Գագիկ Սարգսյանը ներկայացված մեղադրանքում իրեն մեղավոր չի ճանաչել, ավելին` մեր գնահատմամբ մեղադրանքը խիստ վերացական է, ակնհայտորեն չի համապատախանում քրեադատավարական չափորոշիչներին, մասնավորապես` հայտնի չէ, թե Գ. Սարգսյանը հատկապես ի՞նչ գործողություններ է իրականացրել նշյալ հանցակազմի իմաստով, ուստի ՔԿ ֊ի տարածած հաղորդագրության վերնագիրը, թե《 ... ահաբեկչության դեպքերը բացահայտվել են》խստագույնս չափազանցված է։ Լիահույս ենք` հիմնավոր կասկածի շեմը հաղթահարված չլինելու և կալանքի հիմքերի բացակայության պայմաններում առաջիկա ժամերին Դատարանը կմերժի կալանավորման միջնորդությունը: [Փաստաբան Վահե Եփրիկյան]

Այսօր Ազատության հրապարակում տեղի է ունեցել «Միասին» շարժման հանրահավաքը։ Շարժման համակարգող, Հայաստանի դեմոկրատական կուսակցության առաջնորդ Արամ Սարգսյանը հայտնեց, որ Էդգար Ղազարյանն առաջարկել է, որպեսզի հենց այսօր վարչապետի թեկնածուին ու կառավարության կազմը ներկայացնեն։ «Մենք այսօր չենք կարող այդ մենաշնորհը վերցնել մեզ վրա և ասել, թե ամբողջը (կառավարությունը – խմբ.) մենք ենք ներկայացնում։ Կարևոր է քաղաքական ուժերի միասնությունը։ Մեր շարժման ներսում կարծում ենք, որ վարչապետի թեկնածուն կարող է լինել Հրանտ Բագրատյանը»,- ասաց Սարգսյանը։

Եվրախորհրդարանի լիագումար նիստին ներկայացված ԵՄ-ի եւ Հայաստանի միջեւ կապերի սերտեցման, Հայաստանի եւ Ադրբեջանի միջեւ խաղաղության համաձայնագրի անհրաժեշտության վերաբերյալ բանաձեւն ընդունվեց 504 կողմ, 4 դեմ, 32 ձեռնպահ քվեով։ Եվրախորհրդարանի պատգամավորները կոչ են անում դիտարկել Հայաստանի՝ ԵՄ-ին անդամակցության թեկնածուի կարգավիճակ տրամադրելու հնարավորությունը։ Եվրախորհրդարանականները համոզված են, որ եթե Հայաստանը շահագրգռված լինի թեկնածուի կարգավիճակ ստանալով և շարունակի իր ժողովրդավարությունն ամրապնդող կայուն բարեփոխումների ուղին, դա կարող է հիմք հանդիսանալ ԵՄ-Հայաստան հարաբերություններում փոխակերպման փուլի համար։ |armenpress.am|

Մարտի 13-ին Եգիպտոսում ՀՀ դեսպան Հրաչյա Փոլադյանը հանդիպում է ունեցել Եգիպտոսի Կարմիր մահիկ ընկերության գործադիր տնօրեն Ռամի ալ-Նազերի հետ։ Այս մասին տեղեկացնում են Եգիպտոսում ՀՀ դեսպանությունից:Հանդիպմանը կողմերը քննարկել են Հայաստանի կողմից Գազայի բնակչությանը մարդասիրական օգնության տրամադրման և փոխանցման հետ կապված մանրամասներ։ [Եգիպտոսում ՀՀ դեսպանություն]

Բացահայտվել են Երևան քաղաքում 2024 թ․ փետրվարին կազմակերպված ահաբեկչության երկու դեպքերը։ ՀՀ քաղաքացի Գ.Ս.-ն և նախաքննությամբ դեռևս չպարզված անձինք, ունենալով հակաիշխանական հայացքներ, Հայաստանում գործող իշխանության հետ ունենալով գաղափարական թշնամանք, կազմակերպել են 2024 թվականի փետրվարի 10-ին Երևան քաղաքի Նոյ Թաղամասի 143/1 հասցեում, իսկ 2024 թվականի փետրվարի 20-ին՝ Գյուլբենկյան 30/3 և Գյուլբենկյան 33 հասցեներում ահաբեկչությունների կատարում: Քրեական հետապնդում է հարուցվել 4 անձի նկատմամբ: Նրանցից երկուսի նկատմամբ որպես խափանման միջոց է կիրառվել կալանքը, իսկ մյուս երկուսը ձերբակալված են: [ՔԿ]

