞ք ԱԺ՝ անձեռնմխելիությանից զրկելու: Այս մասին ԱԺ-ում հարց ուղղեց «Պատիվ ունեմ» խմբակցության պատգամավոր Թագուհի Թովմասյանը՝ դիմելով գլխավոր դատախազ Աննա Վարդապետյանին: Վարդապետյանը պատասխանեց. «Քանի որ մենք գործ ունենք բազմադրվագ կաշառքի սխեմայի հետ, մեր նպատակն էր ամբողջական ծավալով ապահովել քննությունը և Ազգային ժողով գալ միայն այն ժամանակ, երբ մենք պատրաստ կլինենք գործը ուղարկել դատարան»: |news.am|

«Եվրոպական Միությանը Հայաստանի Հանրապետության անդամակցելու գործընթացի մեկնարկի մասին» նախագիծն ընդունվեց երկրորդ ընթերցմամբ և ամբողջությամբ: ԱԺ-ն այն ընդունեց 64 կողմ, 7 դեմ, 0 ձեռնպահ ձայներով: «Հայաստան» խմբակցությունը դարձյալ չմասնակցեց քվեարկությանը, ինչպես չէր մասնակցել առաջին ընթերցմամբ քվեարկությանը:

ԱԺ-ն այսօր երկրորդ ընթերցմամբ քննարկում է ԵՄ-ին անդամակցելու գործընթացի մեկնարկին վերաբերող օրենքի նախագիծը: Առաջինից երկրորդ ընթերցման ժամանակ փոխվել է օրենքի նախագծի նախաբանը. «Հայաստանի Հանրապետությունը, նպատակ ունենալով զարգացնել ժողովրդավարական ինստիտուտները, բարձրացնել հասարակության բարեկեցությունը, ամրապնդել երկրի անվտանգությունը, դիմակայունությունը և իրավունքի գերակայությունը, հայտարարում է Հայաստանի Հանրապետության՝ Եվրոպական միությանն անդամակցելու գործընթացի մեկնարկը»:

Էր Ռիադում ամերիկյան կողմի հետ առանձին բանակցություններից հետո, ըստ ԱՄՆ պետքարտուղարության, ՌԴ-ն և Ուկրաինան համաձայնել են՝ հրադադար հաստատել Սև ծովում՝ նավագնացությունը, քաղաքացիական նավերի անվտանգությունը ապահովելու համար, դադարեցնել բռնությունը և կանխել առևտրային նավերի օգտագործումը ռազմական նպատակներով։ Միջոցներ նախապատրաստել ռուսական և ուկրաինական էներգետիկ ենթակառուցվածքների ուղղությամբ հարձակումներն արգելող պայմանավորվածությունը կյանքի կոչելու համար։ Վաշինգտոնը պատրաստ է շարունակել աջակցությունը ռազմագերիների փոխանակման, քաղաքացիական անձանց ազատ արձակման հարցերում: |azatutyun.am|