«Զինվորներն են իրենց գումարով հաճախ զինվորական մեքենաները նորոգում. վթարից տուժածի մայր» վերտառությամբ հրապարակման վերաբերյալ ՊՆ-ն հայտնում է, որ ՊՆ հաշվեկշռում առկա և ԶՈՒ կարիքների համար շահագործվող բոլոր տեսակի մեքենաների տեխնիկական սպասարկման, վերանորոգման և բոլոր այլ ծախսերը բացառապես հոգում է ՊՆ-ն, և նախարարության՝ այդ նպատակով հատկացրած միջոցները լիովին բավարար են: Այդուհանդերձ, ՊՆ համապատասխան ստորաբաժանումները հրապարակման մեջ տեղ գտած հայտարարությունների առնչությամբ կանցկացնեն ծառայողական քննություն, ինչպես նաև կկատարեն անհրաժեշտ ուսումնասիրություններ:

ՀՀ էկոնոմիկայի նախկին նախարար Վահան Քերոբյանի նկատմամբ տնային կալանքը երկարաձգվել է ևս երկու ամսով։ Այս մասին հայտնում է Քերոբյանի պաշտպան Տիգրան Եգորյանը։

Այսօր՝ ժամը 17:10-ին, Երևանից 8 կմ հյուսիս-արևելք, օջախի 10 կմ խորությամբ, 1․9 մագնիտուդով երկրաշարժ է գրանցվել։ Էպիկենտրոնային գոտում ստորգետնյա ցնցման ուժգնությունը կազմել է 2-3 բալ։ Երկրաշարժը զգացվել է Երևանում, Գառնի և Ձորաղբյուր գյուղերում 2-3 բալ ուժգնությամբ։

ԱՄՆ պետքարտուղար Էնթոնի Բլինքենը Մերձավոր Արևելքում առկա իրավիճակը քննարկել է Չինաստանի, Սաուդյան Արաբիայի և Թուրքիայի ԱԳ նախարարների հետ։ Պետքարտուղարության խոսնակը հայտնել է, որ բանակցությունների նպատակը հստակ հասկացնելն է, որ Մերձավոր Արևելքում էսկալացիան չի բխում ոչ մեկի շահերից, և որ այդ երկրները պետք է Իրանին կոչ անեն չտանել տարածաշրջանում իրավիճակի էսկալացիայի։ |hetq.am|

Իրանի ու Իսրայելի միջև լարվածության ֆոնին ԻՀՊԿ-ն իսրայելցի գործարարի ընկերությանը պատկանող, Պորտուգալիայի դրոշով նավ է առգրավել այսօր Հորմուզի նեղուցի մոտ։ Այդ մասին հայտնել է Իրանի պետական IRNA գործակալությունը։ Իսրայելի արտգործնախարար Իսրայել Կացը հայտարարել է, որ Իրանը «ծովահենական գործունեություն» է իրականացնում։

Ադրբեջանի և Բելառուսի ԱԳ նախարարները Մինսկում կայացած հանդիպման ժամանակ քննարկել են բելառուսական կողմի հնարավոր ներդրումը Լեռնային Ղարաբաղում վերականգնողական աշխատանքներին: Այդ մասին հայտնում է Ադրբեջանի ԱԳՆ-ն։

Իսրայելի ՊԲ-ն հարվածներ է հասցրել Լիբանանի հարավում գտնվող Ռիհան շրջանում «Հեզբոլլահ»-ի խոշոր համալիրին: Այդ մասին հայտնում է Իսրայելի ՊԲ-ն՝ նշելով, որ համալիրը ներառում էր մի քանի շենք և ռազմական կետ:

Մենք շարունակում ենք զարգացնել փոխգործակցությունը մեր տնտեսական համագործակցության շրջանակներում՝ ձգտելով կանխել ԵԱՏՄ-ն քաղաքականացնելու ցանկացած փորձերը: ԵԱՏՄ-ն և նրա տնտեսական սկզբունքները չպետք է փոխկապակցվեն քաղաքական հավակնությունների հետ: Առևտրի և ինտեգրման հիմնական ազատությունները չեն կարող և չպետք է սահմանափակվեն քաղաքական նկատառումներով, ինչը կհանգեցնի միավորման հիմնարար սկզբունքների կորոզիայի: Այս մասին ասել է Նիկոլ Փաշինյանը Ղազախստանի Egemen Qazaqstan և Казахстанская правда թերթերին տված հարցազրույցում։

ՄԻՊ Անահիտ Մանասյանն ու աշխատակազմի ներկայացուցիչները Տավուշի մարզում հանդիպումներ են ունեցել Մովսես, Ներքին Կարմիրաղբյուր, Բերքաբեր, Ոսկեպար, Ոսկեվան, Կիրանց բնակավայրերի բնակիչների և վարչական ղեկավարների հետ։ Պաշտպանը հատուկ ընդգծում է, որ բոլոր գործընթացներում պետության անվտանգության երաշխավորման հետ մեկտեղ պետք է առաջնային լինեն մարդու իրավունքների նկատմամբ հարգանքի երաշխավորմումն ու մարդու իրավունքների գերակայության հիմնարար սկզբունքը։

ԱՄՆ նախագահ Ջո Բայդենն էլ Իրանին հորդորել է չհարձակվել Իսրայելի վրա․ «Մենք կաջակցենք Իսրայելին, կօգնենք, որ Իսրայելը պաշտպանվի։ Իսկ Իրանը հաջողության չի հասնի»։