Երևանի ավագանին 32 կողմ, 2 դեմ ձայներով ընդունեց հանրային տրանսպորտի նոր ուղեվարձը սահմանելու նախագիծը։ Հիշեցնենք, որ ըստ ընդունված նախագծի՝ ամսական, եռամսյակային և տարեկան տոմսային փաթեթների մասով հանվել են երթևեկության սահմանափակումները, քաղաքացիները փաթեթը ձեռք բերելով կարող են երթևեկել անսահմանափակ ։ Ամսական փաթեթի համար սահմանվել է 9000 դրամ։ Եռամսյակային փաթեթի համար սահմանվել է 24 000 դրամ։ Տարեկան փաթեթի համար սահմանվել է 90 000 դրամ:

Նիկոլ Փաշինյանը, մեկնաբանելով «Ինֆոքոմի» վերջերս հրապարակած հետաքննությունն այն մասին, թե ինչպես է իշխող ՔՊ կուսակցությունն օգտագործել գործընթացից անտեղյակ քաղաքացիների տվյալները և կազմակերպված մեխանիզմի միջոցով անհայտ ծագման միլիոնավոր դրամներ ուղղել կուսակցության նախընտրական քարոզչությանը, նշել է․ «Ես շատ դառնացած եմ էդ թեմայով, շատ դառնացած եմ և իմ պարտքն եմ համարում, որ նման բան այլևս չկրկնվի։ Եվ նաև ներողություն եմ խնդրում հանրությունից, նաև նվիրատուներից։ Մարդկանց պիտի ասենք՝ լսեք, ձեր անունը պետք ա հրապարակվի, դուք պետք ա իմանաք, որ դուք նվիրատվություն եք անում։ Մենք պետք ա ասեինք նաև, որ գիտեք ինչ, ընկերոջ անունով չի կարելի։ Կամ դուք արեք, կամ մի արեք։ Որովհետև մարդ կա, ինքն էլ մտածել ա՝ լավ ինչիս ա պետք, զանգեմ մեր Դերոյին, ասեմ Դերո ջան, քո անունով․․․»։ Նիկոլ Փաշինյանն այս հայտարարությամբ արձանագրում է, որ քարոզչության ֆինանսները հավաքագրվել են «Դերոների» անձնագրերի պատճենների միջոցով, և այդ «Դերոները» տեղյակ չեն եղել, որ իրենք նվիրատվություն են անում ՔՊ-ին։ Հետևապես, նվիրաբերված միլիոնավոր դրամների ծագման աղբյուրը հայտնի չէ։ Չնայած դրան՝ ՀՀ գլխավոր դատախազությունը և ՆԳՆ ոստիկանությունը հանցանքի և զանցանքի հատկանիշներ այդ գործողություններում չի հայտնաբերել։  

Ըստ Փաշինյանի՝ արտաքին ուժեր կային, որոնք նաև դրդում էին ԼՂ-ում էթնիկ զտումները կազմակերպող հիմնական ուժին և նրանց աջակցում, որ Լեռնային Ղարաբաղի հայերը րոպե առաջ դուրս գան։ «Ի՞նչի համար, որովհետև հայտարարել էին Հայաստանում իշխանափոխության մեկնարկի մասին և տեսնում էին, որ Հայաստանում իրենց ռեսուրսները չեն հերիքում հեղափոխություն անելու համար և նրանց հարկավոր էր թեկուզ Ղարաբաղի գնով ռեսուրս բերել Հայաստան, որպեսզի այստեղ հեղափոխություն տեղի ունենա։ Եվ միջին վիճակագրական լրահոսի ընթերցողը սա կտեսներ և չի կարող չտեսնել մինչև օրս։ Եվ այդ նկրտումները շարունակվում են։ Չստացվեց՝ էլի կփորձենք»,- եզրափակեց Փաշինյանը։ 2023 թվականի սեպտեմբերին այդ նույն արտաքին ուժերը ուզում էին Հայաստանի հարցն էլ լուծել, ու փակվի ամբողջը։|armenpress.am|