Զախարովան հայտարարում է՝ քիչ հավանական է, որ «Զվարթնոց» օդանավակայանից ռուս սահմանապահներին դուրս բերելու նախաձեռնությունը համապատասխանի Հայաստանի և նրա քաղաքացիների անվտանգային շահին, «հատկապես հաշվի առնելով այն խնդիրները, որ ռուս և հայ սահմանապահները երկար տարիներ արդյունավետ աշխատում են ուս ուսի տված»։ Միաժամանակ նա նշել է, որ նշված հայտարարությունը հայկական կողմից արվել է «պաշտոնական Երևանի մի շարք ոչ բարեկամական քայլերի և հայտարարությունների ֆոնին»։ «Ինչպես հասկանում ենք, համապատասխան ծանուցումն ուղարկվել է գերատեսչական գծով։ Մենք դիվանագիտական ուղիներով ոչինչ չենք ստացել։ Մենք ելնում ենք նրանից, որ բոլոր որոշումները կկայացվեն միջգերատեսչական ուսումնասիրությունների արդյունքների հիման վրա»։|news.am|

Մոսկվան կշարունակի կապերը Երևանի հետ և կպարզաբանի իրավիճակը ՀԱՊԿ-ին հետագա անդամակցության հետ կապված։ [ՌԴ նախագահի մամուլի քարտուղար Դմիտրի Պեսկով]|tass.ru|

ՀԷՑ-ը 20 միլիոն դրամով տուգանվել է։ Պարզվել է, որ մի շարք դեպքերում խախտվել են սպառման համակարգերն էլեկտրացանցին միացման ժամկետները, որն ուղղակիորեն հանգեցրել է մի խումբ սպառողների իրավունքների կամ օրինական շահերի խախտման։ [ՀԾԿՀ]

Երևանի ավագանին 32 կողմ, 2 դեմ ձայներով ընդունեց հանրային տրանսպորտի նոր ուղեվարձը սահմանելու նախագիծը։ Հիշեցնենք, որ ըստ ընդունված նախագծի՝ ամսական, եռամսյակային և տարեկան տոմսային փաթեթների մասով հանվել են երթևեկության սահմանափակումները, քաղաքացիները փաթեթը ձեռք բերելով կարող են երթևեկել անսահմանափակ ։ Ամսական փաթեթի համար սահմանվել է 9000 դրամ։ Եռամսյակային փաթեթի համար սահմանվել է 24 000 դրամ։ Տարեկան փաթեթի համար սահմանվել է 90 000 դրամ:

Նիկոլ Փաշինյանը, մեկնաբանելով «Ինֆոքոմի» վերջերս հրապարակած հետաքննությունն այն մասին, թե ինչպես է իշխող ՔՊ կուսակցությունն օգտագործել գործընթացից անտեղյակ քաղաքացիների տվյալները և կազմակերպված մեխանիզմի միջոցով անհայտ ծագման միլիոնավոր դրամներ ուղղել կուսակցության նախընտրական քարոզչությանը, նշել է․ «Ես շատ դառնացած եմ էդ թեմայով, շատ դառնացած եմ և իմ պարտքն եմ համարում, որ նման բան այլևս չկրկնվի։ Եվ նաև ներողություն եմ խնդրում հանրությունից, նաև նվիրատուներից։ Մարդկանց պիտի ասենք՝ լսեք, ձեր անունը պետք ա հրապարակվի, դուք պետք ա իմանաք, որ դուք նվիրատվություն եք անում։ Մենք պետք ա ասեինք նաև, որ գիտեք ինչ, ընկերոջ անունով չի կարելի։ Կամ դուք արեք, կամ մի արեք։ Որովհետև մարդ կա, ինքն էլ մտածել ա՝ լավ ինչիս ա պետք, զանգեմ մեր Դերոյին, ասեմ Դերո ջան, քո անունով․․․»։ Նիկոլ Փաշինյանն այս հայտարարությամբ արձանագրում է, որ քարոզչության ֆինանսները հավաքագրվել են «Դերոների» անձնագրերի պատճենների միջոցով, և այդ «Դերոները» տեղյակ չեն եղել, որ իրենք նվիրատվություն են անում ՔՊ-ին։ Հետևապես, նվիրաբերված միլիոնավոր դրամների ծագման աղբյուրը հայտնի չէ։ Չնայած դրան՝ ՀՀ գլխավոր դատախազությունը և ՆԳՆ ոստիկանությունը հանցանքի և զանցանքի հատկանիշներ այդ գործողություններում չի հայտնաբերել։