Եվրախորհրդարանի որոշման մեջ եթե կա մի կետ, որը գործնական նշանակություն ունի մեզ համար, դա 14-րդ կետն է, որը կոչ է անում Ադրբեջանին նստել բանակցությունների արցախահայության հետ, նրանց ղեկավարության հետ և միջազգային ներկայությամբ ապահովել նրանց վերադարձի խնդիրը իրենց տները, իրենց հողը։ Ուրեմն մենք սա արհամարհում ենք, մի կողմ ենք դրել, չենք խոսում դրա մասին, ոնց որ դա գոյություն չունի և փորձում ենք այդ փաստաթուղթը թափահարել որպես Հայաստանի ԵՄ-ին անդամակցության վկայական: Չգիտեմ՝ Հայաստանի արտգործնախարարը կարդացե՞լ է այս փաստաթուղթը: Բայց ԱԺ-ում իրեն տրված հարցերից կարծես թե ինքը տեղյակ չի: Այսօր մի հատ շանս կա արցախահայության իրենց տները վերադառնալու հարցը իրականութուն դարձնել: [ՀՀ նախկին արտգործնախարար Վարդան Օսկանյան] |tert.am|

Բայդենը Նովրուզի կապակցությամբ Ալիևին ուղղված ուղերձում վերահաստատել է Հայաստանի և Ադրբեջանի միջև խաղաղությանը նպաստելու Վաշինգտոնի հանձնառությունը: «Նաև կաշխատենք Ադրբեջանի հետ՝ լուծելու անվտանգային մարտահրավերները, խթանելու տարածաշրջանում խաղաղությունը: Տնտեսական գործակցության նոր հնարավորություններ կբացահայտենք»,- ասված է ուղերձում։ |1lurer.am|

Ոստիկանությունը բացահայտել է, որ 34-ամյա տղամարդն ու 29-ամյա կինը Տելեգրամի միջոցով ապօրինի ձեռք են բերել և տեղադրման միջոցով իրացրել են թմրամիջոցներ: Տղամարդու անձնական խուզարկությամբ հայտնաբերվել է պոլիէթիլենային տոպրակ, որի մեջ կար կապույտ և կարմիր կպչուն ժապավենի 10 փաթեթ՝ մեթամֆետամինի նմանվող զանգվածով: Ընդհանուր քաշը 9,18 գրամ էր: Կնոջ խուզարկությամբ հայտնաբերվել են տարբեր գույնի կպչուն ժապավենով 114 փաթեթ՝ մեթամֆետամին տեսակի թմրամիջոցի նմանվող զանգվածներով՝ ընդհանուր մոտ 93 գրամ քաշով, մոտ 127 գրամ նույն զանգվածով պոլիէթիլենային տոպրակ, ևս մեկ տոպրակ՝ ավելի քան 4 գրամ քաշով:

Շփումների ընթացքում Մոսկվան Հայաստանի հետ քննարկում է այն հարցը, որ արևմտյան երկրները Երևանին ներքաշում են իրենց հակառուսական կուրսի մեջ։ Մոսկվան զգուշացրել է ռիսկերի մասին․ որոշ փաստարկներ հայկական կողմն ընդունել է։ [ՌԴ ԱԳՆ ներկայացուցիչ Մարիա Զախարովա] |ria.ru|

ՀԱՊԿ-ից Հայաստանի հնարավոր ելքը պետք է հիմնված լինի երկրի իրական կարիքների վրա, այլ ոչ թե Արևմուտքի հետ «սիրախաղի»: Չգիտեմ՝ ինչու են Երևանում քաղաքական գործիչները Հայաստանի քաղաքացիներին պարտադրում ՀԱՊԿ-ի բացասական դերի մասին կարծիք։ Ինձ թվում է, որ դա չի առնչվում Հայաստանի իսկական սկզբնական և ազգային շահերին: [ՌԴ ԱԳՆ ներկայացուցիչ Մարիա Զախարովա] |azatutyun.am|

Ջրականի 5-րդ ուսումնական գումարտակի հրամանատար Իշխան Վահանյանի վերաբերյալ քրեական գործով գրեթե 2 տարվա ընթացքում հարցաքննվեց 40 վկա, 14 տուժող եւ տուժողի 15 իրավահաջորդ։ Դատարանը, դատավոր Ջոն Հայրապետյանի նախագահությամբ, այսօր ավարտեց դատակոչի ցուցակում ներառված անձանց հարցաքննության փուլը։ Նրանցից մի քանիսը, սակայն, հարցաքննությունների ողջ ընթացքում դատարան այդպես էլ չներկայացան։ Պատճառները տարբեր են։ Ոմանք մահացել են, ոմանք վատառողջ են, ոմանք գտնվում են Հայաստանից դուրս, ոմանք էլ 2023 թ․ սեպտեմբերին Արցախից Հայաստան բռնի տեղահանումից հետո գտնել չի հաջողվել․ նրանք այլեւս չեն բնակվում այն հասցեներում, որ Միգրացիայի եւ քաղաքացիության ծառայությունն է դատարանին տրամադրել, դատարանի կողմից ոստիկանություն ուղարկված գրությունների հիման վրա եւս նրանց հնարավոր չի եղել հայտնաբերել։ Դատարանը որոշեց հրապարակել եւ հիմք ընդունել նրանց նախաքննական ցուցմունքները։

ՆԱՏՕ-ի գլխավոր քարտուղար Ենս Ստոլտենբերգը կժամանի Հայաստան։ Տեղեկությունը «Լուրերին» հաստատել է ՀՀ ԱԳՆ մամուլի քարտուղար Անի Բադալյանը:Այցը տեղի կունենա մարտի 19-ին: |1lurer.am|

Ադրբեջանի և Իրանի նախագահները մտադիր են հանդիպել Խուդաֆերինի կամրջի տարածքում, Baku.tv-ին տված հարցազրույցում ասել է Ադրբեջանում Իրանի դեսպան Սեյիդ Աբբաս Մուսավին։ Իրանցի դիվանագետի խոսքով՝ Իլհամ Ալիևի և Էբրահիմ Ռայիսիի մասնակցությամբ տեղի կունենա Խուդաֆերին և Գիզ Գալասի հիդրոէլեկտրակայանների բացման հանդիսավոր արարողությունը։ |azatutyun.am|

ԵՄ խորհրդի նախագահ Շառլ Միշելը շնորհավորել է Վլադիմիր Պուտինին այսօր մեկնարկած ընտրություններում «ջախջախիչ հաղթանակի» կապակցությամբ։ «Չկա ընդդիմություն, չկա ազատություն, չկա ընտրություն»,- հավելել է Միշելը X-ի իր միկրոբլոգում։

Շիրակի մարզպետարանի երկու պաշտոնյա է այսօր ձերբակալվել․ նրանց կաշառք ստանալու մեղադրանք է առաջադրվել։ «Ազատության»-ը հայտնել են Հակակոռուպցիոն կոմիտեից։ Ձերբակալվածներից մեկը Շիրակի մարզպետարանի քաղաքաշինության վարչության պետ Խաչատուր Խնձրցյանն է, մյուսը՝ նույն վարչության աշխատակից։