Փաշինյանը չբացառեց, որ դելիմիտացիայի գործընթացը կարող է սկսվել Տավուշի մարզից։ Պատասխանելով Տավուշից գյուղեր «հանձնել-չհանձնելու մասին» հարցին՝ Փաշինյանն ասաց, որ դա անընդունելի ու անհեթեթ խոսակցություն է։ Փաշինյանի խոսքով նախկինում քննարկումներում ֆոն կար, որ հնարավոր է այն ճանապարհներում, որտեղ մի կտոր դե յուրե Հայաստանի գիծը հատում է, նորից մտնում է ՀՀ տարածք, այդ հատվածը ՀՀ-ն պահի, ուրիշ տեղից համարժեք չափով տա․ «Բայց հետագայում ես ինքս եկել եմ եզրակացության, որ չէ, պետք չի էդպես վարվել, որովհետեւ դա ստեղծում ա լրացուցիչ անորոշություններ, եւ պետք ա գնալ, էդ ճանապարհները դուրս ա՞ գալիս ՀԽՍՀ սահմանից, սենց ա՞ մտնում, ոչինչ, մի քիչ կվերակառուցենք այլ կերպ»։ Փաշինյանի խոսքով՝ ինքն այդ հանձնարարականն արդեն տվել է․ «Առաջիկայում պատեհ առիթով կգնամ եւ էս մեր գյուղերի բնակիչներին կբացատրեմ, թե ինչ եմ մտածում եւ ինչու եմ էդպես մտածում»։ ՀՀ վարչապետը նշեց, որ այդպիսի ճանապարհ կա, օրինակ, Ոսկեպար գյուղի հատվածում․ ճանապարհի մի կտոր դե յուրե Հայաստանի գիծը հատում է, նորից մտնում է ՀՀ տարածք։

Արշակ Կարապետյանին ԳՇ պետի տեղակալ և պաշտպանության նախարար նշանակելու հարցում հնարավոր է ամենևին էլ անտեսված չի եղել նրա «հատուկ ու մոտ» հարաբերությունները ՌԴ մի շարք անձանց և շրջանակների հետ: Այս մասին ասաց Փաշինյանը՝ անդրադառնալով քննարկումներին, թե «Փաշինյանը Կրեմլի ցուցումով պաշտոնի է նշանակել Արշակ Կարապետյանին»: Փաշինյանը նաև մանրամասնեց, թե ինչու է որոշում կայացրել Արշակ Կարապետյանին ազատել պաշտոնից․ «2021-ի նոյեմբերի 14-ի առավոտյան Արշակ Կարապետյանն ինձ զեկուցել է, որ սահմանի երկայնքով ամեն ինչ հանգիստ է և հանդարտ, մինչդեռ իր զեկուցման պահին մեր սահմանի մի շարք տեղամասերում ադրբեջանական զորքերը ներխուժած են եղել ՀՀ տարածք և նույնիսկ դիրքեր են վերցրած եղել: Արշակ Կարապետյանը, լինելով պաշտպանության նախարար (երկու տարբերակ կա), կա՛մ դրա մասին տեղյակ չի եղել, կա՛մ, տեղյակ լինելով, ինձ չի զեկուցել: Նման իրավիճակներում ես որևէ մեկին նույնիսկ կես ժամ չեմ հանդուրժի այդ պաշտոնում: Սա է ամբողջ պատմությունը»։

