Հայաստանի արտգործնախարարությունը X-ի էջում դատապարտել է Թուրքիայում կատարված ահաբեկչությունը: «Անկարայում այսօր տեղի ունեցած հարձակումը ցույց տվեց, որ ահաբեկչությունն ու անմեղ մարդկանց վնասելն արդարացում չունեն։ Հայաստանը, ինչպես բազմիցս ասվել է, դեմ է ահաբեկչության ցանկացած ձևին ու բռնության նմանատիպ գործողություններին»,- գրված է հայտարարության մեջ։

2020 թվականի 44-օրյա պատերազմի ընթացքում ու դրանից հետո պատերազմին առնչվող հազարավոր քրեական գործեր են հարուցվել (ըստ գործող Քրեական օրենսգրքի՝ նախաձեռնվել վարույթներ)։ Դրանք վերաբերում են ինչպես ադրբեջանական զինված ուժերի կողմից կատարված ռազմական հանցագործություններին, այնպես էլ հայկական զինված ուժերի ստորաբաժանումների հրամանատարների հրաման չկատարելուն, դասալքությանը եւ այլն։  2024-ի հոկտեմբերի 1-ի դրությամբ 44-օրյա պատերազմի ընթացքում եւ դրանից հետո 44-օրյա պատերազմին առնչվող դեպքերով հարուցվել են ընդհանուր առմամբ 2044 քրեական գործեր։ Որոշ վարույթներից մասեր են անջատվել եւ քննվել առանձին, իսկ որոշներն էլ միրավորվել են մեկ վարույթում։ «Ինֆոքոմը» ՀՀ գլխավոր դատախազությունից տեղեկացել է, որ հարուցված քրեական գործերից դեռեւս միայն 310-ն են ուղարկվել դատարան, իսկ 169-ով նախաքննությունը շարունակվում է։ 

2023 թվականին Պետական եկամուտների կոմիտեի 77 աշխատակիցներ ստացել են մոտ 478 մլն դրամի 109 նվիրատվություն։ «Ինֆոքոմը» կարողացել է նույնականացնել 109 նվիրատուներից 76-ին և գտել նրանց կապը պաշտոնյաների հետ։ ՊԵԿ որոշ պաշտոնյաներ նվիրատվություններ են ստացել վերջին երկու կամ երեք տարին անընդմեջ։ Կոռուպցիայի կանխարգելման հանձնաժողովը, սակայն, նշված անձանց հայտարարագրերի ստուգում և վերլուծություն չի իրականացրել՝ պայմանավորված ռիսկային չափորոշիչ սահմանելու և դրա հիման վրա պետական պաշտոնների ցանկը հաստատելու մասին որոշումներում այս պաշտոնների բացակայությամբ։

ՌԴ ԱԳՆ պաշտոնական ներկայացուցիչ Մարիա Զախարովան անդրադարձել է տարածաշրջանի հաղորդակցությունների ապաշրջափակման հարցին․ «Հայաստանի, Ռուսաստանի Դաշնության և Ադրբեջանի փոխվարչապետների համատեղ նախագահությամբ եռակողմ աշխատանքային խմբի շրջանակում մենք պետք է գտնենք փոխադարձ ընդունելի լուծում, որը հարմար կլինի և՛ Բաքվին, և՛ Երևանին։ Այս ամբողջ ընթացքում մենք ակտիվորեն աշխատել ենք այդ ուղղությամբ և պատրաստ ենք հետագայում աջակցություն ցուցաբերել մեր գործընկերներին։ Ամբողջ տարածաշրջանը կշահի հաղորդակցությունների ապաշրջափակումից։ Տարածաշրջանում տնտեսական և տրանսպորտային միջանցքների ապաշրջափակումը հնարավոր է միայն Ռուսաստանի մասնակցությամբ»,- ասել է Զախարովան։ |1lurer.am|

Թուրքական TUSAŞ ավիաարտադրող ընկերությունում զինված միջադեպ է տեղի ունեցել․ Թուրքիայի ՆԳՆ-ն տեղի ունեցածն աhաբեկչություն է համարել՝ նշելով, որ դրա հետևանքով կան զոհեր և վիրավորներ։ |factor.am|

Փաշինյանը սահմանազատման հանձնաժողովների կանոնակարգի վավերացումը «չափազանց կարևոր իրադարձություն» է համարում։ «Մենք արձանագրել ենք Հայաստանի լեգիտիմ տարածքների սահմանազատման սկզբունքները և դրանք պետք է կյանքի կոչվեն։ Եվ ՀՀ ներսում, և դրսում կլինեն տեսակետներ՝ մեր ռազմավարությունից շեղելու համար, մենք դրանից չենք շեղվելու, բայց լսելու ենք բոլոր փաստարկները»,- հոկտեմբերի 23-ին ԱԺ-կառավարություն հարցուպատասխանի ժամանակ հայտարարել է Փաշինյանը։ Անդրադառնալով Կիրանց-Ոսկեպար հատվածում իրականացված սահմանազատման, Փաշինյանը նշեց՝ «Կիրանցում դպրոց գնալը վերջին 35 տարում ավելի անվտանգ չի եղել, քան այսօր է։ Եվ մենք այս իրադրությունը ուզում ենք ստեղծել ՀՀ բոլոր սահմանամերձ բնակավայրերում»։ |civilnet.am|

Ազգային ժողովը Հայկ Գրիգորյանին ընտրել է Վճռաբեկ դատարանի քրեական պալատի դատավոր։

ԱԺ-ն Վիգեն Քոչարյանին ընտրեց Վճռաբեկ դատարանի քաղաքացիական պալատի դատավոր։

Երևանի ՀԷԿ-ում տեղային, փոքր մասշտաբի հրդեհ է բռնկվել, այս մասին Factor.am-ին հայտնել է ՀԷՑ-ի մամուլի պատասխանատու Նատալյա Սարջանյանը։ «Անվտանգային նկատառումներից ելնելով՝ մեր կողմից անջատում է եղել, որպեսզի հրդեհի հատվածը կարողանանք մարել»,- հավելել է նա։ Այս պահին Երևանի կենտրոնի որոշ հատվածներում շուրջ մեկ ժամ է՝ հոսանք չկա։ |factor.am|

Ալեն Սիմոնյանը հայտնել է, որ պետք է վերանայեն միայն ՔՊ կուսակցության շրջանակում արդարադատության նախարարի թեկնածուներ փնտրելու սկզբունքը: «Մարդկանց ռեսուրսների խնդիր կա բոլոր բնագավառներում, մասնավորապես, եթե մենք խոսում ենք այնպիսի պատասխանատու ոլորտի մասին ինչպիսին է արդարադատությունը: Այստեղ մենք բազմաթիվ խնդիրներ ունենք, նաև հայ-ադրբեջանական խաղաղության պայմանագրի տեսանկյունից ենք նայում. պետք է մասնագետ լինի, որ այդ պայմանագրի հետ առնչություն ունենա»,- ասել է նա՝ պատասխանելով հարցին, թե կադրերի պակաս կա՞, թե՞ ոչ: |tert.am|