Բռնի տեղահանված անձանց 40+10 հազարական դրամով աջակցության ծրագիրը շարունակվելու է առնվազն մինչեւ տարվա վերջ։ Այս մասին ասաց Նիկոլ Փաշինյանը։ Փաշինյանը, անդրադարձավ նաև բնակարանային ապահովման ծրագրին՝ նշելով՝ բնակարանների համար տրամադրվող 3 մլն դրամը դիտարկում են որպես բազային չափ, որի վրա կարող են լինել եւ ըստ ամենայնի կլինեն գործակիցներ․ «Ըդն որում դրանք կարող են տարբեր լինել՝ այդ թվում ընտանիքի բազմազավակության հետ կապված, զոհվածի ընտանիք լինելու հետ կապված, բայց կարող են կապվել նաեւ կոնկրետ բնակավայրերի հետ»։

Ճշմարտությունն այն է, որ Էդմոն Մարուքյանի՝ [աշխատանքից] դուրս գալու պատճառը այն է, որ ես դժգոհ եմ եղել իր աշխատանքից, ինքն էլ դրա մասին գիտի, ասել եմ իրեն: Այս մասին ասաց Նիկոլ Փաշինյանը։ Նիկոլ Փաշինյանը նշեց՝ վերջին հանդիպման ժամանակ Մարուքյանն ասել է, թե Փաշինյանը մի հայտարարություն է արել ու մեջբերել է այն, ասել` խնդրահարույց է համարում: «Ասացի` բացառված է, գնացեք, այդ հայտարարությունն ուղարկեք ինձ՝ վիդեոյով, ասաց` հա, հղում չստացա, ստացա ինչ-որ տեքստ»,- նշեց վարչապետը՝ նշելով՝ երկար ժամանակ Էդմոն Մարուքյանին հանձնարարականներ չի տվել, ուղիղ չի աշխատել նրա հետ, աշխատել է միջնորդավորված: |aysor.am|

[ԵՄ խորհրդի նախագահի հայտարարությունից] հետո մենք ավելի մանրամասն դիտարկեցինք և տեսանք, որ հանրագիտարանում ուրիշ թվեր էլ կան։ Տիտղոսին գրված է 29 800, պարզվեց՝ դա կլորացված թիվ է, տեքստի մեջ կա ուրիշ թիվ 29 743 քառ․ կմ։ Հետո այդ թվում ադրբեջանական կողմը մեր ուշադրությունը հրավիրեց այն փաստի վրա, որ ՀՀ պետական մարմինների կայքերում (ես ստուգել եմ՝ այդ տվյալը այնտեղ եղել է տասնյակ տարիներ), ՀՀ տարածք նշված է 29 743 քառ․ կմ (Փաշինյանը հստակ չէր հիշում թիվը, դրա համար նշեց, որ 29 800 քառ․ կմ-ից պակաս թիվ էր նշված՝ խմբ․)։ Հետո պարզվել է, որ երբ ՀՀ կառավարությունը իր հողային հաշվեկշիռը ժամանակ առ ժամանակ հաստատում է, այնտեղ էլ գրված է մյուս թիվը, որի նկատմամբ 29 800 քառ․ կմ-ը կլորացրած թիվ է: Եվ նույնը վերաբերում է Ադրբեջանին, որովհետև կա տիտղոսային թիվ, և կա ավելի պարզաբանված թիվ։ [Նիկոլ Փաշինյան]

ՀՀ կենտրոնական բանկի խորհրդի նիստի ժամանակ որոշվել է իջեցնել վերաֆինանսավորման տոկոսադրույքը 0.25 տոկոսային կետով՝ սահմանելով 8.50%։

Փաշինյանը չի բացառում, որ խաղաղության պայմանագրի տեքստի շուրջ համաձայնության գալուց և ստորագրման փուլից հետո երկուստեք կարող են հրաժարվել միջազգային ատյաններում գանգատներից։ «Մեր դիրքորոշումը հետևյալն է․ դա մի հարց է, որը կարող է քննարկվել ամենավերջում, երբ ըստ էության խաղաղության պայամանագրի դրույթներն արդեն իսկ համաձայնեցված կլինեն, և արդեն ակհայտ կլինի, որ երկու կողմերը պատրաստ են դրանք ստորագրել»,- ասաց նա։